1, 2. (a) Ano nga premyo an ginpapamulat han mga surugoon han Dios? (b) Ano an nabulig ha aton nga hunahunaon pirme an premyo? (Kitaa an retrato hini nga pahina.)

PARIHO kan apostol Pablo, an dinihogan nga mga Kristiano yana may birilhon nga paglaom nga makarawat “an premyo nga langitnon nga pagtawag han Dios.” (Fil. 3:14) Ginpapamulat nira an panahon nga magmamando hira kaupod ni Jesu-Kristo ha iya Ginhadian ha langit ngan makikigbahin ha pagpahiuli han katawohan ha pagin perpekto. (Pah. 20:6) Makalilipay gud ito nga paglaom nga sadang tipigan hadton mga gin-imbitar han Dios! An iba nga mga karnero may iba nga paglaom. Ginpapamulat nira nga makarawat an premyo nga kinabuhi nga waray kataposan ha tuna, ngan makalilipay gud ito nga paglaom!​—2 Ped. 3:13.

² Basi mabuligan ni Pablo an iya mga igkasi-dinihogan nga Kristiano nga magpabilin nga matinumanon ngan makarawat an premyo, gin-aghat niya hira: “Pirme niyo hunahunaa an mga butang ha kahitas-an.” (Col. 3:2) Kinahanglan nira hunahunaon pirme an ira presyoso nga paglaom, an pagkarawat han ira panurundon ha langit. (Col. 1:4, 5) Oo, an pagpamalandong ha mga bendisyon nga igin-andam ni Jehova para ha  iya katawohan nabulig ha ngatanan nga surugoon han Dios nga hunahunaon pirme an premyo, ha langit man o ha tuna an ira paglaom.​—1 Cor. 9:24.

3. Ano nga mga peligro an iginpahamangno ni Pablo ha iya mga igkasi-Kristiano?

³ Ginpahamangnoan liwat ni Pablo an mga igkasi-Kristiano mahitungod han mga peligro nga mahimo mag-agaw ha ira han premyo. Pananglitan, nagsurat hiya ha kongregasyon han Colosas mahitungod han buwa nga mga Kristiano nga nangangalimbasog nga makarawat an pag-uyon han Dios pinaagi ha pagsunod han Balaud imbes nga ha pagkaada pagtoo ha Kristo. (Col. 2:16-18) Naghisgot liwat hi Pablo han mga peligro nga naeksister tubtob ha aton panahon nga mahimo mag-agaw ha aton han premyo. Pananglitan, iginsaysay niya kon paonan-o aatohan an imoral nga mga hingyap, susulbaron an mga problema ha aton igkasi-tumuroo, ngan aatubangon an mga problema ha pamilya. An iya mga sagdon may kalabotan hini nga mga butang mapulsanon gud ha aton panahon. Salit aton usisahon an pipira han mahigugmaon nga pahamangno ni Pablo ha iya surat ha mga taga-Colosas.

4. Kay ano nga an imoral nga mga hingyap mahimo mag-agaw ha aton han premyo?

⁴ Katapos pahinumdoman ni Pablo an iya kabugtoan mahitungod han ira makalilipay nga paglaom, hiya nagsurat: “Pataya an mga bahin han iyo lawas nga tikang ha tuna may kalabotan ha imoralidad, kahugaw, hingyap ha pakighilawas, maraot nga hingyap, ngan kahakog.” (Col. 3:5) An imoral nga mga hingyap mahimo magin makusog gud, ngan mahimo ito mag-agaw ha aton han espirituwal nga mga bahandi. Usa nga bugto nga nadaog han imoral nga mga hingyap an nagsiring katapos niya makabalik ha kongregasyon, “Nadara ako han makusog hinduro nga pwersa ngan ginpasagdan ko la ito tubtob nga urhi na an ngatanan.”

5. Paonan-o naton mapapanalipdan an aton kalugaringon kon aada kita ha peligroso nga mga kahimtang?

⁵ Labi na nga kinahanglan kita mag-ikmat kon aada kita ha mga kahimtang nga mahimo kita masulay nga ikompromiso an mga suruklan ni Jehova ha moral. Pananglitan, maaramon para ha mag-uyab nga ha tinikangan pa la han ira pagin mag-uyab maghimo na hira hin matin-aw nga mga limitasyon ha mga butang sugad han pagkapotay, pagharokay, o mga kahimtang nga hira la nga duha. (Prob. 22:3) Mahimo liwat mameligro ha moral an usa nga Kristiano kon nagbibiyahe hiya hin hirayo tungod han trabaho o kon kinahanglan hiya magtrabaho kaupod an usa nga diri kasekso. (Prob. 2:10-12, 16) Kon ito an imo kahimtang, pagpakilala nga usa ka nga Saksi ni Jehova, ipakita an husto nga paggawi, ngan hinumdumi nga an pagpikat mahimo magkaada magraot nga resulta. Bangin mas masayon liwat kita masulay ha pagbuhat hin maraot kon nasusubo ngan nanluluya kita. Ha sugad nga kahimtang, bangin hingyapon naton nga may magpaabat ha aton nga importante kita. Bangin manginahanglan gud kita hin atensyon tubtob ha punto nga kakarawaton naton an bisan hin-o nga magpapakita hito ha aton. Kon mahitabo man ito ha imo, pangaro hin bulig kan Jehova ngan ha kabugtoan basi diri maagaw ha imo an premyo.​—Basaha an Salmos 34:18; Proberbios 13:20.

6. Ano an sadang naton hinumdoman may kalabotan ha pagpili hin kaliawan?

⁶ Basi mapatay naton an imoral nga mga hingyap, kinahanglan naton isalikway an imoral nga mga kaliawan. Kadam-an han mga kaliawan yana nagpapakita hin mga panggawi nga pariho han kadaan nga Sodoma ngan Gomorra. (Jud. 7) Igin-aaghat han mga naghihimo hini nga mga kaliawan an ira kalugaringon nga mga ideya may kalabotan ha moral; iginpapakita nira nga normal la an imoralidad ngan waray ito magraot nga resulta. Kinahanglan magin mabinantayon kita, diri kay basta na la nga ginkakarawat an bisan ano nga kaliawan nga igintatanyag han kalibotan. Kinahanglan naton pilion an kaliawan nga diri makakaulang ha aton ha pagpabilin nga nakapokus ha premyo nga kinabuhi.​—Prob. 4:23.

7. Ano nga mga problema an bangin atubangon naton ha sulod han Kristiano nga kongregasyon?

⁷ Kita ngatanan mauyon nga bendisyon an pagin bahin han Kristiano nga kongregasyon. An pag-aram ha Pulong han Dios ha aton mga katirok ngan an mahigugmaon nga suporta han kada tagsa nabulig ha aton nga hunahunaon pirme an premyo. Pero usahay, nabangon an diri pagsinabtanay nga mahimo magresulta hin mga problema ha kabugtoan ha kongregasyon. Kon diri naton susulbaron an sugad nga mga problema, masayon la ito magresulta ha pagdumot.​—Basaha an 1 Pedro 3:8, 9.

8, 9. (a) Ano nga mga kalidad an mabulig ha aton nga makarawat an premyo? (b) Ano an makakabulig ha aton nga matipigan an kamurayawan kon napasubo kita han aton igkasi-Kristiano?

⁸ Paonan-o naton malilikyan an pagdumot basi diri ito mag-agaw ha aton han premyo? Gin-aghat ni Pablo an mga taga-Colosas: “Sugad nga mga pinili, baraan ngan hinigugma han Dios, isul-ot niyo an pagpalangga nga may kalooy, pagkabuotan, pagpaubos, pagkamalumo, ngan pagkapasensyoso. Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton. Pero labot hini ngatanan, isul-ot niyo an gugma, kay ini an hingpit nga bugkos han pagkaurosa.”​—Col. 3:12-14.

⁹ An gugma ngan pagkabuotan makakabulig ha aton nga magin mapinasayloon ha iba. Pananglitan, kon nasakitan kita han ginyakan o ginbuhat han usa nga igkasi-Kristiano, mahimo naton hunahunaon an mga kahimtang nga nagyakan o nagbuhat kita hin diri maopay. Diri ba kita nagpapasalamat nga ginpasaylo han kabugtoan an aton mga sayop tungod han ira gugma ngan pagkabuotan? (Basaha an Eklesiastes 7:21, 22.) Labi nga mapasalamaton kita ha pagkabuotan han Kristo kay gintitirok niya an tinuod nga mga magsiringba basi magkaurosa. (Col. 3:15) Uusa la nga Dios an aton ginhihigugma, pariho nga mensahe an aton iginsasangyaw, ngan damu nga pariho nga pagsari an aton naieksperyensyahan. Kon buotan kita, mahigugmaon, ngan mapinasayloon, nabulig kita ha pagtipig han Kristiano nga pagkaurosa ngan makakapabilin kita nga nakapokus ha premyo nga kinabuhi.

10, 11. (a) Kay ano nga peligroso an kaawa? (b) Paonan-o naton malilikyan an kaawa basi diri ito mag-agaw ha aton han premyo?

¹⁰ An nagpapahamangno nga mga ehemplo ha Biblia nagpapahinumdom ha aton nga an kaawa mahimo mag-agaw ha aton han premyo. Pananglitan, hi Cain naawa ha iya bugto nga hi Abel salit ginpatay niya hiya. Hira Kore, Datan, ngan Abiram naawa kan Moises salit ginkontra nira hiya. Hi Hadi Saul naawa liwat ha kalamposan ni David salit nangalimbasog hiya nga patayon hi David. Diri urusahon nga an Biblia nagsiring: “Kon diin may pangabugho ngan tendensya ha pagin makiawayon, may kasamok liwat ngan ngatanan nga maraot nga buhat.”​—San. 3:16.

¹¹ Kon kukultibaron naton an pagin mahigugmaon ngan pagin buotan, diri kita madali nga maaawa. An Pulong han Dios nasiring: “An gugma nagpapasensya ngan buotan. An gugma diri nangangabugho.” (1 Cor. 13:4) Basi diri tumubo ha aton kasingkasing an ‘pangabugho,’ o kaawa, kinahanglan mangalimbasog kita nga subaron an panhunahuna ni Jehova; kinahanglan tagdon naton an kabugtoan sugad nga mga membro han uusa nga Kristiano nga lawas. Mabulig ini ha aton nga magpakita hin empatiya uyon ha giniyahan nga sagdon: “Kon an usa nga bahin gindadayaw, an ngatanan nga bahin nalilipay liwat.” (1 Cor. 12:16-18, 26) Salit imbes nga maawa, sadang kita malipay kon an iba nakakakarawat hin mga bendisyon. Tagda an ehemplo han anak ni Hadi Saul nga hi Jonatan. Waray hiya maawa han hi David an ginpili nga magin manurunod han trono. Lugod, ginparig-on niya hi David. (1 Sam. 23:16-18) Puydi ba kita magin buotan ngan mahigugmaon pariho kan Jonatan?

12. Ano nga Kasuratanhon nga sagdon an mabulig ha aton nga makarawat an premyo sugad nga pamilya?

¹² An pag-aplikar han mga prinsipyo ha Biblia makakabulig nga magin mamurayawon ngan malipayon an pamilya ngan makakabulig nga makarawat nira an premyo. Ano nga Kasuratanhon nga sagdon para ha pamilya an iginhatag ni Pablo ha mga Kristiano ha Colosas. Hiya nagsiring: “Mga asawa, magpasakop kamo ha iyo bana, kay ito an angay ha mga sumurunod han Ginoo. Mga bana, padayon nga higugmaa an iyo asawa ngan ayaw kasina hin sobra ha iya. Mga anak, magin masinugtanon kamo pirme ha iyo mga kag-anak, kay nakakalipay gud ito ha Ginoo. Mga amay, ayaw pag-aringita an iyo mga anak, basi diri hira masubo.” (Col. 3:18-21) Sigurado nga mauyon ka nga an pag-aplikar ha giniyahan nga sagdon ni Pablo mapulsanon pa gihapon para ha mga bana, asawa, ngan anak.

13. Paonan-o mahimo makabig han Kristiano nga asawa an iya diri tumuroo nga bana?

¹³ Ano man kon usa ka nga asawa ngan inaabat mo nga diri maopay an pagtratar ha imo han imo diri tumuroo nga bana? Mapapaopay mo ba an sitwasyon kon makikiglantugi ka may kalabotan han iya panggawi? Bisan kon maglampos ka ha pagpasunod ha iya nga buhaton an imo karuyag, makakabig mo ba hiya ha kamatuoran? Bangin diri. Pero kon rirespetuhon mo an pagkaulo han imo bana, makakabulig ka nga magin mamurayawon an pamilya, madadayaw mo hi Jehova, ngan bangin makabig  mo pa ngani an imo bana ha tinuod nga pagsingba; hito nga paagi makakarawat niyo nga duha an premyo.​—Basaha an 1 Pedro 3:1, 2.

14. Ano an sadang buhaton han Kristiano nga bana kon diri hiya ginrirespeto han iya diri tumuroo nga asawa?

¹⁴ Ano man kon usa ka nga bana ngan inaabat mo nga diri ka ginrirespeto han imo diri tumuroo nga asawa? Maaaghat mo ba hiya nga respetuhon ka kon guguliatan mo hiya basi ipakita kon hin-o an may awtoridad ha pamilya? Diri gud! An Dios naglalaom nga ipapakita mo an pagkaulo ha mahigugmaon nga paagi, sugad nga pagsubad kan Jesus. (Efe. 5:23) Iginpapakita ni Jesus an iya pagkaulo ha kongregasyon ha mahigugmaon ngan mapailubon nga paagi. (Luc. 9:46-48) Kon susubaron han bana an ehemplo ni Jesus, mahimo niya makabig an iya asawa ha tinuod nga pagsingba.

15. Paonan-o iginpapakita han Kristiano nga bana an iya gugma ha iya asawa?

¹⁵ An mga bana ginsisidngan: “Padayon nga higugmaa an iyo asawa ngan ayaw kasina hin sobra ha iya.” (Col. 3:19) Ginpapasidunggan han mahigugmaon nga bana an iya asawa pinaagi ha pagpamati ha mga opinyon han iya asawa ngan pagpasarig nga ginpapabilhan niya an ginsisiring han iya asawa. (1 Ped. 3:7) Bisan kon diri niya pirme matuman an ngatanan nga ginhahangyo han iya asawa, agsob nga nakakahimo hiya hin mas maopay nga desisyon pinaagi ha pag-aro han opinyon han iya asawa. (Prob. 15:22) An mahigugmaon nga bana nangangalimbasog nga makuha an respeto han iya asawa imbes nga piriton an iya asawa nga respetuhon hiya. An bana nga nahigugma ha iya asawa ngan mga anak posible gud nga magin malipayon ha pag-alagad kan Jehova sugad nga pamilya ngan makakarawat han premyo nga kinabuhi.

16, 17. Sugad nga batan-on, paonan-o mo malilikyan nga masina ha imo mga kag-anak?

¹⁶ Ano man kon usa ka nga tin-edyer ngan inaabat mo nga diri ka nasasabtan han imo Kristiano nga mga kag-anak ngan sobra hira kaistrikto ha imo? Bangin masina ka ngan magruhaduha pa ngani kon an pag-alagad ba kan Jehova amo an pinakamaopay nga paagi han pagkinabuhi. Pero kon tutugotan mo an sugad nga pag-abat nga magin hinungdan nga bumaya ka ha pag-alagad kan Jehova, ha urhi hibabaroan mo nga waray iba nga mas labaw nga nahigugma ha imo kay han imo mahadlukon ha Dios nga mga kag-anak ngan han kabugtoan ha kongregasyon.

¹⁷ Kon diri ka ginsasaway han imo mga kag-anak, makakasiring ka ba nga tinuod hira nga nahigugma ha imo? (Heb. 12:8) Pero bangin an paagi han pagdisiplina ha imo han imo mga kag-anak an nakakapasina ha imo. Imbes nga masina tungod hito, pangalimbasugi nga masabtan kon kay ano nga ito an ira ginyakan ngan ginbuhat. Salit magin kalmado ngan buhata an ngatanan basi diri sobra nga magreak ha pagsaway. An Pulong han Dios nasiring: “Hiya nga nagtatakon [o, nagpupugong] han iya mga polong mayada hibaro; ngan hiya nga may matugnaw nga espiritu amo an tawo nga may sarabutan.” (Prob. 17:27) Himoa nga tumong nga magin hamtong nga indibiduwal nga andam kumarawat hin sagdon, ginpapahimulosan an sagdon ngan diri sobra nga naghihinunahuna han paagi han paghatag hito. (Prob. 1:8) Bendisyon an pagkaada tumuroo nga mga kag-anak nga tinuod nga nahigugma kan Jehova. Sigurado nga karuyag ka nira buligan nga makarawat an premyo nga kinabuhi.

18. Kay ano nga determinado ka nga hunahunaon pirme an premyo?

¹⁸ Anoman an premyo nga aton ginpapamulat​—imortal nga kinabuhi ha langit o kinabuhi nga waray kataposan ha paraiso nga tuna—​makalilipay gud an pagpamalandong hito. Sigurado gud ito nga paglaom kay iginsaad ito han Maglalarang mismo. May kalabotan han Paraiso nga tuna, an Dios nagsiring: “An tuna mapupuno han hibaro ni Jehova.” (Isa. 11:9) Hito nga panahon, an ngatanan nga umurukoy ha tuna tututdoan han Dios. Makalilipay gud ito nga premyo nga sadang naton pangalimbasogan nga makarawat. Salit hunahunaa pirme an mga iginsaad ni Jehova, ngan ayaw tuguti an bisan ano nga mag-agaw ha imo han premyo!