1-2. (a) Kay ano nga kinahanglan sumarig kan Jehova an bag-o nga mga mag-asawa? (Salmo 37:3, 4) (b) Ano an aton hihisgotan hini nga artikulo?

HIRANI ka na ba mag-asawa, o bag-o ka la ba nga inasaw-an? Kon oo, sigurado nga eksayted ka gud nga makaupod ha imo bug-os nga kinabuhi an tawo nga imo ginhihigugma gud. Syempre, an kinabuhi sugad nga may asawa may mga problema, ngan may importante nga mga desisyon nga kinahanglan himoon. An paagi han iyo pag-atubang hito nga mga problema ngan mga desisyon makakaapekto han iyo kalipay ha maabot nga mga tuig. Kon nasarig kamo kan Jehova, maghihimo kamo hin maaramon nga mga desisyon, magririg-on an iyo pag-asawa, ngan magigin mas malipayon kamo. Pero kon diri niyo iaaplikar an sagdon han Dios, posible nga makaeksperyensya kamo hin mga problema nga makakaapekto han iyo pag-asawa, nga magriresulta nga magin diri kamo malipayon.—Basaha an Salmo 37:3, 4.

² Bisan kon ini nga artikulo nakapokus ha bag-o nga mga mag-asawa, maghihisgot ini hin mga problema nga mahimo maeksperyensyahan han ngatanan nga mga mag-asawa. Uusisahon hini kon ano an aton mahibabaroan ha mga ehemplo han pipira nga matinumanon nga kalalakin-an ngan kababayin-an ha Biblia. Ini nga mga ehemplo nagtututdo ha aton hin mga leksyon nga maiaaplikar naton ha iba-iba nga bahin han aton kinabuhi, upod na ha pag-asawa. Hihisgotan liwat naton kon ano an aton mahibabaroan ha mga eksperyensya han pipira nga mag-asawa ha aton panahon.

3-4. Ano nga mga problema an mahimo atubangon han bag-o nga mga mag-asawa?

³ An pipira nga tawo bangin mag-aghat ha usa nga bag-o nga mag-asawa nga magkaada hin kinabuhi nga gintatawag han iba  nga normal nga kinabuhi. Pananglitan, bangin presyuron hira han ira mga kag-anak ngan iba nga kapamilya nga magkaada dayon anak. O bangin aghaton hira han ira kasangkayan ngan mga kapamilya nga maopay an intensyon nga pumalit hira hin balay ngan damu nga mag-opay nga gamit.

⁴ Kon diri magigin mabinantayon an usa nga mag-asawa, bangin makahimo hira hin mga desisyon nga magriresulta nga magkaada hira damu nga utang. Katapos, posible nga magtrinabaho hira hin damu ka oras basi mabaydan ito. Salit an ira panahon nga para unta ha ira personal nga pag-aram han Biblia, pagsingba han pamilya, ngan ha ministeryo bangin nagagamit na nira ha ira sekular nga trabaho. Bangin diri na ngani hira makatambong ha mga katirok tungod ha pag-inobertaym basi la magkaada dugang nga kità o masiguro nga diri mawara ha ira an ira trabaho. Sugad nga resulta, diri nira mapapahimulsan an makalilipay nga mga oportunidad nga mapauswag an ira pag-alagad kan Jehova.

5. Ano an imo nahibaroan ha ehemplo nira Klaus ngan Marisa?

⁵ Iginpapakita han mga eksperyensya nga kon magpupokus kita ha pagtirok hin materyal nga mga butang, diri kita magigin malipayon. Tagda an nahibaroan han mag-asawa nga hira Klaus ngan Marisa may kalabotan hito. * Tikang han nag-asawa hira, hira nga duha nagtrabaho hin bug-os-panahon basi magin komportable an ira kinabuhi. Pero waray hira magin tinuod nga malipayon. Hi Klaus nagsiring: “Damu gud an amon materyal nga mga butang, pero waray kami espirituwal nga mga tumong. Ha tinuod la, komplikado ngan nakakaistres an amon kinabuhi.” Bangin napansin mo liwat nga an pagpokus ha pagtirok hin materyal nga mga butang diri nakakaghatag ha imo hin tinuod nga kalipay. Kon amo, ayaw panluya. Makakabulig ha imo kon ikukonsiderar mo an mag-opay nga ehemplo han iba may kalabotan hito. Siyahan, hisgotan naton kon ano an mahibabaroan han mga bana ha ehemplo ni Hadi Jehosafat.

6. Uyon ha sagdon ha Proberbios 3:5, 6, ano an ginbuhat ni Hadi Jehosafat han inatubang hiya hin daku nga problema?

⁶ Mga bana, usahay ba nabubug-atan kamo han iyo mga responsabilidad? Kon amo, makakapahimulos kamo ha ehemplo ni Hadi Jehosafat. Sugad nga hadi, responsabilidad ni Jehosafat an seguridad han bug-os nga nasud! Ano an iya ginbuhat basi matuman niya iton daku nga responsabilidad? Ginhimo ni Jehosafat an iya makakaya basi proteksyonan an iya mga sakop. Ginparig-on niya an mga syudad han Juda ngan nagtirok hin damu nga kasundalohan nga sobra 1,160,000. (2 Cron. 17:12-19) Ha urhi, inatubang hi Jehosafat hin daku nga problema. Gintarhog hiya, an iya pamilya, ngan an iya katawohan han damu nga kasundalohan han mga Ammonita, Moabita, ngan han kalalakin-an han kabukiran han Seir. (2 Cron. 20:1, 2) Ano an ginbuhat ni Jehosafat? Nangaro hiya kan Jehova hin bulig ngan kusog. Uyon ini ha maaramon nga sagdon ha Proberbios 3:5, 6. (Basaha.) An mapainubsanon nga pag-ampo ni Jehosafat nga  nakarekord ha 2 Cronicas 20:5-12 nagpapakita nga daku gud an iya pagsarig ha iya mahigugmaon nga langitnon nga Amay. Paonan-o ginbaton ni Jehova an pag-ampo ni Jehosafat?

7. Paonan-o ginbaton ni Jehova an pag-ampo ni Jehosafat?

⁷ Hi Jehova nakiistorya kan Jehosafat pinaagi han Levita nga hi Jahaziel. Hi Jehova nagsiring: “Dida la kamo ha iyo pwesto, magpabilin nga natindog, ngan kitaa an pagtalwas ha iyo ni Jehova.” (2 Cron. 20:13-17) Kasagaran na nga diri ito an paagi ha pakig-away ha usa nga girra! Pero ito nga instruksyon diri tikang ha tawo; tikang ito kan Jehova. Tungod han bug-os nga pagsarig ni Jehosafat ha iya Dios, ginsunod niya an instruksyon. Han kinadto hiya ngan an iya katawohan basi tapoon an mga kaaway, iya iginbutang ha prente an diri armado nga mga parakanta, imbes nga an pinakaeksperto nga mga sundalo. Gintuman gud ni Jehova an iya saad kan Jehosafat; Iya ginpirde an kaaway nga mga kasundalohan.—2 Cron. 20:18-23.

8. Ano an mahibabaroan han mga bana ha ehemplo ni Jehosafat?

⁸ Mga bana, may mahibabaroan kamo ha ehemplo ni Jehosafat. Responsabilidad niyo nga atamanon an iyo pamilya, salit naniniguro gud kamo nga proteksyonan ngan suportaran hira. Kon naatubang kamo hin mga problema, bangin abaton niyo nga kaya niyo sulbaron ito ha iyo kalugaringon la nga paagi. Pero ayaw pagsarig ha iyo kalugaringon nga kusog. Lugod, pag-ampo para han bulig ni Jehova. Dugang pa, pag-ampo hin sinsero kaupod han iyo asawa. Pamiling hin giya tikang kan Jehova pinaagi ha pag-aram han Biblia ngan mga publikasyon nga igintatagana han iya organisasyon, ngan iaplikar an sagdon nga aada hito. An iba bangin diri umuyon ha iyo ginhihimo nga mga desisyon nga basado ha Biblia, ngan bangin magsiring pa ngani hira ha iyo nga nalulurong na kamo. Bangin magsiring hira nga an kwarta ngan an mga butang nga napapalit hito amo an pinakamaopay nga proteksyon para ha iyo pamilya. Pero hinumdumi an ehemplo ni Jehosafat. Sinarig hiya kan Jehova, ngan iginpakita niya ito ha iya mga buhat. Waray bayai ni Jehova iton maunungon nga lalaki, ngan diri liwat niya kamo babayaan. (Sal. 37:28; Heb. 13:5) Ano an mahimo buhaton han mga mag-asawa basi masiguro nira nga malipayon an ira kinabuhi sugad nga mga-asawa?

9. Ano an aton masisiring mahitungod kan propeta Isaias ngan ha iya asawa?

⁹ An pag-alagad kan Jehova an pinakaimportante kan propeta Isaias ngan ha iya asawa. Hi Isaias usa nga propeta, ngan posible nga nanagna liwat an iya asawa kay gintawag hiya nga “propetisa.” (Isa. 8:1-4) Nagpokus hi Isaias ngan an iya asawa ha ira pagsingba kan Jehova. Maopay gud hira nga ehemplo ha mga mag-asawa yana!

10. Paonan-o an pag-aram han mga tagna han Biblia makakabulig ha mga mag-asawa nga magin determinado nga buhaton an ira bug-os nga mahihimo para kan Jehova?

¹⁰ Mahimo liwat unahon han mga mag-asawa yana an pag-alagad kan Jehova pinaagi ha pagbuhat han ngatanan nga ira mahihimo para ha pag-alagad ha iya. Mapaparig-on nira an ira pagsarig kan Jehova kon pag-aadman nira nga magkaupod an mga tagna han Biblia ngan uusisahon kon paonan-o ito pirme natutuman. * (Tito 1:2) Mahimo nira pamalandungon kon paonan-o hira makakabulig ha pagtuman han pipira nga tagna han Biblia. Pananglitan, mahimo hira makabulig ha pagtuman han tagna ni Jesus nga an maopay nga sumat igsasangyaw ha bug-os nga tuna antes umabot an kataposan. (Mat. 24:14) Samtang mas nagigin sigurado an mag-asawa nga natutuman  na an mga tagna han Biblia, mas magigin determinado hira nga buhaton an ira bug-os nga mahihimo para kan Jehova.

11. Ano an mga nahimo nira Priscila ngan Aquila, ngan kay ano?

¹¹ An batan-on nga mga mag-asawa may mahibabaroan kanda Priscila ngan Aquila, usa nga Judio nga mag-asawa nga naukoy ha syudad han Roma. Nahibaroan nira an maopay nga sumat mahitungod kan Jesus ngan nagin Kristiano hira. Sigurado nga malipayon na hira ha ira kinabuhi. Pero tigda nga nagbag-o ito han ginpabaya ni Emperador Claudio an ngatanan nga Judio ha Roma. Hunahunaa an nagin epekto hito kanda Aquila ngan Priscila. Kinahanglan nira bumaya ha lugar nga pamilyar na ha ira, mamiling hin bag-o nga urukyan, ngan magtikang utro han ira negosyo nga panhimo hin tolda ha bag-o nga lokasyon. Ito ba nga makuri nga mga kahimtang nakaulang ha ira nga unahon an mga buruhaton han Ginhadian? Posible nga maaram ka han baton hito. Ha ira bag-o nga urukyan ha Corinto, aktibo nga binulig hira Aquila ngan Priscila ha kongregasyon. Binulig liwat hira kan apostol Pablo ha pagparig-on ha kabugtoan. Ha urhi, binalhin hira ha iba nga mga bungto nga mas nagkikinahanglan hin mga parasangyaw. (Buh. 18:18-21; Roma 16:3-5) Sigurado nga nagin busy ngan malipayon gud an ira kinabuhi!

12. Kay ano nga an mag-asawa kinahanglan maghimo hin espirituwal nga mga tumong?

¹² Mahimo masubad han mga mag-asawa yana hira Priscila ngan Aquila pinaagi ha pag-una han mga buruhaton han Ginhadian. An pinakamaopay nga panahon nga angay pag-istoryahan han mag-asawa an ira mga tumong amo an panahon nga mag-uyab pa la hira. Kon an mag-asawa magkaupod nga naghihimo hin mga desisyon ngan nangangalimbasog nga kab-uton an ira mga tumong ha espirituwal, may-ada hira dugang nga mga higayon nga makita an bulig han espiritu ni Jehova ha ira kinabuhi. (Ecles. 4:9, 12) Tagda an eksperyensya nira Russell ngan Elizabeth. Hi Russell nagsiring, “Han mag-uyab pa la kami, gin-istoryahan namon an amon mga tumong ha espirituwal.” Hi Elizabeth nagsiring, “Gin-istoryahan namon ito basi kon kinahanglan namon maghimo hin mga desisyon ha urhi, masisiguro namon nga an amon  mga desisyon diri makakaulang ha amon ha pagkab-ot hito nga mga tumong.” Igintugot han kahimtang nira Russell ngan Elizabeth nga bumalhin hira ha Micronesia basi mag-alagad ha lugar nga mas nagkikinahanglan hin mga magwarali.

13. Sumala ha Salmo 28:7, ano an magigin resulta kon masarig kita kan Jehova?

¹³ Pariho kanda Russell ngan Elizabeth, damu nga mag-asawa an nagdesisyon nga padayon nga pasimplihon an ira kinabuhi basi daku nga panahon an ira magamit ha pagsangyaw ngan pagtutdo nga buruhaton. Kon an mag-asawa naghihimo hin mapulsanon nga mga tumong ha pag-alagad kan Jehova ngan magkaupod nga ginkakab-ot ito, magkakaada damu nga mag-opay nga resulta. Makikita nira kon paonan-o hira gin-aataman ni Jehova, magririg-on an ira pagsarig ha iya, ngan magigin tinuod hira nga malipayon.—Basaha an Salmo 28:7.

14. Paonan-o iginpakita ni apostol Pedro ngan han iya asawa nga nasarig hira ha saad nga mababasa ha Mateo 6:25, 31-34?

¹⁴ An mga mag-asawa may mahibabaroan liwat ha ehemplo ni apostol Pedro ngan han iya asawa. Mga unom ka bulan tubtob ha usa ka tuig tikang han siyahan nga nakaistorya niya hi Jesus, kinahanglan ni apostol Pedro maghimo hin importante nga desisyon. Pagpangisda an pakabuhi ni Pedro. Salit han gin-imbitar ni Jesus hi Pedro nga sumunod ha iya hin bug-os-panahon, kinahanglan igkonsiderar ni Pedro an sitwasyon han iya pamilya. (Luc. 5:1-11) Nagdesisyon hiya nga umupod kan Jesus ha pagsangyaw nga buruhaton. Maaramon ito nga iya desisyon! Ngan may maopay kita nga rason nga maghunahuna nga sinuporta an asawa ni Pedro ha iya desisyon. Iginpapakita han Biblia nga katapos mabanhaw hi Jesus, may mga panahon nga inupod kan Pedro ha pagbiyahe an iya asawa. (1 Cor. 9:5) Waray ruhaduha, tungod han maopay nga ehemplo han asawa ni Pedro, nagkaada hi Pedro hin kagawasan ha pagyakan han iginrekord niya an giniyahan nga sagdon para ha Kristiano nga mga bana ngan asawa. (1 Ped. 3:1-7) Klaro, hi Pedro ngan an iya asawa sinarig ha saad ni Jehova nga itatagana Niya an ira panginahanglan kon uunahon nira ha ira kinabuhi an Ginhadian.—Basaha an Mateo 6:25, 31-34.

15. Ano an imo nahibaroan ha eksperyensya nira Tiago ngan Esther?

¹⁵ Kon medyo maiha na kamo nga mag-asawa, paonan-o niyo padayon nga makukultibar an hingyap nga mapauswag an iyo ministeryo? An usa nga paagi amo an paghibaro tikang ha mga eksperyensya han iba nga mag-asawa. Pananglitan, mahimo niyo basahon an serye nga “Malipayon nga Nagsakripisyo Hira ha Pag-alagad.” An sugad nga mga artikulo nakabulig kanda Tiago ngan Esther, usa nga mag-asawa ha Brazil, nga magkaada daku nga hingyap nga mag-alagad ha lugar nga mas nagkikinahanglan hin mga magwarali. Hi Tiago nagsiring: “Samtang ginbabasa namon an mga eksperyensya kon paonan-o ginbuligan ni Jehova an iya mga surugoon ha aton panahon, karuyag liwat namon abaton an paggiya ngan pag-ataman ha amon ni Jehova.” Ha urhi, binalhin hira ha Paraguay, diin nag-alagad hira ha teritoryo nga Portuguese an linggwahe tikang han 2014. Hi Esther nagsiring: “An usa nga teksto nga paborito namon amo an Efeso 3:20. Damu ka beses nga naeksperyensyahan namon ha amon pag-alagad kan Jehova an pagkatinuod hito nga mga pulong.” Hito nga surat ha mga taga-Efeso, nagsaad hi Pablo nga ihahatag ni Jehova an labaw pa ha aton gin-aaro. Pauroutro gud nga natutuman ito nga saad!

16. Kan kanay mahimo mangaro hin sagdon an batan-on nga mga mag-asawa kon gin-uusisa nira an ira mga tumong?

¹⁶ An batan-on nga mga mag-asawa yana makakapahimulos ha eksperyensya han iba nga nasarig kan Jehova. An iba nga mag-asawa bangin mga dekada na nga nag-aalagad hin bug-os-panahon.  Kay ano nga diri kamo mangaro hin sagdon ha ira kon inaabat niyo nga kinahanglan niyo usisahon an iyo mga tumong? Usa pa ini nga paagi nga maipapakita niyo nga nasarig kamo kan Jehova. (Prob. 22:17, 19) Makakabulig liwat an mga tigurang ha batan-on nga mga mag-asawa nga magkab-ot hin espirituwal nga mga tumong.

17. Ano an nahitabo kanda Klaus ngan Marisa, ngan ano an aton mahibabaroan ha ira eksperyensya?

¹⁷ Pero usahay, an aton desisyon nga pauswagon an aton pag-alagad bangin iba an mahitabo ha aton ginlalaoman. Tagda an ehemplo nira Klaus ngan Marisa, nga gin-unabi ha tinikangan. Han tulo ka tuig na hira nga mag-asawa, binaya hira ha ira lugar ngan nagboluntaryo ha konstruksyon ha Finland branch. Pero nahibaroan nira nga diri hira puydi magpabilin didto hin sobra unom ka bulan. Han una, nasubo gud hira. Pero waray pag-iha, gin-imbitar hira nga umatender ha usa nga kurso ha pag-aram hin Arabic nga linggwahe, ngan yana malipayon nga nag-aalagad hira ha iba nga nasud ha teritoryo nga nagyayakan hin Arabic. Han ginhunahuna ni Marisa an nahitabo, hiya nagsiring: “Makulba gud an pagbuhat han usa nga butang nga waray mo pa buhata hadto, salit kinahanglan mo bug-os nga sumarig kan Jehova. Pero nakita ko kon paonan-o kami pirme ginbubuligan ni Jehova ha diri ginlalaoman nga mga paagi. Katapos namon maeksperyensyahi ito, mas nagrig-on gud an akon pagsarig kan Jehova.” Sugad han iginpapakita hini nga ehemplo, makakasiguro ka nga pirme ka babalosan ni Jehova kon bug-os nga masarig ka ha iya.

18. Ano an mahimo buhaton han mga mag-asawa basi maipakita nira nga padayon hira nga nasarig kan Jehova?

¹⁸ An pag-asawa regalo tikang kan Jehova. (Mat. 19:5, 6) Karuyag niya nga malipay hito nga regalo an mga mag-asawa. (Prob. 5:18) Batan-on nga mga mag-asawa, kay ano nga diri niyo usisahon kon paonan-o niyo ginagamit an iyo kinabuhi? Ginbubuhat ba niyo an ngatanan nga iyo mahihimo basi maipakita kan Jehova nga gin-aapresyar gud niyo an iya mga regalo ha iyo? Pakiistorya kan Jehova ha pag-ampo. Pamiling ha iya Pulong hin mga prinsipyo nga naaplikar ha iyo sitwasyon. Katapos, sunda an sagdon ha iyo ni Jehova. Makakasiguro kamo nga magkakaada kamo malipayon ngan mapulsanon nga kinabuhi kon uunahon niyo an pag-alagad kan Jehova!