1, 2. Samtang nag-uuswag kita ha espirituwal, nahibabaro kita nga buhaton an ano? Iilustrar.

USA nga bata an gintagan hin regalo. Ginsidngan hiya han iya mga kag-anak, “Pagsiring nga salamat.” Sumugot an bata, pero ginbuhat niya ito tungod la kay ginsidngan hiya. Samtang nagtitikaadulto an bata, mas nasasabtan niya an panhunahuna han iya mga kag-anak ngan mas naaapresyar niya an mag-opay nga ginbubuhat han iba. Yana kon nagpapasalamat hiya, kinasingkasing na. Kay ano? Kay nahibaro na hiya nga magin mapasalamaton.

² Ha pariho nga paagi, han nahibaro kita han kamatuoran, nasabtan naton nga importante an pagsunod ha nangunguna nga mga sugo ni Jehova. Pero samtang nag-uuswag kita ha espirituwal, nahibabaro kita hin dugang mahitungod han panhunahuna ni Jehova​—an iya mga naruruyagan, nadidirian, ngan an iya panhunahuna ha iba-iba nga butang. Kon gintutugotan naton an panhunahuna ni Jehova nga mag-impluwensya ha aton mga ginbubuhat ngan desisyon, iginpapakita naton nga ginsusubad naton an iya panhunahuna.

3. Kay ano nga mahimo magin makuri an pagsubad han panhunahuna ni Jehova?

³ Bisan kon makalilipay an pagsubad han panhunahuna ni Jehova, usahay makuri an pagbuhat hito tungod han aton pagin diri perpekto.  Pananglitan, bangin nakukurian kita nga masabtan an panhunahuna ni Jehova may kalabotan ha kalimpyo ha moral, materyalismo, pagsangyaw nga buruhaton, sayop nga paggamit han dugo, o ha iba pa nga butang. Ano an mahimo naton buhaton? Paonan-o kita padayon nga mag-uuswag ha pagsubad han panhunahuna ni Jehova? Ngan paonan-o an pagbuhat hito makakaapekto ha aton mga ginbubuhat yana ngan pagbubuhaton ha tidaraon?

4. Ano an nahiuupod han pagsunod han sagdon ni Pablo: ‘Bag-oha an iyo panhunahuna’?

⁴ Basaha an Roma 12:2. Dinhi, iginsaysay ni apostol Pablo kon ano an nahiuupod ha pagsubad han panhunahuna ni Jehova. Ha nahiuna nga artikulo, nasabtan naton nga basi ‘diri na naton masubad an mga paagi hini nga sistema,’ kinahanglan isalikway naton an kalibotanon nga panhunahuna ngan disposisyon. Pero nagsiring liwat hi Pablo nga kinahanglan naton ‘bag-uhon an aton panhunahuna.’ Nag-uupod ini ha pag-aram han Pulong han Dios, pagsabot han iya panhunahuna, pagpamalandong hito, ngan pangalimbasog nga ipahiuyon an aton panhunahuna ha iya panhunahuna.

5. Isaysay an kaibahan han basta pagbasa la ngan han pag-aram.

⁵ An pag-aram diri kay basta pagbasa la ngan pagbagis han mga baton ha mga pakiana ha materyal nga gin-aadman. Kon nag-aaram kita, ginhuhunahuna naton kon ano an igintututdo ha aton han aton gin-aadman mahitungod kan Jehova, ha iya mga paagi, ngan ha iya panhunahuna. Nangangalimbasog kita nga masabtan kon kay ano nga iginpapabuhat han Dios an usa nga butang ngan igindidiri an usa nga butang. Ginhuhunahuna liwat naton kon ano an kinahanglan naton bag-uhon ha aton kinabuhi ngan ha aton panhunahuna. Bisan kon bangin diri naton mapamalandong ini ngatanan ha kada pag-aram, magpapahimulos kita kon maggagahin kita hin panahon​—bangin katunga han aton ginagamit ha kada pag-aram—​ha pagpamalandong han aton ginbabasa.​—Sal. 119:97; 1 Tim. 4:15.

6. Ano an nahitatabo kon ginpapamalandong naton an panhunahuna ni Jehova?

⁶ Kon regular nga ginpapamalandong naton an Pulong han Dios, may nahitatabo nga urusahon. Ano ito? ‘Napapamatud-an naton ha aton kalugaringon,’ o nakukombinse naton an aton kalugaringon nga perpekto an panhunahuna ni Jehova. Hinay-hinay nga nasasabtan naton an iya panhunahuna ha mga butang, ngan ha urhi ginkakarawat naton ito. ‘Nababag-o’ an aton panhunahuna ngan nagkakaada kita bag-o nga paagi ha paghunahuna. Hinay-hinay nga nasusubad naton an panhunahuna ni Jehova.

7, 8. (a) Ano an panhunahuna ni Jehova ha materyal nga mga butang? (Kitaa an retrato ha tinikangan hini nga artikulo.) (b) Kon ginsusubad naton an panhunahuna ni Jehova, ano an pirme magigin pinakaimportante ha aton?

⁷ An paghunahuna diri kay basta paggamit la han aton hunahuna. An aton panhunahuna nakakaapekto ha aton mga ginbubuhat. (Mar. 7:21-23; San. 2:17) Masasabtan naton ini hin maopay kon tatagdon naton an pipira nga ehemplo. Pananglitan, matin-aw nga iginpapakita ha aton han mga Ebanghelyo kon ano an panhunahuna ni Jehova ha materyal nga mga butang. An Dios mismo an nagpili han tawhanon nga mga kag-anak nga mag-aataman han iya Anak​—usa nga mag-asawa nga diri riko ha materyal. (Leb. 12:8; Luc. 2:24) Han natawo hi Jesus, “ginpahigda [hiya ni Maria] ha sabsaban kay waray na kwarto nga ira mauukyan.” (Luc. 2:7) Kon tutuyoon ni Jehova, damu an paagi nga puydi unta niya himoon basi makagtagana hin mas maopay nga urukyan diin matatawo an iya Anak. Pero karuyag ni Jehova nga atamanon hi Jesus hin pamilya nga prayoridad an espirituwal nga mga butang. Ito an pinakaimportante ha iya.

⁸ Ini nga asoy mahitungod han katawo ni Jesus nagtututdo ha aton kon ano an panhunahuna ni Jehova ha materyal nga mga butang. An pipira nga kag-anak naruruyag gud nga an ira mga anak magkaada han pinakamaopay nga materyal nga mga  butang, bisan kon mahimo ito magin hinungdan nga mameligro an espirituwalidad han ira mga anak. Pero matin-aw nga an espirituwal nga mga butang an pinakaimportante kan Jehova. Ginsusubad mo ba an panhunahuna ni Jehova? Ano an iginpapakita han imo mga ginbubuhat?​—Basaha an Hebreo 13:5.

9, 10. Paonan-o naton mahimo maipakita nga ginsusubad naton an panhunahuna ni Jehova may kalabotan ha pakapakdol ha iba?

⁹ An usa pa nga ehemplo amo an panhunahuna han Dios may kalabotan ha pakapakdol ha iba. Hi Jesus nagsiring: “An bisan hin-o nga nakakapakdol ha usa hini nga mga ubos nga may pagtoo, mas maopay pa nga higtan hiya ha liog hin daku nga gilingan nga bato pariho ha ginbibirik han asno ngan ilabog hiya ha dagat.” (Mar. 9:42) Ini nga mga pulong nagpapakita nga seryoso gud an pakapakdol ha iba! Tungod kay perpekto nga ginsubad ni Jesus an personalidad han iya Amay, makakasiguro kita nga seryoso liwat para kan Jehova kon ginbabalewaray han usa an iya ginbubuhat bisan kon nakakapakdol ito ha usa han mga sumurunod ni Jesus.​—Juan 14:9.

¹⁰ Ginsusubad ba naton an panhunahuna ni Jehova ngan ni Jesus may kalabotan ha pakapakdol ha iba? Ano an iginpapakita han aton mga ginbubuhat? Pananglitan, ano man kon naruruyag kita ha usa nga estilo han bado o pag-ayos nga posible makaaringit ha pipira ha kongregasyon o bangin magin hinungdan nga magkaada imoral nga panhunahuna an iba? Magigin mas importante ba ha aton an pagsunod han aton karuyag nga estilo kay ha pagpakita hin gugma ngan konsiderasyon ha kabugtoan?​—1 Tim. 2:9, 10.

11, 12. Paonan-o an pagsubad han panhunahuna han Dios ha karaotan ngan an pagkaada pagpugong ha kalugaringon mabulig ha aton nga malikyan an pagbuhat hin maraot?

¹¹ Ikatulo nga ehemplo: Hi Jehova nangangalas ha pagkadiri-matadong. (Isa. 61:8) Syempre, maaram hiya nga may tendensya kita nga magbuhat hin maraot tungod kay diri kita perpekto, pero gin-aaghat kita niya nga kangalasan liwat an pagkadiri-matadong. (Basaha an Salmos 97:10.) An pagpamalandong kon kay ano nga nangangalas hi Jehova ha karaotan mabulig ha aton nga masubad an iya panhunahuna ngan magin mas determinado nga likyan an pagbuhat hin maraot.

¹² An pagsubad han panhunahuna ni Jehova ha pagkadiri-matadong mabulig liwat ha aton nga masabtan nga sayop an partikular nga buhat, bisan kon diri ito espisipiko nga gin-uunabi ha Pulong han Dios. Pananglitan, an lap dancing usa nga klase hin malaw-ay nga buhat nga nagigin komon na ha kalibotan. An iba bangin maghunahuna nga diri ito sayop kay diri man ito pariho ha aktuwal nga pakighilawas. * Pero an sugad ba nga buhat uyon ha panhunahuna han Dios, nga nangangalas ha ngatanan nga klase han karaotan? Likyan gud naton an bisan ano nga karaotan pinaagi ha pagkultibar hin pagpugong ha kalugaringon ngan kangalas ha ginkakangalasan ni Jehova.​—Roma 12:9.

13. Kay ano nga sadang naton hunahunaon yana kon ano an panhunahuna ni Jehova ha mga butang basi makahimo kita hin maaramon nga mga desisyon ha tidaraon?

¹³ Kon nag-aaram kita, sadang naton hunahunaon kon ano an panhunahuna ni Jehova ha mga butang kay makakabulig ini ha aton nga makahimo hin maaramon nga mga desisyon ha tidaraon. Hito nga paagi, kon umatubang kita hin sitwasyon diin kinahanglan naton maghimo dayon hin desisyon, magigin andam kita ngan maaram kon ano an aton bubuhaton. (Prob. 22:3) Tagda an pipira nga ehemplo ha Biblia.

14. Ano an aton mahibabaroan ha pagsalikway ni Jose ha pagsulay ha iya han asawa ni Potipar?

¹⁴ Pinaagi ha pagsalikway dayon ha mga pagsulay han asawa ni Potipar, iginpakita ni Jose nga  ginpamalandong na niya nga daan kon ano an panhunahuna ni Jehova may kalabotan ha pagin maunungon ha padis. (Basaha an Genesis 39:8, 9.) Dugang pa, an iya baton ha asawa ni Potipar: “Oonan-on ko in pagbuhat hini nga daku nga karat-an, ngan paglapas kontra han Dios?” nagpapakita nga nasubad na niya an panhunahuna han Dios. Kumusta man kita? Ano an imo bubuhaton kon an usa mo nga katrabaho nagtikang pagpikat ha imo? O kon ginpadad-an ka hin malaw-ay nga mensahe o retrato ha imo celfon? * Magigin masayon gud an pagpabilin nga matinumanon kan Jehova kon hinbaroan ngan ginkarawat na naton an iya panhunahuna ha sugad nga mga butang ngan abanse na kita nga nagdesisyon kon ano an aton bubuhaton.

15. Paonan-o naton maaatohan an pagsulay nga ikompromiso an aton pagin maunungon kan Jehova, pariho han ginbuhat han tulo nga Hebreo?

¹⁵ Tagda liwat an ehemplo han tulo nga Hebreo nga nakilala sugad nga hira Sadrak, Mesak, ngan Abednego. An ira marig-on nga pagdumiri ha pagsingba ha bulawan nga imahen nga ginhimo ni Hadi Nabukodonosor ngan an ira maisugon nga baton ha hadi nagpapakita nga ginhunahuna na nira nga daan kon ano an nahiuupod ha pagpabilin nga matinumanon kan Jehova. (Eks. 20:4, 5; Dan. 3:4-6, 12, 16-18) Pananglitan, ano an imo bubuhaton kon ginhahangyo ka han imo agaron nga magdonar para ha usa nga selebrasyon nga konektado ha buwa nga relihiyon? Imbes nga maghulat nga maeksperyensyahan an sugad nga sitwasyon, kay ano nga diri hunahunaon yana kon ano an panhunahuna ni Jehova ha sugad nga butang? Ngan kon umatubang ka man hin sugad nga sitwasyon, magigin mas masayon ha imo an pagyakan ngan pagbuhat han husto, pariho han ginhimo han tulo nga Hebreo.

16. Paonan-o an pagkaada klaro nga pagsabot han panhunahuna ni Jehova mabulig ha aton nga magin andam kon may medikal nga emergency?

¹⁶ An paghunahuna yana kon kay ano nga kinahanglan kita magpabilin nga maunungon makakabulig liwat kon may medikal nga emergency. Bisan kon determinado gud kita nga likyan an pagpaabuno hin dugo o hin bisan ano han upat nga nangunguna nga sangkap hito, may pipira nga pamaagi ha pagtambal nga nag-uupod han paggamit han dugo diin an usa nga Kristiano kinahanglan personal nga magdesisyon basado ha mga prinsipyo ha Biblia nga nagpapakita han panhunahuna ni Jehova. (Buh. 15:28, 29) Sigurado nga an pinakamaopay nga panahon ha pagturotimbang han sugad nga mga butang diri ha hospital, diin posible nga naabat kita hin kaul-ol ngan ginpipresyur nga maghimo  dayon hin desisyon. Yana an panahon ha pagsaliksik, pagkaada hin legal nga medikal nga dokumento nga nagsasaysay han imo mga karuyag, ngan ha pakiistorya ha imo doktor. *

17-19. Kay ano nga importante nga mahibaroan naton yana an panhunahuna ni Jehova ha mga butang? Pag-unabi hin sitwasyon nga kinahanglan magin andam kita.

¹⁷ Tagda liwat an madagmit nga baton ni Jesus ha diri maaramon nga sagdon ni Pedro: “Ayaw pagyakan hin sugad hito, Ginoo.” Waray ruhaduha, abanse gud nga ginhunahuna ni Jesus kon ano an kaburut-on han Dios para ha iya ngan an ginsisiring han Kasuratan mahitungod han iya kinabuhi ngan kamatayon dinhi ha tuna. Ini nga kahibaro nagparig-on han iya desisyon nga magpabilin nga matinumanon ngan isakripisyo an iya kinabuhi para ha ngatanan nga tawo.​—Basaha an Mateo 16:21-23.

¹⁸ Yana, kaburut-on han Dios nga makultibar han iya katawohan an pakigsangkay ha iya ngan bug-os nga makigbahin hira ha iya buruhaton tubtob nga posible. (Mat. 6:33; 28:19, 20; San. 4:8) Pariho han naeksperyensyahan ni Jesus, bangin may mga tawo nga maopay an motibo nga mangalimbasog nga paluyahon an aton determinasyon ha pagbuhat hito. Pananglitan, ano man kon tanyagan ka han imo agaron hin promosyon ha trabaho nga mas daku an sweldo pero ito nga trabaho makakaulang han imo espirituwal nga mga buruhaton? O ano man kon usa ka nga estudyante ngan gintanyagan ka nga makaeskwela para hin dugang nga edukasyon pero kinahanglan mo umukoy ha iba nga lugar nga hirayo ha iyo balay? Hito nga higayon ka ba mag-aampo, magsasaliksik, makikiistorya ha imo pamilya ngan bangin pati ha mga tigurang, ngan katapos, maghihimo hin desisyon? Kay ano nga diri mangalimbasog nga mahibaroan yana an panhunahuna ni Jehova hito nga mga butang ngan subaron an iya panhunahuna? Katapos kon umatubang ka hin sugad nga sitwasyon, posible gud nga makita mo nga diri nakakadani ito nga mga tanyag. May-ada ka na espirituwal nga mga tumong, ngan determinado ka na kon ano an imo bubuhaton; an kinahanglan na la amo an pagbuhat han desisyon nga imo na ginhimo.

¹⁹ Posible nga may nahuhunahuna ka nga iba pa nga mga sitwasyon nga bangin tigda nga bumangon ha diri ginlalaoman nga paagi. Syempre, diri kita makakapangandam ha tagsa nga sitwasyon nga posible naton atubangon. Pero kon ginpapamalandong naton an panhunahuna ni Jehova durante han aton personal nga pag-aram, posible gud nga mas mahinumdoman naton an aton gin-adman ngan magamit ito ha paghimo hin maaramon nga desisyon ha bisan ano nga sitwasyon. Salit hinaot pangalimbasogan naton nga masabtan kon kay ano nga importante nga hibaroan an panhunahuna ni Jehova ha mga butang, subaron ito, ngan hunahunaon kon paonan-o an pagkaada han panhunahuna han Dios makakaapekto ha aton mga ginbubuhat yana ngan pagbubuhaton ha tidaraon.

20, 21. (a) Kay ano nga malilipay kita ha pagkaada relatibo nga kagawasan ha bag-o nga kalibotan? (b) Paonan-o kita magkakaada han sugad nga kalipay yana?

²⁰ Ginpapamulat gud naton an bag-o nga kalibotan. Kadam-an ha aton naglalaom han kinabuhi nga waray kataposan ha Paraiso nga tuna. Ha pagmando han Ginhadian, an katawohan magkakaada kagawasan tikang ha kasakit ngan pag-antos nga komon dinhi hini nga sistema. Syempre, hito nga panahon, an mga tawo may kagawasan la gihapon ha pagpili. An kada tagsa makakapili uyon ha iya mga karuyag ngan hingyap.

²¹ Pero diri ini nagpapasabot nga ito nga kagawasan waray limitasyon. Kon an mga maaghop maghihimo hin desisyon may kalabotan ha kon ano an husto o sayop, magpapagiya hira ha mga balaud ngan panhunahuna ni Jehova. Maghahatag ini ha ira hin daku nga kalipay ngan hura nga kamurayawan. (Sal. 37:11) Samtang waray pa ito nga panahon, mahimo naton maeksperyensyahan yana an sugad nga kalipay samtang ginsusubad naton an panhunahuna ni Jehova.