1, 2. (a) Ano an ginsisiring han pipira may kalabotan ha ideya nga may organisasyon an Dios? (b) Ano an aton hihisgotan hini nga artikulo?

MAY organisasyon ba an Dios? Bangin an pipira magsiring: “Diri mo kinahanglan hin organisasyon nga maggigiya ha imo. Importante nga may-ada ka personal nga relasyon ha Dios.” Husto ba ito nga panhunahuna? Ano an iginpapakita han mga ebidensya?

² Hini nga artikulo, hihisgotan naton an mga pamatuod nga hi Jehova, an Dios han kahapsay, amo an pinakamaopay nga Organisador. Hihisgotan liwat naton kon ano an sadang naton magin reaksyon ha mga giya nga aton nakakarawat tikang ha organisasyon ni Jehova. (1 Cor. 14:33, 40) Tikang han siyahan nga siglo tubtob yana, ginigiyahan han Kasuratan an tunan-on nga bahin han organisasyon ni Jehova basi maipasamwak an maopay nga sumat ha mas damu nga lugar. Tungod kay ginsusunod naton an Biblia ngan gintutuman an mga instruksyon han organisasyon, natitipigan naton an kalimpyo, kamurayawan, ngan pagkaurosa han kongregasyon.

3. Kay ano nga kombinsido ka nga hi Jehova an pinakamaopay nga Organisador?

³ An mga linarang nagpapamatuod nga an Dios an pinakamaopay nga  Organisador. An Biblia nasiring: “Hi Jehova pinaagi han kinaadman nagtukud han kalibutan; pinaagi han pagsabut iya gintindog an kalangitan.” (Prob. 3:19) ‘An mga sidsid la han mga dalan han Dios’ an aton nahibabaroan, ngan ‘pagkagutiay nga huring an aton nababatian ha iya.’ (Job 26:14) Pero bisan kon gutiay la an aton hinbabaroan mahitungod ha mga planeta, bitoon, ngan galaksi, diri gud naton maididiwara an duro nga pagkaorganisado han mga linarang ha uniberso. (Sal. 8:3, 4) An mga galaksi ginkukompwesto hin minilyon nga bitoon, an ngatanan nagios ha kawanangan ha organisado nga paagi. Hunahunaa la, an mga planeta ha aton sistema solar nalibot ha adlaw nga sugad hin nasunod ha mga balaud han trapiko! Oo, an organisado hinduro nga pagkahimo han uniberso nag-aaghat gud ha aton nga dayawon ngan singbahon hi Jehova ngan magmaunungon ha iya, an Usa nga naghimo ha kalangitan pinaagi han kinaadman.—Sal. 136:1, 5-9.

4. Kay ano nga diri nababaton han syensya an damu nga pakiana?

⁴ Damu na an nadiskobrehan han mga syentista ha aton uniberso ngan planeta nga Tuna nga mapulsanon ha pipira nga bahin han aton kinabuhi. Bisan pa hito, damu nga pakiana an diri nababaton han syensya. Pananglitan, an mga astronomo diri bug-os nga nakakagsaysay kon paonan-o ineksister an uniberso o kon kay ano nga aanhi kita ha planeta nga Tuna ngan puno ini hin buhi nga mga linarang. Diri liwat naisasaysay han kadam-an kon kay ano nga naghihingyap gud an tawo nga mabuhi ha waray kataposan. (Ekles. 3:11) Kay ano nga damu nga importante nga pakiana an diri nababaton? Usa nga rason tungod kay damu nga syentista ngan iba pa an nag-aaghat ha mga tawo nga tumoo ha ebolusyon ngan han ideya nga waray Dios. Pero ha Libro ni Jehova, ginbabaton niya an mga pakiana nga nakakawurok ha mga tawo.

5. Kay ano nga masisiring nga nakadepende kita ha natural nga balaud han palibot?

⁵ Nakadepende kita ha masasarigan ngan diri nagbuburobag-o nga natural nga balaud han palibot nga ginhimo ni Jehova. An mga elektrisyan, tubero, inhinyero, piloto, seruhano—hira ngatanan—nakadepende hini nga mga balaud para mabuhat hin husto an ira trabaho. Pananglitan, an mga seruhano nasarig nga parapriho an pagkahimo han lawas han tawo. Salit kon nag-oopera an usa nga seruhano, diri na niya kinahanglan bilngon kon hain dapit an kasingkasing han pasyente. Ngatanan kita nagsusunod han natural nga balaud han palibot. An pagbalewaray han balaud han grabidad mahimo magin hinungdan nga mameligro an aton kinabuhi!

6. Kay ano nga sigurado kita nga karuyag ni Jehova nga magin organisado an iya mga magsiringba?

⁶ Organisado gud an pagkahimo ni Jehova han uniberso. Salit sigurado kita nga karuyag liwat niya nga magin organisado an iya mga magsiringba. Ngani, ito an rason nga iya igintagana an Biblia basi giyahan kita. An pagsunod ha mga suruklan han Dios ngan ha giya han iya organisasyon nabulig ha aton nga magkaada malipayon ngan makapatagbaw nga kinabuhi.

7. Ano an nagpapakita nga ginhimo an Biblia ha organisado gud nga paagi?

⁷ An Biblia diri la koleksyon hin mga barasahon mahitungod ha mga Judio ngan mga Kristiano. Lugod, usa ito nga libro nga ginhimo ha organisado gud nga paagi—usa nga giniyahan han Dios nga obra maestra. An mensahe han tagsa nga libro han Biblia nagkakauruyon gud. Tikang ha Genesis tubtob ha Pahayag, makikita an nangunguna nga tema han Biblia—an pagbindikar han pagkasoberano ni Jehova ngan pagtuman han iya katuyoan ha tuna pinaagi han iya langitnon nga Ginhadian nga an magmarando amo an Kristo, an iginsaad nga ‘tulin’ o “binhi.”—Basaha an Genesis 3:15; Mateo 6:10; Pahayag 11:15.

8. Kay ano nga makakasiring kita nga organisado gud an mga Israelita?

⁸ An kadaan nga nasud han Israel usa nga susbaranan  han pagin organisado. Pananglitan, ha Mosaiko nga Balaud, may kababayin-an nga igintoka ha pag-alagad ha ganghaan han tabernakulo. (Eks. 38:8) An pagburobalhin han mga Israelita han ira kampo ngan han tabernakulo ginhimo ha organisado nga paagi. Ha urhi, ginbahin-bahin ni Hadi David an mga Lebita ngan an mga saserdote basi magin organisado ha ira buruhaton. (1 Kron. 23:1-6; 24:1-3) Kon ginsusunod han mga Israelita hi Jehova, ginbibendisyonan niya hira. Nagigin organisado hira, nagkakaurosa, ngan nagkakaada kamurayawan.—Deut. 11:26, 27; 28:1-14.

9. Ano an nagpapakita nga organisado an Kristiano nga kongregasyon han siyahan nga siglo?

⁹ An Kristiano nga kongregasyon han siyahan nga siglo organisado liwat. Ginigiyahan ito han nagmamando nga lawas nga ha tinikangan ginkukompwesto han mga apostol. (Buh. 6:1-6) Ha urhi, may iba pa nga kabugtoan nga nagin membro han nagmamando nga lawas. (Buh. 15:6) An mga sagdon ngan instruksyon igintatagana pinaagi han giniyahan nga mga surat han kalalakin-an nga membro han nagmamando nga lawas han siyahan nga siglo o hadton duok nga nakig-upod ha ira. (1 Tim. 3:1-13; Tito 1:5-9) Paonan-o nagpahimulos an mga kongregasyon ha pagsunod han ira giya?

10. Ano an resulta kon ginsusunod han mga kongregasyon hadto an mga giya tikang ha nagmamando nga lawas? (Kitaa an retrato ha tinikangan hini nga artikulo.)

¹⁰ Basaha an Buhat 16:4, 5. Iginsusumat han nagbibiyahe nga mga representante han nagmamando nga lawas “an mga gindesisyonan han mga apostol ngan mga tigurang ha Jerusalem.” Samtang ginsusunod han kabugtoan ito nga mga giya, ‘padayon nga napaparig-on an pagtoo han mga kongregasyon, ngan ha adlaw-adlaw nagtitikadamu an mga tumuroo.’ Ano an aton mahibabaroan hini nga asoy nga mahimo naton iaplikar may kalabotan ha mga giya nga iginhahatag han organisasyon han Dios yana?

11. Ano an sadang buhaton han pinili nga kalalakin-an ha mga giya nga ira nakakarawat tikang ha organisasyon han Dios?

¹¹ Ano an sadang buhaton han mga membro han Komite han Sanga o Komite han Nasud, mga paramangno han sirkito, ngan mga tigurang ha kongregasyon kon nakakakarawat hira hin giya tikang ha organisasyon han Dios yana? Kita ngatanan ginsusugo han Libro ni Jehova nga magin masinugtanon ngan mapinasakupon. (Deut. 30:16; Heb. 13:7, 17) An pagin kritiko o rebelyoso waray lugar ha organisasyon han Dios kay mahimo hito madaot an gugma, kamurayawan, ngan pagkaurosa han kongregasyon. Syempre, an maunungon nga mga Kristiano diri gud magsusubad ha kawaray-respeto ngan pagin diri maunungon ni Diotrepes. (Basaha an 3 Juan 9, 10.) Maopay nga pakianhan naton an aton kalugaringon: ‘Napaparig-on ko ba an espirituwalidad han kabugtoan? Ginkakarawat ngan ginsusunod ko ba dayon an mga giya nga iginhahatag han mga nangunguna?’

12. Ano nga pagbag-o an ginhimo may kalabotan ha pagpili hin mga tigurang ngan ministeryal nga mga surugoon?

¹² Tagda an bag-o la nga desisyon han Nagmamando nga Lawas. An artikulo nga “Mga Pakiana Tikang ha mga Magbarasa” han Nobyembre 15, 2014 nga An Barantayan nagsasaysay han bag-o nga giya ha pagpili hin mga tigurang ngan ministeryal nga surugoon. Ginhihisgotan hito nga artikulo nga han siyahan nga siglo, gintagan han nagmamando nga lawas an nagbibiyahe nga mga paramangno hin awtoridad nga pumili hin mga tigurang ngan ministeryal. Uyon hito nga surubdan, tikang han Septyembre 1, 2014, an mga paramangno han sirkito na an nagpipili hin mga tigurang ngan mga ministeryal. An paramangno han sirkito nangangalimbasog nga makilala an brother nga iginrirekomendar ngan makaupod hiya ha ministeryo kon posible. Gin-oobserbaran liwat han paramangno han sirkito an pamilya  hito nga brother. (1 Tim. 3:4, 5) Gin-uusisa hin maopay han lawas han mga tigurang ngan han paramangno han sirkito an Kasuratanhon nga mga kwalipikasyon para ha mga ministeryal ngan tigurang.—1 Tim. 3:1-10, 12, 13; 1 Ped. 5:1-3.

13. Paonan-o naton maipapakita nga ginsusunod naton an giya nga iginhahatag han mga tigurang?

¹³ Kinahanglan naton sundon an mga giya nga basado ha Biblia nga iginhahatag han mga tigurang. Inin maunungon nga mga paraataman ha kongregasyon ginigiyahan han “maopay nga instruksyon” nga mababasa ha Libro han Dios. (1 Tim. 6:3) Tigamni an sagdon ni Pablo may kalabotan ha mga sarawayon ha kongregasyon. May pipira nga ‘diri nagtatrabaho, lugod nagpipinanlabot han mga butang nga waray hira labot.’ Sigurado nga ginsagdonan hira han mga tigurang pero padayon nira ito nga iginbabalewaray. Paonan-o sadang trataron han kongregasyon ini nga mga indibiduwal? Hi Pablo nagsiring: “Tigamni niyo hiya, ngan ayaw na pakig-upod ha iya.” Makatadunganon ito nga sagdon; lilikyan nira hiya pero diri hiya tatagdon nga kaaway. (2 Tes. 3:11-15) Yana, an mga tigurang mahimo maghatag hin nagpapahamangno nga pahayag may kalabotan ha usa nga padayon nga nagbubuhat hin butang nga nakakapasipara han kongregasyon, sugad han pakig-date ha diri tumuroo. (1 Cor. 7:39) Kon an mga tigurang maghatag han sugad nga pahayag, ano an sadang mo magin reaksyon? Kon maaram ka kon hin-o an gin-uunabi ha pahayag, lilikyan mo ba an pakig-upod hito nga indibiduwal? Kon bubuhaton mo ito, maipapakita mo nga hinigugma mo hiya ngan mahimo ito magpagios ha iya nga bag-uhon an iya maraot nga panggawi. ^[1]

14. Paonan-o kita makakabulig ha pagtipig han kalimpyo han kongregasyon?

¹⁴ Makakabulig kita nga matipigan an espirituwal nga kalimpyo han kongregasyon pinaagi ha pagsunod ha giya han Pulong han Dios. Tagda an nahitabo ha kadaan nga Corinto. Hi Pablo madasigon nga nagsasangyaw hito nga syudad, ngan hinigugma niya an mga igkasi-baraan didto. (1 Cor. 1:1, 2) Sigurado nga diri masayon para ha iya an pagsulbad han problema mahitungod han seksuwal nga imoralidad nga gintutugotan nga magpadayon ha kongregasyon! Ginsugo ni Pablo an mga tigurang nga ihatag kan Satanas an imoral nga tawo—ha iba nga pagkayakan, paiwason hiya ha kongregasyon. Basi matipigan an kaputli han kongregasyon, kinahanglan kuhaon han mga tigurang an “libadura.” (1 Cor. 5:1, 5-7, 12) Kon ginsusuportaran naton an desisyon han mga tigurang mahitungod ha pagpaiwas ha diri mabinasulon nga nakasala, nabulig kita ha pagtipig han kalimpyo han kongregasyon ngan bangin mapagios pa ngani an nakasala nga magbasol ngan mangaro hin pasaylo kan Jehova.

15. Paonan-o naton matitipigan an kamurayawan han kongregasyon?

¹⁵ May usa pa nga problema ha Corinto nga kinahanglan sulbaron. Iginkikiha han pipira an ira igkasi-tumuroo. Ginpakianhan hira ni Pablo: “Kay ano nga diri na la niyo pabay-an nga buhatan kamo hin sayop?” (1 Cor. 6:1-8) Nahitatabo liwat yana an sugad nga problema. Usahay, nawawara an kamurayawan ha butnga han kabugtoan tungod han kalugi han negosyo o han mga akusasyon hin panlimbong. Iginkikiha han iba an ira igkasi-tumuroo, pero iginpapakita han Libro han Dios nga mas maopay nga magpalugi na la kay ha mapasiparahan an ngaran han Dios o madaot an kamurayawan han kongregasyon. ^[2] Syempre, basi masulbad an seryoso nga problema ngan diri pagsinabtanay, kinahanglan naton sundon an sagdon ni Jesus. (Basaha an Mateo 5:23, 24; 18:15-17.) Kon bubuhaton naton ito, matitipigan naton an pagkaurosa han mga magsiringba ni Jehova.

16. Kay ano nga sadang naton laoman nga magkakaurosa an katawohan han Dios?

¹⁶ Iginpapakita ha Libro ni Jehova kon kay ano  sadang naton laoman nga magkakaurosa an iya katawohan. An salmista nagkanta: ‘Kitaa, hin kamaopay ngan hin kairindig an magburugto nga nagtatarampo ha pagkaurosa!’ (Sal. 133:1) Kon ginsusunod han mga Israelita hi Jehova, nagigin organisado hira ngan nagkakaurosa. Igintagna han Dios nga ha tidaraon magkakaurosa an iya katawohan. Hiya nagsiring: “Pupundukon ko hira daw sugad hin usa ka panon hin kakarnerohan.” (Miq. [Mika] 2:12, Baraan nga Biblia) Nagtagna liwat hi Jehova pinaagi kan propeta Sepania: ‘Akon pakakadaon ha mga katawohan an uray nga yinaknan [Kasuratanhon nga kamatuoran], nga hira ngatanan makatawag han ngaran ni Jehova, ha pag-alagad ha iya ha usa nga pagkahiringyon [urosa nga pagsingba ha iya].’ (Sep. 3:9) Mapasalamaton gud kita nga nagkaada kita pribilehiyo nga urosa nga magsingba kan Jehova!

17. Basi matipigan an pagkaurosa ngan kalimpyo han kongregasyon, paonan-o sadang asikasuhon han mga tigurang an kaso han nakabuhat hin sayop?

¹⁷ Basi matipigan an pagkaurosa ngan kalimpyo han kongregasyon, kinahanglan asikasuhon dayon han mga tigurang an hudisyal nga mga kaso ngan buhaton ito ha mahigugmaon nga paagi. Maaram hi Pablo nga an gugma ha Dios diri kay basta emosyon la, ngan diri Niya iginbabalewaray an sayop nga mga buhat. (Prob. 15:3) Salit ha siyahan nga surat ni Pablo ha Corinto, prangka nga ginsagdonan niya hira. Ginbuhat niya ito ha mahigugmaon nga paagi. Paglabay hin pipira ka bulan, iginpapakita han iya ikaduha nga surat ha Corinto nga nag-uswag hira kay ginsunod han mga tigurang an sagdon han apostol. Kon an usa nga Kristiano nagbubuhat hin sayop, adton may espirituwal nga mga kwalipikasyon sadang mangalimbasog nga tadungon hiya pinaagi han espiritu han pagkamalumo.—Gal. 6:1.

18. (a) Paonan-o nakabulig an giya han Pulong han Dios ha mga kongregasyon han siyahan nga siglo? (b) Ano an hihisgotan ha sunod nga artikulo?

¹⁸ Matin-aw nga an Libro han Dios nakabulig gud ha siyahan-siglo nga mga Kristiano ha Corinto ngan ha iba pa basi matipigan an kalimpyo, kamurayawan, ngan pagkaurosa han kongregasyon. (1 Cor. 1:10; Efe. 4:11-13; 1 Ped. 3:8) Sugad nga resulta, damu an nahimo ha ministeryo han aton kabugtoan hito nga panahon. Nakasiring pa ngani hi Pablo nga an maopay nga sumat “iginsangyaw ha ngatanan nga hinimo han Dios ha ilarom han langit.” (Col. 1:23) Yana, naipapasamwak ha bug-os nga kalibotan an katuyoan ni Jehova tungod han urosa nga pagsangyaw han mga membro han organisasyon han Dios. Hihisgotan han sunod nga artikulo an dugang nga pamatuod nga ginpapabilhan gud han katawohan han Dios an Biblia ngan determinado hira nga pasidunggan an Soberano nga Ginoo nga hi Jehova.—Sal. 71:15, 16.