1, 2. (a) Ano an aton pinakabirilhon nga panag-iya? (b) Ano nga mga kamatuoran an aton ginpapabilhan, ngan kay ano? (Kitaa an mga retrato hini nga pahina.)

ANO an imo pinakabirilhon nga panag-iya? Igbabalyo mo ba ito ha usa nga butang nga mas minos an bili? Para ha dedikado nga mga magsiringba ni Jehova, simple la an baton hini nga mga pakiana. An aton pinakabirilhon nga panag-iya amo an aton relasyon kan Jehova, ngan diri gud naton ito igbabalyo ha bisan ano. Ginpapabilhan liwat naton an kamatuoran ha Biblia kay tungod hini nagin posible nga magkaada kita maopay nga relasyon ha aton langitnon nga Amay.​—Col. 1:9, 10.

² Hunahunaa la an ngatanan nga igintututdo ha aton han aton Gihitaasi nga Instruktor pinaagi han iya Pulong, an Biblia! Iya igintututdo ha aton an kamatuoran mahitungod ha pagkaimportante han iya ngaran ngan han iya makaruruyag nga mga kalidad. Ginsusumatan kita niya mahitungod han lukat, an pinakamaopay nga regalo nga iya mahigugmaon nga iginhatag ha aton pinaagi han iya Anak nga hi Jesus. Ginsusumatan liwat kita niya mahitungod han Mesianiko nga Ginhadian, ngan iya gintatagan an mga dinihogan han paglaom nga mabuhi ha langit ngan an “iba nga mga karnero” han paglaom nga mabuhi ha Paraiso nga tuna. (Juan 10:16) Gintututdoan kita niya kon paonan-o kita sadang  magkinabuhi. Ginpapabilhan naton ini nga mga kamatuoran kay nabulig ini nga magin duok kita ha aton Maglalarang ngan magkaada katuyoan an aton kinabuhi.

3. Ano an diri iginpapasabot han pagpalit han kamatuoran?

³ Hi Jehova mahinatagon nga Dios. Diri niya gintatago an kamatuoran ha namimiling hito. Iginhatag pa ngani niya an kinabuhi han iya hinigugma nga Anak sugad nga regalo nga waray bayad. Diri gud kita ginpapabayad han Dios hin kwarta para han kamatuoran. Ngani, han an usa nga lalaki nga hi Simon nagtanyag kan apostol Pedro hin kwarta kabalyo han awtoridad ha paghatag ha iba hin baraan nga espiritu, ginsaway hiya ni Pedro pinaagi ha pagsiring: “Mawara ka unta upod han imo kwarta, kay ginhuhunahuna mo nga pinaagi han kwarta magkakaada ka han waray bayad nga regalo han Dios.” (Buh. 8:18-20) Kon sugad, ano an iginpapasabot han giniyahan nga sugo: “Palit han kamatuuran”?

4. Hini nga artikulo, ano an aton mahibabaroan mahitungod han kamatuoran?

⁴ Basaha an Proberbios 23:23. Ginkikinahanglan an pangalimbasog basi mahibaroan an kamatuoran ha Pulong han Dios. Kinahanglan magin andam kita ha paghimo hin anoman nga sakripisyo nga ginkikinahanglan basi mahibaroan an kamatuoran. Sugad han ginsiring han maaramon nga parasurat han Proberbios, kon ‘ginpalit,’ o nahibaroan na naton an “kamatuoran,” sadang kita magbantay nga diri ito “ibaligya,” o mawara. Aton hisgotan kon ano an iginpapasabot han ‘pagpalit’ han kamatuoran ngan an kantidad nga bangin kinahanglan naton ibayad para hito, siring pa. Pinaagi ha paghibaro hini, mapapahilarom naton an aton apresasyon ha kamatuoran ngan mapaparig-on an aton determinasyon nga diri gud ito “ibaligya.” Sugad han aton mahibabaroan, takos gud paliton an kamatuoran anoman kadaku nga kantidad an aton kinahanglan ibayad para hito.

5, 6. (a) Paonan-o naton mapapalit an kamatuoran nga waray kabalyo nga kwarta? Iilustrar. (b) Paonan-o kita nagpapahimulos ha kamatuoran?

⁵ Bisan kon libre an usa nga butang diri karuyag sidngon nga waray na ito kabalyo. An Hebreo nga pulong nga iginhubad nga “palit” ha Proberbios 23:23 mahimo liwat mangahulogan hin “pagkuha.” Inin duha nga pulong nagpapasabot hin pangalimbasog o hin pagsakripisyo hin usa nga butang para makuha an usa nga birilhon gud nga butang. Mahimo naton iilustrar an pagpalit han kamatuoran hini nga paagi. Sidngon naton nga ha usa nga merkado may igintatanyag nga libre nga saging. Basta na la ba mahingangadto ha aton lamesa ito nga saging? Diri. Kinahanglan kita mangalimbasog nga kumadto ha merkado basi kuhaon ito. Libre ba ito nga saging? Oo, pero kinahanglan mangalimbasog kita ngan maggahin hin panahon pagkadto ha merkado. Ha pariho nga paagi, diri naton kinahanglan hin kwarta basi mapalit an kamatuoran. Pero, kinahanglan kita mangalimbasog basi makuha o mahibaroan ito.

⁶ Basaha an Isaias 55:1-3. An mga pulong ni Jehova nga iginsurat ni Isaias naghahatag hin dugang nga pagpatin-aw kon ano an iginpapasabot han pagpalit han kamatuoran. Hini nga teksto, iginpapariho ni Jehova an iya pulong ha tubig, gatas, ngan bino. Pariho hin pag-inom hin matugnaw ngan matin-aw nga tubig, an mga pulong han Dios nakakarepresko. Ngan sugad la nga an gatas nagpapakusog ha aton ngan nabulig ha mga bata nga tumubo, an masustansya nga mga pulong ni Jehova nagpapakusog ha aton ngan nabulig nga magtubo kita ha espirituwal. Dugang pa, an mga pulong ni Jehova pariho liwat hin bino. Ha ano nga paagi? An Biblia nasiring nga an bino nakakapalipay ha mga tawo. (Sal. 104:15) Salit pinaagi ha pagsugo ha iya katawohan nga ‘pumalit hin alaksio’ o, bino, ginpapasarig kita ni Jehova nga an pagkinabuhi uyon ha iya mga pulong makakapalipay ha aton. (Sal. 19:8) Maopay gud ini nga pag-ilustrar han mga kapulsanan han paghibaro ngan pag-aplikar han mga pulong han Dios! An mga pangalimbasog nga aton ginhihimo maipapariho ha kantidad nga aton iginbabayad. Yana hisgotan naton an lima nga butang nga bangin kinahanglan naton ibayad basi mapalit an kamatuoran.

7, 8. (a) Kay ano nga kinahanglan kita maggahin hin panahon basi mapalit an kamatuoran? (b) Ano an iginsakripisyo han usa nga estudyante, ngan ano an resulta?

⁷ Panahon. Kinahanglan ini ibayad han ngatanan nga napalit han kamatuoran. Ginkikinahanglan an panahon ha pagpamati han mensahe han Ginhadian, pagbasa ha Biblia ngan basado ha Biblia nga mga literatura, personal nga pag-aram ha Biblia, ngan pagpangandam ngan pagtambong ha mga katirok ha kongregasyon. Kinahanglan naton ‘paliton,’ o kuhaon, ito nga panahon tikang ha iba nga buruhaton nga diri importante. (Basaha an Efeso 5:15, 16 ngan an footnote.) Mationan-o kadaku nga panahon an aton ginkikinahanglan basi magkaada han husto nga kahibaro han nangunguna nga katutdoan ha Biblia? Nakadepende ito ha aton kahimtang. Waray gud tubtoban an mahimo naton mahibaroan mahitungod han kinaadman, pamaagi, ngan mga buhat ni Jehova. (Roma 11:33) Iginpariho han siyahan nga isyu han Watch Tower an kamatuoran ha “usa nga gutiay nga bukad” ngan nagsiring: “Ayaw kakontento ha usa nga bukad han kamatuoran. Kon igo na an usa nga bukad han kamatuoran, diri na unta magtatagana an Dios hin damu hinduro nga kamatuoran. Padayon ha pagtirok, pagbiling hin dugang pa.” Mahimo naton pakianhan an aton kalugaringon, ‘Mationan-o kadamu an akon hinbabaroan mahitungod kan Jehova?’ Bisan kon mabuhi kita ha waray kataposan, damu pa gihapon an aton mahibabaroan mahitungod ha iya. Yana, importante gud nga gamiton naton hin maaramon an aton panahon basi makapalit hin mas damu pa nga kamatuoran tubtob nga igintutugot han aton kahimtang. Tagdon naton an usa nga indibiduwal nga nagbuhat hini.

⁸ Hi Mariko, * usa nga batan-on nga Haponesa, kinadto ha New York City, E.U.A. basi umiskwela. Hito nga panahon, membro hiya han usa nga relihiyon nga naestablisar ha Japan han 1959. Nakaistorya hi Mariko han usa nga payunir nga sister durante ha pagsangyaw ha balay-balay. Han nagtikang hiya mahibaro han kamatuoran ha Biblia, nalipay gud hiya salit ginhangyo niya an payunir nga dumarahan hiya hin pag-aram ha Biblia duha ka beses ha usa ka semana. Bisan kon sagipo hiya tungod han iya pag-eskwela ngan part-time nga trabaho, nagtikang dayon hiya pagtambong ha mga katirok ha kongregasyon. Gin-ibanan liwat niya an iya panahon ha pagpahalibway basi magkaada hiya dugang nga panahon ha paghibaro han kamatuoran. An paghimo han sugad nga mga sakripisyo nakabulig ha iya nga mag-uswag dayon ha espirituwal. Waray pa mag-usa ka tuig, nabawtismohan hiya. Paglabay hin unom ka bulan, han 2006, nagpayunir hiya, ngan payunir pa gihapon hiya tubtob yana.

9, 10. (a) Paonan-o an pagpalit han kamatuoran nakakaapekto ha aton panhunahuna ha materyal nga mga butang? (b) Ano an iginsakripisyo han usa nga batan-on nga babaye, ngan ano an iya inaabat mahitungod hito?

⁹ Materyal nga mga butang. Basi mapalit an kamatuoran, bangin kinahanglan naton isakripisyo an aton trabaho nga daku an sweldo o maopay nga karera. Han gin-imbitar ni Jesus an parapangisda nga hira Pedro ngan Andres nga magin “parapangisda hin mga tawo,” ira ‘ginbayaan an [ira] mga pukot.’ (Mat. 4:18-20) Syempre, diri ini nagpapasabot nga adton nahibabaro han kamatuoran yana kinahanglan bumaya ha ira trabaho. Kadam-an ha ira an may Kasuratanhon nga obligasyon. (1 Tim. 5:8) Pero kasagaran na nga kinahanglan bag-uhon han mga indibiduwal nga nahibabaro han kamatuoran an ira panhunahuna ha materyal nga mga butang pati na an ira mga prayoridad. Iginpatin-aw ini ni Jesus han hiya nagsiring: “Ayaw na kamo pagtinirok hin bahandi ha tuna . . . Lugod, pagtirok kamo hin bahandi ha langit.” (Mat. 6:19, 20) Tagda an ehemplo han usa nga batan-on nga babaye.

¹⁰ Mahilig hi Maria mag-uyag hin golf tikang pa ha kabata. Padayon niya nga ginpauswag an iya abilidad ha pag-uyag hin golf han hayskul hiya ngan ha urhi nagin eskolar hiya ha usa nga unibersidad tungod hito. Importante gud ha iya an golf, ngan tumong niya nga magin propesyonal nga parauyag ngan magkaada damu nga kwarta. Katapos, nagtikang hi Maria pag-aram ha Biblia, ngan naruyagan  gud niya an mga kamatuoran nga iya hinbaroan. Nalipay gud hiya ha mga pagbag-o ha iya kinabuhi tungod han iya pag-aplikar han kamatuoran. Hiya nagsiring: “Samtang iginpapahiuyon ko an akon panhunahuna ngan pagkinabuhi ha mga suruklan han Biblia, nagigin mas malipayon ako.” Nasantop ni Maria nga makukurian hiya kon pagdudunganon niya an pagkab-ot hin espirituwal ngan materyal nga karikohan. (Mat. 6:24) Iginsakripisyo niya an iya tumong nga magin propesyonal nga parauyag hin golf ngan an higayon nga magin riko ngan sikat. Pero sugad nga resulta han iya pagpalit han kamatuoran, nag-aalagad na hiya yana sugad nga payunir ngan nagpapahimulos han pagkinabuhi nga iya iginhuhulagway sugad nga an “pinakamakalilipay ngan pinakamakapatagbaw nga pagkinabuhi.”

11. Kon ginpapalit naton an kamatuoran, ano an bangin mahitabo ha aton relasyon ha iba?

¹¹ Relasyon ha iba. Kon ginpipili naton nga magkinabuhi uyon ha kamatuoran ha Biblia, mahimo magbag-o an aton relasyon ha aton kasangkayan ngan mga kapamilya. Kay ano? Hi Jesus nag-ampo mahitungod ha iya mga sumurunod: “Baraana hira pinaagi han kamatuoran; an imo pulong kamatuoran.” (Juan 17:17) An mga pulong nga “baraana hira” mahimo liwat magpasabot hin “ilain hira.” Kon ginkakarawat naton an kamatuoran, nagigin lain o, bulag kita ha kalibotan kay diri na kita nasunod ha mga pamaagi hito. Nag-iiba an pagtratar ha aton han mga tawo kay nagbag-o na an aton mga prinsipyo ngan gintotoohan; nagkikinabuhi kita uyon ha mga kamatuoran ha Biblia. Bisan kon diri man naton karuyag nga magkaada pagkabahin-bahin, an aton iba nga kasangkayan ngan duok nga mga kapamilya bangin humirayo ha aton o kumontra pa ngani ha aton bag-o nga mga gintotoohan. Diri kita nahipapausa hini. Hi Jesus nagsiring: “Oo, magigin kaaway han usa nga tawo an iya mismo panimalay.” (Mat. 10:36) Ginpapasarig liwat kita niya nga mas daku an balos nga aton makakarawat kay ha anoman nga kantidad nga bangin aton iginbayad basi mapalit an kamatuoran.​—Basaha an Marcos 10:28-30.

12. Ano an iginsakripisyo han usa nga Judio para mapalit an kamatuoran?

¹² Tikang ha iya kabata, an Judio nga negosyante nga hi Aaron gintutdoan nga diri sadang luwason an ngaran han Dios. Pero karuyag gud niya mahibaroan an kamatuoran. Nalipay hiya han gintutdoan hiya han usa nga Saksi nga pinaagi ha pagbutang hin mga tiringgan (vowel) ha upat nga Hebreo nga mangarabay (consonant) han ngaran han Dios, mahimo ito luwason nga “Jehova.” Eksayted gud hiya nga kinadto ha sinagoga basi isumat ha mga rabbi an iya makalilipay nga hinbaroan. Pero an ira reaksyon iba gud kay ha ginlalaoman ni Aaron. Imbes nga malipay hira tungod han iya hinbaroan nga kamatuoran mahitungod han ngaran han Dios, gintuprahan lugod nira hiya ngan iginsalikway. Waray liwat malipay ha iya an iya mga kapamilya. Bisan pa hito, padayon niya nga ginpalit an kamatuoran ngan nag-alagad sugad nga matinumanon nga Saksi ni Jehova ha bug-os niya nga kinabuhi. Basi makaglakat uyon ha kamatuoran pariho kan Aaron, kinahanglan magin andam kita ha pagkarawat han anoman nga mga pagbag-o nga mahimo mahitabo ha aton relasyon ha aton mga kapamilya o ha iba.

13, 14. Ano nga mga pagbag-o an kinahanglan naton himoon ha aton panhunahuna ngan buhat basi mapalit an kamatuoran? Pag-unabi hin ehemplo.

¹³ Diri diosnon nga panhunahuna ngan buhat. Kon karuyag naton nga makarawat an kamatuoran ngan magkinabuhi uyon ha mga suruklan han Biblia ha moral, kinahanglan magin andam kita ha paghimo hin mga pagbag-o ha aton panhunahuna ngan buhat. Tigamni an iginsurat ni apostol Pedro may kalabotan hini: “Sugad nga masinugtanon nga mga anak, ayaw na kamo pagpamolde ha mga hingyap niyo hadto tungod han iyo kaignorante, lugod, magin baraan kamo ha ngatanan nga panggawi niyo.” (1 Ped. 1:14, 15) Para ha mga tawo nga nag-uukoy ha maraot nga syudad han Corinto, an pagpalit han kamatuoran nagpapasabot nga kinahanglan nira maghimo hin dagku nga pagbag-o ha ira pagkinabuhi. (1 Cor. 6:9-11) Sugad man, damu yana an nabaya ha ira diri diosnon nga mga buhat basi mapalit an kamatuoran. Hi Pedro dugang nga nagpahinumdom ha mga Kristiano ha iya panahon: “An panahon nga naglabay igo na para han iyo pagbuhat han kaburut-on han mga nasud, nga amo an mangil-ad  nga paggawi, diri-mapugngan nga maglaw-ay nga hingyap, sobra nga pag-inom, mga karisyohan nga waray-kontrol, paglupigay ha pag-inom, ngan mga idolatriya nga supak ha balaud.”​—1 Ped. 4:3.

¹⁴ Ha sulod hin damu ka tuig, hira Devynn ngan Jasmine mga parahubog. Bisan kon maopay nga bookkeeper hi Devynn, diri hiya nagkakaada permanente nga trabaho tungod han iya pagin parahubog. Hi Jasmine kilala tungod han iya pagin masisinahon ngan pagin madarahog. Usa ka adlaw samtang hubog nga naglalakat ha dalan hi Jasmine, nakaistorya niya an duha nga misyonero nga Saksi. An mga misyonero nakigsabot ha iya nga mag-aram ha Biblia, pero pag-abot nira ha balay ni Devynn han sumunod nga semana, hubog hira Jasmine ngan Devynn. Waray gud nira laumi nga magigin interesado an mga misyonero pagbisita ha ira balay. Pero iba na an sitwasyon pagbalik utro han mga misyonero. Tikang han siyahan nga pag-aram nira Jasmine ngan Devynn, nagin maduruto gud hira nga mga estudyante ha Biblia ngan gin-aplikar dayon nira an ira hinbaroan. Waray pa magtulo ka bulan, nagdesisyon hira nga diri na uminom hin de-alkohol ngan ha urhi, nagpakasal hira. Nahibantog gud an ira pagbag-o, salit damu an naaghat ha ira baryo nga mag-aram ha Biblia.

15. Ano an bangin usa han pinakamakuri nga bayad basi mapalit an kamatuoran, ngan kay ano?

¹⁵ Diri Kasuratanhon nga mga kustomre ngan tradisyon. An pag-undang ha pakigbahin ha diri Kasuratanhon nga mga kustomre ngan tradisyon bangin usa han pinakamakuri nga bayad basi mapalit an kamatuoran. Bisan kon bangin masayon para ha pipira an pagkarawat han Kasuratanhon nga basihan ha pagbaya hito nga mga tradisyon, an iba bangin mag-alang ha pagbaya hito kay nababaraka hira kon ano an magigin pagtratar ha ira han ira mga kapamilya, katrabaho, ngan duok nga kasangkayan. Bangin magin tensyonado an sitwasyon, labi na kon an usa nga kustomre nag-uupod hin mga rituwal ha pagpasidungog han namatay nga mga kapamilya. (Deut. 14:1) An susbaranan han iba ha pagin maisugon makakabulig ha aton ha paghimo han ginkikinahanglan nga mga pagbag-o. Tagda an ginbuhat han pipira nga taga-Efeso han siyahan nga siglo.

16. Ano an ginbuhat han pipira nga taga-Efeso basi mapalit an kamatuoran?

¹⁶ An mga taga-Efeso kilala ha pagbuhat hin madyik. Ano an ginbuhat han bag-o nga nakombirte nga mga Kristiano nga nagbubuhat hadto hin madyik basi bayaan inin diri Kasuratanhon nga buhat ngan paliton an kamatuoran? An Biblia nagsasaysay: “Gindara han damu nga nagbubuhat hin madyik an ira mga libro ngan ginsunog ito ha atubangan han ngatanan. Han ginkwenta nira, nagkakantidad ito hin 50,000 ka sinselyo nga silber. Salit ha gamhanan nga paagi an pulong ni Jehova padayon nga naipasamwak ngan naglampos.” (Buh. 19:19, 20) Daku gud an iginsakripisyo hinin matinumanon nga mga Kristiano pero nakakarawat hira hin presyoso nga mga bendisyon.

17. (a) Ano nga mga butang an bangin kinahanglan naton ibayad para ha kamatuoran? (b) Ano nga mga pakiana an aton hihisgotan ha sunod nga artikulo?

¹⁷ Ano an imo iginbayad para ha kamatuoran? Kita ngatanan naggagahin hin panahon ha pagtirok hin mga bukad han kamatuoran. An pipira nagbabayad liwat para ha kamatuoran pinaagi ha pagsakripisyo han mga oportunidad nga magkaada materyal nga mga butang ngan pinaagi ha pagkarawat han mga pagbag-o ha ira relasyon ha iba. Damu ha aton an naghihimo hin mga pagbag-o ha aton panhunahuna ngan buhat ngan naundang ha pakigbahin ha diri Kasuratanhon nga mga kustomre ngan tradisyon. Anoman an aton iginsasakripisyo, kombinsido kita nga an kamatuoran ha Biblia mas birilhon gud kay ha anoman nga aton iginbabayad para mapalit ito. Tungod han kamatuoran, nagin posible nga magkaada kita duok nga relasyon kan Jehova, nga amo an aton pinakabirilhon nga panag-iya. Kon ginpapamalandong naton an mga bendisyon ha paghibaro han kamatuoran, diri gud naton nasasabtan kon kay ano nga ‘iginbabaligya’ ito han iba. Paonan-o ito mahimo mahitabo, ngan paonan-o naton masisiguro nga diri naton mabubuhat iton daku nga sayop? Hihisgotan naton ini nga mga pakiana ha sunod nga artikulo.