“NAG-ALANG gud ako pagbalhin nganhi,” siring ni Allen. * “Diri ako maaram kon magkakaada ako kasangkayan o kakarawaton ako han iba.” Nangangalimbasog hi Allen nga makapahiuyon ha bag-o nga kongregasyon nga sobra 1,400 ka kilometro an kahirayo tikang ha ira balay.

Kon binalhin ka ha iba nga kongregasyon, bangin nag-alang ka liwat ha pagbuhat hito. Ano an makakabulig ha imo nga makapahiuyon? Ano an mahimo mo buhaton kon an pagpahiuyon mas makuri kay han imo ginlalaoman? Ha luyo nga bahin, kon diri ka nabalhin, paonan-o ka mahimo makabulig nga magin masayon para ha bag-o nga mga binalhin an pagpahiuyon ha iyo kongregasyon?

Tagda ini nga ilustrasyon: Kon iginbabalhin an usa nga puno, temporaryo ito nga nakukurian. Samtang gin-uukad an puno ha tuna, kasagaran na nga gin-uutod an kadam-an han gamot hito basi masayon ito maibalhin. Kon maitanom na ito utro, nagtitikang dayon panubo an bag-o nga mga gamot hito. Ha pariho nga paagi, bangin makurian ka liwat kon bumalhin ka ha iba nga kongregasyon. Ha imo daan nga kongregasyon, nagdamu an imo “gamot” pinaagi ha pagkaada duok nga kasangkayan ngan regular nga rutina ha pag-alagad kan Jehova. Yana, kinahanglan mo magpatubo hin bag-o nga mga gamot basi mag-uswag ha imo bag-o nga palibot. Ano an mabulig ha imo basi mahimo ito? An pag-aplikar han mga prinsipyo ha Kasuratan. Hisgotan naton an pipira hito.

An tawo nga nagbabasa han Pulong han Dios kada adlaw pariho “hin kahoy nga gintanum ha ligid han mga kasapa-an hin tubig, nga mabunga ha iya panahon, nga an iya dahon diri malalaya; ngan an ngatanan nga iya paghihimoon madukwag.”​—Sal. 1:1-3.

Sugad la nga an puno kinahanglan nga regular nga sumupsop ha usa nga surok hin tubig basi makapabilin nga mahimsog, an usa nga Kristiano kinahanglan regular nga kumaon tikang ha Pulong han Dios basi makapabilin nga marig-on ha espirituwal. Salit padayon nga basaha an Biblia kada adlaw ngan regular nga tumambong ha mga katirok. Tipigi an maopay nga rutina han pagsingba han pamilya ngan personal nga pag-aram. Anoman an imo ginhihimo basi matipigan an imo espirituwalidad ha imo daan nga kongregasyon, kinahanglan mo liwat ito himoon ha imo bag-o nga kongregasyon.

“Hiya nga nagbabaribi hiya man pagbabaribihan.”​—Prob. 11:25.

Mapaparig-on ka ngan mas madali nga makakapahiuyon kon makikigbahin ka hin bug-os ha ministeryo. Hi Kevin nga usa nga tigurang nagsiring: “An pag-auxiliary payunir dayon pag-abot namon ha amon bag-o nga kongregasyon amo an nakabulig gud ha amon nga mag-asawa.” Hiya nagdugang: “Nagin pamilyar dayon kami ha kabugtoan, ha mga payunir, ngan ha teritoryo.” Hi Roger, nga binalhin ha lugar nga sobra 1,600 ka kilometro an kahirayo tikang ha iya gin-uukyan, nagsiring: “An pinakamaopay nga paagi basi makapahiuyon dayon ha bag-o nga kongregasyon amo an pirme pakigbahin ha ministeryo tubtob nga posible. Dugang pa, sumati an mga tigurang nga andam ka bumulig ha bisan ano nga paagi, sugad han paglimpyo han Kingdom Hall, pagdumara hin bahin kon waray an gintokahan, o pagpasakay hin bugto ha imo sarakyan pakadto ha mga katirok. Kon makita han kabugtoan an usa nga bag-ohan nga may-ada nagsasakripisyo nga gugma, diri hira mag-aalang nga makigsangkay ha imo.”

“Abrihi hin haluag an iyo kasingkasing.”​—2 Cor. 6:13.

Pahaluaga an imo gugma ha kabugtoan. Han binalhin hira Melissa ngan an iya pamilya ha bag-o nga kongregasyon, nangalimbasog hira nga magkaada bag-o nga kasangkayan. “Nakikiistorya kami ha kabugtoan antes ngan katapos han mga katirok ha Kingdom Hall,” siring niya. “Nakabulig ini nga magkaada kami mas daku nga  panahon ha pakiistorya imbes nga simple la nga pangumusta.” Nakabulig liwat ito ha ira nga mas madali nira mahinumdoman an ngaran han kabugtoan. Dugang pa, nagpahaluag hira pinaagi ha pag-abiabi ha kabugtoan; nakabulig ini nga maparig-on an bag-o nga bugkos han pagkamagsarangkay. “Iginhatag namon an numero han amon telepono ngan gin-aro namon an ira numero,” siring niya, “basi makontak nira kami ngan maiapi ha espirituwal nga mga buruhaton ngan ha iba pa nga aktibidad.”

Kon nag-aalang ka ha pakiistorya ha diri mo mga kakilala, mahimo ka magtikang ha gudtiay nga mga butang. Pananglitan, hiyom​—bisan kon ha siyahan baga hin diri ka komportable ha pagbuhat hito. An paghiyom mag-aaghat ha iba nga makigsangkay ha imo. Ngani, “nakakalipay . . . an maghiyomhiyom nga mga bayhon.” (Dar. [Prob.] 15:30; Maupay nga Sumat) “Awdanon gud ako,” siring ni Rachel, nga binalhin hin hirayo tikang ha iya natawohan nga lugar. “Usahay, ginpipirit ko an akon kalugaringon nga makiistorya ha akon bag-o nga mga kakongregasyon. Namimiling ako ha Kingdom Hall hin bugto nga nagliliningkod la ngan diri nakikiistorya ha iba. Ginhuhunahuna ko nga bangin awdanon liwat hiya pariho ha akon.” Puydi mo ba himoon nga tumong nga makiistorya ha mga bag-ohan antes ngan katapos han tagsa nga katirok?

Ha luyo nga bahin, bangin eksayted ka nga magkaada bag-o nga mga kakilala ha siyahan nga pipira ka semana. Pero ito nga pag-abat puydi nga hinay-hinay nga mawara paglabay han panahon. Kon mahitabo ini, bangin kinahanglan mo padayon nga mangalimbasog nga magkaada bag-o nga kasangkayan.

May mga puno nga nagkikinahanglan hin mas hilawig nga panahon basi makagamot hin marig-on ha bag-o nga palibot. Sugad man, diri ngatanan nga nabalhin nakakapahiuyon dayon ha bag-o nga kongregasyon. Kon maiha ka na nga binalhin pero nakukurian ka la gihapon nga makapahiuyon, mahimo makabulig ha imo an pag-aplikar hini nga mga prinsipyo ha Biblia:

“Ayaw kita pag-undang ha pagbuhat han maopay, kay pag-abot han panahon mag-aani kita kon diri kita manluya.”​—Gal. 6:9.

Paggahin hin mas daku nga panahon ha pagpahiuyon kay han imo ginlalaoman. Pananglitan, damu nga misyonero nga ginbansay ha Gilead an nagpapabilin ha ira toka ha iba nga nasud ha sulod hin pipira ka tuig antes umuli ha ira kalugaringon nga nasud basi bumisita. An pagbuhat hito nabulig ha ira nga magin duok ha lokal nga kabugtoan ngan makapahiuyon ha iba nga kultura.

Hi Alejandro, nga damu na an nabalhinan nga lugar, maaram nga an pagpahiuyon ha bag-o nga lugar diri puydi apurahon. Hiya nagsiring: “Hinin bag-o la nga amon pagbalhin, an akon asawa nagsiring, ‘An ngatanan ko nga kasangkayan aadto ha aton daan nga kongregasyon!’” Ginpahinumdoman ni Alejandro an iya asawa nga amo gihapon ito an iya ginsiring han binalhin hira duha ka tuig na an naglabay. Pero durante hiton duha ka tuig, nagpakita an iya asawa hin interes ha iba ngan nagin duok niya nga kasangkayan adton mga diri niya kakilala.

“Diri ka magsiring: Ano in kasugad nga an una nga mga adlaw magoroopay kay hini? Kay ikaw diri nagpapakiana ha makinaadmanon mahatungud hini.”​—Ekles. 7:10.

Ayaw ikompara an imo bag-o nga kongregasyon ha imo daan nga kongregasyon. Pananglitan, an kabugtoan ha imo bag-o nga kongregasyon bangin diri maistoryahon o mas prangka kay ha imo daan nga kongregasyon. Pagpokus ha ira mag-opay nga kalidad, sugad la han karuyag mo nga buhaton nira ha imo. An pipira nga bag-o nga mga binalhin diri makatoo nga an ira pagbalhin magpapagios ha ira nga magpakiana ha ira kalugaringon, ‘Hinigugma ko gud ba “an ngatanan nga kabugtoan”?’​—1 Ped. 2:17.

 “Padayon nga mangaro kay ihahatag ito ha iyo.”​—Luc. 11:9.

Padayon nga pag-ampo para hin bulig. “Ayaw pagsoloha an problema,” siring han tigurang nga hi David. “Damu nga butang an mahihimo la naton pinaagi han bulig ni Jehova. Ig-ampo ito!” Nauyon hini hi Rachel nga gin-unabi kanina. “Kon inaabat namon nga mag-asawa nga baga hin diri na kami bahin han kongregasyon,” siring niya, “espisipiko kami nga nag-aampo kan Jehova, ‘Alayon pahibaroa kami kon may ginbubuhat kami nga nakakapakuri ha iba nga magin duok ha amon.’ Katapos naggagahin kami hin mas daku nga panahon ha kabugtoan.”

Mga kag-anak, kon nakukurian an iyo mga anak nga magpahiuyon, paggahin hin panahon nga ig-ampo an mahitungod hito kaupod nira. Buligi hira nga magkaada bag-o nga kasangkayan pinaagi ha paghikay hin makaparig-on nga pagturotarampo kaupod an kabugtoan.

Ano an mahimo mo buhaton basi mabuligan an bag-o nga mga binalhin ha iyo kongregasyon? Tikang ha tinikangan, ipakita nga tinuod ka nga sangkay. Basi mahimo ito, hunahunaa kon ano nga mga butang an karuyag mo nga buhaton ha imo kon bag-o ka la nga binalhin, ngan ito an buhata. (Mat. 7:12) Mahimo mo ba hira ig-upod ha iyo pagsingba han pamilya o ha pagkita han binulan nga programa han JW Broadcasting? Puydi mo ba hira imbitaron nga umupod ha imo ha ministeryo? Kon iimbitaron mo hira ha simple nga pangaon, diri gud nira hingangalimtan an imo pagin maabiabihon. Ano an iba pa nga praktikal nga bulig an mahimo mo maihatag ha bag-o nga mga binalhin?

“Pag-abot namon ha amon bag-o nga kongregasyon,” siring ni Carlos, “gintagan kami han usa nga sister hin lista han mga tindahan nga barato an mga paraliton. Daku gud ito nga bulig.” An mga binalhin nga tikang ha lugar nga iba an klima bangin magin mapasalamaton kon tututdoan hira han ira isusul-ot kon mapaso, matugnaw, o mauran ha iyo lugar. Mahimo mo liwat hira mabuligan nga magin mas epektibo ha ministeryo pinaagi ha pagsumat ha ira han kasaysayan han iyo lugar o han relihiyoso nga mga gintoohan han mga tawo ha iyo lugar.

Hi Allen, nga gin-unabi ha tinikangan hini nga artikulo, sobra usa ka tuig na ha iya bag-o nga kongregasyon. Nahinunumdoman pa niya: “Ha tinikangan, kinahanglan ko piriton an akon kalugaringon nga makilala an kabugtoan. Pero yana, baga ko na hira hin kapamilya, ngan malipayon ako.” Nasantop ni Allen nga waray hiya mawad-i hin kasangkayan han binalhin hiya. Lugod, nagkaada hiya bag-o nga kasangkayan, nga posible magin kasangkayan niya ha iya bug-os nga kinabuhi.