1. Ano an igin-aaghat ni Jehova ha iya mga magsiringba? (Kitaa liwat an piktyur.)

 HIN-O an aton madadaopan kon nagkikinahanglan kita hin pagliaw ngan giya? Maaram kita han baton. Puydi kita mag-ampo kan Jehova nga Dios. Ito gud an gin-aaghat ha aton ni Jehova nga Dios. Karuyag niya nga agsob kita mag-ampo—“padayon nga mag-ampo.” (1 Tes. 5:17) Puydi kita mag-ampo ha iya bisan san-o ngan mangaro han iya giya ha ngatanan nga bahin han aton kinabuhi. (Prob. 3:5, 6) Tungod kay mahinatagon gud nga Dios hi Jehova, diri niya ginlilimitahan kon pira ka beses kita puydi mag-ampo ha iya.

2. Ano an hihisgotan ta hini nga artikulo?

² Gin-aapresyar ta gud an regalo nga pag-ampo. Pero tungod kay damu an aton buruhaton, bangin makurian kita pagkaada panahon ha pag-ampo. Bangin abaton ta liwat nga kinahanglan himoon naton nga mas de-kalidad an aton mga pag-ampo. Maopay na la kay damu nga pagdasig ngan giya an aton mababasa ha Kasuratan. Hini nga artikulo, hihisgotan ta an ehemplo ni Jesus basi mahibaroan kon paonan-o kita makakahatag hin panahon ha pag-ampo. Hihisgotan ta liwat an lima nga importante nga topiko nga puydi naton ig-upod ha aton mga pag-ampo basi magin mas de-kalidad ito.

3. Ano an nahibaroan ni Jesus mahitungod ha pag-ampo?

³ Maaram hi Jesus nga importante gud kan Jehova an aton mga pag-ampo. Maiha pa antes hiya kumanhi ha tuna, nakita niya nga ginbaton han iya Amay an mga pag-ampo han matinumanon nga kalalakin-an ngan kababayin-an. Pananglitan, nakadto hi Jesus ha sapit han iya Amay han ginbaton Niya an  sinsero nga mga pag-ampo nira Hana, David, Elias, ngan han iba pa. (1 Sam. 1:10, 11, 20; 1 Hadi 19:4-6; Sal. 32:5) Diri urusahon nga gintutdoan ni Jesus an iya mga disipulo nga mag-ampo hin agsob ngan may kompyansa!—Mat. 7:7-11.

4. Ano an aton mahibabaroan ha mga pag-ampo ni Jesus?

⁴ Pinaagi han mga pag-ampo ni Jesus mismo kan Jehova, naghatag hiya hin ehemplo basi sundon han iya mga disipulo. Ha bug-os niya nga ministeryo, agsob hiya mag-ampo. Kinahanglan niya maghatag hin panahon ha pag-ampo kay agsob hiya nga busy ngan napapalibotan hin damu nga tawo. (Mar. 6:31, 45, 46) Nagmata hiya hin temprano ha aga basi magkaada hiya panahon nga nag-uusahan para mag-ampo. (Mar. 1:35) Ha diri maminos usa nga higayon, nag-ampo hiya ha bug-os nga gab-i antes maghimo hin importante nga desisyon. (Luc. 6:12, 13) Ngan ha gab-i antes hi Jesus mamatay, pauroutro hiya nga nag-ampo nga nakapokus ha pinakamakuri nga bahin han iya toka dinhi ha tuna.—Mat. 26:39, 42, 44.

5. Paonan-o ta masusubad hi Jesus kon nag-aampo kita?

⁵ An ehemplo ni Jesus nagtututdo ha aton nga bisan busy gud kita, kinahanglan maghatag kita hin panahon ha pag-ampo. Pariho kan Jesus, bangin kinahanglan ta maggahin hin panahon ha pag-ampo—pinaagi ha pagmata hin temprano ha aga o diri dayon pagkaturog ha gab-i. Kon ginbubuhat ta ito, iginpapakita naton kan Jehova nga gin-aapresyar ta inin espesyal nga regalo. An sister nga hi Lynne nahinunumdom nga nagpasalamat gud hiya han siyahan nga nahibaroan niya an pribilehiyo nga mag-ampo. Siring niya, “Han nahibaroan ko nga puydi ako makiistorya kan Jehova bisan san-o, nakabulig ito ha akon nga hunahunaon hiya sugad nga akon duok nga Sangkay ngan maruyag nga pauswagon an akon mga pag-ampo.” Sigurado nga damu ha aton an naabat hin sugad hito. Salit hisgotan ta an lima nga importante nga topiko nga puydi naton ig-upod ha aton mga pag-ampo.

6. Sumala ha Pahayag 4:10, 11, ano an angay makarawat ni Jehova?

⁶ Dayawa hi Jehova. Ha usa nga urusahon gud nga bisyon, nakakita hi apostol Juan hin 24 nga tigurang ha langit nga nagsisingba kan Jehova. Gindayaw nira an Dios ngan nagsiring nga angayan hiya kumarawat “han himaya ngan  han dungog ngan han gahum.” (Basaha an Pahayag 4:10, 11.) An matinumanon nga mga anghel may damu liwat nga rason nga dayawon ngan pasidunggan hi Jehova. Aadto hira ha langit kaupod niya ngan nakilala na gud nira hiya. Nakikita nira an iya mga kalidad ha iya mga ginbubuhat. Samtang gin-oobserbaran nira an mga ginbubuhat ni Jehova, napapagios hira nga dayawon hiya.—Job 38:4-7.

7. Ano an puydi naton dayawon kan Jehova?

⁷ Karuyag ta liwat ig-upod ha aton mga pag-ampo an pagdayaw kan Jehova ngan isumat ha iya kon ano an aton naruruyagan ngan gin-aapresyar ha iya. Ha imo pagbasa ngan pag-aram ha Biblia, pangalimbasugi nga mahibaroan an mga kalidad ni Jehova nga imo gud naruruyagan. (Job 37:23; Roma 11:33) Katapos, isumat kan Jehova an imo inaabat parte hito nga mga kalidad. Puydi ta liwat dayawon hi Jehova tungod ha pagbulig niya ha aton ngan ha tanan naton nga kabugtoan. Pirme kita niya gin-aataman ngan ginpuprotektaran.—1 Sam. 1:27; 2:1, 2.

8. Ano an pipira ha damu nga rason kon kay ano nga nagpapasalamat kita kan Jehova? (1 Tesalonica 5:18)

⁸ Pasalamati hi Jehova. Damu an aton rason nga pasalamatan hi Jehova ha aton pag-ampo. (Basaha an 1 Tesalonica 5:18.) Puydi ta igpasalamat ha iya an bisan ano nga maopay nga butang nga may-ada kita; kay kon huhunahunaon, tikang ha iya an tagsa nga maopay nga regalo. (San. 1:17) Pananglitan, puydi ta ipahayag an aton apresasyon ha mahusay nga tuna ngan makaruruyag nga mga linarang. Puydi ta liwat igpasalamat an aton kinabuhi, pamilya, kasangkayan, ngan paglaom. Ngan karuyag naton pasalamatan hi Jehova kay gintutugotan kita niya nga magkaada presyoso nga pakigsangkay ha iya.

9. Kay ano nga bangin kinahanglan ta kultibaron an apresasyon kan Jehova?

⁹ Bangin kinahanglan ta maningkamot gud ha paghunahuna han aton mismo mga rason nga magin mapasalamaton kan Jehova. Nagkikinabuhi kita ha kalibotan nga diri mapasalamaton. An mga tawo agsob nga nakapokus ha kon ano an ira karuyag, diri ha kon ano an ira mahihimo basi maipakita an apresasyon ha kon ano an may-ada hira. Kon matapnan kita hito nga batasan, bangin an aton mga pag-ampo magin puro paghangyo na la. Basi diri ito mahitabo, kinahanglan padayon ta nga kultibaron ngan ipahayag an aton apresasyon ha ngatanan nga ginbubuhat ni Jehova para ha aton.—Luc. 6:45.

10. Paonan-o an pagin mapasalamaton nakabulig ha usa nga sister nga makailob? (Kitaa liwat an piktyur.)

¹⁰ An pagin mapasalamaton makakabulig ha aton nga mailob an mga kakurian. Pansina an eksperyensya han sister nga hi Kyung-sook, nga mababasa ha Enero 15, 2015, nga isyu han An Barantayan. Nadayagnos hiya nga may grabe nga kanser ha baga. “Naapektohan gud ako hini nga problema,” siring niya. “Inabat ko nga baga hin nawara ha akon an ngatanan, ngan nahadlok ako hinduro.” Ano an nakabulig ha iya nga makailob? Siring niya nga kada gab-i antes kumaturog,  napakadto hiya ha atop han ira balay ngan nag-aampo ha daku nga tingog mahitungod ha lima nga butang nga iya iginpapasalamat hito nga adlaw. Tungod hito naliaw hiya ngan napagios nga ipahayag an iya gugma kan Jehova. Naeksperyensyahan niya nga ginbubuligan ni Jehova an Iya matinumanon nga mga surugoon kon naatubang hira hin magkuri nga kahimtang, ngan nasantop niya nga ha aton kinabuhi mas damu an bendisyon kay ha mga pagsari. Pariho kan Kyung-sook, damu an aton rason nga magin mapasalamaton kan Jehova, bisan kon nag-aagi kita hin problema. An aton pagpasalamat ha iya pinaagi han pag-ampo makakabulig ha aton nga makailob ngan makapabilin nga kalmado.

11. Kay ano nga ginkinahanglan han mga disipulo ni Jesus an kaisog han binalik na hi Jesus ha langit?

¹¹ Pangaro kan Jehova hin kaisog ha ministeryo. Antes gud bumalik ha langit, ginpahinumdom ni Jesus ha iya mga disipulo an ira toka nga magsangyaw mahitungod ha iya “ha Jerusalem, ha bug-os nga Judea ngan Samaria, ngan ngadto ha pinakahirayo nga bahin han tuna.” (Buh. 1:8; Luc. 24:46-48) Waray pag-iha, gindakop han Judio nga mga lider hira apostol Pedro ngan Juan ngan gindara hira ha atubangan han Sanhedrin; ginsugo nira inin matinumanon nga kalalakin-an nga diri na magsangyaw ngan gintarhog pa ngani hira. (Buh. 4:18, 21) Ano an nagin reaksyon nira Pedro ngan Juan?

12. Sumala ha Buhat 4:29, 31, ano an ginbuhat han mga disipulo?

¹² Sugad nga baton ha mga tarhog han Judio nga mga lider han relihiyon, hira Pedro ngan Juan nagsiring: “Kon husto ha pagkita han Dios nga mamati ha iyo imbes nga ha Dios, kamo an paghukom. Kondi para ha amon, diri namon mahihimo nga umundang ha pagyakan mahitungod han mga butang nga amon nakita ngan nabatian.” (Buh. 4:19, 20) Han ginpagawas ha prisohan hira Pedro ngan Juan, an mga disipulo nag-ampo kan Jehova mahitungod ha pagbuhat han iya kaburut-on. Nag-ampo hira: “Buligi an imo mga uripon nga padayon nga igyakan nga may bug-os nga kaisog an imo pulong.” Ginbaton ni Jehova iton sinsero nga pag-ampo.—Basaha an Buhat 4:29, 31.

13. Ano an aton mahibabaroan ha ehemplo ni Jin-hyuk?

¹³ Masusubad ta an mga disipulo pinaagi ha padayon nga pagsangyaw bisan kon sugoon kita han gobyerno nga umundang. Hunahunaa an ehemplo ni Jin-hyuk, usa nga brother nga ginpriso tungod han iya pagin neutral. Ha prisohan, gin-asayn hiya nga asikasuhon an pipira nga priso nga nakabartolina, pero waray hiya tuguti nga makiistorya ha ira parte ha bisan ano nga waray kalabotan ha iya asaynment, upod na an mahitungod ha Biblia. Nag-ampo hiya nga magin maisugon ngan mataktika ha pagsangyaw ha tagsa nga higayon. (Buh. 5:29) Nagsiring hiya: “Ginbaton ni Jehova an akon mga pag-ampo pinaagi ha paghatag ha akon hin kaisog ngan kinaadman basi makagtikang hin damu nga singko minutos nga pag-aram ha Biblia ha may purtahan han mga selda. Ngan kon gab-i, naghihimo ako hin mga surat nga ihahatag ko ha mga priso kinabuwasan.” Makakasarig liwat kita nga hi Jehova mabulig ha aton nga matuman an aton ministeryo. Pariho kan Jin-hyuk, puydi kita mag-ampo para hin kaisog ngan kinaadman.

14. Ano an makakabulig ha aton kon naatubang kita hin mga problema? (Salmo 37:3, 5)

¹⁴ Hangyoa hi Jehova nga buligan ka nga mailob an imo mga problema. Damu ha aton an may sakit o problema ha emosyon, namatayan hin hinigugma, makuri an sitwasyon han pamilya, gintitimaraot, o may iba pa nga problema. Ngan damu hini nga mga problema an nagin mas makuri atubangon tungod han mga kahimtang sugad han pandemya ngan girra. Isumat  kan Jehova kon ano gud an imo inaabat. Sumati hiya han imo sitwasyon sugad la nga isusumat mo ito ha duok nga sangkay. Sarig nga hi Jehova ‘magios para ha imo.’—Basaha an Salmo 37:3, 5.

15. Paonan-o an pag-ampo makakabulig ha aton nga “magpailob ha kasakitan”? Paghatag hin ehemplo.

¹⁵ An padayon nga pag-ampo mabulig ha aton nga “magpailob ha kasakitan.” (Roma 12:12) Maaram hi Jehova han gin-aagian han iya mga magsiringba—“namamati hiya han ira pangaraba para hin bulig.” (Sal. 145:18, 19) Napamatud-an ito han 29 anyos nga payunir nga hi Kristie. Diri ginlalaoman nga nagkaada hiya grabe nga mga sakit. Salit nadepres gud hiya. Ha urhi, nahibaroan niya nga an iya nanay nadayagnos nga may sakit nga puydi makamatay. Nagsiring hi Kristie: “Nangamuyo ako kan Jehova nga tagan ako hin kusog nga akon kinahanglan kada adlaw. Nangalimbasog ako nga sundon an maopay nga espirituwal nga rutina pinaagi ha pag-atender ha mga katirok ngan personal nga pag-aram.” Nagsiring liwat hiya: “An pag-ampo nakabulig ha akon nga mailob an makuri nga mga panahon. Maaram ako nga pirme aada hi Jehova, ngan an paghunahuna hito nakaliaw gud ha akon. Bisan kon waray dayon mag-opay an akon mga sakit, ginbaton ni Jehova an akon mga pag-ampo pinaagi ha paghatag ha akon hin murayaw nga hunahuna ngan kalmado nga kasingkasing.” Hinaot diri ta gud hingalimtan nga “maaram hi Jehova kon paonan-o tatalwason an katawohan nga may debosyon ha Dios tikang ha pagsari.”—2 Ped. 2:9.

16. Kay ano nga kinahanglan ta an bulig ni Jehova basi maatohan an pagsulay?

¹⁶ Hangyoa hi Jehova nga buligan ka nga maatohan an pagsulay. Tungod kay diri kita perpekto, kinahanglan pirme ta atohan an pagsulay nga magbuhat hin sayop. Ginbubuhat ni Satanas an tanan nga iya mahihimo basi makurian gud kita pag-ato hito. Usa nga iya ginagamit basi hugawan an aton panhunahuna amo an maraot nga kaliawan. An sugad nga kaliawan makakapuno ha aton hunahuna hin  maghugaw nga ideya—mga ideya nga makakahugaw ha aton pagkatawo ngan mahimo magresulta hin seryoso nga sala.—Mar. 7:21-23; San. 1:14, 15.

17. Paonan-o kita magios uyon ha aton hangyo nga malikyan an pagsulay? (Kitaa liwat an piktyur.)

¹⁷ Kinahanglan ta an bulig ni Jehova kon karuyag naton maatohan an pagsulay nga magbuhat hin sayop. Igin-upod ni Jesus ha modelo nga pag-ampo an masunod nga hangyo: “Ayaw itugot nga masulay kami, kondi talwasa kami tikang ha usa nga maraot.” (Mat. 6:13) Karuyag kita buligan ni Jehova, pero kinahanglan mangaro kita hin bulig ha iya. Kinahanglan gumios liwat kita uyon ha aton mga pag-ampo. Puydi ta himoon an aton pinakamaopay basi malikyan an pagbasa ngan pagpamati ha sayop nga mga ideya nga popular ha kalibotan ni Satanas. (Sal. 97:10) Puydi ta pun-on an aton hunahuna hin mag-opay nga ideya pinaagi ha pagbasa ngan pag-aram han Biblia. An pag-atender ha mga katirok ngan pakigbahin ha ministeryo magpuprotektar liwat ha aton panhunahuna. Ngan hi Jehova nagsasaad nga diri niya itutugot nga sulayon kita labaw han aton maiilob.—1 Cor. 10:12, 13.

18. May kalabotan ha pag-ampo, ano an dapat buhaton ta ngatanan?

¹⁸ Yana labaw kay ha kakan-o pa man, an tagsa ha aton kinahanglan mag-ampo basi makapabilin nga matinumanon kan Jehova hinin makuri nga kataposan nga mga adlaw. Paghatag hin panahon para ha kinasingkasing nga pag-ampo kada adlaw. Karuyag ni Jehova nga ‘isumat ta an ngatanan nga aada ha aton kasingkasing’ pinaagi ha pag-ampo. (Sal. 62:8) Dayawa hi Jehova ngan pasalamati hiya ha ngatanan nga iya ginbubuhat. Hangyoa hiya nga buligan ka nga magin maisugon ha ministeryo. Pakimalooy ha iya nga buligan ka nga mailob an bisan ano nga problema ngan maatohan an bisan ano nga pagsulay nga bangin imo gin-aatubang. Ayaw tuguti an bisan ano o bisan hin-o nga makapugong ha imo ha regular nga pag-ampo kan Jehova. Pero paonan-o ni Jehova ginbabaton an aton mga pag-ampo? Hihisgotan ta iton importante nga pakiana ha sunod nga artikulo.