1. Ano an importante nga desisyon nga kinahanglan himoon han ngatanan nga tawo?

 AN MGA tawo yana kinahanglan maghimo hin importante nga desisyon. Masuporta ba hira kan Jehova nga Dios, an may katungod ha pagmando ha uniberso, o masuporta hira ha iya mabangis nga kaaway, hi Satanas nga Yawa? Kinahanglan pumili hin dadapigan. Anoman an ira magin desisyon, makakaapekto ito ha ira kabubuwason ha kadayonan. (Mat. 25:31-33, 46) Ha panahon han “daku nga kasakitan,” mamarkahan hira para ha katalwasan o para ha kabungkagan.—Pah. 7:14; 14:9-11; Ezek. 9:4, 6.

2. (a) Ano an igin-aaghat ha aton han Hebreo 10:35-39? (b) Paonan-o makakabulig ha aton an libro han Pahayag?

² Basaha an Hebreo 10:35-39. Kon imo ginpili nga sumuporta ha pagmando ni Jehova, maaramon an imo desisyon. Yana, karuyag mo gud buligan an iba nga maghimo han tama nga desisyon. Puydi mo gamiton an impormasyon ha libro han Pahayag basi buligan hira. Iton maopay gud nga libro nagsusumat kon ano an mahitatabo hadton nakontra kan Jehova, pero nagpapabug-at liwat ito han mga bendisyon nga makakarawat hadton maunungon nga nasuporta ha iya pagmando. Angay naton pag-adman inin importante nga mga kamatuoran. An pagbuhat hito magpaparig-on han aton determinasyon nga padayon nga mag-alagad kan Jehova. Dugang pa, puydi naton gamiton an aton nahibaroan basi buligan an iba nga makahimo han tama nga desisyon ngan magin marig-on hito.

3. Ano an aton hihisgotan hini nga artikulo?

³ Hini nga artikulo, hihisgotan naton ini nga mga pakiana: Ano an mahitatabo hadton nasuporta ha pagmando han Dios? Ano naman an mahitatabo hadton nagdidesisyon nga  sumuporta ha mapintas nga hayop nga an kolor malamrag an kapula, nga iginhuhulagway ha libro han Pahayag?

4. Ano nga grupo an nakita ni apostol Juan nga kaupod ni Jesus ha langit?

⁴ Ha usa nga bisyon, nakakita hi apostol Juan hin duha nga grupo nga nasuporta ha pagmando ni Jehova ngan nakakarawat han mga bendisyon han kinabuhi nga waray kataposan. May-ada 144,000 ha siyahan nga grupo. (Pah. 7:4) Ginkuha hira tikang ha tuna basi mag-establisar hin gobyerno, o Ginhadian, kaupod ni Jesus ha langit. Makakaupod niya hira ha pagmando ha bawbaw han tuna. (Pah. 5:9, 10; 14:3, 4) Ha bisyon, nakita ni Juan nga natindog hira kaupod ni Jesus ha langitnon nga Bukid Zion.​—Pah. 14:1.

5. Ano an hirani na mahitabo ha mga nanhibilin han 144,000?

⁵ Ha paglabay han mga siglo, yinukot na an ginpili basi magin kaapi han 144,000. (Luc. 12:32; Roma 8:17) Pero ginsumatan hi Juan nga may nanhibilin, o pipira na la, nga buhi ha tuna ha panahon han kataposan nga mga adlaw. Makakarawat hini nga “mga nanhibilin” an ira ultimo nga “selyo” han pag-uyon ni Jehova antes magtikang an daku nga kasakitan. (Pah. 7:2, 3; 12:17) Katapos, ha panahon han daku nga kasakitan, ini nga nanhibilin dadad-on ngadto ha langit basi makaupod han iba pa nga kaapi han 144,000, nga namatay na nga matinumanon. Didto magigin mga igkasi-magmarando hira ni Jesus ha Ginhadian han Dios.​—Mat. 24:31; Pah. 5:9, 10.

6-7. (a) Ano nga grupo an sunod nga nakita ni Juan, ngan ano an aton mahibabaroan mahitungod ha ira? (b) Kay ano nga an nanhibilin ngan an “daku nga grupo” dapat magin interesado ha Pahayag kapitulo 7?

⁶ Katapos makita an langitnon nga grupo, nakita ni Juan an “usa nga daku nga grupo.” Diri pariho han 144,000, ini nga grupo diri maihap. (Pah. 7:9, 10) Ano an aton mahibabaroan mahitungod ha ira? Ginsidngan hi Juan: “Ini hira an mga nakatalwas ha daku nga kasakitan, ngan ira ginlabhan an ira higlaba nga mga bado ngan ginpabusag ito ha dugo han Kordero.” (Pah. 7:14) Katapos makatalwas ha daku nga kasakitan, inin “daku nga grupo” maukoy dinhi ha tuna ngan magpapahimulos hin makalilipay nga mga bendisyon.​—Sal. 37:9-11, 27-29; Prob. 2:21, 22; Pah. 7:16, 17.

⁷ Ginpili man kita nga kumadto ha langit o magpapabilin dinhi ha tuna, nakikita ba naton an aton kalugaringon hini nga nakarekord ha Pahayag kapitulo 7? Dapat la. Eksayting gud ito nga panahon para ha duha nga grupo han mga surugoon han Dios! Magigin malipayon gud kita nga ginpili naton nga suportahan an pagmando ni Jehova. Ano pa an iginsusumat ha aton han libro han Pahayag mahitungod ha daku nga kasakitan?​—Mat. 24:21.

8. Paonan-o magtitikang an daku nga kasakitan, ngan ano an magigin reaksyon han kadam-an nga tawo?

⁸ Sugad han gin-unabi ha nahiuna nga artikulo, an mga gobyerno hini nga kalibotan hirani na umatake ha Babilonya nga Gamhanan, an imperyo han buwa nga relihiyon ha kalibotan. (Pah. 17:16, 17) Ito an magigin tinikangan han daku nga kasakitan. Pero tungod ba hito damu an magtitikang pag-alagad kan Jehova? Diri. Lugod, iginpapakita han Pahayag kapitulo 6 nga hito nga panahon, an mga tawo nga diri nag-aalagad kan Jehova mamimiling hin proteksyon ha politikal ngan komersyal nga mga sistema hini nga kalibotan, nga iginpapariho ha kabukiran. Tungod kay ito nga mga tawo diri masuporta ha Ginhadian han Dios, huhunahunaon hira ni Jehova nga nakontra ha iya.​—Luc. 11:23; Pah. 6:15-17.

9. Paonan-o makikita nga naiiba an katawohan ni Jehova ha panahon han daku nga kasakitan, ngan ano an magigin resulta?

 ⁹ Oo, makikita nga naiiba an matinumanon nga mga surugoon ni Jehova hiton makuri gud nga panahon han kasakitan. Hira la gihap an magigin amo la nga grupo han katawohan nga nag-aalagad kan Jehova nga Dios ngan nagdudumiri pagsuporta ha “mapintas nga hayop.” (Pah. 13:14-17) Tungod kay magpapabilin hira nga matinumanon, masisina gud adton nakontra kan Jehova. Sugad nga resulta, usa nga alyansa han mga nasud an maatake ha katawohan han Dios ha bug-os nga tuna. Gintatawag ini han Biblia nga pag-atake han Gog han Magog.​—Ezek. 38:14-16.

10. Sugad han iginhuhulagway ha Pahayag 19:19-21, ano an magigin reaksyon ni Jehova hini nga pag-atake ha iya katawohan?

¹⁰ Ano an magigin reaksyon ni Jehova hinin mabangis nga pag-atake? Ginsidngan kita niya: “Maglalarab an akon duro nga kapungot.” (Ezek. 38:18, 21-23) Iginhuhulagway han Pahayag kapitulo 19 an sunod nga mahitatabo. Susugoon ni Jehova an Iya Anak basi depensahan an Iya katawohan ngan pirdihon an ira mga kaaway. Hini nga pakig-away, kaupod ni Jesus “an mga hugpo ha langit”​—an matinumanon nga mga anghel ngan an 144,000. (Pah. 17:14; 19:11-15) Ano an magigin resulta hini nga girra? Mapupoo an ngatanan nga tawo ngan organisasyon nga nakontra kan Jehova!​—Basaha an Pahayag 19:19-21.

11. Ano an pinakaimportante nga panhitabo ha libro han Pahayag?

¹¹ Imadyina la an aabaton han mga matinumanon ha tuna nga nakatalwas ha pagpoo ha mga kaaway han Dios! Magigin makalilipay gud ito nga panahon! Magkakaada daku nga guliat hin kalipay ha langit kon mabungkag na an Babilonya nga Gamhanan, pero may usa pa nga maghahatag hin mas daku nga kalipay. (Pah. 19:1-3) Ngani, ito an pinakaimportante nga panhitabo ha libro han Pahayag​—“an kasal han Kordero.”​—Pah. 19:6-9.

12. Sugad han iginpapakita ha Pahayag 21:1, 2, san-o mahitatabo an kasal han Kordero?

¹² San-o mahitatabo ito nga kasal? An ngatanan nga kaapi han 144,000 aadto na ha langit antes gud magtikang an girra han Armagedon. Pero diri pa ito an panahon para ha kasal han Kordero. (Basaha an Pahayag 21:1, 2.) Mahitatabo an kasal han Kordero katapos han girra han Armagedon ngan nabungkag na an ngatanan nga kaaway han Dios.​—Sal. 45:3, 4, 13-17.

13. Ano gud an kahulogan han kasal han Kordero ha mga kaapi hito?

¹³ Ano gud an kahulogan han kasal han Kordero ha mga kaapi hito? Sugad la nga gintatampo han kasal an usa nga lalaki ngan babaye, pagtatampuhon hinin simboliko nga kasal an Hadi, hi Jesu-Kristo, ngan an iya maarasawa, an 144,000. Iton importante nga panhitabo an mag-iestablisar han bag-o nga gobyerno nga magmamando ha tuna ha sulod hin 1,000 ka tuig.​—Pah. 20:6.

14-15. Ha ano iginpapariho han Pahayag kapitulo 21 an 144,000? (Kitaa an piktyur ha kobre.)

¹⁴ Sunod, iginpapariho han Pahayag kapitulo 21 an 144,000 ha usa nga mahusay gud nga syudad nga gintatawag nga “Bag-o nga Jerusalem.” (Pah. 21:2, 9) Ini nga syudad may-ada 12 nga bato nga pundasyon ngan aada hito “an 12 nga ngaran ngan 12 nga apostol han Kordero.” Kay ano nga nakapainteres ito kan Juan? Kay nakita niya an iya ngaran nga nakasurat ha usa hito nga mga bato. Daku gud ito nga pribilehiyo!​—Pah. 21:10-14; Efe. 2:20.

¹⁵ Waray kapariho an hitsura hinin simboliko  nga syudad. May-ada ito haluag nga kalye nga puro nga bulawan, 12 nga ganghaan nga perlas, mga pader ngan mga pundasyon nga gindekorasyonan hin marahalon nga mga bato​—ngan an kahilaba ngan kahaluag ngan kahitaas hito parapriho. (Pah. 21:15-21) Pero baga hin may kulang! Pansina an sunod nga ginsiring ni Juan: “Waray ako nakita nga templo dida hito, kay hi Jehova nga Dios nga Makagarahum-ha-ngatanan amo an templo hito, sugad man an Kordero. Ngan an syudad diri na nagkikinahanglan han adlaw ngan han bulan basi maglamrag ngada hito, kay an himaya han Dios an nakakalamrag hito, ngan an lampara hito amo an Kordero.” (Pah. 21:22, 23) Adton bahin han Bag-o nga Jerusalem makakaupod ni Jehova. (Heb. 7:27; Pah. 22:3, 4) Salit hi Jehova ngan hi Jesus iginhuhulagway sugad nga templo dida hito nga syudad.

16. Ano an maieksperyensyahan han mga tawo ha panahon han Usa ka Yukot ka Tuig nga Pagmando han Ginhadian han Dios?

¹⁶ Makalilipay para ha mga dinihogan nga hunahunaon ini nga syudad. Pero adton may paglaom nga mabuhi ha tuna angay liwat magin interesado hito. Ha panahon han Usa ka Yukot ka Tuig nga Pagmando han Ginhadian han Dios, an Bag-o nga Jerusalem maghahatag hin damu gud nga bendisyon. Nakita ni Juan ini nga mga bendisyon nga naawas sugad nga “salog han tubig han kinabuhi.” Ngan ha paluyoluyo nga ligid han salog may “mga kahoy han kinabuhi” nga an mga dahon hito “para ha pagtambal ha mga nasud.” (Pah. 22:1, 2) An ngatanan nga tawo nga buhi hito nga panahon magkakaada oportunidad nga makapahimulos hito nga mga tagana. An ngatanan nga masinugtanon nga tawo hinay-hinay nga magigin perpekto. Waray na sakit, kasakit, ngan mga luha han kabidoan.​—Pah. 21:3-5.

17. Sugad han iginpapakita han Pahayag 20:11-13, hin-o an makakapahimulos ha Usa ka Yukot ka Tuig nga Pagmando?

¹⁷ Hin-o an makakapahimulos hinin mag-opay gud nga tagana? An siyahan amo an daku nga grupo nga nakatalwas ha Armagedon, ngan an ira mga anak nga bangin matawo ha bag-o nga kalibotan. Pero an Pahayag kapitulo 20 nagsasaad liwat nga an mga patay mababanhaw. (Basaha an Pahayag 20:11-13.) An ngatanan nga matinumanon nga “magtadong” nga namatay hadto pati na an mga “diri magtadong”​—nga waray magkaada oportunidad nga  mahibaro mahitungod kan Jehova—​mabubuhi utro dinhi ha tuna. (Buh. 24:15; Juan 5:28, 29) Karuyag sidngon ba hini nga an ngatanan babanhawon basi mabuhi dinhi ha tuna ha panahon han Usa ka Yukot ka Tuig nga Pagmando? Diri. Adton magraot nga nagdumiri han oportunidad nga mag-alagad kan Jehova antes hira mamatay diri bubuhion utro. May tsansa na unta hira hadto, pero ginpamatud-an nira nga diri hira angayan nga mabuhi ha Paraiso nga tuna.​—Mat. 25:46; 2 Tes. 1:9; Pah. 17:8; 20:15.

18. Ano an magigin kahimtang ha tuna ha kataposan han 1,000 ka tuig?

¹⁸ Ha kataposan han 1,000 ka tuig, an ngatanan nga buhi dinhi ha tuna magigin perpekto na. Waray na bisan hin-o nga buhi nga maaapektohan han sala nga napanunod kan Adan. (Roma 5:12) Waray na gud an sumpa han sala ni Adan. Hito nga paagi, an mga aanhi ha tuna ‘mabubuhi’ sugad nga perpekto nga mga tawo ha kataposan han 1,000 ka tuig.​—Pah. 20:5.

19. Kay ano nga kinahanglan magkaada ultimo nga pagsari?

¹⁹ Maaram kita nga gin-atohan ni Jesus an mga pangalimbasog ni Satanas nga aghaton hiya nga ikompromiso an iya integridad. Nagpabilin hiya nga matinumanon bisan kon ginsarihan hiya. Pero an ngatanan ba nga perpekto nga tawo magpapabilin nga matinumanon kan Jehova kon tagan hi Satanas hin oportunidad nga sarihan hira? An kada tagsa makakabaton hini nga pakiana kon buhian na hi Satanas tikang ha kahiladman ha kataposan han 1,000 ka tuig. (Pah. 20:7) An mga matinumanon ha panahon hinin ultimo nga pagsari makakakarawat hin kinabuhi nga waray kataposan ngan magkakaada na tinuod nga kagawasan. (Roma 8:21) Adton magrirebelde bubungkagon ha kadayonan, upod han Yawa ngan han iya mga demonyo.​—Pah. 20:8-10.

20. Ano an imo inaabat ha eksayting nga mga tagna nga mababasa ha libro han Pahayag?

²⁰ Ano an imo inaabat katapos hinin halipot nga pagrepaso han libro han Pahayag? Eksayted ka ba nga makita an imo kalugaringon hinin makalilipay nga mga tagna? Karuyag mo ba imbitaron an iba nga umupod ha aton ha putli nga pagsingba ha aton Dios? (Pah. 22:17) Tungod kay naaaghat an aton hunahuna ngan kasingkasing hinin eksayting nga mga panhitabo ha tiarabot, sigurado nga karuyag naton iyakan an mga pulong ni apostol Juan: “Amen! Pakadi, Ginoo nga Jesus.”​—Pah. 22:20.