1-2. Ano an ginsiring han usa nga parasurat, ngan ano an aton hihisgotan hini nga artikulo?

YANA, minilyon nga tawo an nasiring nga natoo hira kan Jesus, pero diri nira ginkakarawat an iya mga igintutdo. (2 Tim. 4:3, 4) Ha pagkamatuod, usa nga parasurat an nagsiring: “Kon may iba nga Jesus yana nga magyayakan han mga butang nga ginyakan han tinuod nga Jesus . . . , isasalikway ba naton hiya yana sugad han pagsalikway han mga tawo kan Jesus dos mil ka tuig na an naglabay? . . . An baton: Oo.”

² Han nakanhi hi Jesus ha tuna, damu an nakabati han iya mga igintutdo ngan nakakita han iya mga milagro, pero waray hira tumoo ha iya. Kay ano? Ha nauna nga artikulo, ginhisgotan naton an upat nga rason kon kay ano nga nahipakdol an mga tawo ha mga ginsiring ngan ginbuhat ni Jesus. Hisgotan naton an upat pa nga rason. Hibabaroan liwat naton kon kay ano nga iginsasalikway han mga tawo yana an mga sumurunod ni Jesus ngan kon paonan-o naton malilikyan nga mahipakdol.

3. Ano an ginbuhat ni Jesus nga nakapakdol ha pipira nga tawo?

³ Han nakanhi hi Jesus ha tuna, nakig-upod hiya ha ngatanan nga klase hin tawo. Kinaon hiya upod han mga riko ngan prominente nga mga tawo, pero nakig-upod liwat hiya ha mga pobre ngan mga gintatalumpigos. Dugang pa, mapinairon hiya hadton mga tawo nga ginhuhunahuna han damu sugad nga “magpakasasala.” Tungod han mga ginbuhat ni Jesus, nahipakdol an pipira nga mapahitas-on nga mga tawo. Ginpakianhan nira an mga disipulo ni Jesus: “Kay ano nga nakaon ngan nainom kamo upod han mga parasukot hin buhis ngan han magpakasasala?” Ginbaton ini ni Jesus: “An maghimsog diri nanginginahanglan hin doktor, kondi an mga may sakit. Kinanhi ako basi tawagon, diri an  magtadong nga mga tawo, kondi an magpakasasala basi aghaton hira nga magbasol.”​—Luc. 5:29-32.

4. Sumala kan propeta Isaias, ano unta an dapat laoman han mga Judio mahitungod ha Mesias?

⁴ Ano an ginsisiring han Kasuratan? Maiha pa antes umabot an Mesias, igintagna ni propeta Isaias nga an Mesias diri kakarawaton han kalibotan. An tagna nasiring: “Gintamay hiya ngan ginlikyan han mga tawo . . . Sugad hin igintago tikang ha amon an iya nawong. Gintamay hiya, ngan ginhunahuna namon nga waray hiya pulos.” (Isa. 53:3) An Mesias lilikyan “han mga tawo,” salit dapat unta laoman han mga Judio ha siyahan nga siglo nga isasalikway hi Jesus.

5. Ano an panhunahuna han damu nga tawo yana mahitungod ha mga sumurunod ni Jesus?

⁵ Nahitatabo ba liwat ito yana? Oo. Nalilipay an damu nga lider han relihiyon nga karawaton sugad nga membro han ira kongregasyon an mga tawo nga prominente, riko, ngan ginhuhunahuna hini nga kalibotan nga mga baltok. Ginbubuhat nira ito bisan kon an moralidad ngan an estilo han pagkinabuhi hito nga mga tawo nasupak ha mga suruklan han Dios. Ginmiminos hini nga mga lider han relihiyon an mga surugoon ni Jehova nga madasigon ngan limpyo ha moral tungod kay diri hira mga prominente sumala ha mga suruklan han kalibotan. Sugad han ginsiring ni Pablo, ginpili han Dios adton mga ‘gintatamay.’ (1 Cor. 1:26-29) Pero para kan Jehova, presyoso an ngatanan niya nga matinumanon nga mga surugoon.

6. Paonan-o naton masusubad an disposisyon ni Jesus, sugad han mababasa ha Mateo 11:25, 26?

⁶ Paonan-o naton malilikyan nga mahipakdol? (Basaha an Mateo 11:25, 26.) Ayaw pagpaimpluwensya ha panhunahuna han kalibotan mahitungod ha katawohan han Dios. Akseptara nga mapainubsanon nga mga tawo la an ginagamit ni Jehova basi buhaton an iya kaburut-on. (Sal. 138:6) Ngan pamalandonga kon ano kadamu an iya nahihimo pinaagi ha paggamit ha mga tawo nga ginhuhunahuna han kalibotan nga diri maaramon o diri baltok.

7. Kay ano nga gintawag ni Jesus nga mga hipokrito an mga Pariseo, ngan ano an ira reaksyon?

⁷ Maisugon nga ginkondenar ni Jesus an mga lider han relihiyon ha iya panahon tungod kay diri nira igintututdo ha mga tawo an husto nga pagsingba. Pananglitan, iginbuhayhag niya an pagin hipokrito han mga Pariseo kay mas importante ha ira kon paonan-o maghuhunaw kay ha kon paonan-o aatamanon an ira mga kag-anak. (Mat. 15:1-11) Posible nga nahipausa an mga disipulo ni Jesus ha iya ginsiring. Salit ginpakianhan nira hiya: “Maaram ka ba nga nahipakdol an mga Pariseo han nabatian nira an imo ginsiring?” Hi Jesus binaton: “An tagsa nga tanom nga waray igtanom han akon Amay ha langit gagabuton. Pabay-i hira. Mga buta hira nga paratugway. Salit kon an usa nga buta nagtutugway ha igkasi-buta, hira nga duha mahuhulog ha buho.” (Mat. 15:12-14) Bisan kon nasina kan Jesus an mga lider han relihiyon tungod ha iya mga ginsiring, waray ito makapugong ha iya nga isumat an kamatuoran.

8. Paonan-o iginpakita ni Jesus nga diri ngatanan nga relihiyoso nga gintotoohan ginkakarawat han Dios?

⁸ Iginbuhayhag liwat ni Jesus an buwa nga mga katutdoan han mga relihiyon. Waray hiya magsiring nga an ngatanan nga relihiyoso nga gintotoohan ginkakarawat han Dios. Lugod, nagsiring hiya nga damu an maagi ha hilapad nga dalan nga tipakadto ha kabungkagan, pero diri damu an maagi ha gutiay nga dalan nga tipakadto ha kinabuhi. (Mat. 7:13, 14) Iginpatin-aw niya nga an iba masiring nga nag-aalagad hira ha Dios pero ha pagkatinuod diri. Nagpahamangno hiya: “Pagbantay kamo ha buwa nga mga propeta nga nadaop ha iyo nga nakasul-ot hin barahibo han karnero, pero ha pagkamatuod mga gutom gud hira nga mga lobo. Pinaagi  han ira mga bunga makikilala niyo hira.”​—Mat. 7:15-20.

9. Ano an pipira nga buwa nga relihiyoso nga mga katutdoan nga iginbuhayhag ni Jesus?

⁹ Ano an ginsisiring han Kasuratan? Igintagna han Biblia nga an Mesias mapupuno hin kadasig para ha balay ni Jehova. (Sal. 69:9; Juan 2:14-17) Ito nga kadasig nagpagios kan Jesus nga ibuhayhag an sayop nga relihiyoso nga mga gintotoohan ngan mga buhat. Pananglitan, an mga Pariseo natoo nga imortal an kalag; hi Jesus nagtutdo nga an mga patay nakaturog la. (Juan 11:11) An mga Saduseo nagsiring nga waray pagkabanhaw; ginbanhaw ni Jesus an iya sangkay nga hi Lazaro. (Juan 11:43, 44; Buh. 23:8) An mga Pariseo nagtutdo nga an ngatanan nga nahitatabo o ginbubuhat naton igintanda na nga daan o pagbuot han Dios; hi Jesus nagtutdo nga an mga tawo mahimo magdesisyon kon mag-aalagad ba hira ha Dios o diri.​—Mat. 11:28.

10. Kay ano nga damu an nadiri ha aton tungod han aton mga katutdoan?

¹⁰ Nahitatabo ba liwat ito yana? Oo. Damu an nadiri ha aton tungod kay iginbubuhayhag han aton basado ha Biblia nga mga katutdoan an sayop nga relihiyoso nga mga gintotoohan. Gintututdoan han mga lider han relihiyon an ira mga membro nga ginsisirotan han Dios an maraot nga mga tawo ha impyerno. Ginagamit nira iton sayop nga katutdoan basi kontrolon an mga tawo. Sugad nga mga surugoon ni Jehova, nga nagsisingba ha Dios han gugma, iginbubuhayhag naton iton sayop nga katutdoan. Igintututdo liwat han mga lider han relihiyon nga imortal an kalag. Iginbubuhayhag naton nga pagano an gintikangan hito nga doktrina, nga kon tinuod ito, diri na kinahanglan an pagkabanhaw. Ngan kabaliktaran han igintututdo han damu nga relihiyon nga an ngatanan nga butang pagbuot han Dios ngan igintanda na nga daan, igintututdo naton nga an tawo may kagawasan ha pagbuot ngan makakagdesisyon nga mag-alagad ha Dios. Ano an reaksyon han mga lider han relihiyon? Kaurogan na nga nasisina gud hira!

11. Sumala ha mga pulong ni Jesus ha Juan 8:45-47, ano an ginsusugo han Dios ha iya katawohan?

¹¹ Paonan-o naton malilikyan nga mahipakdol? Kon hinigugma naton an kamatuoran, kinahanglan sundon naton an mga ginsisiring han  Dios. (Basaha an Juan 8:45-47.) Diri pariho kan Satanas nga Yawa, magpapabilin kita ha kamatuoran. Diri gud naton iginkukompromiso an aton mga gintotoohan. (Juan 8:44) Ginsusugo han Dios an iya katawohan nga ‘kangalasan an maraot’ ngan ‘kumupkop ha maopay,’ sugad han ginbuhat ni Jesus.​—Roma 12:9; Heb. 1:9.

12. Kay ano nga damu nga Judio an nagsalikway kan Jesus tungod ha paagi han pagpatay ha iya?

¹² Ano an usa pa nga rason nga ginsalikway han mga Judio hi Jesus ha iya panahon? Hi Pablo nagsiring: “Iginsasangyaw naton nga an Kristo ginpatay ha kahoy, nga ha mga Judio hinungdan ha kahipakdol.” (1 Cor. 1:23) Kay ano nga damu nga Judio an nagsalikway kan Jesus tungod han paagi han pagpatay ha iya? Para ha ira, hi Jesus baga hin kriminal ngan makasasala kay ginpatay hiya ha kahoy, salit waray hira tumoo nga hiya an Mesias.​—Deut. 21:22, 23.

13. Ha ano waray tumoo an mga nagsalikway kan Jesus?

¹³ An mga Judio nga nagsalikway kan Jesus waray tumoo nga inosente hiya, sayop hiya nga gin-akusaran, ngan gintratar hiya hin maraot gud. An mga nagbista kan Jesus waray magpakita hin hustisya. An mga hukom ha korte suprema han mga Judio madagmit nga nagtirirok basi hukman hi Jesus, ngan waray nira sunda an mga balaud ha pagbista. (Luc. 22:54; Juan 18:24) Imbes nga waray dapigan samtang ira ginpapamatian an mga akusasyon ngan ebidensya kontra kan Jesus, an mga hukom mismo namiling hin “buwa nga testimonya kontra kan Jesus basi patayon hiya.” Han napakyas hira, an hitaas nga saserdote nangalimbasog nga bitikon hi Jesus basi masentensyahan nga salaan. Diri gud ito uyon ha legal nga proseso. (Mat. 26:59; Mar. 14:55-64) Ngan kabanhaw ni Jesus, iton diri matadong nga mga hukom nagbayad “hin damu nga silber” ha Romano nga mga sundalo nga nagbabantay ha iya lubnganan basi magpasarang hin buwa nga istorya kon kay ano nga waray sulod an lubnganan.​—Mat. 28:11-15.

14. Ano an igintagna han Kasuratan may kalabotan ha kamatayon han Mesias?

¹⁴ Ano an ginsisiring han Kasuratan? Bisan kon waray laumi han damu nga Judio ha panahon ni Jesus nga an Mesias kinahanglan mamatay, tagda an igintagna han Kasuratan: “Iya iginhatag  an iya kinabuhi tubtob gud ha kamatayon ngan gintagad hiya nga kaupod han mga paratalapas; iya gindara an sala han damu nga tawo, ngan nagin tagapamutnga hiya para ha mga paratalapas.” (Isa. 53:12) Salit waray rason an mga Judio nga isalikway hi Jesus han ginpatay hiya pariho hin makasasala.

15. Ano nga mga akusasyon kontra ha mga Saksi ni Jehova an nagigin hinungdan nga ginsasalikway hira han iba?

¹⁵ Nahitatabo ba liwat ito yana? Oo! Hi Jesus sayop nga gin-akusaran ngan ginsentensyahan nga salaan, ngan ito liwat an naieksperyensyahan han mga Saksi ni Jehova. Hunahunaa an pipira nga ehemplo. Ha mga dekada han 1930 ngan 1940 ha United States, nagkaada damu nga kaso ha korte basi depensahan an aton kagawasan ha pagsingba. An pipira nga huwes klaro nga nadiri gud ha aton. Ha Quebec, Canada, an Singbahan ngan an Estado nagbinuligay basi pugngan an aton buruhaton. Damu nga magwarali an ginpriso tungod la kay nakikiistorya hira ha iba mahitungod han Ginhadian han Dios. Ha Nazi Germany, damu nga matinumanon nga batan-on nga mga brother an ginpatay hini nga gobyerno nga diri natoo ha Dios. Ngan hinin bag-o la nga mga tuig, damu nga kabugtoan ha Russia an ginhukman nga salaan ngan ginpriso tungod ha paghisgot han Biblia nga ginkukonsiderar sugad nga “extremist nga buruhaton.” Bisan an Bag-o nga Kalibotan nga Hubad han Baraan nga Kasuratan ha Russian nga linggwahe igindiri ngan gintawag nga “extremist nga materyal” kay nagamit ito han ngaran nga Jehova.

16. Sugad han iginpapakita ha 1 Juan 4:1, kay ano nga diri kita angay magpalimbong ha buwa nga mga istorya mahitungod ha katawohan ni Jehova?

¹⁶ Paonan-o naton malilikyan nga mahipakdol? Hibaroi an kamatuoran mahitungod ha usa nga butang. Ha iya Sermon ha Bukid, ginpahamangnoan ni Jesus an iya mga mamarati nga an pipira ‘magyayakan han ngatanan nga klase han buwa ngan magraot nga mga butang kontra’ ha ira. (Mat. 5:11) Ito nga mga buwa tikang kan Satanas. Gin-iimpluwensyahan niya an mga parakontra basi magpasarang hin nakakadaot nga mga buwa mahitungod hadton nahigugma ha kamatuoran. (Pah. 12:9, 10) Kinahanglan isalikway naton ito nga mga buwa nga ginsusumat han aton mga parakontra. Diri gud naton angay tugotan an sugad nga mga buwa nga makapahadlok ha aton o magpaluya han aton pagtoo.​—Basaha an 1 Juan 4:1.

17. Paonan-o an mga panhitabo antes patayon hi Jesus posible nga nagin hinungdan nga diniri an iba nga magin iya disipulo?

¹⁷ Antes han iya kamatayon, gintraydor hi Jesus han usa han iya 12 nga apostol. Usa pa nga apostol an nagnigar ha iya hin tulo ka beses, ngan ginbayaan hiya han ngatanan niya nga apostol ha gab-i antes hiya patayon. (Mat. 26:14-16, 47, 56, 75) Waray mahipausa hito hi Jesus. Iya pa ngani igintagna nga mahitatabo ito. (Juan 6:64; 13:21, 26, 38; 16:32) Han nahitabo ito, an iba bangin diniri nga magin iya mga disipulo. Bangin naghunahuna hira, ‘Kon sugad hito an mga apostol ni Jesus, diri ko karuyag magin kaapi ha ira!’

18. Ano nga mga tagna may kalabotan kan Jesus an natuman antes han iya kamatayon?

¹⁸ Ano an ginsisiring han Kasuratan? Mga siglo antes kumanhi hi Jesus ha tuna, iginsumat ni Jehova dida ha iya Pulong nga an Mesias tatrayduron kabalyo hin 30 ka bug-os nga silber. (Zac. 11:12, 13) Usa nga duok nga sangkay ni Jesus an magtatraydor ha iya. (Sal. 41:9) Iginsurat liwat ni propeta Zacarias: “Pataya an paraataman hin panon, ngan pabay-i nga magpatsarang an panon.” (Zac. 13:7) Imbes nga mahipakdol tungod hini nga mga panhitabo, sigurado nga naparig-on an sinsero nga mga tawo han nakita nira nga natuman kan Jesus ini nga mga tagna.

19. Ano an hinbabaroan han sinsero nga mga tawo?

 ¹⁹ Nahitatabo ba liwat ito yana? Oo. Yana, may pipira nga kilalá nga mga Saksi nga binaya ha kamatuoran, nagin apostata, ngan nangangalimbasog nga ipahirayo an iba tikang kan Jehova. Nagpapasarang hira hin maraot nga mga sumat, nakakalimbong nga mga istorya, ngan mga buwa mahitungod ha mga Saksi ni Jehova pinaagi han mga dyaryo, radyo, TV, ngan ha Internet. Pero an sinsero nga mga tawo diri nalilimbongan hito. Lugod, maaram hira nga igintagna han Biblia nga mahitatabo ito nga mga butang.​—Mat. 24:24; 2 Ped. 2:18-22.

20. Paonan-o naton malilikyan nga malimbongan kita hadton mga binaya ha kamatuoran? (2 Timoteo 4:4, 5)

²⁰ Paonan-o naton malilikyan nga mahipakdol? Kinahanglan padayon nga parig-unon naton an aton pagtoo pinaagi ha regular nga pag-aram, pag-ampo pirme, ngan pagin busy ha buruhaton nga iginhatag ni Jehova ha aton. (Basaha an 2 Timoteo 4:4, 5.) Kon may pagtoo kita, diri kita mababaraka kon nakakabati kita hin maraot nga mga report mahitungod ha mga Saksi ni Jehova. (Isa. 28:16) An aton gugma kan Jehova, ha iya Pulong, ngan ha aton kabugtoan mabulig ha aton nga diri mahipakdol o malimbongan hadton mga binaya ha kamatuoran.

21. Bisan kon kadam-an yana an diri nakarawat han aton mensahe, ha ano kita makakasiguro?

²¹ Ha panahon ni Jesus, damu an nahipakdol ngan nagsalikway ha iya. Pero damu liwat an kumarawat ha iya. Kaapi hito an usa nga membro han Sanhedrin han mga Judio ngan bisan an “damu gud nga saserdote.” (Buh. 6:7; Mat. 27:57-60; Mar. 15:43) Yana, minilyon liwat an nasunod kan Jesus. Kay ano? Kay maaram hira han kamatuoran nga aada ha Kasuratan, ngan hinigugma nira ito. An Pulong han Dios nasiring: “May-ada hura nga kamurayawan an mga nahigugma han imo balaud; waray makakapakdol ha ira.”​—Sal. 119:165.