ARADMAN NGA ARTIKULO 47
Ayaw Tuguti an Bisan Ano nga Makagbulag ha Imo Tikang kan Jehova
“Nasarig ako ha imo, O Jehova.”—SAL. 31:14.
KARANTAHON 122 Magmarig-on, Diri Nababantad!
MAHITUNGOD HAN ARTIKULO a
1. Paonan-o kita nahibaro nga karuyag ni Jehova nga magin duok ha aton?
GIN-AAGHAT kita ni Jehova nga magin duok ha iya. (San. 4:8) Karuyag niya nga magin aton Dios, Amay, ngan Sangkay. Ginbabaton niya an aton mga pag-ampo ngan ginbubuligan kita ha magkuri nga panahon. Ngan ginagamit niya an iya organisasyon basi tutdoan ngan proteksyonan kita. Pero ano an kinahanglan naton buhaton basi magin duok kan Jehova?
2. Paonan-o kita mahimo magin duok kan Jehova?
2 Mahimo kita magin duok kan Jehova pinaagi ha pag-ampo ha iya ngan pagbasa han iya Pulong ngan pagpamalandong hito. Kon bubuhaton ta ito, maghihilarom an aton gugma ngan apresasyon ha iya. Napapagios kita nga sugton ngan dayawon hiya kay angayan hiya hito. (Pah. 4:11) Samtang mas nakikilala naton hi Jehova, mas masarig kita ha iya ngan ha organisasyon nga iya igintatagana basi buligan kita.
3. Paonan-o nangangalimbasog an Yawa nga ibulag kita kan Jehova, pero ano an mabulig ha aton nga diri gud bayaan an aton Dios ngan an iya organisasyon? (Salmo 31:13, 14)
3 Pero an Yawa nangangalimbasog nga ibulag kita kan Jehova, labi na kon naatubang kita hin mga problema. Paonan-o ini niya ginbubuhat? Nangangalimbasog hiya nga hinay-hinay nga mawara an aton pagsarig kan Jehova ngan ha iya organisasyon. Pero maaatohan naton an mga taktika han Yawa. Kon marig-on an aton pagtoo ngan pagsarig kan Jehova, diri ta babayaan an aton Dios ngan an iya organisasyon.—Basaha an Salmo 31:13, 14.
4. Ano an aton hihisgotan hini nga artikulo?
4 Hini nga artikulo, hihisgotan naton an tulo nga butang nga bangin magtikang ha gawas han kongregasyon; an tagsa hito mahimo makagwara han aton pagsarig kan Jehova ngan ha iya organisasyon. Paonan-o ini nga mga butang mahimo makagbulag ha aton tikang kan Jehova? Ngan ano an aton mahihimo basi maatohan an mga pangalimbasog ni Satanas?
KON NAKAKAEKSPERYENSYA KITA HIN MGA PROBLEMA
5. Paonan-o an mga problema mahimo makagwara han aton pagsarig kan Jehova ngan ha iya organisasyon?
5 Usahay, naatubang kita hin mga problema—sugad han pagkontra han pamilya o kawad-i hin trabaho. Paonan-o an sugad nga mga problema mahimo makagwara han aton pagsarig ha organisasyon ni Jehova ngan makagbulag ha aton tikang ha iya? Kon maiha na kita nga nakakaeksperyensya hin mga problema, bangin umabat kita hin kawaray-paglaom ngan madepres kita. Ginsasalingabot ni Satanas an sugad nga mga oportunidad ngan ginagamit ito basi magruhaduha kita kon hinigugma kita ni Jehova. Karuyag han Yawa nga hunahunaon naton nga hi Jehova o an Iya organisasyon an hinungdan han aton mga pag-antos. Puropariho hito an nahitabo ha pipira nga Israelita ha Ehipto. Ha siyahan, tinoo hira nga ginpili ni Jehova hira Moises ngan Aaron basi talwason hira tikang ha pagkauripon. (Ex. 4:29-31) Pero ha urhi han ginpakurian hira han Paraon, ginbasol nira hira Moises ngan Aaron han ira mga problema ngan ginsidngan hira: “Tungod ha iyo nangalas ha amon an Paraon ngan an iya mga surugoon ngan nagbutang kamo hin espada ha ira kamot basi kami patayon.” (Ex. 5:19-21) Ginbasol nira an maunungon nga mga surugoon han Dios. Makasurubo gud ito! Kon maiha ka na nga nakakaeksperyensya hin mga problema, paonan-o mo matitipigan nga marig-on an imo pagsarig kan Jehova ngan ha iya organisasyon?
6. Ano an aton mahibabaroan kan propeta Habakuk mahitungod ha pag-atubang han aton mga problema? (Habakuk 3:17-19)
6 Isumat kan Jehova ha pag-ampo an imo inaabat, ngan pangaro hin bulig ha iya. Hi propeta Habakuk inatubang hin damu nga problema. Makausa, baga hin nagruhaduha hiya kon hinigugma hiya ni Jehova. Salit ha iya pag-ampo, iginsumat niya kan Jehova an iya inaabat. Hiya nagsiring: “O Jehova, tubtob san-o ako mangangaraba para hin bulig, pero diri ka namamati? . . . Kay ano nga imo gintutugotan an panalumpigos?” (Hab. 1:2, 3) Ginbaton ni Jehova an kinasingkasing nga pag-ampo han iya maunungon nga surugoon. (Hab. 2:2, 3) Katapos pamalandungon ni Habakuk an pagtalwas ni Jehova ha iya katawohan, nagin malipayon hiya utro. Nagin kombinsido hiya nga hinigugma hiya ni Jehova ngan bubuligan hiya nga mailob an bisan ano nga problema. (Basaha an Habakuk 3:17-19.) Ano an leksyon para ha aton? Kon naatubang ka hin mga problema, pag-ampo kan Jehova ngan isumat ha iya an imo inaabat. Katapos, pangaro ha iya hin bulig. Kon bubuhaton mo ito, makakasarig ka nga ihahatag ha imo ni Jehova an kusog nga imo ginkikinahanglan basi makailob. Ngan kon inaabat mo an iya bulig, mas magririg-on an imo pagtoo ha iya.
7. Ano an ginpangalimbasogan nga buhaton han mga paryente ni Shirley, ngan ano an nakabulig ha iya nga diri mawara an iya pagtoo kan Jehova?
7 Tipigi an imo espirituwal nga rutina. Ito an nakabulig kan Shirley, usa nga sister ha Papua New Guinea, han inatubang hiya hin mga problema. b Pobre an pamilya ni Shirley, ngan usahay nakukurian hira ha pagkaada igo nga pagkaon. Usa niya nga paryente an nangalimbasog nga wad-on an iya pagsarig kan Jehova. Ginsidngan niya hi Shirley: “Nasiring ka nga an baraan nga espiritu han Dios nabulig ha imo, pero hain man ito nga bulig? Pobre la gihap an iyo pamilya. Ginkakaragan mo la an imo panahon pagsinangyaw.” Gin-amin ni Shirley: “Ginpakianhan ko an akon kalugaringon: ‘Hinigugma ba kami han Dios o diri?’ Salit nag-ampo ako dayon kan Jehova ngan iginsumat ha iya an ngatanan nga akon ginhuhunahuna. Waray ako umundang ha pagbasa han Biblia ngan han aton mga publikasyon, ngan padayon ako nga nagsangyaw ngan inatender ha mga katirok.” Waray pag-iha, nasantop niya nga gin-aataman ni Jehova an iya pamilya. Waray magutom an iya pamilya, ngan malipayon hira. Hi Shirley nagsiring: “Inabat ko nga ginbabaton ni Jehova an akon mga pag-ampo.” (1 Tim. 6:6-8) Kon titipigan mo an imo espirituwal nga rutina, diri mo liwat tutugotan an mga problema o pagruhaduha nga makagbulag ha imo tikang kan Jehova.
KON GINTATRATAR HIN MARAOT AN MGA BROTHER NGA NANGUNGUNA
8. Ano an bangin mahitabo ha mga brother nga nangunguna ha organisasyon ni Jehova?
8 Pinaagi han media ngan mga social network, an aton mga kaaway nagpapasarang hin buwa o sayop nga impormasyon mahitungod ha mga brother nga nangunguna ha organisasyon ni Jehova. (Sal. 31:13) An pipira nga brother gin-aresto ngan gin-akusaran nga mga kriminal. An siyahan-siglo nga mga Kristiano inatubang hin puropariho nga sitwasyon han sayop nga gin-akusaran ngan gin-aresto hi apostol Pablo. Ano an ira nagin reaksyon?
9. Ano an nagin reaksyon han pipira nga Kristiano han ginpriso hi apostol Pablo?
9 An pipira nga Kristiano ha siyahan nga siglo inundang ha pagsuporta kan apostol Pablo han priso hiya ha Roma. (2 Tim. 1:8, 15) Kay ano? Iginkakaawod ba nira hi Pablo kay ginhuhunahuna han mga tawo nga kriminal hiya? (2 Tim. 2:8, 9) O nahadlok ba hira kay bangin liwat hira pagtimarauton? Anoman an ira rason, hunahunaa kon ano an posible nga inabat ni Pablo. Nag-ilob hiya hin damu nga kakurian ngan ginbutang pa ngani ha peligro an iya kinabuhi para ha ira. (Buh. 20:18-21; 2 Cor. 1:8) Hinaot diri gud naton subaron an mga tawo nga waray bumulig kan Pablo ha panahon nga ginkikinahanglan niya ito! Ano an dapat naton hunahunaon kon gintitimaraot an mga brother nga nangunguna?
10. Ano an angay naton hinumdoman kon gintitimaraot an mga brother nga nangunguna, ngan kay ano?
10 Hinumdumi kon kay ano nga gintitimaraot kita ngan kon hin-o an nagpapahinabo hito. An 2 Timoteo 3:12 nasiring: “Pagtitimarauton liwat an ngatanan nga naghihingyap magkinabuhi nga may debosyon ha Dios sugad nga mga disipulo ni Kristo Jesus.” Salit diri kita angay mahipausa nga puntirya han mga pag-atake ni Satanas an mga brother nga nangunguna. Karuyag niya nga mabungkag hito nga mga pag-atake an ira integridad ngan mahadlok kita.—1 Ped. 5:8.
Bisan kon priso hi Pablo, maisugon nga ginsuportahan hiya ni Onesiforo. Yana, ginsusuportahan han aton kabugtoan an ira napriso nga mga igkasi-tumuroo, sugad han iginpapakita hini nga piktyur (Kitaa na parapo 11-12)
11. Ano an aton mahibabaroan ha ehemplo ni Onesiforo? (2 Timoteo 1:16-18)
11 Padayon nga suportahi an imo kabugtoan ngan unungi hira. (Basaha an 2 Timoteo 1:16-18.) Iba an nagin reaksyon ni Onesiforo, usa nga Kristiano ha siyahan nga siglo, han ginpriso hi Pablo. “Waray niya ikaawod an [kan Pablo] kapriso nga nakakadena.” Lugod, ginbiling ni Onesiforo hi Pablo, ngan han nakit-an niya, nangalimbasog hiya nga buligan hi Pablo ha praktikal nga mga paagi. Basi mahimo ito, iginbutang ni Onesiforo an iya kinabuhi ha peligro. Ano an leksyon para ha aton? Diri naton tugotan an kahadlok ha tawo nga magpalisang ha aton o magpugong ha aton ha pagsuporta ha aton kabugtoan nga gintitimaraot. Lugod, depensahan naton hira ngan buligan. (Prob. 17:17) Kinahanglan nira an aton gugma ngan suporta.
12. Ano nga leksyon an aton mahibabaroan tikang ha aton kabugtoan ha Russia?
12 Pansina kon paonan-o an aton kabugtoan ha Russia binulig ha ira hinigugma nga mga igkasi-tumuroo nga ginpriso. Han an pipira ginbista, damu nga kabugtoan an kumadto ha korte basi suportahan hira. Ano an leksyon para ha aton? Kon an nangunguna nga mga brother ginpapakaraot, gin-aaresto, o gintitimaraot, ayaw kahadlok. Ig-ampo hira, atamana an ira pamilya, ngan pamiling hin iba pa nga praktikal nga paagi basi ipakita an imo suporta.—Buh. 12:5; 2 Cor. 1:10, 11.
KON GINTATAMAY KITA
13. Paonan-o an pagtamay mahimo makagwara han aton pagsarig kan Jehova ngan ha iya organisasyon?
13 An diri tumuroo nga mga paryente, katrabaho, o kaeskwela bangin magtamay ha aton tungod han aton pagsangyaw nga buruhaton o han aton pagkinabuhi uyon ha higtaas nga suruklan ni Jehova ha moral. (1 Ped. 4:4) Bangin sumiring hira: “Naayon ako ha imo nga sangkay, pero istrikto hinduro an iyo relihiyon ngan diri nasabay ha uso.” Bangin may pipira nga magpakaraot ha aton tungod han aton paagi han pagtratar ha mga gin-disfellowship ngan sumiring: “Paonan-o ka makakasiring nga mahigugmaon ka nga tawo?” An mga komento nga sugad hini mahimo magtanom hin pagruhaduha ha aton hunahuna. Bangin magtikang kita paghunahuna: ‘Sobra ba an ginlalaoman ha akon ni Jehova? Istrikto ba hinduro an iya organisasyon?’ Kon naatubang ka hin sugad nga sitwasyon, paonan-o ka makakapabilin nga duok kan Jehova ngan ha iya organisasyon?
Waray toohi ni Job an kabuwaan han iya mga sangkay kuno nga nagtamay ha iya. Lugod, determinado hiya nga tipigan an iya integridad kan Jehova (Kitaa an parapo 14)
14. Ano an dapat naton magin reaksyon kon gintatamay kita han iba tungod ha pagkinabuhi uyon ha mga suruklan ni Jehova? (Salmo 119:50-52)
14 Magin determinado nga padayon nga sundon an mga suruklan ni Jehova. Hi Job padayon nga nagsunod ha mga suruklan ni Jehova bisan kon gintamay hiya tungod ha pagbuhat hito. Usa han mga nasiring nga sangkay kuno hiya ni Job an nangalimbasog pa ngani nga kombinsihon hiya nga diri importante ha Dios kon ginsusunod ni Job an Iya mga suruklan o diri. (Job 4:17, 18; 22:3) Pero waray tumoo hi Job hito nga kabuwaan. Maaram hiya nga tama an mga suruklan ni Jehova han husto ngan sayop, ngan determinado hiya nga padayon nga sundon ito. Waray niya tuguti nga wad-on han iba an iya integridad. (Job 27:5, 6) Ano an leksyon para ha aton? Ayaw tuguti nga an pagtamay makaaghat ha imo nga kwestyunon an mga suruklan ni Jehova. Hunahunaa kon ano an nahitabo ha imo mismo kinabuhi. Diri ba nakita mo hin pauroutro nga tama an mga suruklan ni Jehova ngan nakakabenepisyo ka kon ginsusunod mo ito? Magin determinado nga suportahan an organisasyon nga padayon nga nasunod hito nga mga suruklan. Kon bubuhaton mo ito, anoman nga pagtamay an himoon han mga tawo, diri gud ito makakagbulag ha imo tikang kan Jehova.—Basaha an Salmo 119:50-52.
15. Kay ano nga gintamay hi Brizit?
15 Pansina an eksperyensya ni Brizit, usa nga sister ha India. Gintamay hiya han iya mga kapamilya tungod han iya pagtoo. Waray pag-iha katapos han iya bawtismo han 1997, nawad-an hin trabaho an iya diri tumuroo nga bana. Salit nagdesisyon an bana nga hiya, hi Brizit, ngan an ira mga anak nga babaye dapat lumungon ha iya mga kag-anak, nga naukoy ha lain nga syudad. Pero inatubang hi Brizit hin mas dagku nga problema. Tungod kay waray trabaho an iya bana, kinahanglan niya magtrabaho hin full-time basi masuportahan an iya pamilya. Dugang pa, an pinakahirani nga kongregasyon mga 350 ka kilometro an kahirayo. Makasurubo, ginkontra hiya han pamilya han iya bana tungod han iya pagtoo. Duro gud an pagkontra salit kinahanglan bumalhin utro an pamilya ni Brizit. Katapos, ha diri ginlalaoman, namatay an iya bana. Ha urhi, usa han iya mga anak nga babaye, nga 12 anyos pa la an edad, an namatay tungod han kanser. Mas naggrabe pa gud an sitwasyon kay ginbasol hi Brizit han iya mga paryente tungod hini nga mga panhitabo. Nagsiring hira nga kon waray hiya magin usa han mga Saksi ni Jehova, waray unta mahitabo ito ngatanan nga trahedya. Bisan pa hito, padayon hiya nga sinarig kan Jehova ngan nagpabilin nga duok ha iya organisasyon.
16. Paonan-o ginbendisyonan hi Brizit tungod han iya pagpabilin nga duok kan Jehova ngan ha Iya organisasyon?
16 Tungod kay hi Brizit naukoy nga hirayo gud ha kongregasyon, usa nga paramangno han sirkito an nag-aghat kan Brizit nga magsangyaw ha ira lugar ngan magdumara hin mga katirok ha iya balay. Ha siyahan, inabat niya nga makuri ito hinduro. Pero ginsunod niya ito nga sagdon. Nagsangyaw hiya han maopay nga sumat, nagdumara hin mga katirok ha iya balay, ngan naggahin hin panahon para ha pagsingba han pamilya kaupod an iya mga anak. Ano an nagin resulta? Hi Brizit nakagtikang ngan nakagdumara hin damu nga Bible study, ngan damu ha ira an nabawtismohan. Han 2005, nagregular payunir hiya. Ginbalosan an iya pagsarig kan Jehova ngan an iya pagkamaunungon ha Iya organisasyon. An iya mga anak matinumanon nga nag-aalagad kan Jehova, ngan yana, may-ada na duha nga kongregasyon hito nga lugar! Kombinsido hi Brizit nga gintagan hiya ni Jehova hin kusog basi makaya an iya mga problema ngan mailob an pagtamay han iya pamilya.
MAGPABILIN NGA MAUNUNGON KAN JEHOVA NGAN HA IYA ORGANISASYON
17. Ano an dapat magin determinasyon naton?
17 Karuyag ni Satanas nga tumoo kita nga babayaan kita ni Jehova kon may mga problema kita ngan an pagsuporta ha organisasyon ni Jehova mas magpapakuri la han aton kinabuhi. Karuyag ni Satanas nga mahadlok kita kon an nangunguna nga mga brother pakarauton, pagtimarauton, o prisuhon. Ngan pinaagi han mga pagtamay, karuyag ni Satanas nga wad-on an aton pagsarig ha mga suruklan ni Jehova ngan ha Iya organisasyon. Pero maaram gud kita han iya maraot nga mga taktika ngan diri kita niya mauuwat. (2 Cor. 2:11) Magin determinado nga isalikway an kabuwaan ni Satanas ngan magpabilin nga maunungon kan Jehova ngan ha Iya organisasyon. Hinumdumi, diri ka gud babayaan ni Jehova. (Sal. 28:7) Salit ayaw tuguti an bisan ano nga makagbulag ha imo tikang kan Jehova!—Roma 8:35-39.
18. Ano an aton hihisgotan ha sunod nga artikulo?
18 Hini nga artikulo, ginhisgotan ta an mga problema nga bangin atubangon naton tikang ha gawas han kongregasyon. Pero an aton pagsarig kan Jehova ngan ha iya organisasyon mahimo liwat masarihan tungod han mga problema tikang ha sulod han kongregasyon. Paonan-o naton malalamposan an sugad nga mga problema? Hihisgotan naton ito ha sunod nga artikulo.
KARANTAHON 118 “Dugangi an Amon Pagtoo”
a Basi matinumanon nga makapailob hinin kataposan nga mga adlaw, kinahanglan padayon kita nga sumarig kan Jehova ngan ha iya organisasyon. Nangangalimbasog an Yawa nga gamiton an mga problema basi mawara ito nga pagsarig. Hihisgotan hini nga artikulo an tulo nga butang nga ginagamit han Yawa ngan kon ano an aton mahihimo basi maatohan an iya mga pangalimbasog.
b Ginsaliwnan an iba nga ngaran.