ARADMAN NGA ARTIKULO 46
Kon Paonan-o hi Jehova Nabulig ha Aton nga Makailob nga May Kalipay
“Hi Jehova mapailubon nga naghuhulat basi magpakita ha iyo hin pagkabuotan, ngan mabuhát hiya basi magpakita ha iyo hin kalooy.”—ISA. 30:18.
KARANTAHON 3 Amon Kusog, Paglaom, Ginsasarigan
MAHITUNGOD HAN ARTIKULO a
1-2. (a) Ano nga mga pakiana an aton hihisgotan? (b) Ano an nagpapakita nga hingyap gud ni Jehova nga buligan kita?
HI Jehova makakabulig ha aton nga makaya an aton mga problema ngan magin malipayon ha pag-alagad ha iya. Ha ano nga mga paagi nabulig hiya ha aton? Ngan paonan-o kita bug-os nga makakapahimulos ha bulig nga igintatagna ni Jehova? Ini nga mga pakiana babatunon hini nga artikulo. Pero hisgotan ta anay ini nga pakiana: Karuyag gud ba kita buligan ni Jehova?
2 An pulong nga gin-gamit ni apostol Pablo ha iya surat ha mga Hebreo makakabulig ha aton nga mahibaroan an baton. Hi Pablo nagsurat: “Hi Jehova an akon parabulig; diri ako mahahadlok. Ano an mahihimo ha akon han tawo?” (Heb. 13:6) An mga reperensya ha Biblia nasiring nga an pulong nga “parabulig,” sugad han pagkagamit hini nga bersikulo, nagtutudlok ha usa nga tawo nga nagdadagmit basi buligan an usa nga nangangaraba para hin bulig. Imadyina hi Jehova nga nagdadagmit basi talwason an usa nga aada ha makuri nga kahimtang. Sigurado nga mauyon ka nga iginpapakita hini nga paghulagway nga karuyag ni Jehova—oo, hingyap gud niya—nga magin aton Parabulig. Pinaagi han suporta ni Jehova, maiilob naton nga may kalipay an aton mga problema.
3. Ano an tulo nga paagi nga nabulig ha aton hi Jehova basi mailob nga may kalipay an aton mga problema?
3 Ano an pipira nga paagi nga nabulig ha aton hi Jehova basi mailob nga may kalipay an aton mga problema? Para mabaton ito, basahon naton an bahin han libro han Isaias. Kay ano? Damu han mga tagna nga iginsumat ni Jehova kan Isaias an aplikado ha mga surugoon han Dios yana. Dugang pa, agsob ihulagway ni Isaias hi Jehova ha mga pulong nga masayon naton masabtan. Makikita naton an pipira nga ehemplo ha Isaias kapitulo 30. Hito nga kapitulo, hi Isaias ginamit hin mag-opay nga ilustrasyon basi ihulagway kon paonan-o hi Jehova nabulig ha iya katawohan (1) pinaagi ha pagpamati hin maopay ngan pagbaton ha aton mga pag-ampo, (2) pinaagi ha paggiya ha aton, ngan (3) pinaagi ha pagbendisyon ha aton yana ngan ha tiarabot. Hisgotan naton inin tulo nga paagi nga nabulig ha aton hi Jehova.
HI JEHOVA NAMAMATI HA ATON
4. (a) Paonan-o iginhulagway ni Jehova an mga Judio ha panahon ni Isaias, ngan ha urhi, ano an Iya gintugotan nga mahitabo? (b) Ano nga paglaom an iginhatag ni Jehova ha mga matinumanon? (Isaias 30:18, 19)
4 Ha tinikangan han Isaias kapitulo 30, iginhulagway ni Jehova an mga Judio sugad nga “mga anak nga magtig-a an ulo,” nga ‘gindudugangan hin sala an sala.’ Nagsiring pa hiya: “Rebelyoso hira nga katawohan, . . . nga diri naruruyag ha pagpamati ha balaud ni Jehova.” (Isa. 30:1, 9) Tungod kay an katawohan nadiri pagpamati, nagtagna hi Isaias nga tutugotan ni Jehova nga mag-antos hira hin trahedya. (Isa. 30:5, 17; Jer. 25:8-11) Ngan ito an nahitabo, ginbihag hira han mga taga-Babilonya. Pero may pipira nga matinumanon nga mga Judio, ngan hi Isaias may mensahe han paglaom para ha ira. Ginsidngan niya hira nga maabot an panahon nga tutugotan hira ni Jehova nga bumalik ha Israel. (Basaha an Isaias 30:18, 19.) Ngan ito gud an nahitabo. Ginpagawas hira ni Jehova ha Babilonya. Pero damu ka tuig anay an linabay antes hira talwason. Iginpapakita han mga pulong nga “hi Jehova mapailubon nga naghuhulat basi magpakita ha iyo hin pagkabuotan” nga malabay anay an panahon antes talwason an mga matinumanon. Ngani, 70 ka tuig nga distyero an mga Israelita ha Babilonya antes gintugotan an nanhibilin nga bumalik ha Jerusalem. (Isa. 10:21; Jer. 29:10) Han nakabalik na an katawohan ha ira tuna, an mga luha tungod han kasubo samtang bihag hira nasaliwnan hin mga luha han kalipay.
5. Ano nga pasarig an iginhahatag ha aton han Isaias 30:19?
5 Yana mapaparig-on kita hini nga mga pulong: “Sigurado nga magpapakita hiya ha imo hin pagkabuotan ha pakabati niya han imo pangaraba para hin bulig.” (Isa. 30:19) Ginpapasarig kita ni Isaias nga hi Jehova mamamati hin maopay kon nangangaraba kita ha Iya ngan babatunon dayon Niya an aton mga pangamuyo. Nagsiring pa hi Isaias: “Babatunon ka niya pakabati gud niya hito.” Inin nagpapasarig nga mga pulong nagpapahinumdom ha aton nga karuyag han aton Amay—oo, hingyap gud niya—nga buligan an mga nangangaro hin bulig ha iya. An paghibaro hini nakakaaghat ha aton nga makailob nga may kalipay.
6. Paonan-o iginpapakita han mga pulong ni Isaias nga hi Jehova namamati ha pag-ampo han tagsa niya nga surugoon?
6 Ano pa nga pasarig an aton makukuha hini nga bersikulo parte ha aton mga pag-ampo? Hi Jehova namamati hin maopay ha pag-ampo han tagsa ha aton. Kay ano nga makakasiring kita hito? Ha siyahan nga bahin han Isaias kapitulo 30, gin-gamit an mga pulong nga “kamo” ngan “iyo” kay nakikiistorya hi Jehova ha iya katawohan sugad nga grupo. Pero ha bersikulo 19 gin-gamit an mga pulong nga “ka” ngan “imo,” nga sugad hin nakikiistorya ha usa nga indibiduwal. Hi Isaias nagsurat: “Diri ka na gud magtatangis”; “sigurado nga magpapakita hiya ha imo hin pagkabuotan”; “babatunon ka niya.” Sugad nga mahigugmaon nga Amay, diri ginsisidngan ni Jehova an usa nga nanluluya nga anak, “Dapat pariho ka karig-on han imo bugto.” Lugod, interesado hiya ha tagsa ha aton ngan hiya mismo an namamati ha aton mga pag-ampo.—Sal. 116:1; Isa. 57:15.
Ano an karuyag sidngon ni Isaias han nagsiring hiya: “Ayaw niyo [hi Jehova] papahuwaya”? (Kitaa an parapo 7)
7. Paonan-o iginpakita ni Isaias ngan ni Jesus an pagkaimportante han padayon nga pag-ampo?
7 Kon nadaop kita ha aton Dios parte ha usa nga butang nga aton nababarak-an, bangin ha siyahan tagan kita ni Jehova hin kusog basi makaya an sitwasyon. Ngan kon an aton problema diri matapos ha panahon nga aton ginlalaoman, bangin kinahanglan pauroutro nga maghangyo kita kan Jehova hin kusog para mailob ito. Gin-aaghat kita niya nga buhaton ito. Sugad hin ito an iginpapasabot hini nga mga pulong ni Isaias: “Ayaw niyo [hi Jehova] papahuwaya.” (Isa. 62:7) Ano an karuyag sidngon hito? Dapat padayon gud kita nga mag-ampo kan Jehova nga sugad hin diri naton hiya gintutugotan nga pumahuway. An mga pulong ni Isaias nagpapahinumdom ha aton han mga ilustrasyon ni Jesus mahitungod ha pag-ampo nga mababasa ha Lucas 11:8-10, 13. Dida hito gin-aaghat kita ni Jesus nga mag-ampo nga ‘padayon nga nagpipirit’ ngan “padayon nga mangaro” hin baraan nga espiritu. Puydi liwat kita makimalooy kan Jehova nga giyahan kita basi makahimo hin mag-opay nga desisyon.
HI JEHOVA NAGGIGIYA HA ATON
8. Ha kadaan nga panahon, paonan-o natuman an mga pulong ha Isaias 30:20, 21?
8 Basaha an Isaias 30:20, 21. Han ginlikosan han kasundalohan han Babilonya an Jerusalem hin usa ngan tunga ka tuig, an kasakitan nga naeksperyensyahan han katawohan nagin sugad na la kakomon han tinapay ngan tubig. Pero sumala ha bersikulo 20 ngan 21, nagsaad hi Jehova ha mga Judio nga kon magbabasol ngan magbabag-o hira, tatalwason niya hira. Gintawag ni Isaias hi Jehova nga ira “Harangdon nga Instruktor” ngan nagsaad ha katawohan nga tututdoan hira ni Jehova kon paonan-o Hiya sisingbahon ha paagi nga Iya kinakarawat. Natuman ito nga mga pulong han an mga Judio ginpagawas tikang ha pagkabihag. Ginpamatud-an ni Jehova nga hiya an ira Harangdon nga Instruktor, ngan pinaagi han iya paggiya, an iya katawohan naglampos nga ipahiuli an putli nga pagsingba. Malipayon gud kita kay hi Jehova an aton Harangdon nga Instruktor yana.
9. Ano an usa nga paagi nga nakakarawat naton yana an giya ni Jehova?
9 Hini nga mga bersikulo, hi Isaias nagsiring nga pariho kita hin mga estudyante nga gintututdoan ni Jehova ha duha nga paagi. Siyahan, hi Isaias nagsiring: “Makikita mo an imo Harangdon nga Instruktor pinaagi han imo mismo mga mata.” Hini nga ilustrasyon, hi Isaias nagsiring nga an Instruktor natindog ha atubangan han iya mga estudyante. Pribilehiyo gud naton nga makapahimulos han instruksyon han Dios yana. Paonan-o kita gintututdoan ni Jehova? Ginbubuhat niya ito pinaagi han iya organisasyon. Mapasalamaton gud kita ha klaro nga instruksyon nga aton nakakarawat tikang ha organisasyon ni Jehova! An instruksyon nga ginhahatag ha aton ha mga katirok ngan kombensyon sugad man pinaagi ha mga publikasyon, brodkast, ngan damu pa nabulig ha aton ha magkuri nga panahon basi makailob nga may kalipay.
10. Ha ano nga paagi nakakabati kita hin “pulong ha [aton] luyo”?
10 Gin-unabi ni Isaias an ikaduha nga paagi nga gintututdoan kita ni Jehova, nasiring: “An imo mismo mga talinga makakabati hin pulong ha imo luyo.” Dinhi iginhulagway han propeta hi Jehova sugad hin atentibo nga instruktor nga naglalakat ha luyo han iya mga estudyante ngan gin-gigiyahan hira kon diin maagi. Yana nababatian naton an tingog han Dios tikang ha aton luyo. Paonan-o? An giniyahan nga mga pulong han Dios maiha na nga iginsurat ha Biblia, ha panahon nga hirayo na ha aton. Salit kon nagbabasa kita han Biblia, sugad hin nababatian naton an tingog han Dios tikang ha aton luyo.—Isa. 51:4.
11. Basi makailob nga may kalipay, ano an kinahanglan naton buhaton, ngan kay ano?
11 Ha ano nga paagi kita bug-os nga makakapahimulos ha giya ni Jehova nga igintatagana pinaagi han iya organisasyon ngan han iya Pulong? Pansina nga hi Isaias nag-unabi hin duha nga butang. Siyahan, “ini an dalan.” Ikaduha, “lakat kamo dida hini.” (Isa. 30:21) Diri igo an paghibaro la han “dalan.” Kinahanglan liwat kita ‘maglakat dida hini.’ An Pulong ni Jehova ngan an mga pagsaysay tikang ha iya organisasyon nagtututdo ha aton kon ano an iginpapabuhat ni Jehova ha aton. Nahibabaro liwat kita kon paonan-o iaaplikar an aton nahibabaroan. Basi makailob nga may kalipay ha aton pag-alagad kan Jehova, kinahanglan buhaton naton iton duha nga butang. Hito la nga paagi kita makakasiguro nga bibendisyonan kita ni Jehova.
HI JEHOVA NAGBIBENDISYON HA ATON
12. Sumala ha Isaias 30:23-26, paonan-o bibendisyonan ni Jehova an iya katawohan?
12 Basaha an Isaias 30:23-26. Paonan-o natuman ini nga tagna ha mga Judio nga binalik ha Israel katapos magin bihag ha Babilonya? Nakakarawat hira hin hura nga mga bendisyon—ha pisikal ngan ha espirituwal. Ginbendisyonan ni Jehova an iya katawohan hin hura nga suplay han materyal nga pagkaon. Pero mas importante pa gud, iya hira gintagan hin hura nga espirituwal nga pagkaon samtang hinay-hinay nga iginpapahiuli an putli nga pagsingba. An espirituwal nga mga bendisyon nga nakarawat han katawohan han Dios hito nga panahon labaw gud kay han bisan ano nga ira naeksperyensyahan antes hito. Sugad han iginpapakita ha bersikulo 26, gindugangan gud ni Jehova an espirituwal nga kahayag. (Isa. 60:2) An mga bendisyon ni Jehova nakabulig ha iya mga surugoon nga padayon nga mag-alagad ha iya nga may kalipay ngan kusog “tungod han maopay nga kahimtang han kasingkasing.”—Isa. 65:14.
13. Paonan-o an tagna parte ha pagpahiuli natutuman ha aton panahon?
13 An tagna ba parte ha pagpahiuli han putli nga pagsingba aplikado ha aton yana? Oo! Ha ano nga paagi? Tikang han 1919 C.E., minilyon an nagkaada na kagawasan tikang ha pagkabihag ha Babilonya nga Gamhanan, an imperyo han buwa nga relihiyon ha kalibotan. Gin-giyahan hira ngadto ha tuna nga mas maopay gud kay han Tuna nga Iginsaad ha Israel. Gin-giyahan hira ngadto ha usa nga espirituwal nga paraiso. (Isa. 51:3; 66:8) Ano ito nga espirituwal nga paraiso?
14. Ano an espirituwal nga paraiso, ngan hin-o an naukoy hito yana? (Kitaa an footnote nga An Iginpapasabot.)
14 Tikang han 1919 C.E., an mga dinihogan naukoy na ha usa nga espirituwal nga paraiso. b Samtang nalabay an panahon, adton may paglaom nga mabuhi ha tuna, an “iba nga mga karnero,” naukoy na gihap hini nga espirituwal nga tuna ngan nakakakarawat han hura nga mga bendisyon ni Jehova.—Juan 10:16; Isa. 25:6; 65:13.
15. Hain dapit an espirituwal nga paraiso?
15 Hain dapit an espirituwal nga tuna, o paraiso, yana? An mga magsiringba ni Jehova naukoy ha ngatanan nga bahin han tuna. Salit an espirituwal nga paraiso nga ira gin-uukyan makikita liwat ha bug-os nga kalibotan. Amo nga yana, bisan hain kita naukoy ha tuna, puydi kita magin bahin han espirituwal nga paraiso basta aktibo kita nga nasuporta ha tinuod nga pagsingba.
Paonan-o an tagsa ha aton makakaamot ha kahusay han espirituwal nga paraiso? (Kitaa an parapo 16-17)
16. Paonan-o naton padayon nga makikita an kahusay han espirituwal nga paraiso?
16 Basi magpabilin ha espirituwal nga paraiso, kinahanglan padayon liwat kita nga magin mapasalamaton tungod han bug-os-kalibotan nga Kristiano nga kongregasyon. Paonan-o naton ito bubuhaton? Pinaagi ha pagpokus ha kahusay, diri ha pagin diri perpekto han kabugtoan. (Juan 17:20, 21) Kay ano nga importante gud ito? Hunahunaa ini nga pagkompara. Naglalaom kita nga makakita hin iba-iba nga klase hin kahoy ha usa nga mahusay nga parke, o garden. Ha pariho nga paagi, an espirituwal nga paraiso nga makikita ha mga kongregasyon yana may iba-iba nga indibiduwal nga maipapariho ha mga kahoy. (Isa. 44:4; 61:3) Kinahanglan siguruhon naton nga padayon kita nga magpokus ha kahusay han “kagurangan,” diri ha pagin diri perpekto han tagsa nga “kahoy” nga pinakahirani ha aton. Diri naton tugotan nga an pagin diri perpekto naton o han iba ha kongregasyon makagwara han aton pokus ha kabug-osan nga kahusay han nagkakaurosa nga Kristiano nga kongregasyon ha bug-os nga kalibotan.
17. Ano an mahihimo han tagsa ha aton basi makaamot ha pagkaurosa han kongregasyon?
17 Paonan-o an tagsa ha aton makakabulig basi matipigan an pagkaurosa han kongregasyon? Pinaagi ha pakigmurayaw. (Mat. 5:9; Roma 12:18) Ha kada panahon nga nag-uuna kita ha pakigmurayaw ha iba ha kongregasyon, nakakaamot kita ha kahusay han espirituwal nga paraiso. Ginhihinumdom naton nga an tagsa nga naukoy ha espirituwal nga paraiso ginpahirani ni Jehova ha putli nga pagsingba. (Juan 6:44) Imadyina kon ano kamalipayon hi Jehova kon nakikita kita niya nga naniningkamot gud nga maparig-on an kamurayawan ngan pagkaurosa hadton iya mga ginhuhunahuna sugad nga presyoso—an iya mga surugoon!—Isa. 26:3; Hag. 2:7.
18. Ano an dapat naton pamalandungon hin agsob, ngan kay ano?
18 Paonan-o kita bug-os nga makakapahimulos han mga bendisyon nga nakakarawat naton sugad nga mga surugoon han Dios? Puydi naton hunahunaon hin maopay an aton gin-aadman ha Pulong han Dios ngan ha aton mga publikasyon nga iginbase ha Biblia. An sugad nga pag-aram ngan pagpamalandong mabulig ha aton nga magkultibar hin Kristiano nga mga kalidad nga nagpapagios ha aton nga magpakita hin “minagburugto nga gugma” ngan “malumo nga palanggaon . . . an usa kag usa” ha kongregasyon. (Roma 12:10) Kon ginpapamalandong naton an mga bendisyon ha aton yana, napaparig-on ta an aton relasyon kan Jehova. Ngan kon ginpapamalandong naton an mga bendisyon ni Jehova ha aton ha tiarabot, pirme magigin tinuod gud ha aton an paglaom nga mag-alagad ha iya ha kadayonan. Ini ngatanan mabulig ha aton yana nga magin mas malipayon ha pag-alagad kan Jehova.
DETERMINADO NGA MAGPAILOB
19. (a) Sumala ha Isaias 30:18, ha ano kita kombinsido? (b) Ano an mabulig ha aton nga makailob nga may kalipay?
19 Hi Jehova “mabuhát” para ha aton kon iya na tapuson ini nga maraot nga kalibotan. (Isa. 30:18) Kombinsido kita nga hi Jehova—“usa nga Dios han hustisya”—diri matugot nga an kalibotan ni Satanas lumahos hin bisan usa la ka adlaw kay han ginkikinahanglan. (Isa. 25:9) Mapailubon nga naghuhulat kita upod kan Jehova nga umabot ito nga adlaw han katalwasan. Samtang waray pa ito, determinado kita nga padayon nga apresyaron an pribilehiyo han pag-ampo, pag-aram ngan pag-aplikar han Pulong han Dios, ngan pagpamalandong han mga bendisyon ha aton. Kon bubuhaton ta ito, bubuligan kita ni Jehova nga makailob nga may kalipay ha aton pagsingba ha iya.
KARANTAHON 142 Marig-on nga Tipigi an Aton Paglaom
a Hihisgotan hini nga artikulo an tulo nga paagi nga hi Jehova nabulig ha iya mga magsiringba basi mailob nga may kalipay an mga problema. Mahibabaroan naton ini pinaagi ha pag-usisa han Isaias kapitulo 30. Samtang ginrirepaso naton ini nga kapitulo, mapapahinumdoman kita han pagkaimportante han pag-ampo kan Jehova, pag-aram han iya Pulong, ngan pagpamalandong han mga bendisyon ha aton yana ngan ha tiarabot.
b AN IGINPAPASABOT: An “espirituwal nga paraiso” nagtutudlok ha kahimtang nga may seguridad diin ginsisingba naton hi Jehova nga nagkakaurosa. Hini nga kahimtang, may-ada kita hura nga espirituwal nga pagkaon nga waray buwa nga mga katutdoan ngan damu an aton makalilipay nga buruhaton ha pagsangyaw han maopay nga sumat han Ginhadian han Dios. May-ada kita duok nga relasyon kan Jehova ngan naukoy hin murayaw kaupod an aton mahigugmaon nga kabugtoan, nga nabulig ha aton nga mailob nga may kalipay an mga problema. Nasulod kita ha espirituwal nga paraiso kon nagtitikang kita pagsingba kan Jehova ha husto nga paagi ngan kon ginhihimo naton an aton pinakamaopay basi subaron hiya.