1-2. Ano nga mga problema an naieksperyensyahan han damu nga Saksi?

GINDASIG ni apostol Pablo hi Timoteo nga bug-os nga tumanon an iya ministeryo, ngan aplikado liwat ito ha ngatanan nga Kristiano. (2 Tim. 4:5) Ginsiseryoso naton ngatanan ito nga sagdon ni Pablo. Pero usahay makuri an pagbuhat hito. Damu han aton kabugtoan an nagkikinahanglan hin kaisog basi makagsangyaw. (2 Tim. 4:2) Pananglitan, hunahunaa an aton kabugtoan nga nag-uukoy ha mga nasud nga may restriksyon an aton buruhaton o igindidiri pa ngani. Nagsasangyaw hira bisan kon mahimo hira mapriso!

² An katawohan ni Jehova nakakaeksperyensya hin iba-iba nga problema nga nakakapaluya ha ira. Pananglitan, damu an kinahanglan maniguro pagtrabaho basi la maitagana an mga panginahanglan han ira pamilya. Karuyag unta nira mas makigbahin pa ha ministeryo, pero kapoy na gud hira ha kataposan han semana. An iba gutiay na la an nahihimo tungod han ira maiha na nga sakit o pagtikalagas. Bangin diri na ngani hira nakakagawas ha ira balay. An iba naman padayon nga naabat hin kawaray-pulos. Hi Mary, * nga usa nga sister nga taga-Middle East, nagsiring: “Kinahanglan ko gud mangalimbasog nga atohan an akon negatibo nga mga pagbati nga nakakapaluya ha akon ha emosyon. Nakukonsensya ako tungod kay nauubos hito an akon panahon ngan kusog nga para unta ha akon ministeryo.”

3. Ano an aton hihisgotan hini nga artikulo?

³ Anoman an aton kahimtang, tatagan kita ni Jehova hin kusog basi makaya an aton mga problema ngan padayon nga makag-alagad ha iya tubtob han aton mahihimo. Antes naton hisgotan kon paonan-o kita ginbubuligan ni Jehova, aton usisahon kon paonan-o niya ginpakusog hira Pablo ngan Timoteo basi matuman an ira ministeryo bisan pa han mga problema.

4. Ano nga mga problema an gin-atubang ni Pablo?

⁴ Hi Pablo inatubang hin damu nga problema. Labi nga ginkinahanglan niya an kusog han ginkastigo hiya, ginbato, ngan ginpriso. (2 Cor. 11:23-25) Gin-amin liwat ni Pablo nga usahay naabat hiya hin negatibo nga mga pagbati ngan kinahanglan niya ito atohan. (Roma 7:18, 19, 24) May-ada liwat hiya problema ha kahimsog nga sugad “hin tunok ha unod,” ngan karuyag gud niya nga kuhaon ito han Dios.​—2 Cor. 12:7, 8.

5. Ano an mga nahimo ni Pablo bisan pa han iya mga problema?

⁵ Ginpakusog ni Jehova hi Pablo basi matuman an iya ministeryo bisan pa han iya mga problema. Tagda an mga nahimo ni Pablo. Pananglitan, samtang priso hiya ha usa nga balay ha Roma, madasigon nga gindepensahan niya an maopay nga sumat ha atubangan han Judio nga mga lider ngan posible pati ha atubangan han mga opisyal han gobyerno. (Buh. 28:17; Fil. 4:21, 22) Nagsangyaw liwat hiya ha damu nga Pretoriano nga Gwardya, pati ha ngatanan nga nabisita ha iya. (Buh. 28:30, 31; Fil. 1:13) Hito gihap nga panahon, naghimo hi Pablo hin giniyahan nga mga surat nga napapahimulosan han tinuod nga mga Kristiano tubtob yana. Dugang pa, an ehemplo ni Pablo nagparig-on ha kongregasyon ha Roma, nga tungod hito an iya kabugtoan nagkaada “dugang nga kaisog ha pagyakan han pulong han Dios hin waray kahadlok.” (Fil. 1:14) Bisan kon usahay limitado an nahihimo ni Pablo, ginhimo niya an bug-os niya nga makakaya ngan “nagresulta gud [ito] ha pag-uswag han maopay nga sumat.”​—Fil. 1:12.

6. Sumala ha 2 Corinto 12:9, 10, ano an nakabulig kan Pablo basi matuman an iya ministeryo?

⁶ Maaram hi Pablo nga an ngatanan niya nga ginbuhat ha pag-alagad kan Jehova, nahimo niya diri tungod han iya kusog kondi tungod han kusog han Dios. Nagsiring hiya nga an gahum han Dios “nagigin perpekto ha maluya.” (Basaha an 2 Corinto 12:9, 10.) Pinaagi han iya baraan nga espiritu, gintagan ni Jehova hi Pablo hin gahum basi matuman hin bug-os an iya ministeryo​—bisan pa han pagtimaraot, kapriso, ngan iba pa nga problema nga iya gin-atubang.

7. Ano nga mga problema an kinahanglan malamposan ni Timoteo basi matuman niya an iya ministeryo?

⁷ Hi Timoteo, nga usa nga batan-on nga kaupod ni Pablo, kinahanglan liwat sumarig ha gahum han Dios basi matuman an iya ministeryo. Inupod hi Timoteo kan Pablo ha hirayo nga  mga pagbiyahe sugad nga misyonero. Iginpadara liwat hiya ni Pablo basi bisitahon ngan parig-unon an mga kongregasyon. (1 Cor. 4:17) Bangin inabat ni Timoteo nga diri hiya kwalipikado hito. Posible nga ito an rason kon kay ano nga ginsagdonan hiya ni Pablo: “Ayaw gud pabay-i nga minuson han bisan hin-o an imo pagin batan-on.” (1 Tim. 4:12) Hito liwat nga panahon, hi Timoteo may-ada tunok ha unod​—an iya “agsob nga pagkasakit.” (1 Tim. 5:23) Pero maaram hiya nga an gamhanan nga baraan nga espiritu ni Jehova magpapakusog ha iya basi maisangyaw niya an maopay nga sumat ngan makagserbi hiya ha iya kabugtoan.​—2 Tim. 1:7.

8. Paonan-o ginpapakusog ni Jehova an iya katawohan yana?

⁸ Yana, gintatagan ni Jehova an iya katawohan han “diri ordinaryo nga gahum” basi padayon hira nga makag-alagad ha iya hin matinumanon. (2 Cor. 4:7) Hisgotan naton an upat nga probisyon nga iginhahatag ni Jehova basi pakusgon ngan buligan kita nga makapabilin nga matinumanon ha iya: pag-ampo, Biblia, pakig-upod ha kabugtoan, ngan an aton ministeryo.

9. Paonan-o makakabulig ha aton an pag-ampo?

⁹ Napapakusog pinaagi han pag-ampo. Ha Efeso 6:18, gindadasig kita ni Pablo nga mag-ampo ha Dios “ha tagsa nga higayon.” Sugad nga baton han aton mga pag-ampo, pakukusgon kita han Dios. Inabat ni Jonnie, nga taga-Bolivia, an bulig ni Jehova han nakaeksperyensya hiya hin sunod-sunod nga problema. An iya asawa ngan an iya mga kag-anak durungan nga nagkasakit hin grabe. Nakurian gud hi Jonnie ha pag-asikaso han ira mga panginahanglan. Namatay an iya nanay, ngan nag-iha makarekober an iya asawa ngan an iya tatay ha ira sakit. Mahitungod hiton makuri nga panahon, hi Jonnie nagsiring, “Kon nababaraka gud ako, pirme nakakabulig ha akon an pagin espisipiko ha akon mga pag-ampo.” Ginpakusog ni Jehova hi Jonnie basi makapailob. Hi Ronald, nga tigurang ha Bolivia, nahibaro nga may kanser an iya nanay. Paglabay hin usa ka bulan, namatay an iya nanay. Ano an nakabulig ha iya nga makaya iton makuri nga panahon? Hiya nagsiring: “Kon nag-aampo ako kan Jehova, iginsusumat ko ha iya an ngatanan nga akon inaabat. Maaram ako nga mas nasasabtan niya ako kay han bisan hin-o, bisan pa ngani han akon mismo kalugaringon.” Usahay, bangin naabat kita nga diri na naton kaya an aton mga problema ngan diri kita maaram han aton ig-aampo. Pero gin-aaghat kita ni Jehova nga mag-ampo ha iya bisan kon nakukurian kita nga ipahayag an aton mga ginhuhunahuna ngan inaabat.​—Roma 8:26, 27.

10. Sumala ha Hebreo 4:12, kay ano nga importante gud an pagbasa han Biblia ngan an pagpamalandong hito?

¹⁰ Napapakusog pinaagi han Biblia. Sugad la nga sinarig hi Pablo ha Kasuratan para han kusog ngan pagliaw, kinahanglan liwat sumarig kita hito. (Roma 15:4) Samtang ginbabasa naton an Pulong han Dios ngan ginpapamalandong ito, mahimo gamiton ni Jehova an iya espiritu basi buligan kita nga mas masabtan kon paonan-o maiaaplikar ha aton sitwasyon an aton mga nababasa. (Basaha an Hebreo 4:12.) Hi Ronald, nga gin-unabi kanina, nagsiring: “Maopay na gud la kay nangalimbasog ako nga basahon kada gab-i an Biblia. Ginpapamalandong ko gud an mga kalidad ni Jehova ngan an iya mahigugmaon nga pag-ataman ha iya mga surugoon. Nagpapakusog gud ini ha akon.”

11. Paonan-o napakusog han Biblia an usa nga nasusubo gud nga sister?

¹¹ Mahimo kita magkaada husto nga disposisyon mahitungod ha aton kahimtang kon papamalandungon naton an Pulong han Dios. Tagda kon paonan-o nakabulig an Biblia ha usa nga  nasusubo gud nga balo. Ginsidngan hiya han usa nga tigurang nga may mahibabaroan hiya nga mapulsanon nga mga leksyon kon babasahon niya an libro han Job. Han ginbasa niya ito, an iya dayon nakita an sayop nga panhunahuna ni Job. Ha iya hunahuna, nagsiring hiya: “Job! Ayaw pagin sobra kanegatibo!” Pero nasantop niya nga an iya disposisyon sugad na ngay-an han kan Job. Nakabulig ini ha iya nga mabag-o an iya panhunahuna ngan magkaada kusog nga makaya an kasakit nga iya inaabat tungod ha kamatay han iya bana.

12. Paonan-o kita ginpapakusog ni Jehova pinaagi han aton kabugtoan?

¹² Napapakusog pinaagi ha pakig-upod ha kabugtoan. Usa pa nga paagi nga ginagamit ni Jehova ha pagpakusog ha mga Kristiano amo an aton kabugtoan. Hi Pablo nagsurat nga naghihingyap hiya nga “magdinasigay” hira han iya Kristiano nga kabugtoan. (Roma 1:11, 12) Ginpapabilhan gud ni Mary, nga gin-unabi kanina, an sugad nga pakig-upod. Hiya nagsiring: “Ginagamit ni Jehova an kabugtoan nga diri ngani maaram han akon mga problema. May ginsisiring hira nga nakakadasig ha akon o nagpapadara hira hin kard, ngan ito gud an akon ginkikinahanglan. Nakakabulig liwat an pakiistorya ha mga sister nga may mga problema nga pariho han akon ngan nahibabaro ako tikang ha ira mga eksperyensya. Ngan pirme iginpapaabat han mga tigurang nga importante ako ha kongregasyon.”

13. Paonan-o naton mapaparig-on an usa kag usa ha mga katirok ha kongregasyon?

¹³ Usa han pinakamaopay nga lugar nga madadasig naton an usa kag usa amo an ha mga katirok ha kongregasyon. Kon natambong kita, kay ano nga diri mag-una ha pagparig-on ha iba pinaagi han sinsero nga pagpahayag han aton gugma ngan apresasyon ha ira? Pananglitan, antes magtikang an usa nga katirok, an tigurang nga hi Peter nagsiring ha usa nga sister nga diri Saksi an asawa: “Napaparig-on gud kami han imo presensya. Pirme mo gin-aasikaso an imo unom nga anak basi makatambong ngan may igin-andam hira nga komento.” Nabantad gud hiya hito ngan nahingangatangis nga nagsiring, “Ito gud an akon kinahanglan mabatian yana.”

14. Paonan-o nabulig ha aton an pakigbahin ha ministeryo?

¹⁴ Napapakusog pinaagi han ministeryo. Kon iginsusumat naton ha iba an mga kamatuoran ha Biblia, narirepreskohan kita ngan napaparig-on, kumarawat man hira o diri. (Prob. 11:25) Naeksperyensyahan han sister nga hi Stacy nga nagpapakusog gud an pagministeryo. Han may kapamilya hiya nga ginpaiwas ha kongregasyon, nasubo gud hiya ngan padayon nga ginpapakianhan niya an iya kalugaringon, ‘May dugang pa ba unta ako nga ginhimo basi mabuligan hiya?’ Diri mapugngan ni Stacy nga paghinunahunaon ito nga problema. Ano an nakabulig ha iya nga makaya iton makasurubo nga kahimtang? An ministeryo! Kon nagsasangyaw hiya, nagpupokus hiya ha mga tawo ha teritoryo nga nagkikinahanglan han iya bulig. Hiya nagsiring: “Hito nga panahon, gintagan ako ni Jehova hin Bible study nga madagmit nga nag-uswag. Nakadasig gud ito ha akon. Daku gud nga bulig ha akon an ministeryo.”

15. Ano an imo mahibabaroan ha mga ginsiring ni Mary?

¹⁵ Tungod han mga kahimtang, inaabat han iba nga gutiay la an ira nahihimo ha ministeryo. Kon ito an imo inaabat, hinumdumi nga nalilipay hi Jehova kon ginhihimo mo an imo pinakamaopay. Tagda utro an ehemplo ni Mary. Han binalhin hiya ha usa nga lugar nga iba an yinaknan, inabat niya nga limitado gud la an iya nahihimo. Hiya nagsiring, “May panahon nga an akon la nahihimo amo an paghatag hin simple nga komento o pagbasa hin teksto o paghatag hin tract ha pagsangyaw.” Tungod hito, inabat niya nga gutiay gud la an iya nahihimo kon ikukompara hadton maaram gud hito nga yinaknan.  Pero ginbag-o niya an iya panhunahuna. Nasantop niya nga mahimo hiya gamiton ni Jehova bisan kon limitado an iya mga abilidad. Hiya nagsiring, “Simple gud la an mga kamatuoran nga nagtatalwas han kinabuhi, ngan ito nga mga kamatuoran an nakakagbag-o han kinabuhi han mga tawo.”

16. Ano an makakabulig ha kabugtoan nga diri na nakakagawas ha balay basi magkaada hin kusog?

¹⁶ Nakikita ngan gin-aapresyar ni Jehova an aton hingyap nga makigbahin ha ministeryo bisan kon diri na kita nakakagawas ha aton balay. Mahimo kita niya buligan nga makagsangyaw ha mga nag-aataman ha aton o ha mga doktor ngan nars. Kon iginkukompara naton an aton mga nahihimo yana ha aton mga nahihimo hadto, bangin masubo kita. Pero kon nasasabtan naton kon paonan-o kita ginbubuligan ni Jehova yana, magkakaada kita kusog basi makapailob ha bisan ano nga problema ngan makapabilin nga malipayon.

17. Sumala ha Eclesiastes 11:6, kay ano nga kinahanglan padayon kita nga magministeryo bisan kon diri dayon naton nakikita an mga resulta hito?

¹⁷ Diri kita maaram kon hain han mga binhi han kamatuoran nga aton igintatanom an maturok ngan matubo. (Basaha an Eclesiastes 11:6.) Pananglitan, hi Barbara, nga usa nga sister nga sobra 80 anyos na, regular nga nagsasangyaw pinaagi ha telepono ngan ha surat. Ha usa niya nga surat, iya ito gin-updan han Ang Bantayan, Marso 1, 2014 nga isyu, nga may artikulo nga “Ang Ginawa ng Diyos Para sa Iyo.” Diri hiya maaram nga naihatag ngay-an niya ito nga surat ha usa nga mag-asawa nga maiha na nga diri Saksi ni Jehova. Pauroutro nga ginbasa han mag-asawa ito nga magasin. Inabat han bana nga sugad hin hi Jehova mismo an nakikiistorya ha iya. An mag-asawa nagtikang tumambong ha mga katirok ngan ha urhi nagin aktibo utro nga mga Saksi​—katapos hin sobra 27 ka tuig. Hunahunaa la kon paonan-o nadasig ngan naparig-on hi Barbara nga makita an mag-opay nga resulta tungod hito nga surat!

18. Ano an kinahanglan naton buhaton basi makapahimulos tikang ha gahum han Dios?

¹⁸ Naghahatag ha aton hi Jehova hin damu nga oportunidad basi makarawat an iya hura nga gahum. Kon ginagamit naton an iya mga probisyon​—sugad han pag-ampo, Biblia, pakig-upod ha kabugtoan, ngan han ministeryo​—iginpapakita naton nga nasarig kita nga kaya kita buligan ni Jehova ngan karuyag gud niya nga buhaton ito. Salit pirme kita sumarig ha aton langitnon nga Amay nga nalilipay ha ‘pagpakita han iya kusog para hadton bug-os an kasingkasing ngadto ha iya.’​—2 Cron. 16:9.