1. Tungod han sala, ano an komon nga inaabat han matinumanon nga mga surugoon han Dios?

“KAIRO ko nga tawo!” (Roma 7:24) Damu nga matinumanon nga surugoon han Dios an naabat pariho hito nga gin-abat ni apostol Pablo. Kita ngatanan nag-aantos tungod han aton napanunod nga sala. Salit bisan kon karuyag gud naton lipayon hi Jehova, usahay napapakyas kita, ngan nasusubo kita hito. Inaabat pa ngani han pipira nga Kristiano nga nakabuhat hin seryoso nga sala nga diri na gud hira mapapasaylo han Dios.

2. (a) Paonan-o iginpapakita han Salmos 34:22 nga diri sadang umabat hin duro nga kakonsensya an mga surugoon han Dios? (b) Ano an hihisgotan hini nga artikulo? (Kitaa an kahon nga “ Leksyon o Simboliko nga Kahulogan?”)

² Pero an Kasuratan nagpapasarig ha aton nga adton naayop kan Jehova diri sadang umabat hin duro nga kakonsensya. (Basaha an Salmos 34:22.) Ano an nahiuupod han pag-ayop kan Jehova? Ano nga mga pitad an sadang naton himoon basi makarawat an kalooy ngan pagpasaylo ni Jehova? Mahibabaroan naton an baton hito pinaagi ha pag-usisa han kahikayan han pagkaada mga syudad nga arayopan ha kadaan nga Israel. Oo, ito nga kahikayan bahin han Balaud nga kasabotan nga ginsaliwnan han Pentekostes 33 C.E. Pero tigamni nga ito nga Balaud tikang kan Jehova. Salit pinaagi han kahikayan han pagkaada mga syudad nga arayopan, nahibabaro kita kon ano an panhunahuna ni Jehova  mahitungod ha sala, nakasala, ngan pagbasol. Hisgotan anay naton kon ano an katuyoan hito nga mga syudad ngan kon paonan-o ito ginagamit.

3. Paonan-o gindudumara han mga Israelita an mga kaso han tinuyo nga pagpatay?

³ Diri ginbabalewaray ni Jehova an mga kaso han pagpatay hin tawo ha kadaan nga Israel. Adton tinuyo nga nakamatay papatayon liwat han pinakaduok nga kapamilya o paryente nga lalaki han biktima nga gintatawag nga “magpapanimalus han dugo.” (Num. 35:19) Hini nga paagi, nababayaran an kinabuhi han inosente nga ginpatay. Inin madagmit nga pagpadapat han sirot nagpapanalipod ha Tuna nga Iginsaad kontra ha kahugawan, kay hi Jehova nagsugo: ‘Ayaw niyo paghugawi an tuna kay [an pagpaagay hin kanan tawo] dugo nakakahugaw han tuna.’​—Num. 35:33, 34.

4. Paonan-o gindudumara han mga Israelita an mga kaso han diri tinuyo nga pagpatay?

⁴ Pero paonan-o gindudumara han mga Israelita an mga kaso han diri tinuyo nga pagpatay? Bisan kon an usa diri tinuyo nga nakamatay, may baratunon pa gihapon hiya tungod han iya pagpaagay hin inosente nga dugo. (Gen. 9:5) Pero tungod han kalooy ni Jehova, may higayon an nakamatay nga pumalagiw tikang ha “magpapanimalus han dugo” ngadto ha usa han unom nga syudad nga arayopan. Didto, mapapanalipdan hiya. An diri tinuyo nga nakamatay kinahanglan magpabilin ha syudad nga arayopan tubtob ha kamatay han hitaas nga saserdote.​—Num. 35:15, 28.

5. Paonan-o an kahikayan han pagkaada mga syudad nga arayopan nabulig ha aton nga mas makilala hi Jehova?

⁵ An pagpili hini nga mga syudad sugad nga mga syudad nga arayopan diri kanan tawo ideya. Hi Jehova mismo an nagsugo kan Josue: “Pagyakni an mga anak ni Israel ha pagkasiring: Magtutdo kamo hin mga [syudad] nga arayupan.” Ini nga mga syudad gintatagad sugad nga “ilinain” o sagrado. (Jos. 20:1, 2, 7, 8) Tungod kay hi Jehova mismo an nagsugo nga ilain ini nga mga syudad para ha espesyal nga katuyoan, bangin magpakiana kita: Paonan-o ini nga kahikayan nabulig ha aton nga mas masabtan an kalooy ni Jehova? Ngan ano an igintututdo hini ha aton yana may kalabotan han pag-ayop ha iya?

6, 7. (a) Isaysay an papel han mga tigurang ha paghukom ha diri tinuyo nga nakamatay. (Kitaa an retrato ha tinikangan hini nga artikulo.) (b) Kay ano nga maaramon para ha usa nga nakamatay nga dumaop ha mga tigurang?

⁶ An usa nga diri tinuyo nga nakamatay kinahanglan ‘magasoy han iya kalipungan [o, kaso] ha mga talinga han katigurangan’ didto ha ganghaan han syudad nga arayopan. Kinahanglan hiya aabiabihon didto. (Jos. 20:4) Paglabay hin pipira ka panahon, papabalikon hiya ngadto ha mga tigurang han syudad diin nahitabo an krimen, ngan ito nga mga tigurang an maghuhukom han kaso. (Basaha an Numeros 35:24, 25.) Ibabalik la an nakamatay ha syudad nga arayopan kon napamatud-an han mga tigurang nga diri tinuyo an iya pagpatay.

⁷ Kay ano nga nahidadabi an mga tigurang? Kay kinahanglan nira tipigan nga limpyo an nasud han Israel ngan buligan an diri tinuyo nga nakamatay nga magpahimulos han kalooy ni Jehova. Usa nga eskolar ha Biblia an nagsurat nga kon an nakamatay diri dumaop ha mga tigurang, “makakadaot ito ha iya.” An eskolar nagdugang: “Hiya an may baratunon ha iya kalugaringon nga kinabuhi, kay waray niya pahimulsi an panalipod nga iginhatag han Dios para ha iya.” May-ada probisyon para mabuligan adton diri tinuyo nga nakamatay, pero kinahanglan niya aroon ngan karawaton ito nga bulig. Kon diri hiya umayop ha usa han mga syudad nga iginlain ni Jehova, an pinakaduok nga kapamilya o paryente han biktima may kagawasan nga patayon hiya.

8, 9. Kay ano nga sadang magpabulig ha mga tigurang an usa nga Kristiano nga nakabuhat hin seryoso nga sala?

⁸ Yana, an usa nga Kristiano nga nakabuhat hin seryoso nga sala kinahanglan magpabulig ha mga  tigurang ha kongregasyon basi maibalik an iya maopay nga relasyon kan Jehova. Kay ano nga importante gud ini? Siyahan, hi Jehova an naghimo han kahikayan nga an mga tigurang an magdudumara hin mga kaso may kalabotan ha seryoso nga sala, sugad han mababasa ha iya Pulong. (San. 5:14-16) Ikaduha, ini nga kahikayan nabulig ha mabinasulon nga nakasala nga magpabilin ha gugma han Dios ngan malikyan an pauroutro nga pagbuhat han iya sala. (Gal. 6:1; Heb. 12:11) Ikatulo, an mga tigurang gintokahan ngan ginbansay ha pagparig-on ha usa nga mabinasulon nga nakasala ngan ha pagbulig ha iya nga maibanan an iya kasakit ngan kakonsensya. Ini nga mga tigurang gintatawag ni Jehova nga “sirongan tikang ha bagyo.” (Isa. 32:1, 2) Diri ka ba mauyon nga ini nga kahikayan usa nga kapahayagan han kalooy han Dios?

⁹ Damu nga surugoon han Dios an nakaeksperyensya na hin pagliaw tungod han pangaro hin bulig ha mga tigurang ngan han pagkarawat hito nga bulig. Pananglitan, an bugto nga hi Daniel nakabuhat hin seryoso nga sala, pero ha sulod hin pipira ka bulan nag-alang hiya pagdaop ha mga tigurang. “Tungod kay maiha na nga panahon an lumabay,” siring niya, “nahunahuna ko nga waray na maibubulig ha akon an mga tigurang. Pero nababaraka pa gihapon ako ngan naghuhulat han mga resulta han akon mga nabuhat. Ngan kon nag-aampo ako kan Jehova, inaabat ko nga kinahanglan ko pirme unahon an pangaro hin pasaylo tungod han akon nabuhat.” Ha urhi, nagpabulig hi Daniel ha mga tigurang. Ha paghinumdom han nahitabo, hiya nagsiring: “Nahadlok gud ako pagdaop ha ira. Pero katapos hito, inabat ko nga baga hin may nagkuha han akon mabug-at nga pinas-an. Yana, inaabat ko nga makakadaop na ako kan Jehova nga waray makakaulang.” May malimpyo na yana nga konsensya hi Daniel, ngan hinin bag-o la, ginpili hiya sugad nga ministeryal nga surugoon.

10. Basi makarawat an kalooy, ano an kinahanglan himoon han diri tinuyo nga nakamatay?

¹⁰ An usa nga diri tinuyo nga nakamatay kinahanglan may himoon basi makarawat an kalooy. Kinahanglan hiya pumalagiw ngadto ha pinakahirani nga syudad nga arayopan. (Basaha an Josue 20:4.) Sigurado nga diri gud hiya maglalangan ha pagbuhat hini; matatalwas la hiya kon makaabot dayon hiya hito nga syudad ngan magpabilin  dida hito! Nangangahulogan ini nga kinahanglan hiya magsakripisyo. Kinahanglan niya bayaan an iya trabaho, komportable nga urukyan, ngan mawawad-an hiya hin kagawasan nga magbiyahe​—tubtob ha kamatay han hitaas nga saserdote. * (Num. 35:25) Pero bawi an iya mga pagsakripisyo. Kon bumaya hiya ha syudad nga arayopan, iginpapakita niya nga ginbabalewaray niya an dugo nga iya ginpaagay, ngan mamimeligro an iya mismo kinabuhi.

11. Ano nga mga buhat han usa nga mabinasulon nga Kristiano an nagpapakita nga diri niya ginbabalewaray an kalooy han Dios?

¹¹ Basi makarawat an kalooy han Dios, an mabinasulon nga mga nakasala yana kinahanglan liwat may-ada buhaton. Kinahanglan bug-os naton nga bayaan an makasasala nga pagkinabuhi, likyan diri la an seryoso nga mga sala kondi pati an gudtiay nga sala nga kasagaran na nga nagtutugway ha seryoso nga sala. Ha paggiya han baraan nga espiritu, iginhulagway ni apostol Pablo an mga ginbuhat han mabinasulon nga mga Kristiano ha Corinto. Hiya nagsurat: “Tungod han iyo kasubo nga uyon ha kaburut-on han Dios nagresulta ito ha iyo pagin sinsero, oo, napamatud-an niyo nga waray kamo sayop, nasina kamo ha sayop, nahadlok kamo ha Dios, nagpakita kamo hin sinsero nga hingyap ngan kaaktibo, ngan gintadong niyo an sayop!” (2 Cor. 7:10, 11) Kon nangangalimbasog kita nga bayaan an makasasala nga buhat, iginpapakita naton kan Jehova nga diri kita sobra ka kampante ngan diri naton ginhuhunahuna nga awtomatiko nga makakarawat naton an iya kalooy.

12. Ano an bangin kinahanglan isakripisyo han usa nga Kristiano basi padayon nga makarawat an kalooy han Dios?

¹² Ano an bangin kinahanglan isakripisyo han usa nga Kristiano basi padayon niya nga makarawat an kalooy han Dios? Kinahanglan hiya magin andam nga bayaan an anoman nga importante ha iya kon ito an magtutugway ha iya nga makasala. (Mat. 18:8, 9) Kon may kasangkayan ka nga nag-aaghat ha imo nga buhaton an diri nalilipayan ni Jehova, andam ka ba nga diri na makig-upod ha ira? Kon nakukurian ka ha pagpugong ha kalugaringon may kalabotan ha paggamit hin de-alkohol nga irimnon, andam ka ba nga likyan an mga sitwasyon nga mahimo mag-aghat ha imo nga mag-inom hin sobra? Kon nangangalimbasog ka nga atohan an imoral nga hingyap, ginlilikyan mo ba an mga salida, website, o mga buruhaton nga mahimo magpukaw hin mahugaw nga panhunahuna? Tigamni nga bawi gud an anoman nga sakripisyo nga aton ginhihimo basi matipigan an aton integridad kan Jehova. Waray na gud mas makasurubo pa kay han pag-abat nga ginsalikway kita niya. Ha luyo nga bahin, waray na mas makalilipay pa kay han pag-abat han kan Jehova waray kataposan nga maunungon nga gugma.​—Isa. 54:7, 8.

13. Isaysay kon kay ano nga an usa nga nakamatay mahimo magin talwas ngan malipayon ha sulod han syudad nga arayopan.

¹³ Kon an usa nga diri tinuyo nga nakamatay aada na ha sulod han syudad nga arayopan, talwas na hiya. May kalabotan hito nga mga syudad, hi Jehova nagsiring: ‘Ini maaamo an iyo arayupan.’ (Jos. 20:2, 3) Hi Jehova nagsugo nga diri na hukman utro an nakamatay ha pariho la gihapon nga kaso, ngan diri pasudlon ha syudad an “magpapanimalus han dugo” basi patayon an nakasala. Salit diri na sadang mahadlok an nakasala nga may mabulos ha iya. Samtang aada hiya hito nga syudad, talwas hiya tungod han panalipod ni Jehova. Ito nga arayopan diri usa nga prisohan. Puydi hiya didto magtrabaho, bumulig ha iba, ngan mamurayawon nga magsingba kan Jehova. Oo, mahimo hiya magkaada malipayon ngan makapatagbaw nga kinabuhi!

14. Ano an malalaoman han usa nga mabinasulon nga Kristiano?

¹⁴ An pipira nga surugoon han Dios nga nakabuhat hin seryoso nga sala pero nagbasol na naabat nga baga hin “priso” hira kay nakukonsensya pa gihapon hira; inaabat pa ngani nira nga diri na gud hira magigin malimpyo ha pagkita ni Jehova  tungod han ira nabuhat. Kon ito an imo inaabat, sarig nga kon ginpasaylo ka na ni Jehova, diri na gud niya dudumdumon an imo sala! Ito mismo an naeksperyensyahan ni Daniel, nga gin-unabi kanina. Katapos hiya sagdonan han mga tigurang ngan buligan nga maibalik an iya limpyo nga konsensya, hiya nagsiring: “Inabat ko nga sugad hin nakakaginhawa na ako utro. Katapos asikasuhon ha husto nga paagi an problema, waray na ako umabat hin kakonsensya. Kon ginpasaylo na an sala, waray na gud ito. Sugad han ginsiring ni Jehova, iya ginkukuha an imo mga pinas-an ngan iginpapahirayo ito ha imo. Diri mo na gud ito makikita utro.” Kon an usa nga nakamatay aada na ha sulod han syudad nga arayopan, diri na hiya sadang mahadlok ha “magpapanimalus han dugo.” Sugad man, kon ginpasaylo na kita ni Jehova ha aton mga sala, diri kita sadang mahadlok nga padayon hiya nga namimiling hin rason basi ipahinumdom ha aton an aton sala o hukman kita tungod hito.​—Basaha an Salmos 103:8-12.

15, 16. Paonan-o an papel ni Jesus sugad nga Paralukat ngan Hitaas nga Saserdote nagpaparig-on han imo pagsarig ha kalooy han Dios?

¹⁵ Ngani, mas damu an aton rason yana nga sumarig ha kalooy ni Jehova kay han mga Israelita hadto. Katapos ipahayag ni Pablo an iya kasubo kay diri niya bug-os nga nasusunod an sugo ni Jehova, hiya nagsiring: “Nagpapasalamat ako ha Dios pinaagi kan Jesu-Kristo nga aton Ginoo!” (Roma 7:25) Oo, bisan kon padayon hiya nga nakikig-away ha sala ngan han iya naglabay nga mga sayop​—nga iya na ginbasolan—​nasarig hiya han pagpasaylo han Dios pinaagi kan Jesus. Sugad nga aton Paralukat, ginlilimpyohan ni Jesus an aton konsensya ngan gintatagan kita niya hin kamurayawan ha hunahuna. (Heb. 9:13, 14) Sugad nga aton Hitaas nga Saserdote, “bug-os nga matatalwas niya an mga nadaop ha Dios pinaagi ha iya, kay nagpapadayon hiya nga buhi basi makimalooy para ha ira.” (Heb. 7:24, 25) Kon an papel han hitaas nga saserdote nagpasarig ha mga Israelita nga mapapasaylo an ira mga sala, labi na gud nga makakasarig kita nga tungod han mahihimo han aton Hitaas nga Saserdote nga hi Jesus, ‘makakarawat naton an kalooy ngan an diri-matupngan nga pagkabuotan nga mabulig ha aton ha husto nga panahon.’​—Heb. 4:15, 16.

¹⁶ Salit basi makaayop kan Jehova, ipakita an imo pagtoo ha halad ni Jesus. Ayaw hunahunaa nga an kapulsanan han lukat para la ha katawohan ha kabug-osan. Lugod, sarig nga an lukat mapulsanon para ha imo. (Gal. 2:20, 21) Sarig nga an lukat amo an basihan ha pagpasaylo han imo mga sala. Sarig nga an lukat naghahatag ha imo han paglaom nga mabuhi ha waray kataposan. An halad ni Jesus regalo ni Jehova para ha imo.

17. Kay ano nga karuyag mo umayop kan Jehova?

¹⁷ An mga syudad nga arayopan kapahayagan han kalooy ni Jehova. Pinaagi hini nga kahikayan, ginpapabug-atan han Dios diri la an pagkasagrado han kinabuhi kondi iginpapakita liwat niya kon paonan-o an mga tigurang nabulig ha aton, kon ano an nahiuupod han tinuod nga pagbasol, ngan kon kay ano nga makakasarig gud kita han pagpasaylo ni Jehova. Naayop ka ba kan Jehova? Hiya gud la an talwas nga arayopan! (Sal. 91:1, 2) Ha sunod nga artikulo, hibabaroan naton kon paonan-o an mga syudad nga arayopan makakabulig ha aton nga masubad hi Jehova​—an pinakamaopay nga ehemplo ha pagpakita hin hustisya ngan kalooy.