IMPORTANTE gud ini nga katirok ha Jerusalem. Iginpatawag ni Hadi David an ngatanan niya nga prinsipe, opisyal, ngan makusog nga mga tawo. Makakabati hira hin espesyal nga pahibaro. Gintokahan ni Jehova an anak ni David nga hi Solomon nga magtukod hin waray kapariho nga istraktura para ha pagsingba ha tinuod nga Dios. Pinaagi han espiritu han Dios, nakarawat hinin lagas na nga hadi han Israel an plano han istraktura ngan iginhatag ito kan Solomon. Hi David nagsiring: “An buruhaton daku; kay an palasio diri para ha tawo kondi para kan Jehova nga Dios.”—1 Kron. 28:1, 2, 6, 11, 12; 29:1.

Katapos, hi David nagpakiana: “Hin-o ha iyo in may-ada kasingkasing hin paghatag hin regalo para [kan Jehova]?” (1 Cron. 29:5, Maupay nga Sumat) Kon nakadto ka hito nga hitabo, susuportaran mo ba ito nga daku nga buruhaton? Ito gud an ginhimo han mga Israelita. Ngani, hira ‘nagkalipay kay ha hingpit nga kasingkasing hira nagtanyag [hin mga halad] ha kinasingkasing kan Jehova.’—1 Kron. 29:9.

Paglabay hin mga siglo, hi Jehova naghimo hin mas labaw hito nga templo—an daku nga espirituwal nga templo, an kahikayan ha pagsingba ha Dios pinaagi han halad ni Jesus. (Heb. 9:11, 12) Paonan-o iginpapahiuli ni Jehova ha iya an mga tawo yana? Pinaagi han aton pagsangyaw ngan pagtutdo nga buruhaton. (Mat. 28:19, 20) Sugad nga resulta, minilyon an gindudumarahan hin pag-aram ha Biblia, yinukot an nababawtismohan, ngan ginatos nga kongregasyon an napuporma.

Tungod hito nga pag-uswag, kinahanglan hin mas damu nga literatura nga basado ha Biblia, magtukod ngan magmintinar hin mga Kingdom Hall, ngan magkaada mga katirokan para ha asembleya ngan kombensyon. Diri ka ba mauyon nga an pagpasamwak han maopay nga sumat daku ngan makalilipay nga buruhaton?—Mat. 24:14.

An gugma ha Dios ngan ha igkasi-tawo ngan an pagkaapurado han pagsangyaw nga buruhaton nagpapagios ha aton nga ‘maghatag hin regalo’ para kan Jehova pinaagi hin kinasingkasing nga mga donasyon. Makalilipay gud nga ‘pasidunggan hi Jehova pinaagi han aton manggad’ ngan makita kon paonan-o ito husto ngan maaramon nga ginagamit basi suportaran an pinakadaku nga buruhaton ha kasaysayan han tawo!—Prob. 3:9.