DAMU nga kabugtoan nga binalhin hadto ha iba nga nasud basi magkaada mas daku nga kita an binalik ha ira natawhan nga nasud. Tungod han ira gugma kan Jehova ngan ha ira igkasi-tawo, binalhin hira ha mga lugar nga mas nanginginahanglan hin mga magwarali. (Mat. 22:37-39) Ano nga mga sakripisyo an ira ginhimo, ngan ano nga mga bendisyon an ira nakarawat? Basi mahibaroan ito, magpokus kita ha nasud han Cameroon ha weste han Aprika.

Han 1998, an brother nga hi Onésime binaya ha Cameroon, nga iya natawhan nga nasud. Nag-ukoy hiya hin 14 ka tuig ha iba nga nasud. Usa ka adlaw ha katirok, nabatian niya an usa nga ilustrasyon mahitungod ha pagsangyaw. An nagpapahayag nagsiring, “Kon an duha nga magsangkay nangingisda ha magkaiba nga dapit ngan an usa nakadakop hin mas damu nga isda, diri ba mabalhin an usa nga gutiay la an nadakop ngadto ha dapit nga mas damu an nadadakop?”

Tungod hito nga ilustrasyon, nakapanhunahuna hi Onésime nga bumalik ha Cameroon, diin damu an nadadakop ha espirituwal nga pagpangisda, basi buligan an mga magwarali didto. Pero may mga ginkakabarak-an hiya. Tungod kay maiha na hiya ha iba nga nasud, makaka-adjust pa ba hiya ha pagkinabuhi ha iya natawhan nga nasud? Basi mahibaroan ito, binisita hi Onésime ha Cameroon hin unom ka bulan. Katapos, han 2012, binalik hiya didto ngan nag-ukoy hin permanente.

Hi Onésime nagsiring: “Kinahanglan ko mag-adjust ha mapaso nga klima ngan ha pagkinabuhi didto. Ha Kingdom Hall, kinahanglan ko mahiara pagliningkod ha matig-a nga bangko. Pero kon nagpupokus ako ha programa,” nagsiring hiya nga nahiyom, “nahingangalimtan ko an kutson nga mga lingkoran.”

Han 2013, nagpakasal hi Onésime kan Géraldine, nga binalik ha Cameroon katapos mag-ukoy ha France hin siyam ka tuig. Ano nga mga bendisyon an nakarawat hini nga mag-asawa tungod han ira pagpokus ha teokratiko nga mga buruhaton? Hi Onésime nagsiring: “Nakaeskwela kami nga mag-asawa ha School for Kingdom Evangelizers ngan nag-alagad ha Bethel. Ha naglabay nga tuig, 20 nga Bible study ha amon kongregasyon an nabawtismohan. Inaabat ko yana nga aada ako ha husto nga dapit para ha ‘pagpangisda.’” (Mar. 1:17, 18) Hi Géraldine nagsiring: “Nakakarawat ako hin mas damu nga bendisyon kay han akon nahunahuna.”

Hi Judith binalhin ha United States pero karuyag gud niya pahaluagon an iya ministeryo. Hiya nagsiring, “Ha kada ko pagbibisita ha akon pamilya ha Cameroon, nagtatangis ako kon tiuli na ako kay babayaan ko an pipira nga natikangan ko pag-Bible study.” Pero nag-aalang hi Judith pagbalhin  ha Cameroon. Maopay an iya trabaho salit nakakabulig hiya ha mga gastos ha pagpatambal ha iya tatay ha Cameroon. Bisan pa hito, sinarig hiya kan Jehova, salit binalhin hiya. Gin-amin niya nga namimingaw hiya ha iya komportable nga kinabuhi ha iba nga nasud. Nag-ampo hiya kan Jehova nga buligan hiya nga maka-adjust ngan nakabulig ha iya an pagdasig han paramangno han sirkito ngan han iya asawa.

Ha paghinumdom ha naglabay, hi Judith nagsiring, “Makalilipay kay ha tulo ka tuig, may-ada ako upat nga nabuligan nga mabawtismohan.” Hi Judith nagtikang mag-alagad sugad nga espesyal payunir. Yana, hiya ngan an iya asawa nga hi Sam-Castel nag-aalagad ha sirkito nga buruhaton. Pero ano an nahitabo ha tatay ni Judith? Nakabiling hi Judith ngan an iya pamilya hin hospital ha iba nga nasud nga andam mag-isponsor ha operasyon han iya tatay. Makalilipay kay naglampos an operasyon.

An brother nga hi Victor binalhin ha Canada. Han nabasa niya an usa nga artikulo ha Barantayan mahitungod ha hitaas nga edukasyon, naghunahuna hiya mahitungod ha iya pag-eskwela. Salit, waray na hiya magpadayon pag-eskwela ha unibersidad, lugod nagkuha na la hiya hin halipot nga kurso basi magkaada skill. Hiya nagsiring, “Nakabulig ito ha akon nga makatrabaho dayon, ngan mabuhat an maiha ko na nga karuyag buhaton​—an pagpayunir.” Ha urhi, nag-asawa hi Victor kan Caroline, ngan binisita hira ha Cameroon. Didto, han binisita hira ha sanga nga opisina, gindasig hira nga mag-alagad ha Cameroon. Hi Victor nagsiring, “Waray kami rason nga bumaribad, ngan tungod kay ginpasimple namon an amon kinabuhi, puydi namon karawaton an imbitasyon.” Bisan kon hi Caroline may problema ha kahimsog, nagdesisyon hira nga bumalhin.

Hira Victor ngan Caroline nagtikang magregular payunir basi buligan an mga nakakaistorya nira nga interesado ha Biblia. Ha tinikangan, an ira tirok an ira gin-gamit ha ira kagarastohan. Katapos, nagtrabaho hira ha Canada hin pipira ka bulan basi pagbalik nira ha Cameroon makapadayon hira pagpayunir. Ano nga mga bendisyon an ira nakarawat? Nakaeskwela hira ha School for Kingdom Evangelizers, nagin espesyal payunir, ngan yana construction servant na. Hi Victor nagsiring, “Han ginbayaan namon an amon komportable nga kinabuhi, naeksperyensyahan gud namon an bulig ni Jehova.”

Han 2002, ginbasa ni Alain, usa nga estudyante ha unibersidad ha Germany, an tract nga Mga Batan-on​—Ano an Iyo Bubuhaton ha Iyo Kinabuhi? Napagios hiya hito nga magkab-ot hin bag-o nga mga tumong. Han 2006, ineskwela hiya ha Ministerial Training School ngan igintoka ha Cameroon, an iya natawhan nga nasud.

Ha Cameroon, nakatrabaho hi Alain hin part-time. Ha urhi, nakabiling hiya hin trabaho nga mas daku an sweldo, pero nabaraka hiya kay bangin ito makaulang ha iya ministeryo. Salit han gin-imbitar hiya nga magin espesyal payunir, ginkarawat niya dayon ito. Gintanyagan hiya han iya boss hin mas daku pa nga sweldo, pero determinado na hi Alain ha iya desisyon. Ha urhi, nag-asawa hiya kan Stéphanie, nga nag-ukoy ha France hin pipira ka tuig. Ano nga mga problema an gin-atubang ni Stéphanie pagbalhin niya ha Cameroon?

Hi Stéphanie nagsiring: “Nagkaada ako mga sakit nga diri man grabe pati mga allergy, pero regular ako nga nakakapatambal salit nag-oopay an akon pamati.” Ini nga mag-asawa ginbalosan tungod han ira pagpailob. Hi Alain nagsiring: “Han  nagsangyaw kami ha hirayo nga baryo nga an ngaran Katé, may mga nabilngan kami nga naruruyag magpa-Bible study. Ha urhi, na-Bible study namon hira pinaagi ha telepono. Duha ha ira an nabawtismohan, ngan nagkaada didto grupo hin mga magwarali.” Hi Stéphanie nagsiring: “Waray na mas makalilipay pa kay ha pagbulig ha mga tawo tubtob nga magdedikar hira kan Jehova. Tungod han amon pag-alagad dinhi, damu ka beses nga naeksperyensyahan namon ito nga kalipay.” Yana, hira Alain ngan Stéphanie nag-aalagad ha sirkito nga buruhaton.

Hi Gisèle nabawtismohan samtang naeskwela pagkadoktor ha Italy. Naimpres hiya ha simple nga pagkinabuhi han mag-asawa nga payunir nga nag-study ha iya, ngan karuyag niya nga pahaluagon pa an iya ministeryo. Salit nagregular payunir hiya samtang gintatapos niya an iya pag-eskwela.

Karuyag ni Gisèle nga bumalhin ha Cameroon basi mas makag-alagad pa kan Jehova, pero may mga ginkakabarak-an hiya. Hiya nagsiring, “Kinahanglan ko isakripisyo an akon pagin residente ha Italy, ngan kinahanglan ko bumulag ha akon kasangkayan ngan mga kapamilya didto.” Bisan pa hito, han Mayo 2016, hi Gisèle binalhin ha Cameroon. Waray pag-iha, nag-asawa hiya kan Léonce, ngan an sanga nga opisina ha Cameroon nagrekomendar ha ira nga bumalhin ha Ayos, usa nga bungto nga nanginginahanglan gud hin mga magwarali.

Kumusta an ira kinabuhi ha Ayos? Hi Gisèle nagsiring: “Kaurogan nga mga semana nga waray koryente, salit diri kami nakaka-charge han amon celfon. Haros pirme nga diri ito nagagamitan. Nahibaro ako pagluto gamit hin sungo, ngan nagdadara kami hin kariton ngan ispat kon naalog kami ha gab-i samtang gutiay na la an tawo ha atabay.” Paonan-o nakapailob ini nga mag-asawa? Hi Gisèle nagsiring: “Nakabulig gud ha amon an espiritu ni Jehova, an suporta namon nga mag-asawa ha usa kag usa, ngan an pagdasig han amon mga kapamilya ngan kasangkayan ngan an ira bulig ha pinansyal ha panapanahon.”

Nalipay ba hi Gisèle nga binalik hiya ha iya natawhan nga nasud? “Oo! Nalipay gud ako,” siring niya. “Ha tinikangan, nakurian kami ngan inabat hin panluya, pero han nalamposan namon ito, inabat namon nga ginbuhat gud namon an kinahanglan namon buhaton. Sinarig kami kan Jehova ngan nagin mas duok kami ha iya.” Hira Léonce ngan Gisèle ineskwela ha School for Kingdom Evangelizers, ngan yana temporaryo nga espesyal payunir na.

Pariho hin mga parapangisda nga maisugon nga gin-aatubang an magkuri nga kahimtang basi makadakop hin damu nga isda, adton nabalik ha ira natawhan nga nasud andam magsakripisyo basi buligan an sinsero nga mga tawo nga nakarawat han mensahe han Ginhadian. Sigurado nga diri hingangalimtan ni Jehova inin magduruto nga magwarali tungod han gugma nga ira iginpapakita para ha iya ngaran. (Neh. 5:19; Heb. 6:10) Kon naukoy ka ha iba nga nasud ngan may panginahanglan hin mga magwarali ha imo natawhan nga nasud, puydi ka ba bumalik? Kon bubuhaton mo ito, damu nga bendisyon an naghuhulat ha imo.​—Prob. 10:22.