Han gab-i antes han iya kamatayon, ginsagdonan ni Jesus an iya mga apostol nga diri maghingyap nga magin prominente kay ha ira mga igkasi-tumuroo. Ginsidngan niya hira: “An mga hadi han mga nasud nagpapakaagaron ha katawohan, ngan an mga may awtoridad ha ira gintatawag nga Pilantropo. Pero diri kamo magin sugad hito.”​—Luc. 22:25, 26.

Hin-o an mga Pilantropo nga gin-uunabi ni Jesus? Iginpapakita han mga inskripsyon, sinselyo, ngan mga sinurat nga kustomre han mga Griego ngan mga Romano nga pasidunggan an prominente nga mga tawo ngan mga magmarando pinaagi ha paghatag ha ira han titulo nga Euergetes, o Pilantropo. An sugad nga mga indibiduwal gintagan hini nga titulo tungod han ira ginbuhat nga maopay para ha mga tawo.

May mga hadi nga nagkaada han titulo nga Pilantropo. An pipira hini amo an mga magmarando ha Ehipto nga hira Ptolemy III Euergetes (mga 247-222 B.C.E.) ngan Ptolemy VIII Euergetes II (mga 147-117 B.C.E.). Nagkaada liwat hini nga titulo an Romano nga mga magmarando nga hira Julio Cesar (48-44 B.C.E.) ngan Agusto (31 B.C.E.–14 C.E.), pati na hi Herodes nga Bantogan, nga hadi han Judea. May kalabotan kan Herodes, posible nga nakarawat niya ini nga titulo han nagpalit hiya hin trigo ha iba nga nasud basi buligan an iya mga sakop durante hin gutom ngan han nagtagana hiya hin mga bado para ha mga pobre.

Sumala han Aleman nga eskolar ha Biblia nga hi Adolf Deissmann, komon gud an paggamit han titulo nga Pilantropo ha kadaan nga panahon, ngan kon mamimiling ka hin mga inskripsyon hini nga titulo ha kadaan nga mga butang, masayon gud la makabiling hin sobra usa ka gatos nga inskripsyon.

Kon sugad, ano an iginpapasabot ni Jesus han ginsidngan niya an iya mga disipulo: “Diri kamo magin sugad hito”? Gin-aaghat ba hira ni Jesus nga diri magin mabinuligon ha mga tawo, karuyag sidngon, diri magin mahunahunaon ha kaopayan han mga tawo ha ira palibot? Diri. An ginpapabug-atan ni Jesus posible nga an motibo ha paghatag.

Ha panahon ni Jesus, an mga riko nangangalimbasog nga magkaada maopay nga reputasyon pinaagi ha pag-isponsor hin mga kiritaon ngan mga uyag ha estadyum, paghimo hin mga parke ngan templo, ngan pagsuporta ha iba pa nga mga aktibidad. Pero ginbubuhat nira ito basi dayawon hira, magin prominente, o makombinse an mga tawo nga bumutos ha ira. Usa nga reperensya an nagsiring: “Bisan kon an pipira hito nga mga nagdonar sinsero an motibo ha paghatag, an kadam-an ha ira kasagaran nga nagbubuhat hito tungod la han ira makukuha nga politikal nga bentaha.” An pagin ambisyoso ngan pagin makikalugaringon amo an ginpapalikyan ni Jesus ha iya mga sumurunod.

Paglabay hin pipira ka tuig, ginpabug-atan ni apostol Pablo an pariho nga importante nga kamatuoran may kalabotan ha pagkaada husto nga motibo ha paghatag. Hiya nagsurat ha iya mga igkasi-tumuroo ha Corinto: “An kada tagsa maghatag uyon ha karuyag han iya kasingkasing, nga diri nagrireklamo o napipiritan, kay an Dios nahigugma ha malipayon nga nahatag.”​—2 Cor. 9:7.