Antes ko isumat an sunod nga nahitabo, sumatan ko anay kamo kon paonan-o ako nagtikang ha bug-os-panahon nga pag-alagad.

Igin-anak ako han 1942 ha Curaçao, usa nga mahusay nga isla ha Caribbean. An akon tatay taga-Suriname, pero binalhin hiya ha isla para magtrabaho. Duha ka tuig antes ako matawo, usa hiya han siyahan nga mga Saksi ni Jehova nga nabawtismohan ha Curaçao. a Ginba-Bible study kami niya nga iya mga anak kada semana, bisan kon usahay diri namon ito karuyag. Han 14 anyos ako, binalhin an amon pamilya ha Suriname basi maataman ni Tatay an iya lagas na nga nanay.

Ha Suriname, nakigsangkay ako ha mga batan-on ha kongregasyon nga aktibo nga nag-aalagad kan Jehova. Magurang hira ha akon hin pipira ka tuig ngan nag-aalagad sugad nga mga regular payunir. Kon nag-iistorya hira han ira mga eksperyensya ha ministeryo, malipayon gud hira. Katapos han mga katirok, kami nga magsarangkay nag-iiristorya liwat hin mga topiko parte ha Biblia—usahay, samtang nalingkod ha gawas ngan nagkikita ha mga bitoon. Ini nga kasangkayan nakabulig ha akon nga mahibaroan kon ano an karuyag ko ha akon kinabuhi; karuyag ko magbuhat para kan Jehova. Salit nagpabawtismo ako han 16 anyos ako. Ha urhi, nagregular payunir ako ha edad nga 18.

Nahibaro ako hin damu nga leksyon sugad nga payunir, ngan nabuligan ako hini ha akon pag-alagad hin bug-os-panahon. Pananglitan, usa han siyahan nga mga leksyon nga akon nahibaroan amo an pagkaimportante han pag-train ha iba. Han nagtikang ako magpayunir, an misyonero nga hi Willem van Seijl nagpakita hin personal nga interes ha akon. b Gintutdoan ako niya hin damu nga butang mahitungod ha pagdumara hin teokratiko nga mga toka. Hito nga panahon, diri ako maaram nga nagkikinahanglan  gud ako hin training. Han sumunod nga tuig, ginpili ako nga magin espesyal payunir ngan nagtikang pagbulig ha gudtiay nga grupo han kabugtoan nga naukoy ha kagurangan han Suriname ngan hirayo ha iba nga kongregasyon. Mapasalamaton gud ako han napapanahon nga training nga iginhatag ha akon han kabugtoan! Tikang hadto, nangalimbasog ako nga sundon an ira ehemplo pinaagi ha paghatag hin panahon ha pag-train ha iba.

An ikaduha nga leksyon nga akon nahibaroan amo an kaopayan han pagkinabuhi hin simple pero organisado gud. Ha kada pagtitikang han bulan, ginpaplano namon hin maopay han akon partner an amon mga panginahanglan para ha maabot nga mga semana. Katapos, usa ha amon an nagbibiyahe hin hirayo pakadto ha sentro ngan namamalit han amon panginahanglan. Dapat maaramon kami paggasto han amon binulan nga reimbursement ngan tipiron an amon mga suplay basi umabot ito hin usa ka bulan. Kon maubosan kami samtang aada ha kagurangan, pipira la nga tawo, kon may-ada man, an makakabulig ha amon. Natoo ako nga an paghibaro ha pagkinabuhi hin simple pero organisado gud samtang bata pa nakabulig ha akon nga magin pokus ha buruhaton ni Jehova ha bug-os ko nga kinabuhi.

An ikatulo nga leksyon nga akon nahibaroan amo an kapulsanan han pagtutdo ha mga tawo gamit an ira kalugaringon nga linggwahe. Nagdaku ako nga nagyayakan hin Dutch, Ingles, Papiamento, ngan Sranantongo (kilala liwat nga Sranan), an linggwahe han kadam-an ha Suriname. Pero ha kagurangan, nakita ko nga mas ginkakarawat han mga tawo an maopay nga sumat kon nagsasangyaw kami ha ira kalugaringon nga yinaknan. Nakukurian ako pagyakan han pipira hini nga mga linggwahe, sugad han Saramaccan, nga may hitaas ngan hamubo nga mga tono. Pero sulit an pangalimbasog. Ha paglabay han mga tuig, nakagtutdo ako han kamatuoran ha damu pa nga tawo kay nakakagyakan ako ha ira kalugaringon nga linggwahe.

Syempre, may-ada liwat ako makaarawod nga mga eksperyensya. Pananglitan, makausa karuyag ko unta pakianhan an usa nga Bible study nga nagyayakan hin Saramaccan kon kumusta na an iya pamati, kay nagsisinakit an iya tiyan. Pero an akon ngay-an iginpakiana ha iya kon burod ba hiya! Syempre, naawod hiya hito nga pakiana. Bisan kon nakakahimo ako hin sugad hini nga mga sayop, pirme ako nangangalimbasog nga magyakan ha kalugaringon nga linggwahe han mga tawo ha akon mga toka.

Han 1970, ginpili ako nga magin paramangno han sirkito. Hito nga tuig, iginpresenta ko an slide program nga “Visiting the World Headquarters of Jehovah’s Witnesses” ha damu nga gudtiay nga grupo ha kagurangan. Basi makaabot ngadto, ako ngan an pipira nga brother nasakay hin hilaba nga sakayan basi makabiyahe ha mga salog ha kagurangan. An amon sakayan may karga nga generator, portable nga tangke hin gasolina, mga lampara, ngan slide projection equipment. Ha pagduong namon, kinahanglan namon dad-on an ngatanan nga equipment ha kagurangan diin ipapasalida namon an slide program. Pero an nahinunumdoman ko gud hito nga mga pagbiyahe kay naruyagan hinduro han mga tawo ito nga mga programa. Nalipay gud ako nga buligan an iba nga mahibaro mahitungod kan Jehova ngan han tunan-on nga bahin  han iya organisasyon. An espirituwal nga mga balos mas labaw gud kay ha bisan ano nga akon iginsakripisyo samtang ginhihimo an buruhaton ni Jehova.

Bisan kon nakita ko nga bentaha ha akon pag-alagad an pagin solo, inabat ko la gihap nga kinahanglan ko hin permanente nga makakaupod ha akon kinabuhi. Salit espisipiko ako nga nag-ampo nga makabiling hin asawa nga malipayon nga magpapailob ha mga kakurian ha bug-os-panahon nga pag-alagad ha kagurangan. Paglabay hin mga usa ka tuig, gin-uyaban ko hi Ethel, usa nga espesyal payunir nga andam magsakripisyo para kan Jehova. Tikang han bata pa hi Ethel, naruyagan gud niya an ehemplo ni apostol Pablo ngan karuyag niya nga subaron an iya pagin madasigon ha ministeryo. Nagpakasal kami han Septyembre 1971 ngan nagtikang pag-alagad ha sirkito nga buruhaton sugad nga mag-asawa.

Diri riko an pamilya ni Ethel, salit nakapahiuyon hiya hin maopay ha pagbiyahe nga buruhaton ha kagurangan. Pananglitan, kon nag-aandam para bumisita ha mga kongregasyon ha hirayo nga bahin han kagurangan, diri damu an amon gindadara. Ha mga salog kami naglalaba ngan nakarigo. Nahiara na kami pagkaon hin bisan ano nga iandam han kabugtoan sugad han mga iguana, piranha, o bisan ano nga bangin nadakop nira ha kagurangan o ha mga salog. Kon waray mga plato, dahon han saging an amon ginkakaonan. Kon waray kutsara ngan tinidor, nagkakamot kami. Inabat namon ni Ethel nga an pagsakripisyo nga magkaupod samtang nagbubuhat para kan Jehova nakabulig ha amon nga magin sugad karig-on hin tulo nga higot nga ginlubid. (Ecles. 4:12) Diri gud namon igbabalyo ha bisan ano ito nga mga eksperyensya!

Ha usa han amon mga pagbiyahe tipauli tikang ha hirayo nga bahin han kagurangan nahitabo an akon ginsaysay ha tinikangan. Samtang tikadto ha masulog ngan batoon nga bahin han salog, an sakayan linunod kadali pero linutaw liwat dayon. Maopay na la may sul-ot kami nga mga life jacket ngan waray kami mahulog ha sakayan. Pero puno hin  tubig an amon sakayan. Ginhuwad namon an mga pagkaon tikang ha mga surudlan ngadto ha salog ngan gin-gamit ito nga mga surudlan basi limason an tubig ha sakayan.

Tungod kay waray na kami pagkaon, nangisda kami samtang nagbibiyahe ha salog. Pero waray kami nadadakop. Salit nag-ampo kami kan Jehova ngan naghangyo ha iya nga tagan kami hin pagkaon para hito nga adlaw. Katapos namon mag-ampo, usa han kabugtoan an nag-itsa hin kawil ngan nakadakop hin daku nga isda nga igo para ha amon nga lima nga makakaon hito nga gab-i ngan mabusog.

Katapos hin lima ka tuig ha pagbiyahe nga buruhaton, kami ni Ethel nakakarawat hin diri ginlalaoman nga bendisyon—magigin mga kag-anak na kami. Nalipay ako nga mabatian an balita, pero diri ako sigurado kon ano an mahitatabo ha tiarabot. Karuyag gud namon ni Ethel nga magpabilin ha bug-os-panahon nga pag-alagad kon posible. Han 1976 natawo an amon anak nga hi Ethniël. An amon ikaduha nga anak, hi Giovanni, natawo paglabay hin duha ngan tunga ka tuig.

Tungod han panginahanglan ha Suriname hito nga panahon, ginhikay han sanga nga opisina nga magpadayon ako ha pag-alagad sugad nga paramangno han sirkito samtang ginpapadaku an amon mga anak. Han bata pa an amon mga anak, naasayn ako nga magmangno ha mga sirkito nga pipira la an kongregasyon. Kasagaran na nga nakabulig ito ha akon nga makag-alagad hin pipira ka semana kada bulan sugad nga nagbibiyahe nga paramangno ngan igahin an nabibilin nga mga semana sugad nga payunir ha kongregasyon diin kami nakaasayn. Gin-uupdan ako ni Ethel ngan han amon mga anak kon nabisita ako ha mga kongregasyon nga hirani ha amon. Pero ako la nga usa an napakadto ha mga kongregasyon ngan asembleya ha kagurangan.

Kinahanglan ko magplano hin maopay basi matuman an ngatanan ko nga responsabilidad. Ginsisiguro ko nga may-ada kami panpamilya nga pag-aram kada semana. Kon waray ako kay nabisita ha mga kongregasyon ha kagurangan, hi Ethel an nagdudumara han panpamilya nga pag-aram ha amon mga anak. Pero tubtob nga posible, nagbubuhat kami nga urupod sugad nga pamilya. Pirme liwat namon nakakaupod ni Ethel an amon mga anak ha angayan nga mga kaliawan—nag-uuyag kami o nag-a-outing. Agsob nga gab-i na ako hinduro nakaturog para maiandam an akon teokratiko nga mga toka. Ngan hi Ethel, sugad nga may kapas nga asawa nga ginhulagway ha Proberbios 31:15, nabuhát antes magkaagahon basi masiguro nga  mababasa namon an inadlaw nga teksto sugad nga pamilya ngan makapamahaw upod an amon mga anak antes hira kumadto ha eskwelahan. Mapasalamaton gud ako ha pagkaada asawa nga pirme andam magsakripisyo basi buligan ako nga matuman an mga responsabilidad nga iginhatag ha akon ni Jehova!

Sugad nga mga kag-anak, nangalimbasog gud kami nga buligan an amon mga anak nga higugmaon hi Jehova ngan an Kristiano nga ministeryo. Karuyag namon nga pilion han amon mga anak an bug-os-panahon nga pag-alagad sugad nga ira mga karera, diri tungod kay ito an karuyag namon nga buhaton nira, kondi tungod kay ito an ira ginpili. Pirme namon ginpapabug-atan ha ira an kalipay ha pag-alagad hin bug-os-panahon. Ginpabug-atan namon kon paonan-o kami ginbuligan ngan ginbendisyonan ni Jehova sugad nga pamilya, nga diri man ginbabalewaray an mga kakurian. Ginsiguro liwat namon nga an amon mga anak magkaada mga sangkay nga Saksi, nga gin-uuna hi Jehova ha ira kinabuhi.

Igintagana ni Jehova an ngatanan namon nga panginahanglan samtang nagpapadaku kami han amon mga anak. Syempre, nangangalimbasog ako pirme nga makasuporta ha akon pamilya. An akon eksperyensya ha kagurangan sugad nga solo nga espesyal payunir nagtutdo ha akon nga magtipid para ha mga butang nga kinahanglan namon paliton. Pero bisan kon ginhihimo namon an amon pinakamaopay, usahay nagkukulang la gihap kami han amon mga panginahanglan. Hito nga mga kahimtang, natoo ako nga ginbuligan kami ni Jehova. Pananglitan, tikang han 1986 tubtob 1992, nagkaada girra sibil ha Suriname. Hito nga mga tuig, usahay makuri magkaada bisan han nangunguna nga mga panginahanglan. Bisan pa hito, hi Jehova nagtagana ha amon.—Mat. 6:32.

Ha bug-os namon nga kinabuhi, pirme kami gin-aataman ni Jehova ngan ginbubuligan nga magin malipayon ngan kontento. An amon mga anak daku gud nga bendisyon ha amon, ngan pribilehiyo an pagpadaku ha ira basi mag-alagad kan Jehova. Nalilipay liwat kami nga ginpili nira an bug-os-panahon nga pag-alagad. Hira Ethniël ngan Giovanni pariho naggradwar ha teokratiko nga mga eskwelahan ngan yana nag-aalagad ha sanga nga opisina ha Suriname kaupod an ira mga asawa.

Lagas na kami ni Ethel yana, pero busy la gihapon kami ha pagbuhat para kan Jehova sugad nga mga espesyal payunir. Ngani, busy gud kami salit waray ako panahon basi mahibaro paglangoy! Pero waray ako ginbabasolan. Kon ginhihinumdom ko an naglabay, masisiring ko gud nga an pagdesisyon nga sumulod ha bug-os-panahon nga pag-alagad samtang bata pa amo an usa han pinakamaopay nga mga desisyon nga akon ginhimo.