ARADMAN NGA ARTIKULO 45
Kon Paonan-o hi Jehova Nabulig ha Aton nga Matuman an Aton Ministeryo
“Mahibabaro gud hira nga nagkaada propeta dida ha ira.” —EZEK. 2:5.
KARANTAHON 67 “Isangyaw an Pulong”
MAHITUNGOD HAN ARTIKULO a
1. Ano an aton malalaoman, ngan ha ano kita makakasiguro?
MAKAKALAOM kita hin pagkontra samtang gintutuman naton an pagsangyaw nga buruhaton. Ito nga pagkontra bangin magtikaduro ha tiarabot. (Dan. 11:44; 2 Tim. 3:12; Pah. 16:21) Bisan pa hito, makakasiguro kita nga bubuligan kita ni Jehova. Kay ano? Hi Jehova pirme nabulig ha iya mga surugoon nga matuman an ira mga toka—anoman ito kakuri. Ha pag-ilustrar, hisgotan naton an pipira nga panhitabo ha kinabuhi ni propeta Ezekiel, nga nagsangyaw ha mga Judio nga gindistyero ha Babilonya.
2. Paonan-o ginhulagway ni Jehova an mga tawo nga kinahanglan sangyawan ni Ezekiel, ngan ano an aton hihisgotan hini nga artikulo? (Ezekiel 2:3-6)
2 Ano nga klase hin mga tawo an kinahanglan sangyawan ni Ezekiel? Ginhulagway hira ni Jehova sugad nga mga “rebelyoso” ngan “diri namamati.” Peligroso hira sugad hin mga tunok ngan delikado sugad hin mga iskorpyon. Salit pauroutro nga ginsidngan ni Jehova hi Ezekiel: “Ayaw kahadlok”! (Basaha an Ezekiel 2:3-6.) Natuman ni Ezekiel an iya toka nga magsangyaw kay (1) ginsugo hiya ni Jehova, (2) ginpakusog hiya han espiritu han Dios, ngan (3) ginparig-on hiya han mga pulong han Dios. Paonan-o inin tulo nga butang nakabulig kan Ezekiel? Ngan paonan-o ito nabulig ha aton yana?
HI EZEKIEL—GINSUGO NI JEHOVA
3. Ano nga mga pulong an sigurado nga nagparig-on kan Ezekiel, ngan paonan-o hiya ginpasarig ni Jehova han Iya bulig?
3 Hi Jehova nagsiring kan Ezekiel: “Susugoon ko ikaw.” (Ezek. 2:3, 4) Ito nga mga pulong sigurado nga nagparig-on kan Ezekiel. Kay ano? Kay posible nga nahinumdoman niya nga hi Jehova naggamit hin puropariho nga mga pulong han ginsugo Niya hira Moises ngan Isaias sugad nga Iya mga propeta. (Ex. 3:10; Isa. 6:8) Maaram liwat hi Ezekiel kon paonan-o ginbuligan ni Jehova iton duha nga propeta nga matuman an makuri nga mga toka. Salit han makaduha nga nagsiring hi Jehova kan Ezekiel: “Susugoon ko ikaw,” may maopay nga rason an propeta nga sumarig ha bulig ni Jehova. Dugang pa, ha libro han Ezekiel, pipira ka beses nga mababasa naton ini: “An pulong ni Jehova inabot ha akon.” (Ezek. 3:16) Ngan pauroutro nga nagsurat hiya: “An pulong ni Jehova inabot utro ha akon.” (Ezek. 6:1) Sigurado nga kombinsido hi Ezekiel nga ginsugo hiya ni Jehova. Sugad man, tungod kay hi Ezekiel anak hin saserdote, posible nga gintutdoan hiya han iya tatay nga pirme ginpapasarig ni Jehova an Iya mga propeta han Iya bulig. Pananglitan, ginsidngan ni Jehova hira Isaac, Jacob, ngan Jeremias: “Upod mo ako.”—Gen. 26:24; 28:15; Jer. 1:8.
4. Ano nga nakakaliaw nga mga pulong an sigurado nga nagparig-on kan Ezekiel?
4 Ano an magigin reaksyon han mga Israelita ha pagsangyaw ni Ezekiel? Hi Jehova nagsiring: “An panimalay ni Israel magdudumiri ha pagpamati ha imo, kay nadiri hira ha pagpamati ha akon.” (Ezek. 3:7) Pinaagi ha pagsalikway kan Ezekiel, ginsasalikway han mga tawo hi Jehova. Ito nga mga pulong nagpasarig kan Ezekiel nga an pagsalikway ha iya han mga tawo diri nagpapasabot nga napakyas hiya sugad nga propeta. Ginpasarig liwat ni Jehova hi Ezekiel nga kon matuman na an mga paghukom nga iya ginpasamwak, an mga tawo “mahibabaro . . . nga nagkaada propeta dida ha ira.” (Ezek. 2:5; 33:33) Sigurado nga iton nakakaliaw nga mga pulong naghatag kan Ezekiel han kusog nga iya ginkikinahanglan basi matuman an iya ministeryo.
GINSUSUGO KITA NI JEHOVA YANA
Pariho han nagin kahimtang ni Ezekiel, an mga tawo bangin diri interesado ha aton mensahe ngan kumontra ha aton, pero maaram kita nga kaupod naton hi Jehova (Kitaa an parapo 5-6)
5. Sumala ha Isaias 44:8, paonan-o kita nagkakaada kusog?
5 Kita liwat nagkakaada kusog kay maaram kita nga ginsugo kita ni Jehova. Ginpapasidunggan kita niya pinaagi ha pagtawag ha aton nga iya “mga saksi.” (Isa. 43:10) Daku gud ito nga pribilehiyo! Sugad la nga ginsidngan ni Jehova hi Ezekiel: “Ayaw kahadlok,” ginsisidngan kita ni Jehova: “Ayaw kamo kabaraka.” Kay ano nga diri kita dapat mahadlok ha mga nakontra ha aton? Pariho kan Ezekiel, ginsugo kita ni Jehova ngan Iya kita bubuligan.—Basaha an Isaias 44:8.
6. (a) Paonan-o kita ginpapasarig ni Jehova nga bubuligan kita niya? (b) Ano an nakakaliaw ngan nakakaparig-on ha aton?
6 Ginpapasarig kita ni Jehova nga bubuligan kita niya. Pananglitan, antes hi Jehova magsiring: “Kamo an akon mga saksi,” nagsiring hiya: “Pag-agi mo ha katubigan, maupod ako ha imo, ngan pag-agi mo ha mga salog, diri ito malapwas ha imo. Paglakat mo ha kalayo, diri ka mapapaso, ngan diri ka masusunog han laga.” (Isa. 43:2) Samtang gintutuman ta an aton ministeryo, usahay nakakaeksperyensya kita hin sugad-baha nga mga ulang ngan naatubang hin sugad-kalayo nga mga problema. Bisan pa hito, ha bulig ni Jehova padayon kita nga nagsasangyaw. (Isa. 41:13) Pariho ha panahon ni Ezekiel, kadam-an han mga tawo yana an nagsasalikway han mensahe. Ginhihinumdom naton nga an ira pagsalikway diri nagpapasabot nga napakyas kita sugad nga mga Saksi han Dios. Nakakaliaw ngan nakakaparig-on ha aton an paghibaro nga hi Jehova nalilipay kon matinumanon nga nagpapadayon kita ha pagpasamwak han iya mensahe. Hi apostol Pablo nagsiring: “An tagsa nga tawo makarawat han iya balos uyon ha iya ginbubuhat.” (1 Cor. 3:8; 4:1, 2) Usa nga maiha na nga payunir nga sister an nagsiring: “Nalilipay ako ha paghibaro nga ginbabalosan ni Jehova an aton mga pangalimbasog.”
HI EZEKIEL—GINPAKUSOG HAN ESPIRITU HAN DIOS
Nakakita hi Ezekiel hin bisyon han langitnon nga karuwahe ni Jehova, ngan tungod hito nagin mas kombinsido hiya nga bubuligan hiya ni Jehova nga matuman an iya ministeryo (Kitaa an parapo 7)
7. Ha kada panahon nga ginpapamalandong ni Ezekiel an bisyon nga iya nakita, ano an sigurado nga nagin epekto hito ha iya? (Kitaa an piktyur ha kobre.)
7 Nakita ni Ezekiel kon ano kagamhanan an espiritu han Dios. Ha bisyon, nakita niya nga an baraan nga espiritu nabulig ha gamhanan nga espiritu nga mga linarang ngan nagpapagios ha dagku gud nga mga kaliding han langitnon nga karuwahe. (Ezek. 1:20, 21) Ano an nagin reaksyon ni Ezekiel? Iya ginsurat an nahitabo. “Han nakita ko ito, linuhod ako nga nahapa.” Tungod kay nahipausa gud hi Ezekiel, hinapa hiya ha tuna. (Ezek. 1:28) Ha urhi, ha kada panahon nga ginpapamalandong ni Ezekiel iton urusahon nga bisyon, sigurado nga nagigin mas kombinsido hiya nga ha bulig han espiritu han Dios, matutuman niya an iya ministeryo.
8-9. (a) Ano an nahitabo kan Ezekiel han ginsugo hiya ni Jehova nga tumindog? (b) Paonan-o dugang nga ginpakusog ni Jehova hi Ezekiel para ha iya makuri nga teritoryo?
8 Ginsugo ni Jehova hi Ezekiel: “Anak han tawo, tindog basi makaistorya ko ikaw.” Ito nga sugo upod han espiritu han Dios nakahatag kan Ezekiel han kusog nga iya ginkikinahanglan basi makabuhát. Hi Ezekiel nagsurat: “An espiritu sinulod ha akon ngan ginpatindog ako.” (Ezek. 2:1, 2) Ha urhi ngan ha bug-os nga ministeryo ni Ezekiel, gin-giyahan hiya han “kamot” han Dios—an baraan nga espiritu han Dios. (Ezek. 3:22; 8:1; 33:22; 37:1; 40:1, ftn.) Ginpakusog hi Ezekiel han espiritu han Dios para ha toka nga iya nakarawat—an pagsangyaw ha “magtig-a an ulo ngan diri namamati” nga mga tawo ha iya teritoryo. (Ezek. 3:7) Ginsidngan ni Jehova hi Ezekiel: “An imo nawong ginhimo ko nga sugad gud katig-a han ira mga nawong ngan an imo agtang nga sugad gud katig-a han ira mga agtang. An imo agtang ginhimo ko nga pariho hin diamante, nga mas matig-a kay han matig-a nga bato. Ayaw kahadlok ha ira o kalisang tungod han ira mga nawong.” (Ezek. 3:8, 9) Sugad hin ginsidngan ni Jehova hi Ezekiel: ‘Ayaw tuguti nga an katig-a han ulo han mga tawo magpaluya ha imo. Papakusgon ko ikaw.’
9 Katapos hito, gindara hi Ezekiel han espiritu han Dios ngadto ha teritoryo nga iya sasangyawan. “An gahum ni Jehova ginios gud ha akon,” nagsurat hi Ezekiel. Usa ka semana an ginkinahanglan basi bug-os nga mahibaroan ngan masabtan han propeta an mensahe nga dapat niya ipasamwak para makagsangyaw hiya nga may kombiksyon. (Ezek. 3:14, 15) Katapos, ginsugo hiya ni Jehova nga kumadto ha kapatagan diin “an espiritu sinulod ha [iya].” (Ezek. 3:23, 24) Andam na hi Ezekiel nga tikangan an iya ministeryo.
GINPAPAKUSOG KITA HAN ESPIRITU HAN DIOS YANA
Pariho kan Ezekiel, ano an nabulig ha aton yana nga matuman an aton ministeryo? (Kitaa an parapo 10)
10. Ano nga bulig an aton ginkikinahanglan basi matuman an aton pagsangyaw nga buruhaton, ngan kay ano?
10 Ano nga bulig an aton ginkikinahanglan basi matuman an aton pagsangyaw nga buruhaton? Basi mabaton ito, hunahunaa an nahitabo kan Ezekiel. Antes niya tikangan an iya pagsangyaw, an espiritu han Dios naghatag ha iya han kusog nga iya ginkikinahanglan. Pariho kan Ezekiel, matutuman ta liwat yana an aton pagsangyaw nga buruhaton ha bulig la han espiritu han Dios. Kay ano? Kay hi Satanas nakikiggirra ha aton basi umundang kita ha aton pagsangyaw. (Pah. 12:17) Ha panhunahuna han tawo, baga hin diri naton kaya daugon hi Satanas. Pero pinaagi han aton pagsangyaw nga buruhaton, nadadaog naton hiya! (Pah. 12:9-11) Ha ano nga paagi? Kon nagsasangyaw kita, iginpapakita naton nga diri kita nahahadlok ha mga tarhog ni Satanas. Kada pagsasangyaw naton, napipirde hi Satanas. Salit ano an aton masisiring kon padayon kita nga nakakagsangyaw bisan kon ginkukontra han aton mga kaaway? Makakasiring kita nga ginpapakusog kita han baraan nga espiritu ngan may-ada kita han pag-uyon ni Jehova.—Mat. 5:10-12; 1 Ped. 4:14.
11. Ano an bubuhaton han espiritu han Dios para ha aton, ngan paonan-o kita padayon nga makakakarawat hito?
11 Ano an dugang nga iginpapasarig ha aton han paghibaro nga simboliko nga ginpatig-a ni Jehova an nawong ngan agtang ni Ezekiel? An espiritu han Dios mahimo magpakusog ha aton basi malamposan an bisan ano nga problema nga bangin atubangon ta ha aton ministeryo. (2 Cor. 4:7-9) Kon sugad, ano an puydi naton buhaton basi masiguro nga padayon ta nga makakarawat an espiritu han Dios? Kinahanglan padayon naton ito nga ig-ampo, nga nasarig nga papamatian kita ni Jehova. Gintutdoan ni Jesus an iya mga disipulo: “Padayon nga mangaro, . . . padayon nga mamiling, . . . padayon nga magtuktok.” Babatunon kita ni Jehova pinaagi ha ‘paghatag hin baraan nga espiritu ha mga nangangaro ha iya.’—Luc. 11:9, 13; Buh. 1:14; 2:4.
HI EZEKIEL—GINPARIG-ON HAN MGA PULONG HAN DIOS
12. Sumala ha Ezekiel 2:9–3:3, diin tikang an linukot nga basahon ngan ano an sulod hito?
12 Hi Ezekiel diri la ginpakusog han espiritu han Dios kondi ginparig-on liwat han mga pulong han Dios. Ha bisyon, nakita niya an usa nga kamot nga may ginkakaptan nga linukot nga basahon. (Basaha an Ezekiel 2:9–3:3.) Diin tikang an linukot nga basahon? Ano an sulod hito? Paonan-o ito nagparig-on kan Ezekiel? Kitaon ta. An linukot nga basahon tikang ha trono han Dios. Posible nga gin-gamit ni Jehova an usa han upat nga anghel nga nakita na ni Ezekiel basi ihatag an linukot nga basahon ha iya. (Ezek. 1:8; 10:7, 20) An linukot nga basahon may mga pulong han Dios—an hilaba nga mensahe han paghukom nga ipapasamwak ni Ezekiel ha rebelyoso nga mga distyero. (Ezek. 2:7) Ginsurat ito nga mensahe paluyoluyo ha linukot nga basahon.
13. Ano an ginsiring ni Jehova kan Ezekiel nga buhaton ha linukot nga basahon, ngan kay ano nga matam-is ito?
13 Ginsidngan ni Jehova an iya propeta nga kaunon an linukot nga basahon ngan ‘busugon an iya tiyan hito.’ Ginsugot ni Ezekiel ito nga sugo ngan bug-os nga ginkaon an linukot nga basahon. Ano an iginpapasabot hini nga bahin han bisyon? Kinahanglan ni Ezekiel masabtan hin bug-os an mensahe nga iya ipapasamwak. Kinahanglan tumoo hiya hito nga mensahe basi mapagios hiya nga magsangyaw. Katapos, may urusahon nga nahitabo. Nahibaroan ni Ezekiel nga an linukot nga basahon ‘sugad katam-is hin dugos.’ (Ezek. 3:3) Kay ano? Para kan Ezekiel, an dungog nga magin representante ni Jehova matam-is, o makalilipay, nga eksperyensya. (Sal. 19:8-11) Mapasalamaton hiya nga gin-uyonan hiya ni Jehova nga mag-alagad sugad nga Iya propeta.
14. Ano an nakabulig kan Ezekiel nga magin andam nga karawaton an iya toka?
14 Ha urhi, ginsidngan ni Jehova hi Ezekiel: “Ibutang ha imo kasingkasing ngan pamatii an ngatanan ko nga pulong nga akon iginyayakan ha imo.” (Ezek. 3:10) Pinaagi hito nga mga instruksyon, ginsidngan ni Jehova hi Ezekiel nga hinumdoman an nakasurat ha linukot nga basahon ngan pamalandungon ito. An pagbuhat hito nagparig-on kan Ezekiel. Naghatag liwat ito ha iya hin mapwersa nga mensahe nga ipapasamwak ha mga tawo. (Ezek. 3:11) Tungod kay aada ha kasingkasing ngan baba ni Ezekiel an mensahe han Dios, andam na hiya nga karawaton ngan tumanon an iya toka.—Ikompara an Salmo 19:14.
GINPAPARIG-ON KITA HAN MGA PULONG HAN DIOS YANA
15. Basi makailob, ano an kinahanglan naton “ibutang ha [aton] kasingkasing”?
15 Basi makailob ha aton ministeryo, kita liwat kinahanglan padayon nga maparig-on han mga pulong han Dios. Kinahanglan ta “ibutang ha [aton] kasingkasing” an tanan nga ginyayakan ha aton ni Jehova. Yana, nagyayakan ha aton hi Jehova pinaagi han iya sinurat nga Pulong, an Biblia. Paonan-o kita makakasiguro nga an Pulong han Dios padayon nga nakakaapekto ha aton mga panhunahuna, pag-abat, ngan motibo?
16. Ano an kinahanglan naton buhaton ha Pulong han Dios, ngan paonan-o naton ito matitipigan ha aton kasingkasing?
16 Sugad la nga napaparig-on kita ha pisikal kon nakaon kita hin pagkaon ngan natutunaw ito, napaparig-on liwat kita ha espirituwal kon gin-aadman naton an Pulong han Dios ngan ginpapamalandong ito. Ginhihinumdom naton an leksyon mahitungod ha linukot nga basahon. May kalabotan ha Pulong han Dios, karuyag ni Jehova nga aton ‘busugon an aton tiyan hito,’ karuyag sidngon, sabton ito hin maopay. Mahihimo naton ito pinaagi ha pag-ampo, pagbasa, ngan pagpamalandong. Siyahan, nag-aampo kita basi maiandam an aton kasingkasing ha pagkarawat han mga panhunahuna han Dios. Katapos, nagbabasa kita hin teksto ha Biblia. Kahuman, naundang kita hin madaliay basi mamalandong ngan maghunahuna hin maopay ha aton nabasa. Ano an magigin resulta? Kon mas namamalandong kita, mas matitipigan ta ha aton simboliko nga kasingkasing an Pulong han Dios.
17. Kay ano nga importante nga pamalandungon naton an aton ginbabasa ha Biblia?
17 Kay ano nga importante nga basahon an Biblia ngan pamalandungon ito? An pagbuhat hito naghahatag ha aton han kusog nga aton ginkikinahanglan basi maisangyaw an mensahe han Ginhadian yana ngan an mapwersa nga mensahe han paghukom nga bangin naton ipasamwak ha diri na maiha. Sugad man, kon ginpapamalandong naton an makaruruyag nga mga kalidad ni Jehova, magigin mas marig-on an aton relasyon ha iya. Tungod hito, magpapahimulos kita hin usa nga butang nga matam-is gud, o makalilipay—kamurayawan ha hunahuna ngan kakontento.—Sal. 119:103.
NAPAPAGIOS NGA MAGPAILOB
18. Ano an kakarawaton han mga tawo ha aton teritoryo, ngan kay ano?
18 Hi Ezekiel propeta, pero kita diri. Kondi determinado kita nga padayon nga ipasamwak an mensahe ni Jehova nga iya gintipigan ha iya sinurat nga Pulong tubtob nga sumiring hiya nga tapos na an pagsangyaw nga buruhaton. Pag-abot han panahon han paghukom, waray rason an mga tawo ha aton teritoryo ha pagsiring nga waray hira makakarawat hin pahamangno o ginbalewaray hira han Dios. (Ezek. 3:19; 18:23) Lugod, kakarawaton nira nga an mensahe nga aton iginsangyaw tikang ha Dios.
19. Ano an maghahatag ha aton hin kusog basi matuman an aton ministeryo?
19 Ano an maghahatag ha aton hin kusog basi matuman an aton ministeryo? An tulo gihapon nga butang nga nagparig-on kan Ezekiel. Padayon kita nga nagsasangyaw kay maaram kita nga ginsugo kita ni Jehova, ginpapakusog kita han baraan nga espiritu han Dios, ngan ginpaparig-on kita han Pulong han Dios. Ha bulig ni Jehova, napapagios kita nga tumanon an aton ministeryo ngan magpailob “tubtob ha kataposan.”—Mat. 24:13.
KARANTAHON 65 Mag-uswag!
a Hini nga artikulo, hihisgotan ta an tulo nga butang nga nakabulig kan propeta Ezekiel nga matuman an iya toka ha pagsangyaw. Samtang ginrirepaso naton kon paonan-o ginbuligan ni Jehova an iya propeta, mapaparig-on an aton pagsarig nga bubuligan kita ni Jehova nga matuman an aton ministeryo.