1. Ha ano nakukurian an damu ha aton?

 NAGHIMO ka na ba hin espirituwal nga tumong pero nakurian ka pagkab-ot hito? b Kon oo, diri ka nag-uusahan. Pananglitan, karuyag ni Philip nga magin mas agsob ngan de-kalidad an iya pag-ampo, pero nakurian hiya pagbiling hin panahon ha pag-ampo. Tumong ni Erika nga umabot antes magtikang an katirok para ha pagsangyaw, pero agsob la gihap hiya atrasado. Hi Tomáš pipira ka beses nga naningkamot pagbasa han bug-os nga Biblia. Siring niya: “Waray ako mag-enjoy pagbasa han Biblia. Tulo ka beses ako nagtesting, pero pirme la ako tubtob ha Levitico.”

2. Kay ano nga diri kita angay mahulop kon waray ta pa makab-ot an aton espirituwal nga tumong?

² Kon may tumong ka yana nga waray mo pa makab-ot, ayaw kahulop. Bisan an pagkab-ot hin simple nga tumong agsob nga nagkikinahanglan hin panahon ngan pangalimbasog. An imo padayon nga paghingyap nga makab-ot an imo tumong nagpapakita nga presyoso ha imo an imo relasyon kan Jehova ngan karuyag mo ihatag ha iya an imo pinakamaopay. Gin-aapresyar ni Jehova an imo mga paningkamot. Syempre, diri hiya naglalaom ha imo hin labaw kay han imo maihahatag. (Sal. 103:14; Mic. 6:8) Salit kon magpipili ka hin tumong, siguroha nga makakab-ot mo ito. Kon may tumong ka na, ano an imo mahihimo basi makab-ot ito? Hisgotan ta an pipira nga suhestyon.

3. Kay ano nga importante an pagkaada daku nga hingyap?

³ Importante gud an pagkaada daku nga hingyap basi makab-ot an espirituwal nga mga tumong. Kon may-ada ka hito nga hingyap, maniningkamot ka gud nga makab-ot an imo tumong. Maipapariho ta ito ha hangin nga nagduduso ha sakayan nga de-layag basi makaabot ha destinasyon hito. Kon padayon nga mahuyop an hangin, posible gud nga makaabot an timonel ha iya destinasyon. Ngan kon makusog an hangin, bangin mas madagmit pa ngani hiya makaabot. Ha pariho nga paagi, kon mas daku an aton hingyap, mas daku an posibilidad nga makab-ot ta an aton mga tumong. “Kon daku an imo hingyap, mas naniningkamot ka,” siring ni David, usa nga brother ha El Salvador. “Nangangalimbasog ka nga diri magpapugong ha bisan ano basi makab-ot an imo tumong.” Salit ano an imo mahihimo basi magkaada mas daku nga hingyap?

4. Ano an puydi ta ig-ampo? (Filipos 2:13) (Kitaa liwat an piktyur.)

⁴ Pag-ampo nga madugangan an imo hingyap. Magagamit ni Jehova an iya espiritu basi pagiuson ka nga kab-uton an imo tumong. (Basaha an Filipos 2:13.) Danay naghihimo kita hin tumong kay maaram kita nga dapat ta ito himoon. Maopay ito. Pero bangin waray gud kita hingyap ha pagkab-ot hito. Ini an inabat ni Norina, usa nga sister ha Uganda. Tumong niya nga magkaada Bible study, pero kulang an iya hingyap kay inabat niya nga diri hiya maopay magtutdo. Ano an nakabulig ha iya? Nagsiring hiya: “Kada adlaw ginhahangyo ko hi Jehova nga buligan ako nga mas hingyapon an pagkaada Bible study. Uyon ha akon mga pag-ampo, naningkamot ako nga pauswagon an akon paagi han pagtutdo. Paglabay hin pipira ka bulan, napansin ko nga nadugangan na an akon hingyap. Hito mismo nga tuig, nagkaada ako duha nga Bible study.”

5. Ano an puydi ta pamalandungon basi madugangan an aton hingyap?

⁵ Pamalandonga an ginbubuhat ni Jehova para ha imo. (Sal. 143:5) Ginpamalandong ni apostol Pablo an diri matupngan nga pagkabuotan ni Jehova ha iya, ngan nagpagios ito ha iya nga magin maduruto ha pag-alagad kan Jehova. (1 Cor. 15:9, 10; 1 Tim. 1:12-14) Ha pariho nga paagi, kon mas ginpapamalandong mo an ginbubuhat ni Jehova para ha imo, mas hihingyapon mo nga makab-ot an imo tumong. (Sal. 116:12) Pansina kon ano an nakabulig ha usa nga sister ha Honduras nga makab-ot an iya tumong nga magin regular payunir. Nagsiring hiya: “Ginpamalandong ko kon ano kadaku an gugma ni Jehova ha akon. Gindara niya ako ha iya katawohan. Gin-aataman niya ako ngan ginpuproteksyonan. An sugad nga pagpamalandong nagparig-on han akon gugma ha iya ngan nakadugang han akon hingyap.”

6. Ano pa an makakabulig ha aton nga madugangan an aton hingyap?

⁶ Pagpokus ha mga bendisyon han pagkab-ot han imo tumong. Pansina kon ano an nakabulig kan Erika, nga gin-unabi na, nga makab-ot an iya tumong nga umabot hin eksakto ha oras. Nagsiring hiya: “Nasantop ko nga daku gud an  nawawara ha akon tungod han pagin late ha ministeryo. Pero kon mas temprano ako nga maabot, makukumusta ko an kabugtoan ngan mahahatagan hira hin panahon. Makakapamati liwat ako ha praktikal nga mga suhestyon nga mabulig ha akon nga mag-enjoy ha akon ministeryo ngan mapauswag ito.” Nagpokus hi Erika ha mga kaopayan han pag-abot nga eksakto ha oras, ngan nakab-ot niya an iya tumong. Ano nga mga bendisyon an puydi mo pokusan? Kon tumong mo nga pauswagon an imo pagbasa han Biblia o pag-ampo, hunahunaa kon paonan-o hito mapaparig-on an imo pakigsangkay kan Jehova. (Sal. 145:18, 19) Kon tumong mo nga magkultibar hin Kristiano nga kalidad, pagpokus ha kon paonan-o hito mapapauswag an imo relasyon ha iba. (Col. 3:14) Puydi mo ilista an tanan nga rason kon kay ano nga karuyag mo makab-ot an imo tumong. Regular nga kitaa ito nga lista. Hi Tomáš, nga gin-unabi na, nagsiring: “Kon mas damu an akon rason ha pagkab-ot han usa nga tumong, mas naniningkamot ako nga makab-ot ito.”

7. Ano an nakabulig kan Julio ngan ha iya asawa nga makab-ot an ira tumong?

⁷ Pakig-upod hadton magdadasig ha imo nga kab-uton an imo tumong. (Prob. 13:20) Pansina kon ano an nakabulig kan Julio ngan ha iya asawa nga makab-ot an ira tumong nga pahaluagon an ira ministeryo. Hi Julio nagsiring: “Nagpili kami hin kasangkayan nga nasuporta han amon tumong, ngan iginsusumat namon ito ha ira. Damu ha ira an nakakab-ot na hin puropariho nga mga tumong, salit nakakahatag hira ha amon hin mag-opay nga suhestyon. Ginkukumusta liwat han amon kasangkayan an amon mga plano, ngan gindadasig nira kami kon kinahanglan namon ito.”

8. Ano an puydi mahitabo kon ginkakab-ot ta la an aton tumong ha mga panahon nga may hingyap kita? (Kitaa liwat an piktyur.)

⁸ Pero an tinuod, may mga panahon nga waray kita gana nga kab-uton an aton tumong. Karuyag sidngon ba nga waray kita mahihimo para makab-ot ito? Diri. Ha pag-ilustrar: An hangin puydi magin makusog nga pwersa nga nagduduso ha sakayan nga de-layag tipakadto ha destinasyon hito. Pero iba-iba an kakusgon han hangin, ngan may mga adlaw nga bangin waray gud hangin. Karuyag sidngon ba nga an timonel diri na makakapadayon? Diri man. Pananglitan, may mga sakayan nga de-layag nga may makina; an iba may mga bugsay. Magagamit ito han timonel basi makapadayon ngadto ha iya destinasyon. Maipapariho ha hangin an aton hingyap; nagbuburobag-o an kakusog hito. Ngan may mga adlaw nga bangin waray kita hingyap nga kab-uton an aton tumong. Salit kon naniningkamot la kita nga kab-uton an aton tumong kon may hingyap kita, bangin diri ta gud ito makab-ot. Pero sugad la nga an timonel namimiling hin iba nga paagi basi makaabot ha iya destinasyon, puydi la gihap kita maningkamot nga makab-ot an aton tumong bisan ha mga panahon nga waray kita hingyap. Bisan kon magkikinahanglan ito hin disiplina ha kalugaringon, sulit an mga resulta. Antes ta hisgotan kon ano an aton mahihimo, hisgotan ta an usa nga pakiana nga bangin bumangon.

9. Dapat ba kita magpadayon ha paningkamot nga kab-uton an aton tumong bisan ha mga panahon nga waray kita hingyap ha pagkab-ot hito? Isaysay.

 ⁹ Karuyag ni Jehova nga malipayon ngan kinaburut-on nga mag-alagad kita ha iya. (Sal. 100:2; 2 Cor. 9:7) Salit dapat ba kita magpadayon ha paningkamot nga kab-uton an aton espirituwal nga tumong bisan kon waray kita hingyap nga makab-ot ito? Pansina an ehemplo ni apostol Pablo. Hiya nagsiring: “Istrikto nga gindidisiplina ko an akon lawas ngan gin-uuripon ito.” (1 Cor. 9:25-27, ftn.) Ginpirit ni Pablo an iya kalugaringon nga buhaton an tama bisan ha mga panahon nga bangin iba an iya karuyag buhaton. Gin-uyonan ba ni Jehova an pag-alagad ni Pablo? Oo! Ngan ginbalosan hiya ni Jehova tungod han iya mga paningkamot.—2 Tim. 4:7, 8.

10. Ano an mga kaopayan han paningkamot nga magkab-ot hin tumong bisan ha mga panahon nga waray kita hingyap?

¹⁰ Ha pariho nga paagi, nalilipay hi Jehova nga makita an aton paningkamot nga kab-uton an aton tumong bisan ha mga panahon nga waray kita hingyap nga buhaton ito. Nalilipay hiya kay bisan kon danay ginbubuhat ta ito diri tungod han aton gugma hito nga buruhaton, maaram hiya nga ginbubuhat ta ito tungod han aton gugma ha iya. Sugad la nga ginbendisyonan ni Jehova hi Pablo, bibendisyonan kita Niya tungod han aton mga pangalimbasog. (Sal. 126:5) Ngan kon nakakarawat naton an bendisyon ni Jehova, bangin hingyapon na naton nga makab-ot an aton tumong. Hi Lucyna, usa nga sister ha Poland, nagsiring: “Danay diri ko karuyag magsangyaw, labi na kon kapoy ako. Bisan pa hito, maopay gud nga regalo an kalipay nga akon inaabat katapos ko magsangyaw.” Salit kitaon ta kon ano an aton mahihimo ha mga panahon nga waray kita hingyap.

11. Paonan-o kita mabubuligan ni Jehova nga maparig-on an aton pagpugong ha kalugaringon?

¹¹ Pag-ampo nga magkaada ka pagpugong ha kalugaringon. An pagpugong ha kalugaringon amo an abilidad nga kontrolon an aton mga pagbati ngan mga buhat. Ini nga termino agsob nga nagpapasabot han pagpugong ha aton kalugaringon ha pagbuhat han maraot. Pero kinahanglan liwat an pagpugong ha kalugaringon basi magbuhat han maopay, labi na kon makuri an usa nga buruhaton o kon waray kita hingyap nga buhaton ito. Hinumdumi nga an pagpugong ha kalugaringon bahin han bunga han espiritu, salit pangaro kan Jehova hin baraan nga espiritu basi mabuligan ka nga makultibar iton importante nga kalidad. (Luc. 11:13; Gal. 5:22, 23) Hi David, nga gin-unabi na, nagsumat kon paonan-o an pag-ampo nakabulig ha iya. Karuyag niya nga magin mas regular ha iya personal nga pag-aram. Nagsiring hiya: “Ginhahangyo ko hi Jehova nga buligan ako nga makultibar an pagpugong ha kalugaringon. Ha bulig niya, nakagtikang ako hin maopay nga rutina han pag-aram ngan nagin regular na ako hito.”

12. Paonan-o an Eclesiastes 11:4 nabulig ha aton nga makab-ot an aton espirituwal nga mga tumong?

¹² Ayaw hulata an perpekto nga kahimtang. Hini nga kalibotan, diri gud kita makakalaom hin perpekto nga kahimtang. Kon huhulaton ta ito, bangin diri gud naton makab-ot an aton tumong. (Basaha an Eclesiastes 11:4.) An brother nga hi Dayniel nagsiring: “Waray perpekto nga kahimtang. Ginhihimo ta an pinakamaopay nga kahimtang kon gintitikangan ta ito.” Hi Paul, usa nga brother ha Uganda, nag-unabi hin usa pa nga rason kon kay ano nga diri kita dapat maglangan-langan: “Kon nagtitikang kita bisan makuri an kahimtang, gintatagan ta hi Jehova hin rason nga bendisyonan kita.”—Mal. 3:10.

13. Ano an mga kaopayan han pagtikang ha gudtiay nga tumong?

¹³ Pagtikang ha gudtiay nga tumong. Bangin waray kita hingyap nga kab-uton an aton tumong kay baga hin makuri gud ito makab-ot. Kon ini an imo kahimtang, puydi ka ba maghimo hin gudtiay nga tumong para makab-ot an imo daku  nga tumong? Kon tumong mo nga kultibaron an usa nga kalidad, puydi ka ba maningkamot anay nga ipakita ito ha gudtiay nga paagi? Kon tumong mo nga mabasa an bug-os nga Biblia, puydi ka ba magtikang pinaagi ha pag-eskedyol hin mas haglipot nga panahon han pagbasa? Hi Tomáš, nga gin-unabi ha tinikangan, nakurian pagkab-ot han iya tumong nga mabasa an Biblia ha sulod hin usa ka tuig. Nagsiring hiya: “Nasantop ko nga an akon napili nga kadagmiton sobra kalaksi para ha akon. Salit nagdesisyon ako nga magtesting utro, pero hini nga higayon, nagplano ako nga magbasa hin pipira la ka parapo kada adlaw ngan pamalandungon ito. Tungod hito, nagtikang ako mag-enjoy ha akon pagbasa.” Tungod kay mas nag-enjoy na hi Tomáš, iya gindugangan an kaihaon han iya pagbasa. Ha urhi, nabasa niya an bug-os nga Biblia. c

14. Ano nga mga ulang an bangin atubangon ta?

¹⁴ Makasurubo nga bisan kon daku an aton hingyap o disiplinado gud kita, bangin may makaulang la gihapon ha aton. Pananglitan, bangin an “diri ginlalaoman nga mga hitabo” makaagaw han panahon nga magagamit ta unta ha pagkab-ot han aton tumong. (Ecles. 9:11) Bangin umatubang kita hin kakurian nga tungod hito manluya kita ngan magin gutiay la an kusog. (Prob. 24:10) Tungod kay diri kita perpekto, puydi kita makahimo hin mga sayop nga tungod hito mas makukurian kita pagkab-ot han aton tumong. (Roma 7:23) O bangin kinakapoy gud la kita. (Mat. 26:43) Ano an makakabulig ha aton nga malamposan an usa nga ulang?

15. Kon may nakakaulang ha aton, karuyag sidngon ba nga pakyas kita? Isaysay. (Salmo 145:14)

¹⁵ Hinumdumi nga kon may ulang, diri ito nagpapasabot nga pakyas ka. An Biblia nasiring nga bangin pauroutro kita nga makaeksperyensya hin mga problema o kakurian. Pero ginkaklaro liwat hito nga puydi kita bumangon utro, labi na ha bulig ni Jehova. (Basaha an Salmo 145:14.) An brother nga hi Philip, nga gin-unabi na, nagsiring: “An akon kalamposan diri nakadepende ha kon makapira ako matumba. Lugod, nakadepende  ito ha kon makapira ako bumangon.” Hi David, nga gin-unabi na, nagsiring: “Naniningkamot ako nga hunahunaon nga an mga ulang diri mga butang nga makakapugong ha akon, kondi mga oportunidad ha pagpakita kan Jehova nga hinigugma ko gud hiya.” Oo, kon nagpapadayon ka la gihapon bisan kon may nakakaulang, ginpapamatud-an mo kan Jehova nga karuyag mo hiya lipayon. Sigurado nga malipayon gud hi Jehova kon iya nakikita nga padayon ka nga naniningkamot ha pagkab-ot han imo tumong!

16. Ano nga leksyon an aton mahibabaroan ha usa nga ulang?

¹⁶ Mahibaro hin leksyon tikang hito nga ulang. Hunahunaa kon ano an nagin hinungdan hito, ngan pakianhi an imo kalugaringon, ‘Ano an akon mahihimo basi diri na ini mahitabo utro?’ (Prob. 27:12) Pero usahay, an mga ulang puydi magpakita nga an usa nga tumong diri praktikal para ha aton. Kon pag-abat mo ini an imo kahimtang, turotimbanga utro an imo tumong basi mahibaroan kon praktikal la ba gihapon ito ha imo. d Diri huhunahunaon ni Jehova nga pakyas ka kon waray mo makab-ot an usa nga tumong nga diri praktikal ha imo.—2 Cor. 8:12.

17. Kay ano nga dapat ta hinumdoman kon ano na an aton nakab-ot?

¹⁷ Hinumdumi kon ano na an imo nakab-ot. An Biblia nasiring nga “an Dios diri kay diri matadong nga kalimtan niya an imo mga buhat.” (Heb. 6:10) Salit diri mo liwat ito dapat kalimtan. Hunahunaa kon ano na an imo nakab-ot—pagkultibar man ito hin pakigsangkay kan Jehova, pag-istorya ha iba mahitungod ha iya, o pagpabawtismo. Sugad la nga nag-uswag ka ngan nakakab-ot hin espirituwal nga mga tumong hadto, puydi ka magpadayon ha pag-uswag tubtob nga makab-ot mo an imo tumong yana.—Fil. 3:16.

18. Ano an dapat ta hinumdoman nga buhaton samtang naniningkamot kita pagkab-ot han aton tumong? (Kitaa liwat an piktyur.)

¹⁸ Ha bulig ni Jehova, puydi mo makab-ot an imo tumong, pariho han timonel nga malipayon nga nakakaabot ha iya destinasyon. Pero hinumdumi nga gin-i-enjoy liwat han damu nga timonel an pagbiyahe. Ha pariho nga paagi, samtang padayon ka nga naniningkamot ha pagkab-ot han imo espirituwal nga tumong, malipay ha pagkita kon paonan-o ka ginbubuligan ngan ginbibendisyonan ni Jehova samtang ginbubuhat mo ito. (2 Cor. 4:7) Kon diri ka maundang, makakakarawat ka hin mas dagku pa gud nga bendisyon.—Gal. 6:9.