1. Ano an paghulagway han Biblia ha tinuod nga gugma?

 “AN MGA laga [han gugma] mga larab han kalayo, an laga ni Jah. An mabalud nga katubigan diri makakaparong han gugma, ngan an mga salog diri makakaanod hito.” b (Kanta ni Solo. 8:6, 7) Maopay gud ito nga paghulagway ha tinuod nga gugma! Ini nga mga pulong usa nga pasarig ha mga mag-asawa: Puydi kamo magkaada diri napapakyas nga gugma ha usa kag usa.

2. Ano an kinahanglan buhaton han mag-asawa basi masiguro nga diri magtugnaw an ira gugma?

² Nakadepende ha mag-asawa an pagkaada diri napapakyas nga gugma samtang buhi hira. Ha pag-ilustrar, an usa nga campfire mahimo la magpadayon nga naglalaga kon pirme ito susung-an. Kon papabay-an ito, an kalayo hinay-hinay nga mapaparong. Ha pariho nga paagi, an paghigugmaay han mag-asawa mahimo la magpabilin nga marig-on kon paririg-unon nira an ira relasyon. May mga panahon nga an mag-asawa mahimo umabat nga an ira gugma nagtutugnaw na, labi na kon nabubug-atan hira han kakurian ha pinansyal, problema ha kahimsog, o han presyur han pagpadaku hin mga anak. Salit kon inasaw-an ka, paonan-o mo matitipigan nga buhi “an laga ni Jah” ha iyo pag-asawa? Hini nga artikulo, hihisgotan ta an tulo nga paagi basi magpabilin nga marig-on an iyo relasyon ngan magkaada malipayon nga pag-asawa. c

3. Paonan-o an marig-on nga relasyon kan Jehova mabulig ha mag-asawa nga matipigan nga buhi an ira gugma? (Eclesiastes 4:12) (Kitaa liwat an piktyur.)

³ Basi magpadayon nga buhi “an laga ni Jah,” kinahanglan pariho nga mangalimbasog an bana ngan asawa ha pagkaada marig-on nga relasyon kan Jehova. Paonan-o ito mabulig ha ira pag-asawa? Kon importante ha mag-asawa an ira pakigsangkay ha ira langitnon nga Amay, malipayon nga gin-aaplikar nira an iya sagdon, nga makakabulig ha ira nga malikyan ngan malamposan an mga problema nga puydi magpatugnaw han ira gugma ha usa kag usa. (Basaha an Eclesiastes 4:12.) An espirituwal nga mga tawo nangangalimbasog liwat nga subaron hi Jehova ngan kultibaron an mga kalidad nga iya iginpapakita, sugad han pagin buotan, pasensyoso, ngan mapinasayloon. (Efe. 4:32–5:1) Kon an mag-asawa nagpapakita hini nga mga kalidad, mas masayon magtubo an ira gugma. An sister nga hi Lena, nga sobra 25 ka tuig na nga inasaw-an, nagsiring, “Masayon higugmaon ngan irespeto an espirituwal nga tawo.”

4. Kay ano nga ginpili ni Jehova hira Jose ngan Maria nga magin mga kag-anak han tiarabot nga Mesias?

⁴ Pansina an usa nga ehemplo ha Biblia. Han kinahanglan ni Jehova magpili hin mag-asawa nga magigin mga kag-anak han tiarabot nga Mesias, hira Jose ngan Maria an Iya ginpili ha damu nga tulin ni David. Kay ano? Pariho hira may personal nga relasyon kan Jehova, ngan maaram hi Jehova nga ira uunahon hiya ha ira pag-asawa. Mga mag-asawa, ano an iyo mahibabaroan kan Jose ngan kan Maria?

5. Ano an mahibabaroan han mga bana kan Jose?

⁵ Kinaburut-on nga sumunod hi Jose ha paggiya ni Jehova, ngan tungod hito nagin mas maopay hiya nga bana. Ha diri maminos tulo nga higayon, nakakarawat hiya hin mga instruksyon tikang ha Dios parte ha iya pamilya. Ha tagsa hito nga mga higayon, sinugot dayon hiya, bisan kon nagpasabot ito hin paghimo hin dagku nga pagbag-o. (Mat. 1:20, 24; 2:13-15, 19-21) Pinaagi ha pagsunod ha giya han Dios, ginprotektahan, ginsuportahan, ngan gintaganahan ni Jose hi Maria. An mga ginbuhat ni Jose sigurado nga nagpahilarom han gugma ngan respeto ni Maria ha iya! Mga bana, masusubad niyo hi Jose pinaagi ha pagpamiling hin sagdon nga basado ha Biblia mahitungod ha pag-ataman ha iyo pamilya. d Kon iyo gin-aaplikar ini nga sagdon bisan kon nagpapasabot ito hin paghimo hin mga pagbag-o, iginpapakita niyo an iyo gugma ha iyo asawa ngan ginpaparig-on an iyo pag-asawa. An usa nga sister ha Vanuatu nga sobra 20 ka tuig na nga inasaw-an nagsiring: “Kon an akon bana namimiling ngan nasunod han giya ni Jehova, mas ginrirespeto ko hiya. Inaabat ko nga talwas ako, ngan natapod ako ha iya mga desisyon.”

6. Ano an mahibabaroan han mga asawa kan Maria?

⁶ May kalugaringon nga relasyon hi Maria kan  Jehova; an iya pagtoo diri nakadepende ha kon ano an ginbubuhat ni Jose. Maaram gud hiya han Kasuratan. (Luc. 1:46) Naggahin liwat hiya hin panahon ha pagpamalandong. (Luc. 2:19, 51) Sigurado nga nagin maopay gud nga asawa hi Maria tungod han iya espirituwalidad. Yana, damu nga asawa an naniningkamot nga subaron an ginbuhat ni Maria. Pananglitan, an sister nga hi Emiko nagsiring: “Han solo pa ako, may kalugaringon ako nga espirituwal nga rutina. Pero han nag-asawa na ako, nasantop ko nga tungod kay an akon bana nag-aampo para ha amon ngan nangunguna ha pagsingba, an akon pagtoo nakadepende na la ha kon ano an iya ginbubuhat. Nasabtan ko nga ako mismo an kinahanglan magparig-on han akon relasyon kan Jehova. Salit yana naggagahin ako hin panahon nga mag-usahan kaupod han akon Dios—nag-aampo, nagbabasa han Kasuratan, ngan namamalandong ha iya mga panhunahuna.” (Gal. 6:5) Mga asawa, samtang padayon niyo nga ginpaparig-on an iyo pakigsangkay kan Jehova, an iyo bana mas magkakaada rason nga dayawon ngan higugmaon kamo.—Prob. 31:30.

7. Ano an mahibabaroan han mag-asawa kanda Jose ngan Maria mahitungod ha pagsingba nga magkaupod?

⁷ Hira Jose ngan Maria nagbinuligay liwat basi magpabilin nga marig-on an ira relasyon kan Jehova. Maaram hira nga importante an urosa nga pagsingba kan Jehova sugad nga pamilya. (Luc. 2:22-24, 41; 4:16) Bangin makuri an pagbuhat hito, labi na samtang nagtitikadaku an pamilya, pero nakaya nira ito. Maopay gud ito nga ehemplo para ha mga mag-asawa yana! Kon may mga anak kamo, pariho kanda Jose nga Maria, bangin makuri an pag-atender ha mga katirok o pag-eskedyol hin panahon para ha pagsingba han pamilya. Bangin mas makuri pa ngani an pagkaada panahon ha pag-aram o pag-ampo nga magkaupod sugad nga mag-asawa. Pero hinumdumi nga kon magkaupod kamo nga nagsisingba kan Jehova, nagigin mas duok kamo ha iya ngan ha usa kag usa. Salit himoa nga prayoridad an pagsingba.

8. Kon may problema an pag-upod han usa nga mag-asawa, ano an ira mahihimo basi mas magpahimulos ha pagsingba han pamilya?

⁸ Ano man kon may mga problema an iyo pag-asawa? Bangin diri makaruruyag para ha imo an paghunahuna nga magkakaupod kamo ha pagsingba han pamilya. Kon sugad, tikangi pinaagi ha paghisgot hin halipot ngan nakaka-enjoy nga mga topiko nga ginkauyonan niyo nga hisgotan. Makakaparig-on ini han iyo relasyon ngan han iyo hingyap ha pagbuhat hin espirituwal nga mga butang sugad nga mag-asawa.

9. Kay ano nga an bana ngan asawa kinahanglan magkaada panahon para ha usa kag usa?

⁹ Mga mag-asawa, matitipigan liwat niyo nga buhi an iyo gugma pinaagi ha pagkaada panahon nga magkaupod. Kon ginbubuhat niyo ito, mas gutiay an posibilidad nga magpahirayo an iyo hunahuna ngan emosyon ha usa kag usa. (Gen. 2:24) Pansina kon ano an nadiskobrehan nira Lilia ngan Ruslan waray pag-iha katapos nira magpakasal, sobra 15 ka tuig na an naglabay. Nagsiring hi Lilia: “Nasantop namon nga diri kami magkakaada daku nga panahon nga magkaupod pariho han amon ginlalaoman hadto. Busy gud kami ha sekular nga trabaho, buruhaton ha balay, ngan ha urhi ha amon mga anak. Nahunahuna namon nga kon diri kami maggagahin hin panahon para ha usa kag usa, posible nga diri na kami magin duok.”

10. Paonan-o maiaaplikar han mga mag-asawa an prinsipyo ha Efeso 5:15, 16?

¹⁰ Paonan-o masisiguro han mga mag-asawa nga magkakaada hira panahon nga magkaupod? Bangin kinahanglan kamo maghatag, o mag-eskedyol, hin panahon para ha usa kag usa. (Basaha an Efeso 5:15, 16.) An brother nga hi Uzondu ha Nigeria nagsiring: “Kon nag-ieskedyol  ako han akon mga buruhaton, igin-uupod ko hito an panahon nga magkakaupod kami han akon asawa, ngan ginhihimo ko nga prayoridad ito nga panahon.” (Fil. 1:10) Pansina kon ano an ginhihimo ni Anastasia, nga asawa han usa nga paramangno han sirkito ha Moldova, basi magamit ha pinakamaopay nga paagi an iya panahon. Nagsiring hiya: “Nangangalimbasog ako nga himoon an akon personal nga mga buruhaton samtang an akon bana busy ha iya mga responsabilidad. Hito nga paagi, magkakaada kami panahon nga magkaupod ha urhi.” Pero ano man kon nakukurian kamo nga magkaada panahon nga magkaupod tungod han iyo mga eskedyol?

11. Ano nga mga buruhaton an ginbuhat nira Aquila ngan Priscilla nga magkaupod?

¹¹ An mga mag-asawa may mahibabaroan ha ehemplo nira Aquila ngan Priscilla, usa nga mag-asawa nga gin-aapresyar han damu nga Kristiano ha siyahan nga siglo. (Roma 16:3, 4) Bisan kon an Biblia diri naghahatag hin damu nga detalye parte ha ira pag-asawa, nagsusumat ito nga magkaupod hira nga nagtrabaho, nagsangyaw, ngan binulig ha iba. (Buh. 18:2, 3, 24-26) Ngani, kon gin-uunabi han Biblia hira Aquila ngan Priscilla, pirme hira magkaupod.

12. Ano an puydi buhaton han mag-asawa basi mas magkaada hira panahon nga magkaupod? (Kitaa liwat an piktyur.)

¹² Paonan-o masusubad han mga mag-asawa hira Aquila ngan Priscilla? Hunahunaa an damu nga butang nga kinahanglan niyo buhaton han imo padis. Puydi ba niyo buhaton nga magkaupod an pipira hito imbes nga nag-uusahan la? Pananglitan, magkaupod nga nagsangyaw hira Aquila ngan Priscilla. Regular ba kamo nga nagpaplano nga buhaton ito? Magkaupod liwat nga nagtrabaho hira Aquila ngan Priscilla. Bangin diri pariho an iyo trabaho han imo padis, pero puydi ba niyo buhaton nga magkaupod an mga buruhaton ha balay? (Ecles. 4:9) Kon nagbibinuligay kamo ha pagbuhat han usa nga trabahoon, mas aabaton niyo nga usa kamo nga team ngan may oportunidad kamo nga makag-istorya. Hira Robert ngan Linda sobra 50 ka tuig na nga mag-asawa. Nagsiring hi Robert: “Ha tinuod la, waray kami daku nga panahon nga magkaupod ha pagpahalibway. Pero kon nanhuhugas ako ngan an akon asawa an nagtatrapo hito o kon naggagarden ako ngan napakadto hiya basi bumulig ha akon, nalilipay gud ako. An pagbuhat han mga butang nga magkaupod nabulig ha amon nga magin duok ha usa kag usa. An amon gugma padayon nga naghihilarom.”

13. Basi magin tinuod nga duok ha usa kag usa, ano an dapat buhaton han mag-asawa?

¹³ Pero hinumdumi nga an pagin magkaupod la diri pirme nangangahulogan nga an mag-asawa magigin duok na ha usa kag usa. Usa nga asawa ha Brazil an nagsiring: “Yana, busy gud kita salit masayon la maghunahuna nga may panahon kami nga magkaupod sugad nga mag-asawa tungod la kay naukoy kami ha uusa nga balay. Nahibaroan ko nga diri igo an pagin magkaupod la. Dapat ko liwat ihatag ha akon bana an atensyon nga iya ginkikinahanglan.” Pansina  kon paonan-o ginsisiguro ni Bruno ngan han iya asawa nga hi Tays nga makaghatag hin atensyon ha usa kag usa. Nagsiring hi Bruno: “Ha bakante nga panahon nga magkaupod kami, diri kami nagamit hin celfon ngan gin-i-enjoy namon an amon pagkaupod.”

14. Kon an mag-asawa diri nag-i-enjoy ha pagkaada panahon nga magkaupod, ano an ira mahihimo?

¹⁴ Pero ano man kon kamo han imo padis diri nag-i-enjoy ha pagkaada panahon nga magkaupod? Bangin magkaiba an iyo mga hilig, o bangin naaaringit kamo ha usa kag usa. Ano an iyo mahihimo? Hunahunaa an campfire nga gin-unabi na. Diri dayon nadaku an kalayo hito. Kinahanglan hinay-hinay nga sung-an ito hin dagku nga sungo. Ha pariho nga paagi, puydi kamo magtikang pinaagi ha pagkaada haglipot nga takna nga magkaupod kamo kada adlaw. Siguroha nga hihimoon niyo an pariho niyo mai-enjoy, diri an posible niyo pag-awayan. (San. 3:18) Kon magtitikang kamo ha gudtiay nga butang, puydi niyo mapalaga utro an iyo gugma.

15. Kay ano nga importante an respeto basi magpabilin nga buhi an gugma han mag-asawa?

¹⁵ Importante ha pag-asawa an respeto. Pariho ito han oxygen nga nakakabulig basi dumaku gud an laga han campfire. Kon waray oxygen, madagmit nga mapaparong an kalayo. Ha pariho nga paagi, kon waray respeto, an gugma han mag-asawa bangin malaksi nga magtugnaw. Ha luyo nga bahin, an mag-asawa nga nangangalimbasog nga ipakita an respeto ha usa kag usa naniningkamot nga tipigan nga buhi an ira gugma. Pero hinumdumi nga an importante, diri kon naghuhunahuna ka nga nagpapakita ka hin respeto, lugod kon gin-aabat ba han imo padis nga ginrirespeto hiya. Hira Penny ngan Aret sobra 25 ka tuig na nga mag-asawa. Nagsiring hi Penny: “Tungod kay may respeto kami ha usa kag usa, puno hin gugma an amon panimalay. Diri kami nag-aalang pagpahayag han amon inaabat kay maaram kami nga importante ha amon an mga opinyon han kada tagsa.” Salit ano an imo mahihimo basi buligan an imo padis nga umabat nga ginrirespeto mo gud hiya? Hunahunaa an ehemplo nira Abraham ngan Sarah.

16. Ano an mahibabaroan han mga bana ha ehemplo ni Abraham? (1 Pedro 3:7) (Kitaa liwat an piktyur.)

¹⁶ May respeto an pagtratar ni Abraham kan Sarah. Namati hiya ha mga opinyon ni Sarah ngan ginrespeto an iya mga inaabat. Makausa, nasakit hi Sarah, ngan iginpahungaw niya kan Abraham an iya inaabat ngan ginbasol pa ngani hiya. Binaton ba hi Abraham nga nasisina? Waray. Maaram hiya nga hi Sarah mapinasakupon ngan mabinuligon nga asawa. Namati hi Abraham ha iya ngan naningkamot nga sulbaron an problema. (Gen. 16:5, 6) Ano nga leksyon an aton mahibabaroan? Mga bana, may awtoridad kamo ha paghimo hin mga desisyon para ha iyo pamilya. (1 Cor. 11:3) Pero mahigugmaon an pagkonsiderar han opinyon han imo asawa antes magdesisyon, labi na kon an desisyon makakaapekto ha iya. (1 Cor. 13:4, 5) Ha iba nga mga panahon, bangin maistres an imo asawa ngan  bangin kinahanglan niya isumat an iya inaabat. Ginrirespeto mo ba an iya mga inaabat pinaagi ha pagpamati hin maopay? (Basaha an 1 Pedro 3:7.) Hira Angela ngan Dmitry haros 30 ka tuig na nga mag-asawa. Iginsumat ni Angela kon paonan-o iginpapaabat han iya bana nga ginrirespeto hiya: “Hi Dmitry andam pirme mamati ha akon kon nasusubo ako o kon karuyag ko la makiistorya. Pasensyoso hiya ha akon, bisan ha mga panahon nga emosyonal gud ako.”

17. Ano an mahibabaroan han mga asawa ha ehemplo ni Sarah? (1 Pedro 3:5, 6)

¹⁷ Ginrespeto ni Sarah hi Abraham pinaagi ha pagsuporta han iya mga desisyon. (Gen. 12:5) Makausa, nagdesisyon hi Abraham nga abiabihon an diri ginlalaoman nga mga bisita. Ginhangyo niya hi Sarah nga iundang an iya ginbubuhat ngan mag-andam hin damu nga tinapay. (Gen. 18:6) Ginios dayon hi Sarah ngan ginsuportahan an desisyon ni Abraham. Mga asawa, masusubad niyo hi Sarah pinaagi ha pagsuporta ha mga desisyon han iyo bana. Kon ginbubuhat niyo ito, ginpaparig-on niyo an iyo pag-asawa. (Basaha an 1 Pedro 3:5, 6.) Hi Dmitry, nga gin-unabi ha nauna nga parapo, nagsumat kon paonan-o iginpapaabat han iya asawa nga ginrirespeto niya hiya. Nagsiring hiya: “Gin-aapresyar ko an pangalimbasog ni Angela nga suportahan an akon mga desisyon, bisan kon magkaiba an amon opinyon. Bisan kon diri maopay an resulta, diri niya ako ginbabasol.” Masayon gud la higugmaon an usa nga narespeto ha imo!

18. Paonan-o an mag-asawa nagpapahimulos kon nangangalimbasog hira nga matipigan nga buhi an ira gugma?

¹⁸ Yana, karuyag ni Satanas parungon an gugma nga nakikita ha Kristiano nga mga pag-asawa. Maaram hiya nga kon mawara an gugma han mag-asawa ha usa kag usa, bangin hinay-hinay nga magpahirayo hira kan Jehova. Pero an tinuod nga gugma diri mapaparong! Salit hinaot an gugma ha iyo pag-asawa magin pariho ha gugma nga iginhulagway ha Kanta ni Solomon. Magin determinado nga unahon hi Jehova ha iyo pag-asawa, paghatag hin panahon ha usa kag usa, ngan irespeto an pagbati ngan panginahanglan han usa kag usa. Kon bubuhaton niyo ito, an iyo pag-asawa maghahatag hin kadayawan ha gintitikangan han tinuod nga gugma, hi Jehova, ngan pariho hin kalayo nga pirme ginsusung-an, an iyo gugma padayon nga magririg-on samtang buhi kamo.