AN PAGHALAD maiha na nga importante nga bahin han tinuod nga pagsingba. An mga Israelita naghalad hin mga hayop, ngan an mga Kristiano kilala tungod han ira “halad han pagdayaw.” Pero may iba pa nga klase hin halad nga nakakapalipay gud ha Dios. (Heb. 13:15, 16) Ini nga mga halad nagriresulta hin kalipay ngan bendisyon, sugad han iginpapakita han masunod nga mga ehemplo.

Hi Hana usa nga matinumanon nga surugoon ha kadaan nga panahon. Karuyag gud niya nga magkaada anak nga lalaki pero diri hiya nagkakaanak. Ha iya pag-ampo, nagsaad hiya kan Jehova nga kon magkaada hiya anak nga lalaki, “ihahatag [niya] hiya kan Jehova ha ngatanan nga adlaw han iya kinabuhi.” (1 Sam. 1:10, 11) Ha urhi, nagburod hi Hana ngan iya igin-anak hi Samuel. Han nalutas na hi Samuel, gindara ni Hana an bata ha tabernakulo, sugad han iya iginsaad. Ginbendisyonan ni Jehova hi Hana tungod han iya pagin andam nga magsakripisyo. Nakapribilehiyo hiya nga magkaada lima pa nga anak, ngan hi Samuel nagin propeta ngan parasurat han Biblia.​—1 Sam. 2:21.

Pariho kanda Hana ngan Samuel, an mga Kristiano yana may pribilehiyo nga gamiton an ira kinabuhi ha pag-alagad ha ira Maglalarang. Nagsaad hi Jesus nga anoman nga sakripisyo an aton ginhihimo ha pag-alagad kan Jehova, may-ada ito hura nga balos.​—Mar. 10:28-30.

Han siyahan nga siglo, an Kristiano nga babaye nga hi Dorcas kilala ha iya “mag-opay nga buhat ngan mga hatag tungod ha kalooy”​—mga halad nga iya ginhihimo ha pagbulig ha iba. Pero makasurubo kay “nagkasakit hiya ngan namatay,” salit nasubo an bug-os nga kongregasyon. Han hinbatian han mga disipulo nga nakada hito nga lugar hi Pedro, nakimalooy hira ha iya nga kumadto dayon ha ira. Hunahunaa la an ira kalipay han inabot hi Pedro ngan ginbanhaw hi Dorcas—​ini an siyahan nga asoy nga may ginbanhaw an usa nga apostol! (Buh. 9:36-41) Waray gud hingalimti han Dios an mga halad ni Dorcas. (Heb. 6:10) An iya pagin mahinatagon iginsurat ha Pulong han Dios sugad nga maopay nga ehemplo para subaron naton.

Hi apostol Pablo nagpakita liwat hin maopay nga susbaranan ha pagin mahinatagon; andam hiya maggahin hin panahon ngan atensyon para ha iba. Ha iya surat para ha iya mga igkasi-Kristiano ha Corinto, hiya nagsiring: “Malilipay gud ako paghatag han ngatanan ngan pagsakripisyo han akon kalugaringon para ha iyo mga kalag.” (2 Cor. 12:15) Hinbaroan ni Pablo tikang ha iya eksperyensya nga an pagsakripisyo para ha iba diri la nagriresulta hin kalipay, kondi labaw ha ngatanan, nagriresulta ito han bendisyon ngan pag-uyon ni Jehova.​—Buh. 20:24, 35.

Matin-aw, nalilipay hi Jehova kon ginagamit naton an aton panahon ngan kusog ha pagbulig ha pagpauswag han mga buruhaton han Ginhadian ngan ha pagbulig ha aton mga igkasi-tumuroo. Pero may iba pa ba nga paagi ha pagsuporta ha pagsangyaw nga buruhaton? Oo! Labot la han paghatag han aton panahon ngan kusog, mapapasidunggan liwat naton an Dios pinaagi han aton boluntaryo nga mga donasyon. Ginagamit ini ha pagpauswag han bug-os-kalibotan nga pagsangyaw nga buruhaton, nga nag-uupod ha pagsuporta ha mga misyonero ngan ha iba pa nga aada ha espesyal nga bug-os-panahon nga pag-alagad. Dugang pa, an pag-andam ngan paghubad han mga literatura ngan mga video, an pagbulig ha mga naapektohan hin kalamidad, ngan an pagtukod hin bag-o nga mga Kingdom Hall ginsusuportaran pinaagi han aton boluntaryo nga mga donasyon. Makakasarig kita nga adton mahinatagon sigurado nga bibendisyonan. Dugang pa, kon iginhahatag naton kan Jehova an aton birilhon nga mga panag-iya, napapasidunggan naton hiya.​—Prob. 3:9; 22:9.