1, 2. Kay ano nga importante an pagparig-on?

“WARAY pa gud ako makabati nga gindasig ako han akon mga kag-anak, lugod pirme la nira ako gintatamay. Ngan nasasakitan gud ako han ira mga ginyayakan,” siring han 18 anyos nga hi Cristina. ^[1] “Ginsisidngan nira ako nga waray buot, bulok, ngan matambok. Salit agsob ako magtangis ngan diri na ako naruruyag pakiistorya ha ira. Inaabat ko nga waray ako pulos.” Oo, makasurubo gud an kinabuhi kon waray pagdasig!

² An pagdasig o pagparig-on may maopay gud nga epekto. Hi Rubén nagsiring: “Maiha na ako nga naabat hin kawaray-pulos. Pero makausa, nagsangyaw ako kaupod han usa nga tigurang ngan naobserbaran niya nga masurub-on ako. Namati hiya hin maopay ha akon samtang iginsusumat ko an akon inaabat. Katapos, iginpahinumdom niya ha akon an mag-opay ko nga ginbubuhat. Iginpahinumdom liwat niya ha akon an ginsiring ni Jesus—nga an kada tagsa ha aton mas importante kay ha damu nga maya. Agsob ko mahinumdoman ito nga teksto, ngan padayon ito nga nakakaparig-on ha akon. Daku gud an nagin epekto ha akon han ginsiring han tigurang.”—Mat. 10:31.

3. (a) Ano an ginsiring ni apostol Pablo may kalabotan ha pagparig-onay? (b) Ano an aton hihisgotan hini nga artikulo?

 ³ Diri urusahon nga ginpapabug-atan han Biblia nga kinahanglan an padayon nga pagparig-onay. Hi apostol Pablo nagsurat ha Hebreo nga mga Kristiano: “Mga kabugtoan, pag-ikmat kamo nga waray bisan usa ha iyo nga magkaada maraot nga kasingkasing nga waray pagtoo pinaagi ha pagbaya ha buhi nga Dios; pero kada adlaw padayon nga magparig-onay kamo . . . basi waray bisan usa ha iyo an magin matig-a an kasingkasing tungod han nakakalimbong nga gahum han sala.” (Heb. 3:12, 13) Mas nasasabtan mo an pagkaimportante han sagdon nga magparig-onay kon naparig-on ka na han iba. Salit tagdon naton ini nga mga pakiana: Kay ano nga importante an pagparig-on? Ano an aton hibabaroan han paagi ni Jehova, ni Jesus, ngan ni Pablo ha pagparig-on ha iba? Ngan paonan-o kita magigin epektibo ha pagparig-on ha iba?

4. Hin-o an nagkikinahanglan hin pagdasig, pero kay ano nga an kadam-an yana diri naghahatag hin pagdasig?

⁴ Kita ngatanan nagkikinahanglan hin pagparig-on o pagdasig. Importante gud ito labi na kon nagtitikaadulto kita. “An kabataan . . . nagkikinahanglan hin pagdasig pariho hin tanom nga nagkikinahanglan hin tubig,” siring han usa nga magturutdo nga hi Timothy Evans. “Kon gindadasig an usa nga bata, inaabat niya nga may maopay hiya nga nahihimo ngan gin-aapresyar hiya.” Pero nagkikinabuhi na kita ha peligroso gud nga mga panahon. An mga tawo mga hakog, nawawarayan na gugma ha ira mga kapamilya, ngan talagsa na la maghatag hin pagdasig. (2 Tim. 3:1-5) Diri ginkukumendasyonan han pipira nga kag-anak an ira mga anak tungod kay hira mismo waray makakarawat hin bisan ano nga pagdasig tikang ha ira mga kag-anak. Damu nga empleyado an diri ginkukumendasyonan, salit inaabat nira nga diri gin-aapresyar an ira trabaho.

5. Ano an nahiuupod han pagparig-on?

⁵ An pagparig-on o pagdasig kasagaran nga nag-uupod hin paghatag hin kumendasyon ha maopay nga ginbuhat han usa. Mapaparig-on liwat naton an iba pinaagi ha pag-apresyar han ira mag-opay nga kalidad o ‘pagliaw ha mga nasusubo.’ (1 Tes. 5:14) An Griego nga pulong nga kasagaran nga iginhuhubad nga “pagparig-on” o “pagdasig” literal nga nangangahulogan hin “pagtawag nga sumapit ha usa.” Samtang padayon kita nga nag-aalagad kaupod han aton kabugtoan, posible nga may mga higayon kita nga parig-unon hira. (Basaha an Eklesiastes 4:9, 10.) Namimiling ba kita hin higayon nga sumatan an iba kon kay ano nga hinigugma ngan gin-aapresyar naton hira? Antes naton ito batunon, maopay nga hunahunaon naton ini nga puplunganon: “An polong ha panahon nga iginkikinahanglan, pagkamaopay hini!”—Prob. 15:23.

6. Kay ano nga karuyag han Yawa nga manluya kita? Pag-unabi hin ehemplo.

⁶ Karuyag gud ni Satanas nga manluya kita kay maaram hiya nga an panluya makakadaot han aton espirituwalidad ngan ha iba pa nga paagi. An Proberbios 24:10 nasiring: ‘Kon ikaw maharaptay ha adlaw han kakurian. An imo kusug gutiay.’ Gin-gamit ni Satanas an mga trahedya ngan akusasyon basi paluyahon an matadong nga hi Job, pero waray maglampos ito nga taktika. (Job 2:3; 22:3; 27:5) Maaatohan naton an mga buhat han Yawa kon paparig-unon naton an aton mga kapamilya ngan mga kakongregasyon. Mabulig ini nga an kada tagsa magin malipayon ngan magkaada kasigurohan.

7, 8. (a) Ano nga mga ehemplo ha Biblia an nagpapakita nga importante kan Jehova an paghatag hin pagparig-on? (b) Paonan-o masusubad han mga kag-anak an ehemplo ni Jehova? (Kitaa an retrato ha tinikangan hini nga artikulo.)

⁷ Hi Jehova. An salmista nagkanta: “Hi Jehova  harani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” (Sal. 34:18) Han nahadlok ngan nanluya an matinumanon nga propeta nga hi Jeremias, ginparig-on hiya ni Jehova. (Jer. 1:6-10) Sigurado nga naparig-on gud an lagas na nga propeta nga hi Daniel han nagsugo an Dios hin anghel basi parig-unon hiya. Gintawag hiya hito nga anghel nga ‘hinigugma gud’! (Dan. 10:8, 11, 18, 19) Mahimo mo ba liwat parig-unon an nanluluya nga mga magwarali, payunir, ngan edaran nga kabugtoan?

⁸ Bisan kon maiha hinduro nga nagkaupod hi Jehova ngan an iya hinigugma nga Anak, waray niya hunahunaa nga diri na kinahanglan kumendasyonan ngan parig-unon hi Jesus han nakanhi hiya ha tuna. Lugod, duha ka beses nga nabatian ni Jesus nga nagyakan an iya Amay tikang ha langit: “Ini an akon Anak nga hinigugma, nga akon nalilipayan.” (Mat. 3:17; 17:5) Oo, ginkumendasyonan han Dios hi Jesus ngan ginpasarig nga maopay an iya ginbubuhat. Sigurado nga nagparig-on hi Jesus han nabatian niya ini nga mga pulong ha duha nga kahimtang—ha tinikangan han iya ministeryo ngan ha ultimo nga tuig han iya kinabuhi. Nagsugo liwat hi Jehova hin anghel basi parig-unon hi Jesus tungod han duro nga kasubo han gab-i antes hiya mamatay. (Luc. 22:43) Kon usa ka nga kag-anak, masusubad mo an ehemplo ni Jehova pinaagi ha pagdasig pirme ha imo anak ngan paghatag hin kumendasyon kon may nahihimo hiya nga maopay. Sadang mo liwat hira buligan nga malamposan an mga pagsari nga ira gin-aatubang ha eskwelahan kada adlaw.

9. Ano an aton hibabaroan ha paagi han pagtratar ni Jesus ha iya mga disipulo?

⁹ Hi Jesus. Han gab-i han gintikangan ni Jesus an Memoryal, nakita niya an usa nga negatibo nga kalidad han iya mga apostol, an pagin mapahitas-on. Mapainubsanon nga ginhimsawan niya hira, pero padayon hira nga nagdiskusyon kon hin-o ha ira an may gidadakui nga awtoridad; ngan hi Pedro sobra an kompyansa ha kalugaringon. (Luc. 22:24, 33, 34) Bisan pa hito, ginkumendasyonan niya an iya matinumanon nga mga apostol tungod han ira padayon nga pagsunod ha iya bisan ha mga pagsari. Nagtagna hiya nga magbubuhat hira hin durodaku kay han iya ginbuhat, ngan ginpasarig hira nga hinigugma hira han Dios. (Luc. 22:28; Juan 14:12; 16:27) Mahimo naton pakianhan an aton kalugaringon, ‘Ginsusubad ko ba hi Jesus pinaagi ha paghatag hin kumendasyon ha akon anak ngan ha iba tungod han mag-opay nga ira ginbubuhat imbes nga magpokus ha ira mga kaluyahan?’

10, 11. Paonan-o iginpakita ni Pablo nga importante gud an pagparig-on ha iba?

¹⁰ Hi apostol Pablo. Ha mga surat ni Pablo, ginkumendasyonan niya an iya mga igkasi-Kristiano. Nagbiyahe hiya kaupod nira ha sulod hin mga katuigan ngan sigurado nga maaram hiya han ira mga kaluyahan, pero positibo an iya mga ginsiring mahitungod ha ira. Pananglitan, iginhulagway ni Pablo hi Timoteo sugad nga iya “hinigugma ngan matinumanon nga anak ha Ginoo,” an usa nga sinsero nga magmamangno ha panginahanglan han mga Kristiano. (1 Cor. 4:17; Fil. 2:19, 20) Ha surat ni Pablo ha kongregasyon han Corinto, iya ginkumendasyon hi Tito ha pagsiring: “Hiya an akon kaupod-upod ngan igkasi-magburuhat para ha iyo kaopayan.” (2 Cor. 8:23) Sigurado nga naparig-on gud hira Timoteo ngan Tito han hinbaroan nira an pagtagad ha ira ni Pablo!

¹¹ Iginbutang ha peligro nira Pablo ngan Bernabe an ira kinabuhi pinaagi ha pagbalik ha mga lugar diin nag-antos hira hin madarahog nga pag-atake. Pananglitan, bisan kon inatubang hira hin duro nga pagkontra ha Listra, binalik hira didto basi dasigon an bag-o nga mga disipulo nga magmatinumanon. (Buh. 14:19-22) Ha Efeso, inatubang hi Pablo ha nasisina nga grupo. An Buhat 20:1, 2 nasiring: “Katapos han samok, iginpatawag ni Pablo an mga disipulo, ngan kahuman hira parig-unon, nagsiring hiya nga malakat na hiya, ngan kinadto hiya ha Macedonia. Katapos niya libuton  ito nga mga rehiyon ngan parig-unon an mga disipulo didto pinaagi hin damu nga pulong, kinadto hiya ha Gresya.” Importante gud kan Pablo an pagparig-on ha iba.

12. Ano an katuyoan han aton mga katirok?

¹² Mahigugmaon nga naghikay an aton langitnon nga Amay hin regular nga mga katirok basi makaghatag ngan makakarawat kita hin pagdasig. (Basaha an Hebreo 10:24, 25.) Pariho han mga sumurunod ni Jesus ha siyahan nga siglo, nagkakatirok kita basi mahibaro ngan maparig-on. (1 Cor. 14:31) Hi Cristina nga gin-unabi ha tinikangan hini nga artikulo, nagsiring: “Naruruyagan ko gud an mga katirok tungod han gugma ngan pagparig-on han kabugtoan. Usahay masurub-on ako nga naabot ha Kingdom Hall. Pero may mga sister nga nadaop ha akon, ginhahangkopan ako, ngan nasiring nga mahusay ako. Ginsisidngan nira ako nga hinigugma nira ako ngan nalilipay hira nga makita an akon espirituwal nga pag-uswag. Napaparig-on gud ako ha ira mga pagdasig!” Makalilipay gud kon an ngatanan nakikigbahin ha ‘pagdinasigay’!—Roma 1:11, 12.

13. Kay ano nga an mag-iha na nga mga surugoon han Dios nagkikinahanglan hin pagparig-on?

¹³ Bisan an mag-iha na nga mga surugoon han Dios nagkikinahanglan hin pagparig-on. Tagda pananglitan hi Josue. Matinumanon hiya nga nag-alagad ha Dios ha sulod hin damu nga katuigan. Pero ginsidngan ni Jehova hi Moises nga parig-unon hiya. Hi Jehova nagsiring: ‘Sugoa hi Josue, ngan dasiga hiya ngan parig-ona; kay hiya matabok ha atubangan hini nga katawohan, ngan hiya mag-aaghat ha ira ha pagpanunod han tuna nga imo makikita.’ (Deut. 3:27, 28) Hi Josue an makarawat han mabug-at nga responsabilidad nga manguna ha mga Israelita ha pagsakop han Tuna nga Iginsaad. Maatubang hiya hin mga problema ngan mapipirde pa ngani hira hin usa ka beses. (Jos. 7:1-9) Matin-aw, kinahanglan gud niya an pagparig-on! Yana, mahimo liwat naton parig-unon an mga tigurang, pati na an mga paramangno han sirkito nga maduruto nga nagmamangno ha panon han Dios. (Basaha an 1 Tesalonica 5:12, 13.) Usa nga paramangno han sirkito an nagsiring: “Danay gintatagan kami han kabugtoan hin surat han pagpasalamat nga nasiring nga nagpahimulos gud hira han amon pagbisita. Gintitipigan namon ini nga mga surat ngan ginbabasa ito kon naabat kami hin panluya. Nakakaparig-on gud ito ha amon.”

14. Ano an nagpapakita nga an paghatag hin kumendasyon ngan pagdasig epektibo kon nagsasagdon kita?

¹⁴ Maaram an mga tigurang ngan mga kag-anak nga epektibo an paghatag hin kumendasyon ngan pagdasig basi karawaton an sagdon han Biblia. Han ginkumendasyonan ni Pablo an mga taga-Corinto ha pagsunod ha iya sagdon, sigurado nga nadasig hira nga padayon nga buhaton an husto. (2 Cor. 7:8-11) Hi Andreas nga may duha nga anak nagsiring: “An pagdasig nabulig ha kabataan nga magtubo nga may marig-on  nga espirituwalidad ngan emosyon. Mas masayon nira karawaton an sagdon kon may pagdasig. Bisan kon maaram an amon mga anak kon ano an husto, an amon pirme paghatag hin pagdasig ha ira nabulig nga magin bahin ha ira pagkinabuhi an pagbuhat han husto.”

15. Ano an usa nga paagi nga mahihimo naton basi parig-unon an iba?

¹⁵ Ipakita nga gin-aapresyar mo an mga pangalimbasog ngan mag-opay nga kalidad han kabugtoan. (2 Kron. 16:9; Job 1:8) Ginpapabilhan gud ni Jehova ngan ni Jesus an aton nahihimo ha pagsuporta ha mga buruhaton han Ginhadian, bisan kon limitado la an aton nabubuhat tungod han aton kahimtang. (Basaha an Lucas 21:1-4; 2 Corinto 8:12.) Pananglitan, daku an ginhihimo nga pangalimbasog han pipira nga lagas nga kabugtoan basi makatambong ngan makigbahin ha mga katirok ngan regular nga makasangyaw. Diri ba sadang naton hira kumendasyon ngan parig-unon?

16. Kay ano nga diri kita sadang mag-alang ha pagparig-on ha iba?

¹⁶ Pamiling hin higayon ha pagparig-on ha iba. Kon may nakikita kita nga takos kumendasyonan, kay ano nga diri kita sadang mag-alang ha pagbuhat hito? Tagda an eksperyensya ni Pablo ngan ni Bernabe han nakadto hira ha Antiokia ha Pisidia. An punoan nga mga opisyal han sinagoga nagsiring ha ira: “Mga kabugtoan, kon may isisiring kamo nga makakadasig ha mga tawo, ipahayag niyo ito.” Ginbuhat ito ni Pablo pinaagi ha paghatag hin makaparig-on nga pahayag. (Buh. 13:13-16, 42-44) Kon may maisisiring kita nga makakadasig ha iba, kay ano nga diri ito isumat? Kon magigin batasan naton an pagparig-on ha iba, posible gud nga parig-unon liwat kita nira.—Luc. 6:38.

17. Ano an mas epektibo nga paagi ha paghatag hin kumendasyon?

¹⁷ Magin sinsero ngan espisipiko. Nakakabulig an pankabug-osan nga pagdasig ngan kumendasyon, pero an mensahe ni Jesus ha mga Kristiano ha Tiatira nagpapakita nga mas maopay an pagin espisipiko. (Basaha an Pahayag 2:18, 19.) Pananglitan, kon usa ka nga kag-anak, mahimo mo sumatan an imo anak kon ano an imo gin-aapresyar ha iya ginbubuhat basi mag-uswag ha espirituwal. Puydi naton sumatan an usa nga solo nga kag-anak kon kay ano nga bilib kita ha iya paagi han pagpadaku han iya anak bisan kon makuri an iya kahimtang. Maopay gud an epekto han sugad nga pagparig-on!

18, 19. Paonan-o naton mapaparig-on an kada tagsa?

¹⁸ Diri kita susugoon ni Jehova nga parig-unon an partikular nga indibiduwal pariho han iya pagsugo kan Moises nga dasigon ngan parig-unon hi Josue. Pero nalilipay an Dios kon ginpaparig-on naton an aton mga igkasi-tumuroo ngan an iba. (Prob. 19:17; Heb. 12:12) Pananglitan, mahimo naton sumatan an mamumulong kon paonan-o kita nagpahimulos ha sagdon tikang ha iya pahayag o nabuligan nga masabtan an kahulogan han partikular nga teksto. Usa nga sister an nagsurat ha bisita nga mamumulong: “Bisan kon pipira la ka minuto an aton pag-istorya, nasabtan mo nga nasusubo ako, ngan ginliaw ngan ginparig-on mo ako. Karuyag ko isiring ha imo nga an imo buotan nga pagyakan, ha imo pahayag ngan ha imo personal nga pakiistorya, regalo ha akon ni Jehova.”

¹⁹ Kon determinado kita nga iaplikar an sagdon ni Pablo nga ‘padayon nga magdinasigay ngan magparig-onay sugad han ginbubuhat na naton,’ posible gud nga damu an aton mahuhunahuna nga paagi basi parig-unon an iba ha espirituwal. (1 Tes. 5:11) Sigurado nga mapapalipay naton hi Jehova kon ‘kada adlaw padayon nga magpaparig-onay kita.’