1. Ano an bangin ipakiana naton ha aton kalugaringon?

USAHAY nababaraka ka ba kon nahuhunahuna mo an mga mahitatabo ha tiarabot—an kabungkag han buwa nga relihiyon, an pag-atake han Gog han Magog, ngan an girra han Armagedon? Naipakiana mo na ba ha imo kalugaringon, ‘Kon umabot na ito nga makaharadlok nga mga panhitabo, makakapabilin ba ako nga matinumanon?’ Kon nahunahuna mo na ito nga mga pakiana, an ginsiring ni Jesus ha aton tema nga teksto sigurado nga makakabulig ha imo. Hi Jesus nagsiring ha iya mga disipulo: “Ayaw pabay-i nga masubo an iyo kasingkasing. Magpakita kamo hin pagtoo.” (Juan 14:1) An marig-on nga pagtoo mabulig ha aton nga maatubang nga may kompyansa an mga mahitatabo ha tiarabot.

2. Paonan-o naton mapaparig-on an aton pagtoo, ngan ano an aton hihisgotan hini nga artikulo?

² Mapaparig-on naton an aton pagtoo basi mailob an tiarabot nga mga pagsari pinaagi ha pagkonsiderar kon paonan-o naton gin-aatubang yana an mga pagsari han aton pagtoo. Kon ginhuhunahuna naton an aton reaksyon ha mga pagsari nga aton naieksperyensyahan, mahibabaroan naton kon ano nga mga bahin han aton pagtoo an kinahanglan naton parig-unon. Ha kada pagsari nga aton nalalamposan, mas nagririg-on an aton pagtoo. Mabulig ini ha aton nga mailob an tiarabot nga mga pagsari. Hini nga artikulo, rirepasuhon naton an upat nga sitwasyon nga naeksperyensyahan han mga disipulo ni Jesus nga tungod hito nakita nga kinahanglan nira hin dugang nga pagtoo. Katapos, hihisgotan naton kon paonan-o naton maiilob an puropariho nga mga pagsari yana ngan kon paonan-o kita maiaandam hito ha mga mahitatabo ha tiarabot.

3. Sumala ha Mateo 6:30, 33, ano nga punto mahitungod ha pagtoo an iginpatin-aw ni Jesus?

³ Natural la nga karuyag itagana han usa nga ulo han pamilya an pagkaon, bado, ngan urukyan para ha iya asawa ngan mga anak.  Diri pirme masayon an pagbuhat hito hinin makuri nga panahon. Ha pipira nga kahimtang, an aton mga igkasi-tumuroo nawad-an hin trabaho, ngan bisan pa han ira paningkamot, diri hira nakakabiling hin iba nga trabaho. An iba naman, waray nira karawta an usa nga trabaho nga diri angayan ha mga Kristiano. Ha sugad nga mga kahimtang, kinahanglan naton an marig-on nga pagtoo nga sisiguruhon ni Jehova nga may-ada an aton pamilya han mga panginahanglan. Ginklaro ito ni Jesus ha iya mga disipulo ha Sermon ha Bukid. (Basaha an Mateo 6:30, 33.) Kon kombinsido gud kita nga diri kita papabay-an ni Jehova, makakapokus kita ha aton pag-alagad ha iya. Samtang nakikita naton kon paonan-o kita ginbubuligan ni Jehova nga magkaada han aton materyal nga panginahanglan, mas magigin tinuod hiya ha aton ngan magririg-on an aton pagtoo.

4-5. Ano an nakabulig ha usa nga pamilya nga maatubang an ira mga kabaraka mahitungod han ira materyal nga mga panginahanglan?

⁴ Tagda kon paonan-o naeksperyensyahan han usa nga pamilya ha Venezuela an bulig ni Jehova han nababaraka gud hira mahitungod han ira materyal nga mga panginahanglan. Hadto, an pamilya Castro diri nagkukuri ha pinansyal tungod kay may-ada hira kalugaringon nga uma. Pero ginkuha han usa nga armado nga grupo an ira tuna ngan ginpaiwas hira. An tatay nga hi Miguel nagsiring: “Yana, nag-uuma na la kami ha usa nga gutiay nga tuna nga amon ginhuram. Kada adlaw nag-aampo ako kan Jehova nga itagana niya an amon panginahanglan ha tagsa nga adlaw.” Makuri an kahimtang han pamilya Castro, pero tungod kay natoo gud hira nga maitatagana han aton mahigugmaon nga Amay an ira adlaw-adlaw nga panginahanglan, regular nga natambong hira ha mga katirok ha kongregasyon ngan nakikigbahin ha ministeryo. Gin-uuna nira ha ira kinabuhi an mga buruhaton han Ginhadian, ngan igintatagana ni Jehova an ira mga panginahanglan.

⁵ Hiton makuri nga mga panahon, hi Miguel ngan an iya asawa nga hi Yurai, nagpokus kon paonan-o hira gin-aataman ni Jehova. May mga panahon nga gin-gamit ni Jehova an kabugtoan basi maghatag han iba nira nga materyal nga panginahanglan o mabuligan hi Miguel nga makabiling hin trabaho. May mga panahon naman nga igintagana ni Jehova an ira nangunguna nga mga panginahanglan pinaagi han bulig nga ira nakakarawat ha sanga nga opisina. Waray gud hira pabay-i ni Jehova. Sugad nga resulta, nakita nira nga mas nagrig-on an pagtoo han ira pamilya. Katapos mag-unabi hin espisipiko nga ehemplo kon paonan-o hira ginbuligan ni Jehova, an ira suhag nga anak nga hi Yoselin, nagsiring: “Makaparig-on gud makita kon paonan-o kami ginbuligan ni Jehova. Sangkay ko hiya, ngan nasarig ako nga pirme niya ako bubuligan.” Nagsiring pa hiya: “An mga pagsari nga naeksperyensyahan han amon pamilya nag-andam ha amon para maatubang an mas makuri nga mga pagsari ha tiarabot.”

6. Paonan-o mo mapaparig-on an imo pagtoo kon nagkukuri ka ha pinansyal?

⁶ Nagkukuri ka ba ha pinansyal? Kon amo, diri gud ito masayon para ha imo. Pero bisan pa hito, mahimo mo gamiton ito nga panahon basi parig-unon an imo pagtoo. Pag-ampo ngan basaha an ginsiring ni Jesus ha Mateo 6:25-34 ngan pamalandonga ito. Tagda an mga eksperyensya han  kabugtoan yana nga nagpapamatuod nga nagtatagana hi Jehova hadton nagpapabilin nga busy ha espirituwal nga mga buruhaton. (1 Cor. 15:58) Kon bubuhaton mo ito, magigin kombinsido ka gud nga bubuligan ka ni Jehova sugad la nga iya ginbuligan an iba nga nakaeksperyensya hin mga problema nga pariho han imo. Maaram hiya han imo panginahanglan, ngan maaram hiya kon paonan-o niya ito itatagana. Samtang naieksperyensyahan mo an bulig ni Jehova, magririg-on an imo pagtoo salit maiilob mo an mas makuri nga mga pagsari ha tiarabot.—Hab. 3:17, 18.

7. Sumala ha Mateo 8:23-26, paonan-o nasarihan an pagtoo han mga disipulo tungod han “usa nga makusog nga subasko”?

⁷ Han hi Jesus ngan an iya mga disipulo naabtan ha dagat hin makusog nga subasko, gin-gamit ni Jesus ito nga hitabo basi buligan hira nga makita nga kinahanglan nira parig-unon an ira pagtoo. (Basaha an Mateo 8:23-26.) Makusog gud ito nga subasko, salit nasusulod an ira sakayan han mga balud, pero hi Jesus maopay la an katurog. Han ginpukaw hiya han nahahadlok nga mga disipulo ngan ginhangyo nga talwason hira, may pagkabuotan nga ginpakianhan hira han Ginoo: “Kay ano nga nahahadlok gud kamo, kamo nga gutiay an pagtoo?” Nasantop unta hito nga mga disipulo nga kaya gud ni Jehova protektaran hi Jesus ngan an iya mga kaupod tikang ha peligro. Ano an leksyon? An marig-on nga pagtoo mabulig ha aton nga makaya an bisan ano nga “makusog nga subasko,” o bagyo, literal man ito o simboliko.

8-9. Paonan-o nasarihan an pagtoo ni Anel, ngan ano an nakabulig ha iya?

⁸ Tagda kon paonan-o nagrig-on an pagtoo ni Anel, nga usa nga solo nga sister nga taga-Puerto Rico, han nakaeksperyensya hiya hin makuri gud nga pagsari. Nakaeksperyensya hiya hin literal nga makusog nga bagyo. An pagsari nagtikang han 2017 han naguba an balay ni Anel tungod han bagyo nga Maria. Nawad-an liwat hiya hin trabaho tungod han bagyo. “Hiton makuri nga mga panahon, nabaraka gud ako,” siring ni Anel, “pero sinarig ako kan Jehova pinaagi han pag-ampo ngan waray ako magpadaog han akon mga kabaraka.”

⁹ May ginsiring pa hi Anel nga nakabulig ha iya nga makaya an pagsari—an pagkamasinugtanon. Hiya nagsiring: “An pagsunod han giya han organisasyon nakabulig ha akon nga magpabilin nga kalmado. Nakita ko nga ginbuligan ako ni Jehova pinaagi han espirituwal nga mga pagdasig nga akon nakarawat pati han materyal nga bulig han kabugtoan.” Nagsiring pa hiya: “Gintagan ako ni Jehova hin labaw pa kay han akon gin-aaro, ngan nagrig-on gud an akon pagtoo.”

10. Ano an mahimo mo buhaton kon naatubang ka hin usa nga makusog nga bagyo?

¹⁰ May gin-aatubang ka ba nga usa nga makusog nga bagyo? Bangin nag-aantos ka tungod hin kalamidad. O bangin nag-aantos ka hin simboliko nga bagyo, sugad han grabe nga sakit nga nakakapasubo gud ha imo ngan diri ka maaram han imo bubuhaton. Bangin may mga panahon nga nababaraka ka gud, pero ayaw pasagdi nga mawara an imo pagsarig kan Jehova tungod hito. Pahirani ha iya pinaagi han sinsero nga pag-ampo. Parig-ona  an imo pagtoo pinaagi ha pagpamalandong ha mga panahon nga ginbuligan ka ni Jehova. (Sal. 77:11, 12) Makakasiguro ka nga diri ka gud niya babayaan yana ngan bisan san-o.

11. Kay ano nga dapat magin determinado kita nga magin masinugtanon ha mga nangunguna?

¹¹ Ano pa an makakabulig ha imo nga makaya an mga pagsari? Sugad han ginsiring ni Anel, an pagkamasinugtanon. Sarig ha mga ginsasarigan ni Jehova ngan ni Jesus. Usahay, an mga pinili nga manguna bangin maghatag hin giya nga diri praktikal para ha aton. Pero ginbibendisyonan ni Jehova an masinugtanon. Nahibaro kita tikang ha iya Pulong ngan ha mga eksperyensya han matinumanon nga mga surugoon nga an pagkamasinugtanon nagtatalwas hin kinabuhi. (Ex. 14:1-4; 2 Cron. 20:17) Pamalandonga an sugad nga mga ehemplo. Kon bubuhaton mo ito, mapaparig-on an imo determinasyon nga sundon an mga kahikayan han organisasyon yana ngan ha tiarabot. (Heb. 13:17) Salit waray rason nga mahadlok ka ha mas makusog nga bagyo, nga amo an daku nga kasakitan, nga hirani na umabot.—Prob. 3:25.

12. Uyon ha Lucas 18:1-8, paonan-o makakabulig an pagtoo para makaya an kawaray-hustisya?

¹² Maaram hi Jesus nga masasarihan an pagtoo han iya mga disipulo tungod han kawaray-hustisya. Basi mabuligan hira nga makaya ito, naghatag hiya hin ilustrasyon nga mababasa ha libro han Lucas. Nag-istorya hi Jesus mahitungod ha usa nga balo nga babaye nga padayon nga nakimalooy ha diri matadong nga huwes para ha hustisya. Nasarig an balo nga an iya pagin mapinadayunon magkakaada maopay nga resulta. Ha urhi, iginhatag han huwes an iya gin-aaro. Ano an leksyon? Hi Jehova nagpapakita gud hin hustisya. Salit hi Jesus nagsiring: “Kon sugad, diri ba an Dios sigurado nga maghahatag hin hustisya para ha iya mga pinili nga nangangaraba ha iya ha adlaw ngan gab-i?” (Basaha an Lucas 18:1-8.) Katapos, hi Jesus nagdugang: “Pag-abot han Anak han tawo, makikita gud ba niya ha tuna ini nga pagtoo?” Kon nag-aantos kita hin kawaray-hustisya, kinahanglan pamatud-an naton nga marig-on gud an aton pagtoo pariho hito nga balo nga babaye pinaagi han aton pagin mapailubon ngan pagin mapinadayunon. Kon sugad hito an aton pagtoo, makakasarig kita nga bubuligan gud kita ni Jehova. Kinahanglan liwat tumoo kita ha gahum han pag-ampo. Usahay, an aton mga pag-ampo bangin batunon ha mga paagi nga diri naton ginlalaoman.

13. Paonan-o an pag-ampo nakabulig ha usa nga pamilya nga nakaeksperyensya hin kawaray-hustisya?

¹³ Tagda an eksperyensya han sister nga hi Vero nga naukoy ha Democratic Republic of the Congo. Hi Vero, upod an iya diri Saksi nga bana, pati an ira 15 anyos nga anak kinahanglan bumaya ha ira baryo kay gin-atake ito hin grupo han mga sundalo. Samtang nagbibiyahe hira, may gin-agian hira nga checkpoint ngan ginpaundang hira han mga sundalo ngan gintarhog nga papatayon hira. Han nagtikang magtangis hi Vero, naniguro an iya anak nga pakalmahon hiya pinaagi ha pag-ampo ha daku nga tingog ngan pauroutro nga paggamit han ngaran ni Jehova ha iya pag-ampo. Katapos niya mag-ampo, ginpakianhan hiya han kumander han mga sundalo,  “Inday, hin-o an nagtutdo ha imo pag-ampo?” Binaton hiya, “Gintutdoan ako ni Nanay, gamit an ehemplo nga mababasa ha Mateo 6:9-13.” An kumander nagsiring, “Sige Inday, larga na upod han imo mga kag-anak, ngan hinaot proteksyonan kamo ni Jehova nga iyo Dios!”

14. Ano an bangin magsari han aton pagtoo, ngan ano an makakabulig ha aton nga makapailob?

¹⁴ An sugad nga mga eksperyensya nagtututdo ha aton nga diri gud naton minuson an pagkaimportante han pag-ampo. Pero ano man kon an imo mga pag-ampo diri dayon ginbabaton o diri ginbabaton ha nakakaimpres nga paagi? Pariho ha balo nga babaye ha ilustrasyon ni Jesus, padayon nga pag-ampo. Sarig nga diri ka papabay-an han Dios, ngan babatunon niya an imo pag-ampo ha husto nga panahon ngan ha anoman nga paagi. Padayon nga pangamuyo kan Jehova para han iya baraan nga espiritu. (Fil. 4:13) Hinumdumi nga ha diri na maiha, hura nga bibendisyonan ka ni Jehova nga tungod hito diri mo na mahinunumdoman an imo naeksperyensyahan nga mga pag-antos. Kon gin-iilob mo an mga pagsari ha bulig ni Jehova, magigin mas marig-on ka ngan makakaya mo an mga pagsari ha tiarabot.—1 Ped. 1:6, 7.

15. Sumala ha Mateo 17:19, 20, ano nga problema an gin-atubang han mga disipulo ni Jesus?

¹⁵ Gintutdoan ni Jesus an iya mga disipulo nga makakabulig an pagtoo basi malamposan nira an mga problema. (Basaha an Mateo 17:19, 20.) Ha usa nga higayon, an mga disipulo waray makapagawas hin demonyo, bisan kon nahimo na nira ito ha iba nga mga panahon. Ano an problema? Iginsaysay ni Jesus nga kinahanglan nira hin dugang nga pagtoo. Ginsidngan niya hira nga kon may igo hira nga pagtoo makakaya nira malamposan an sugad-bukid nga mga problema! Yana, bangin nakakaeksperyensya liwat kita hin mga problema nga baga hin imposible naton makaya.

16. Paonan-o an pagtoo nakabulig kan Geydi basi makaya an usa nga trahedya ngan an iya duro nga kasubo?

¹⁶ Tagda an ehemplo ni Geydi, usa nga sister nga taga-Guatemala. An iya asawa nga hi Edi ginpatay samtang tipauli hira tikang ha katirok ha kongregasyon. Paonan-o nakabulig kan Geydi an iya pagtoo basi makaya an iya duro nga kasubo? Hiya nagsiring: “Nakakabulig ha akon an pag-ampo nga ipasa kan Jehova an akon pinas-an, salit nagigin murayaw ako. Nakita ko nga ginbubuligan ako ni Jehova pinaagi han akon pamilya ngan mga kasangkayan ha kongregasyon. An pagpabilin nga busy ha pag-alagad kan Jehova nakaiban han akon kasakit ngan nakabulig ha akon nga magkinabuhi kada adlaw nga diri sobra nga nagkikinabaraka han mahitatabo kinabuwasan. Tungod hini nga akon naeksperyensyahan, nahibaroan ko nga anoman nga pagsari an akon atubangon, makakaya ko ito ha bulig ni Jehova, ni Jesus, ngan han organisasyon.”

17. Ano an mahimo naton buhaton kon naatubang kita hin sugad-bukid nga problema?

¹⁷ Duro ka ba nga nasusubo tungod ha kamatay han usa mo nga hinigugma? Paggahin hin panahon nga parig-unon an imo pagtoo ha paglaom han pagkabanhaw pinaagi ha pagbasa han mga nakarekord ha Biblia mahitungod ha mga ginbanhaw.  Nasusubo ka ba kay may kapamilya ka nga ginpaiwas ha kongregasyon? Pag-aram basi makombinse ka nga an paagi han Dios ha pagdisiplina amo pirme an pinakamaopay. Anoman an imo gin-aatubang nga problema, gamita ito sugad nga oportunidad basi parig-unon an imo pagtoo. Isumat kan Jehova an ngatanan nga aada ha imo kasingkasing. Ayaw ibulag an imo kalugaringon, lugod, pagpabilin nga duok ha imo kabugtoan. (Prob. 18:1) Pakigbahin ha mga buruhaton nga makakabulig ha imo nga makapailob, bisan kon nagtatangis ka samtang ginbubuhat ito. (Sal. 126:5, 6) Ipadayon an imo rutina ha pagtambong ha mga katirok, pagsangyaw, ngan pagbasa han Biblia. Ngan pirme pagpokus ha maopay nga mga bendisyon nga ihahatag ha imo ni Jehova ha tiarabot. Samtang nakikita mo kon paonan-o ka ginbubuligan ni Jehova, an imo pagtoo ha iya mas magririg-on.

18. Kon makita mo nga diri sugad karig-on an imo pagtoo, ano an mahimo mo buhaton?

¹⁸ Kon an mga pagsari nga imo naeksperyensyahan hadto o naieksperyensyahan yana nagpakita nga diri sugad karig-on an imo pagtoo, ayaw panluya. Kitaa ito sugad nga oportunidad basi parig-unon an imo pagtoo. Paghangyo sugad han ginbuhat han mga apostol ni Jesus, nga nagsiring: “Tagi kami hin dugang nga pagtoo.” (Luc. 17:5) Pamalandonga liwat an mga ehemplo nga aton ginhisgotan hini nga artikulo. Pariho kanda Miguel ngan Yurai, hinumdumi an mga panahon nga ginbuligan ka ni Jehova. Pariho han anak ni Vero ngan kan Anel, sinsero nga pag-ampo kan Jehova labi na kon may makuri ka nga problema. Ngan pariho kan Geydi, hunahunaa nga mahimo ka buligan ni Jehova pinaagi han imo pamilya o kasangkayan. Kon tutugotan mo hi Jehova nga buligan ka nga makaya an imo mga problema yana, magigin mas kombinsido ka nga bubuligan ka niya nga makaya an anoman nga pagsari nga bangin maeksperyensyahan mo ha tiarabot.

19. Ha ano sigurado hi Jesus, ngan ha ano ka makakasiguro?

¹⁹ Ginbuligan ni Jesus an iya mga disipulo nga makita nga kinahanglan nira dugangan an ira pagtoo. Pero waray gud hiya magruhaduha nga ha bulig ni Jehova makakaya nira an mga pagsari nga ira maieksperyensyahan ha tiarabot. (Juan 14:1; 16:33) Nasarig hiya nga makakatalwas an usa nga daku nga grupo ha tiarabot nga daku nga kasakitan tungod han ira marig-on nga pagtoo. (Pah. 7:9, 14) Magigin usa ka ba ha ira? Pinaagi han diri matupngan nga pagkabuotan ni Jehova, magigin usa ka ha ira kon sasalingabuton mo an tagsa nga oportunidad yana nga maparig-on an imo pagtoo!—Heb. 10:39.