1-2. Isaysay kon kay ano nga may mga prinsipyo ha Biblia nga nagigin mas importante ha aton kon nagbabag-o an aton kahimtang.

 HA ADLAW han kasal, an gwapo nga lalaki ngan an iya mahusay nga maarasawa namamati gud ha basado ha Biblia nga pahayag mahitungod ha pag-asawa. Diri na bag-o ha ira an mga prinsipyo nga ginhihisgotan dida hito. Pero yana, ito nga mga impormasyon mas importante na ha ira. Kay ano? Kay ig-aaplikar na nira ito sugad nga mag-asawa.

² Sugad liwat hito an pag-abat han Kristiano nga mag-asawa kon nagigin mga kag-anak hira. Bangin damu na nga pahayag parte ha pagpadaku hin mga anak an ira nabatian han naglabay nga mga tuig. Pero ito nga mga prinsipyo magigin mas importante na ha ira yana. Magkakaada na hira anak nga papadakuon. Daku gud ito nga responsabilidad! Siguro nga an bag-o nga mga kahimtang makakagbag-o ha aton panhunahuna ha pamilyar nga mga prinsipyo ha Biblia. Usa ini nga rason kon kay ano nga an mga magsiringba ni Jehova nagbabasa han Kasuratan, ngan sugad han iginsugo ha mga hadi han Israel, namamalandong hito “ha ngatanan nga adlaw” han ira kinabuhi.—Deut. 17:19.

3. Ano an aton hihisgotan hini nga artikulo?

³ Mga kag-anak, may-ada kamo usa han pinakadaku nga mga pribilehiyo nga makakarawat han usa nga Kristiano, an pagtutdo ha iyo mga anak mahitungod kan Jehova. Pero diri la pag-istorya mahitungod ha aton Dios an karuyag niyo buhaton. Karuyag niyo buligan an iyo mga anak nga higugmaon gud hiya. Ano an iyo mahihimo basi maipasilsil ha iyo mga anak an gugma kan Jehova? Hini nga artikulo, aton hihisgotan an upat nga prinsipyo  ha Biblia nga makakabulig ha iyo sugad nga mga kag-anak. (2 Tim. 3:16) Aton liwat kikitaon kon paonan-o nagpahimulos an iba nga Kristiano nga mga kag-anak tungod han pag-aplikar han mga sagdon ha Biblia.

4. Ano an usa nga prinsipyo nga makakabulig ha mga kag-anak nga maipasilsil ha kasingkasing han ira mga anak an gugma kan Jehova? (Santiago 1:5)

⁴ Prinsipyo 1: Pamilnga an giya ni Jehova. Hangyoa hi Jehova nga tagan ka han kinaadman nga imo kinahanglan basi mabuligan an imo mga anak nga makultibar an gugma ha iya. (Basaha an Santiago 1:5.) Hiya an pinakakwalipikado nga Persona nga maghahatag hin sagdon. Damu an rason kon kay ano. Iini an duha. Siyahan, hi Jehova an pinakaeksperyensyado nga kag-anak. (Sal. 36:9) Ngan ikaduha, an iya maaramon nga sagdon pirme naghahatag hin mga kapulsanan.​—Isa. 48:17.

5. (a) Ano an igintatagana han organisasyon ni Jehova nga bulig para ha mga kag-anak? (b) Sugad han makikita ha video, ano an imo nahibaroan ha paagi han pagpadaku nira Brother ngan Sister Amorim ha ira mga anak?

⁵ Ginagamit ni Jehova an iya Pulong ngan an iya organisasyon basi magtagana hin damu nga espirituwal nga pagkaon tikang ha Biblia nga makakabulig ha imo nga padakuon an imo mga anak nga nahigugma kan Jehova. (Mat. 24:45) Pananglitan, makakaagi ka hin damu nga praktikal nga sagdon ha serye han mga artikulo nga “Bulig Para ha Pamilya,” nga damu ka tuig nga lakip ha magasin nga Pagpamata! ngan yana makikita ha aton website. Damu liwat nga video ha jw.org an nagpapakita hin mga interbyu ngan igindrama nga mga sitwasyon nga makakabulig ha mga kag-anak nga iaplikar an sagdon ni Jehova samtang ira ginpapadaku an ira mga anak. *​—Prob. 2:4-6.

6. Ano an inaabat han usa nga tatay ha giya nga nakakarawat nira nga mag-asawa tikang ha organisasyon ni Jehova?

⁶ Damu nga kag-anak an nagpahayag han ira pagpasalamat ha bulig nga igintatagana ni Jehova pinaagi han iya organisasyon. Hi Joe, nga usa nga tatay, nagsiring: “Diri masayon an pagpadaku hin tulo nga anak ha kamatuoran. Pirme kami nga mag-asawa nag-aampo kan Jehova para buligan kami. Ngan agsob namon abaton nga tayming gud an paggawas han  usa nga artikulo o video basi buligan kami nga malamposan an usa nga sitwasyon nga amon gin-aatubang. Pirme kami nasarig ha giya ni Jehova.” Naobserbaran ni Joe ngan han iya asawa nga ito nga mga tagana nabulig ha ira mga anak nga magin duok kan Jehova.

7. Kay ano nga importante nga an mga kag-anak magpakita hin maopay nga ehemplo? (Roma 2:21)

⁷ Prinsipyo 2: Pagtutdo pinaagi han ehemplo. Gin-oobserbaran gud han mga anak an ira mga kag-anak ngan agsob hira subaron. Syempre, waray kag-anak nga perpekto. (Roma. 3:23) Pero dapat buhaton han mga kag-anak an ira pinakamaopay basi magpakita hin maopay nga ehemplo ha ira mga anak. (Basaha an Roma 2:21.) Mahitungod ha mga bata, an usa nga tatay nagsiring: “Pariho hira hin mga espongha nga nasalupsop han tanan.” Nagsiring liwat hiya: “Iginsusumat nira ha amon kon an amon ginbubuhat diri pariho han amon igintututdo ha ira.” Salit kon karuyag naton nga higugmaon hi Jehova han aton mga anak, an aton mismo gugma ha iya kinahanglan marig-on ngan nakikita nira.

8-9. Ano an imo nahibaroan ha mga ginsiring ni Andrew ngan ni Emma?

⁸ Damu an mga paagi nga matututdoan han mga kag-anak an ira mga anak nga higugmaon hi Jehova. Pansina an ginsiring han 17 anyos nga brother nga hi Andrew: “Pirme ginpapabug-atan han akon mga kag-anak an pagkaimportante han pag-ampo. Kada gab-i nag-aampo hi Tatay kaupod ko, bisan kon human na ako mag-ampo. Pirme kami ginpapahinumdoman han akon mga kag-anak: ‘Puydi kamo makiistorya kan Jehova bisan pira ka beses niyo karuyag.’ Ito nga pagpabug-at ha pag-ampo nakabantad gud ha akon, ngan yana komportable na gud ako mag-ampo kan Jehova ngan ginhuhunahuna ko hiya sugad nga mahigugmaon nga Amay.” Mga kag-anak, ayaw gud minosa an daku nga impluwensya ha iyo mga anak han iyo mismo gugma kan Jehova.

⁹ Pansina liwat an eksperyensya ni Emma. Han ginbayaan han iya tatay an ira pamilya, damu an utang han iya tatay nga kinahanglan bayaran han iya nanay. Siring ni Emma: “Damu ka beses nga kulang an kwarta ni Nanay, kondi pirme hiya nag-iistorya kon paonan-o nag-aataman ngan nagtatagana hi Jehova ha iya mga surugoon. Nakita ko ha paagi han iya pagkinabuhi nga natoo gud hiya hito. Ginbuhat ni Nanay an iya igintutdo ha akon.” Ano an leksyon? An mga kag-anak puydi magtutdo pinaagi han ira ehemplo bisan ha makuri nga mga sitwasyon.​—Gal. 6:9.

10. Ano an mga oportunidad han damu nga Israelita nga kag-anak ha pakig-istorya ha ira mga anak? (Deuteronomio 6:6, 7)

¹⁰ Prinsipyo 3: Regular nga makiistorya ha imo mga anak. Ginsugo ni Jehova an mga Israelita ha kadaan nga panahon nga tutdoan hin regular an ira mga anak mahitungod ha iya. (Basaha an Deuteronomio 6:6, 7.) Damu an mga oportunidad hito nga mga kag-anak ha bug-os nga adlaw nga makiistorya ha ira mga anak ngan ipasilsil ha ira kasingkasing an gugma kan Jehova. Pananglitan, an batan-on nga Israelita nga lalaki bangin damu ka oras nga nabulig ha iya tatay ha pagtanom o pag-ani. An iya naman bugto nga babaye bangin haros bug-os-adlaw nga nabulig ha iya nanay ha pagtahi, paghablon, ngan iba pa nga buruhaton ha balay. Mentras magkaupod nga nagtatrabaho an mga kag-anak ngan mga anak, damu nga importante nga topiko an puydi nira pag-istoryahan. Pananglitan, puydi nira pag-istoryahan an pagkamaopay ni Jehova ngan kon paonan-o hiya nabulig ha pamilya.

11. Ano an usa nga higayon nga makaistorya han Kristiano nga mga kag-anak an ira mga anak?

¹¹ Iba na an aton panahon yana. Ha damu nga lugar, an mga kag-anak ngan mga anak haros diri na nagkakaupod ha bug-os nga adlaw. Bangin  an mga kag-anak aadto ha trabaho ngan an mga anak naman aadto ha eskwelahan. Salit an mga kag-anak kinahanglan mamiling hin mga higayon nga makaistorya an ira mga anak. (Efe. 5:15, 16; Fil. 1:10) An pagsingba han pamilya usa hito nga mga higayon. Ini an siring han batan-on nga brother nga hi Alexander: “An akon tatay pirme naghihimo hin kahikayan para ha pagsingba han pamilya, ngan diri niya gintutugotan nga may makaulang hini nga panahon han amon pagkaurupod. Katima han pag-aram, nag-iiristorya la kami.”

12. Ano an angay hinumdoman han ulo han pamilya ha panahon han pagsingba han pamilya?

¹² Kon usa ka nga ulo han pamilya, ano an imo mahihimo basi magin makalilipay para ha imo mga anak an pagsingba han pamilya? Kay ano nga diri niyo pag-adman an aton maopay nga bag-o nga publikasyon nga Mabuhi hin Malipayon ha Waray Kataposan! Ito nga pag-aram maopay gud nga higayon para ha nakaka-enjoy nga pag-iristorya. Karuyag mo nga an imo mga anak magsumat han ira mga inaabat ngan nababarak-an, salit ayaw gamita an panahon para ha pagsingba han pamilya basi sermonan o isgan hira. Ngan pangalimbasugi nga diri sobra nga magreak kon an imo mga anak magsumat han ira panhunahuna nga diri uyon ha mga prinsipyo han Kasuratan. Lugod, magin malipayon nga tangkod hira han ira inaabat, ngan dasiga hira nga diri mag-alang pag-istorya hito. Maihahatag mo la an pinakamaopay nga bulig ha imo mga anak kon maaram ka han ira tinuod nga inaabat.

13. Ano an iba pa nga oportunidad han mga kag-anak nga mabuligan an ira mga anak nga magin duok kan Jehova?

¹³ Mga kag-anak, pamiling hin mga oportunidad ha bug-os nga adlaw nga mabuligan an iyo mga anak nga magin duok kan Jehova. Diri niyo kinahanglan hulaton an iyo eskedyol ha pag-aram ha Biblia para tutdoan hira parte ha aton mahigugmaon nga Dios. Pansina an ginsiring han nanay nga hi Lisa: “Gin-gamit namon an mga linarang ha pagtutdo ha amon mga anak mahitungod kan Jehova. Pananglitan, kon may ginbuhat an amon ayam nga nagpatawa ha amon mga anak, ginsusumatan namon hira nga proyba ito nga an aton Maglalarang maaram magpatawa ngan nahigugma han kinabuhi, pariho ha aton.”

14. Kay ano nga importante nga buligan han mga kag-anak an ira mga anak nga magin maaramon ha pagpili hin kasangkayan? (Proberbios 13:20)

 ¹⁴ Prinsipyo 4: Buligi an imo mga anak nga makapili hin maopay nga kasangkayan. An Pulong han Dios klaro nga nasiring nga an aton kasangkayan mahimo magin maopay o maraot nga impluwensya ha aton. (Basaha an Proberbios 13:20.) Mga kag-anak, maaram ba kamo kon hin-o an kasangkayan han iyo mga anak? Nakilala na ba niyo ngan nakaupod hira? Ano an iyo mahihimo basi buligan an iyo mga anak nga makigsangkay ha mga nahigugma kan Jehova? (1 Cor. 15:33) Mabubuligan niyo hira nga magin maaramon ha pagpili kon mag-iimbitar kamo hin kabugtoan nga may maopay nga espirituwalidad nga umupod ha mga buruhaton han iyo pamilya.​—Sal. 119:63.

15. Ano an mahihimo han mga kag-anak basi buligan an ira mga anak nga magkaada maopay nga kasangkayan?

¹⁵ Pansina an eksperyensya han tatay nga hi Tony. Nagsumat hiya han ginhimo nira nga mag-asawa basi buligan an ira mga anak nga magkaada maopay nga kasangkayan: “Damu ka tuig nga gin-iimbitar namon nga mag-asawa ha amon balay an kabugtoan nga iba-iba an edad ngan kahimtang ha kinabuhi. Urosa kami nga nangangaon ngan nagpa-family worship. Maopay gud ini nga paagi nga makilala an mga nahigugma kan Jehova ngan nag-aalagad ha iya nga malipayon. Nagin bendisyon ha amon an pag-ukoy ha amon balay han mga paramangno han sirkito, misyonero, ngan iba pa. An ira mga eksperyensya, kadasig, ngan kamaduruto ha pag-alagad nagkaada daku nga epekto ha amon mga anak ngan nakabulig ha ira nga magin duok kan Jehova.” Mga kag-anak, magin determinado nga buligan an iyo mga anak nga magkaada maopay nga kasangkayan.

16. Ano man kon an imo anak nagsiring nga nadiri hiya mag-alagad kan Jehova?

¹⁶ Ano man kon ginhimo mo na an imo pinakamaopay pero an usa han imo mga anak nagsiring nga nadiri hiya mag-alagad kan Jehova? Ayaw hunahunaa nga pakyas ka sugad nga kag-anak. Hi Jehova naghatag ha aton ngatanan​—pati ha imo anak​—han regalo nga kagawasan ha pagbuot, an abilidad ha pagpili kon mag-aalagad kita ha Dios o diri. Kon an imo anak nagdesisyon nga bumaya kan Jehova, ayaw kawad-i  hin paglaom nga maabot an adlaw nga mabalik hiya. Hinumdumi an ilustrasyon mahitungod ha nawara nga anak. (Luc. 15:11-19, 22-24) Ito nga batan-on binaya ha matadong nga dalan, kondi ha urhi binalik hiya. Bangin magsiring an iba: “Ilustrasyon la ito. Puydi ba ito mahitabo ha tinuod nga kinabuhi?” Puydi! Ngani, ito an eksperyensya han batan-on nga lalaki nga hi Elie.

17. Paonan-o nakakadasig ha imo an eksperyensya ni Elie?

¹⁷ Ini an siring ni Elie mahitungod ha iya mga kag-anak: “Ginhimo nira an ngatanan basi higugmaon ko hi Jehova ngan an iya Pulong, an Biblia. Kondi han magtin-edyer na ako, nagtikang ako pagrebelde.” Nagkaada doble nga pagkinabuhi hi Elie, ngan ginbalewaray niya an ngatanan nga pangalimbasog han iya mga kag-anak nga buligan hiya ha espirituwal. Katapos niya bumaya ha ira balay, nagbuhat hiya hin magraot nga butang. Bisan pa hito, may mga panahon nga nakikiistorya hiya ha usa han iya mga sangkay mahitungod ha Biblia. Nagsiring hi Elie: “Samtang mas agsob nga nag-iinistorya ako mahitungod kan Jehova, nagigin mas agsob liwat an akon paghinunahuna ha iya. Hinay-hinay nga an binhi han kamatuoran han Biblia​—nga ginpangalimbasogan itanom han akon mga kag-anak—​nagtikang tumubo.” Inabot an panahon nga binalik hi Elie ha kamatuoran. * Imadyina an kalipay han iya mga kag-anak kay nangalimbasog hira nga tutdoan hiya tikang pa ha pagkabata nga higugmaon hi Jehova!—2 Tim. 3:14, 15.

18. Ano an imo inaabat ha mga kag-anak nga nangangalimbasog gud ha pagtutdo ha ira mga anak nga higugmaon hi Jehova?

¹⁸ Mga kag-anak, gintagan kamo hin maopay hinduro nga pribilehiyo, an pagpadaku hin bag-o nga henerasyon han mga magsiringba ni Jehova. (Sal. 78:4-6) Diri ito masayon, ngan sinsero nga ginkukumendasyonan namon kamo ha iyo maduruto gud nga pangalimbasog nga buligan an iyo mga anak! Kon padayon nga bubuhaton niyo an iyo pinakamaopay basi buligan an iyo mga anak nga higugmaon hi Jehova ngan padakuon hira ha iya disiplina ngan sagdon, makakasiguro kamo nga malilipay an aton mahigugmaon nga Amay ha langit.​—Efe. 6:4.