1-2. Ano an usa nga rason nga angay kita magin interesado ha libro han Pahayag?

 MAY nag-agda na ba ha imo nga kitaon an photo album han iba nga tawo? Samtang ginkikita mo an mga piktyur, damu didto an diri mo kilala. Pero nainteres ka ha usa nga piktyur. Kay ano? Kay aada ka hito. Samtang ginkikita mo ito, ginhihinumdom mo kon kakan-o ngan diin ito ginpiktyuran. Naniningkamot ka liwat nga makilala an iba pa nga aada hito. Espesyal gud ha imo ito nga piktyur.

² An libro han Pahayag pariho hito nga piktyur. Kay ano? May diri maminos duha nga rason. Siyahan, ini nga libro ha Biblia iginsurat para ha aton. Ini an aton mababasa ha siyahan mismo nga bersikulo: “Usa nga pahayag ni Jesu-Kristo, nga iginhatag ha iya han Dios, basi ipakita ha iya mga uripon an mga butang nga kinahanglan mahitabo ha diri na maiha.” (Pah. 1:1) Salit an nakasurat hini nga libro diri para ha mga tawo ha kabug-osan kondi para ha aton nga dedikado nga mga surugoon han Dios. Sugad nga katawohan han Dios, diri kita angay mahipausa ha paghibaro nga nakikigbahin kita ha katumanan han mga tagna nga mababasa hinin makapainteres nga libro. Ha iba nga pagkayakan, “aada kita hito nga piktyur.”

3-4. Sumala ha libro han Pahayag, san-o matutuman an mga tagna hito, ngan ano an dapat magin epekto hito ha tagsa ha aton?

³ An ikaduha nga rason may kalabotan naman ha panahon kon san-o matutuman ini nga mga tagna. Iginsumat han lagas na nga hi apostol Juan ito nga panahon han nagsiring hiya: “Pinaagi han baraan nga espiritu nahingadto ako ha adlaw han Ginoo.” (Pah. 1:10) Han iginsurat ni Juan ini nga mga pulong han mga 96 C.E., maiha pa antes magtikang an “adlaw han Ginoo.” (Mat. 25:14, 19; Luc. 19:12) Pero sumala ha tagna han Biblia, ito  nga adlaw nagtikang han 1914 han nagin Hadi hi Jesus ha langit. Tikang hito nga tuig, an mga tagna ha Pahayag, nga may kalabotan ha katawohan han Dios, nagtikang matuman. Oo, nagkikinabuhi na kita yana ha “adlaw han Ginoo”!

⁴ Tungod kay nagkikinabuhi kita hinin eksayting nga panahon, kinahanglan tagan naton hin daku nga atensyon an mahigugmaon nga sagdon nga nakarekord ha Pahayag 1:3: “Malipayon an nagbabasa ha daku nga tingog ngan an mga namamati han mga pulong hini nga tagna ngan nagtutuman han mga butang nga iginsurat dida hini, kay hirani na an itinanda nga panahon.” Oo, kinahanglan naton ‘basahon ha daku nga tingog,’ ‘pamatian an mga pulong hini nga tagna,’ ngan ‘tumanon’ ini. Ano an pipira hini nga mga pulong nga kinahanglan naton tumanon?

5. Paonan-o ginpapabug-atan han libro han Pahayag an pagkaimportante nga siguruhon nga an aton pagsingba kinakarawat ni Jehova?

⁵ Tikang ha siyahan nga kapitulo han Pahayag, mahibabaroan ta nga maaram gud hi Jesus han nahitatabo ha mga kongregasyon han iya katawohan. (Pah. 1:12-16, 20; 2:1) Makikita ito ha mga mensahe nga iginpadara ni Jesus ha pito nga kongregasyon ha Asia Minor. Hito nga mga mensahe, naghatag hiya hin espisipiko nga instruksyon basi buligan an mga Kristiano ha siyahan nga siglo nga masiguro nga an ira pagsingba kinakarawat ni Jehova. Ngan an ginsiring dida hito nga mga mensahe aplikado ha ngatanan nga katawohan han Dios yana. Ano an leksyon para ha aton? An aton lider, hi Kristo Jesus, maaram gud han kahimtang han aton espirituwalidad. Ginpapangunahan ngan ginpuprotektaran kita niya; waray maitatago ha iya. Maaram hiya han kinahanglan naton buhaton basi padayon nga uyonan kita ni Jehova. Ano nga instruksyon an iya iginhatag nga kinahanglan naton tumanon yana?

6. (a) Sumala ha ginsiring ni Jesus ha Pahayag 2:3, 4, ano an problema han kongregasyon ha Efeso? (b) Ano nga leksyon an aton mahibabaroan tikang hini?

⁶ Basaha an Pahayag 2:3, 4. Kinahanglan diri mawara an gugma nga inabat naton para kan Jehova ha tinikangan. Iginpakita han mensahe ni Jesus ha kongregasyon ha Efeso nga nagpakita hira hin pagpailob ngan padayon nga nag-alagad kan Jehova bisan pa han iba-iba nga kakurian. Bisan pa hito, nawara an gugma nga ira inabat ha tinikangan. Kinahanglan ibalik nira ito nga gugma​—kay kon diri, diri kakarawaton an ira pagsingba. Sugad man yana, diri la pagpailob an kinahanglan naton buhaton. Kinahanglan tama an mga hinungdan han aton pagpailob. Interesado an aton Dios diri la ha kon ano an aton ginbubuhat kondi ha kon kay ano liwat nga ginbubuhat naton ito. Importante ha iya an aton mga motibo kay karuyag niya nga an aton pagsingba iginbase ha aton hilarom nga gugma ngan apresasyon ha iya.​—Prob. 16:2; Mar 12:29, 30.

7. (a) Sugad han mababasa ha Pahayag 3:1-3, ano nga problema an nakita ni Jesus ha kongregasyon ha Sardis? (b) Ano an kinahanglan naton buhaton?

⁷ Basaha an Pahayag 3:1-3. Kinahanglan magpabilin kita nga nagmamata ngan alerto. Iba naman an problema han kongregasyon ha Sardis. Bisan kon hadto aktibo hira ha espirituwal, napapasibay-an na nira an ira pag-alagad ha Dios. Salit ginsidngan hira ni Jesus nga “magmata.” Ano an leksyon para ha aton? Maaram kita nga diri kakalimtan ni Jehova an aton mga buhat. (Heb. 6:10) Bisan pa hito, diri kita puydi makontento ha aton na nahimo han naglabay ha pag-alagad kan Jehova. Bangin mas damu na an aton mga limitasyon kay han hadto, pero kinahanglan padayon kita nga magin busy ha “buruhaton han Ginoo” ngan magpabilin nga  nagmamata ngan alerto tubtob ha kataposan.—1 Cor. 15:58; Mat. 24:13; Mar. 13:33.

8. Ano nga leksyon an aton mahibabaroan ha ginsiring ni Jesus ha kabugtoan ha Laodicea, sugad han mababasa ha Pahayag 3:15-17?

⁸ Basaha an Pahayag 3:15-17. Kinahanglan magin madasigon kita ngan bug-os-kasingkasing ha aton pagsingba. Ginpabug-atan han mensahe ni Jesus ha mga taga-Laodicea an iba liwat nga problema. “Malanhod” hira ha ira pagsingba. Tungod han ira kakulang hin kadasig, ginsidngan hira ni Jesus nga ‘miserable hira ngan makalolooy.’ Kinahanglan magpakita hira hin nagkakalayo nga kadasig para kan Jehova ngan ha pagsingba ha iya. (Pah. 3:19) Ano an leksyon para ha aton? Kon naibanan na an aton kadasig, kinahanglan dugangan naton an aton apresasyon ha aton espirituwal nga karikohan. (Pah. 3:18) Diri gud naton karuyag nga mawara an aton pokus tungod han pagpinaniguro nga magkaada komportable nga kinabuhi ngan diri na naton magin prayoridad an espirituwal nga mga buruhaton.

9. Sugad han makikita ha mga mensahe ni Jesus ha mga Kristiano ha Pergamo ngan Tiatira, ano nga peligro an kinahanglan naton likyan?

⁹ Kinahanglan isalikway naton an mga katutdoan han mga apostata. Ginsaway ni Jesus an pipira ha Pergamo kay nag-aaghat hira hin pagkabahin-bahin ngan naghihimo hin mga sekta. (Pah. 2:14-16) Ginkumendasyonan niya an mga taga-Tiatira nga naglikay ha “higlarom nga mga butang ni Satanas,” ngan gin-aghat niya hira nga ‘kaptan hin marig-on’ an kamatuoran. (Pah. 2:24-26) An magluya nga Kristiano didto nga nagpadára ha buwa nga mga katutdoan kinahanglan magbasol. Kumusta man kita yana? Kinahanglan isalikway naton an bisan ano nga katutdoan nga nakontra ha panhunahuna ni Jehova. Bangin “diosnon pagkit-on” an mga apostata, pero diri hira “nagkikinabuhi uyon ha gahum hito.” (2 Tim. 3:5) Mas masayon makita ngan isalikway an buwa nga mga katutdoan kon maduruto kita mag-aram han Pulong han Dios.—2 Tim. 3:14-17; Jud. 3, 4.

10. Ano pa nga leksyon an aton mahibabaroan ha ginsiring ni Jesus ha mga kongregasyon ha Pergamo ngan Tiatira?

¹⁰ Kinahanglan diri naton buhaton, pasagdan, o konsinteron an bisan ano nga klase hin imoralidad. May usa pa nga problema ha Pergamo ngan Tiatira. Ginkondenar ni Jesus an pipira dida hito nga mga kongregasyon kay waray nira isalikway an imoralidad. (Pah. 2:14, 20) Ano an leksyon para ha aton? Diri kita puydi  maghunahuna nga papasagdan la kita ni Jehova nga magbuhat hin bisan ano nga imoralidad, bisan kon damu na kita ka tuig nga nag-aalagad ha iya ngan may pipira nga pribilehiyo ha pagkayana. (1 Sam. 15:22; 1 Ped. 2:16) Naglalaom hiya nga susundon naton an iya higtaas nga mga suruklan ha moral bisan kon naghamubo na gud an mga suruklan han kalibotan.​—Efe. 6:11-13.

11. Ano na an aton nahibaroan? (Kitaa liwat an kahon nga “ Mga Leksyon Para ha Aton Yana.”)

¹¹ Ano na an aton nahibaroan? Nahibaroan ta nga kinahanglan naton siguruhon nga an aton pagsingba kinakarawat ni Jehova. Kon may ginbubuhat kita nga mahimo magin hinungdan nga diri karawaton an aton pagsingba, kinahanglan maghimo dayon kita hin mga pagbag-o basi makarawat an pag-uyon han Dios. (Pah. 2:5, 16; 3:3, 16) Pero may gin-unabi pa hi Jesus ha iya mga mensahe ha mga kongregasyon. Ano ito?

12. Ano an aton mahibabaroan ha mga mensahe ni Jesus ha kabugtoan ha Smirna ngan Filadelfia? (Pahayag 2:10)

¹² Hisgotan naton yana an mga mensahe ni Jesus ha mga kongregasyon ha Smirna ngan Filadelfia. Ginsidngan niya an mga Kristiano didto nga diri mahadlok nga mag-antos hin pagtimaraot, kay babalosan an ira pagkamatinumanon. (Basaha an Pahayag 2:10; 3:10) Ano an leksyon para ha aton yana? Kinahanglan laoman naton an pagtimaraot ngan magin andam nga ilubon ito. (Mat. 24:9, 13; 2 Cor. 12:10) Kay ano nga importante ini nga pahinumdom?

13-14. Paonan-o an katawohan han Dios naaapektohan han mga panhitabo nga gin-uunabi ha Pahayag kapitulo 12?

¹³ An libro han Pahayag nagsusumat ha aton nga an katawohan han Dios pagtitimarauton ha aton panahon—an “adlaw han Ginoo.” Gin-uunabi han Pahayag kapitulo 12 nga nagkaada girra ha langit katapos gud maestablisar an Ginhadian han Dios. Hi Miguel​—an ginhimaya nga hi Jesu-Kristo—​ngan an iya mga kasundalohan nakig-away kan Satanas ngan ha mga demonyo. (Pah. 12:7, 8) Sugad nga resulta, ito nga mga kaaway han Dios napirde ngan iginlabog nganhi ha tuna, nga nagin hinungdan han duro nga pag-antos han mga tawo. (Pah. 12:9, 12) Pero paonan-o ini nga panhitabo nakakaapekto ha katawohan han Dios?

¹⁴ Sunod, iginsusumat ha aton han Pahayag an ginbuhat ni Satanas. Diri na hiya gintutugotan nga makakadto ha langit, salit iginpupokus niya an iya kasina ha nanhibilin nga mga dinihogan. Ini hira an tunan-on nga mga representante han Ginhadian han Dios “ngan may buruhaton nga pagpamatuod mahitungod kan Jesus.” (Pah. 12:17; 2 Cor. 5:20; Efe. 6:19, 20) Paonan-o natutuman ini nga tagna?

15. Hin-o an ginsisimbolohan han “duha nga saksi” nga gin-uunabi ha Pahayag kapitulo 11, ngan ano an nahitabo ha ira?

 ¹⁵ Nagpahinabo hi Satanas hin pag-atake ha dinihogan nga kabugtoan nga nangunguna ha buruhaton nga pagsangyaw han Ginhadian. Ito nga kalalakin-an an ginsisimbolohan han “duha nga saksi” ha libro han Pahayag nga ginpatay. * (Pah. 11:3, 7-11) Han 1918, walo han kabugtoan nga nangunguna ha organisasyon an sayop nga gin-akusaran, gindeklara nga guilty, ngan ginsentensyahan hin maiha nga kapriso. Kadam-an nga tawo an naghunahuna nga an buruhaton hito nga mga dinihogan napaundang na—ginpatay, siring pa.

16. Ano an urusahon nga nahitabo han 1919, pero ano an padayon nga ginbubuhat ni Satanas tikang hito nga panahon?

¹⁶ An tagna ha Pahayag kapitulo 11 nagsiring liwat nga an “duha nga saksi” bubuhion utro katapos hin halipot nga panahon. Ha katumanan, may urusahon nga nahitabo waray pa mag-usa ka tuig katapos prisuhon iton dinihogan nga kabugtoan. Temprano han 1919, ginpagawas hira ha prisohan, ngan ha urhi iginbasura an mga akusasyon ha ira. Binalik dayon hira ha ira buruhaton​—an buruhaton han Ginhadian. Pero waray ito makapaundang han pag-atake ni Satanas ha katawohan han Dios. Tikang hito nga panahon, nagpapahinabo hi Satanas hin sugad-“salog” nga pagtimaraot kontra ha ngatanan nga katawohan han Dios. (Pah. 12:15) Oo, “ini nga mga kahimtang nagkikinahanglan hin pagpailob ngan pagtoo” han tagsa ha aton.​—Pah. 13:10.

17. Ano nga diri ginlalaoman nga bulig an nakakarawat han katawohan han Dios, bisan kon gin-aatake hira ni Satanas?

¹⁷ Katapos, iginpapakita han Pahayag kapitulo 12 nga may diri ginlalaoman nga mabulig ha katawohan han Dios. Sugad hin lalamyon han “tuna” an sugad-“salog” nga pagtimaraot. (Pah. 12:16) Ini gud an nahitatabo. May mga panahon nga an iba nga elemento han kalibotan ni Satanas, sugad han pipira nga hudisyal nga sistema, mas masinabuton ngan nabulig ha katawohan han Dios. Damu ka beses nga an mga surugoon ni Jehova nagdaog ha mga kaso ha korte salit medyo nagkaada hira kagawasan. Paonan-o nira ginagamit ini nga kagawasan? Bug-os nga ginsasalingabot nira an bisan ano nga oportunidad nga himoon an buruhaton nga iginhatag ha ira ni Jehova.  (1 Cor. 16:9) Ano an nahiuupod hini nga buruhaton?

18. Ano an aton nangunguna nga buruhaton hinin kataposan nga mga adlaw?

¹⁸ Hi Jesus nagtagna nga ipapasamwak han iya katawohan an “maopay nga sumat han Ginhadian” han Dios ha bug-os nga tuna antes umabot an kataposan. (Mat. 24:14) Ha ira pagsangyaw, ginbubuligan hira han usa nga anghel, o grupo han mga anghel, nga gin-uunabi nga may-ada “waray kataposan nga maopay nga sumat nga ipapasamwak ha mga naukoy ha tuna, ha tagsa nga nasud ngan tribo ngan pinulongan ngan katawohan.”​—Pah. 14:6.

19. Ano an usa pa nga mensahe nga kinahanglan isangyaw hadton nahigugma kan Jehova?

¹⁹ Diri la an maopay nga sumat han Ginhadian an mensahe nga kinahanglan ipasamwak han katawohan han Dios. Kinahanglan liwat nira suportahan an buruhaton han mga anghel nga gin-uunabi ha Pahayag kapitulo 8 tubtob 10. Ini nga mga anghel nagpapasamwak hin sunod-sunod nga peste kontra hadton nagsasalikway han Ginhadian han Dios. Salit an mga Saksi ni Jehova nagpapasamwak hin mensahe han paghukom, nga iginpariho ha “uran nga yelo ngan kalayo,” nga nagsasaysay han mga paghukom han Dios ha iba-iba nga elemento han maraot nga kalibotan ni Satanas. (Pah. 8:7, 13) Kinahanglan mahibaro an mga tawo nga hirani na an kataposan basi makahimo hira hin dagku nga pagbag-o ha ira kinabuhi ngan makatalwas ha adlaw han kasina ni Jehova. (Zep. 2:2, 3) Pero diri damu an naruruyag hito nga mensahe. An pagpasamwak hito nagkikinahanglan hin kaisog. Ha panahon han daku nga kasakitan, an mensahe han ultimo nga paghukom mas makakapasina pa ha mga tawo.​—Pah. 16:21.

20. Ano an aton hihisgotan ha masunod nga duha nga artikulo?

²⁰ Kinahanglan gud naton tumanon an “mga pulong hini nga tagna” kay api kita ha katumanan han aton nababasa ha libro han Pahayag. (Pah. 1:3) Pero paonan-o kita matinumanon nga makakailob ha pagtimaraot ngan makakapadayon ha maisugon nga pagpasamwak hini nga mga mensahe? May duha nga makakaparig-on ha aton: siyahan, an iginsusumat han libro han Pahayag mahitungod ha mga kaaway han Dios, ngan ikaduha, an tiarabot nga mga bendisyon nga aton makakarawat kon magpapabilin kita nga matinumanon. Hihisgotan naton ito nga mga topiko ha masunod nga duha nga artikulo.