1. Ano an karuyag sidngon han pagtipig han aton maopay nga panhunahuna? (2 Timoteo 4:5)

 KON naatubang kita hin mga kakurian, mahimo masarihan an aton pagkamaunungon kan Jehova ngan ha iya organisasyon. Paonan-o naton malalamposan an sugad nga mga problema? Kinahanglan tipigan ta an aton maopay nga panhunahuna ngan magpadayon nga nagmamata, nga marig-on ha pagtoo. (Basaha an 2 Timoteo 4:5.) Gintitipigan ta an aton maopay nga panhunahuna pinaagi ha pagpabilin nga kalmado, paghunahuna hin maopay, ngan paningkamot nga subaron an panhunahuna ni Jehova. Kon ginbubuhat ta ito, an aton panhunahuna diri makukontrol han aton emosyon.

2. Ano an aton hihisgotan hini nga artikulo?

² Ha nahiuna nga artikulo, ginhisgotan ta an tulo nga problema nga bangin atubangon naton tikang ha gawas han kongregasyon. Hini nga artikulo, hihisgotan naton an tulo nga problema tikang ha sulod han kongregasyon nga mahimo magsari han aton pagkamaunungon kan Jehova. Amo ito an (1) kon inaabat naton nga gintratar kita hin maraot han usa nga igkasi-Kristiano, (2) kon gindidisiplina kita, ngan (3) kon nakukurian kita pagpahiuyon ha mga pagbag-o ha organisasyon. Paonan-o ta matitipigan an aton maopay nga panhunahuna ngan magpabilin nga maunungon kan Jehova ngan ha iya organisasyon kon naatubang hin sugad nga mga problema?

3. Ano an bangin hunahunaon naton kon inaabat naton nga gintratar kita hin maraot han usa nga igkasi-Kristiano?

³ Inabat mo na ba nga gintratar ka hin maraot han usa nga igkasi-Kristiano, bangin pa ngani han usa nga may responsabilidad ha kongregasyon? Posible nga diri intensyon han bugto nga masakitan ka. (Roma 3:23; San. 3:2) Bisan pa hito, bangin nakapasubo ha imo an iya ginbuhat. Bangin waray ka mahingaturog paghinunahuna hito. Bangin naghunahuna ka pa ngani, ‘Kon nabubuhat ini han usa nga bugto, ini gud ba an organisasyon han Dios?’ Ito gud an karuyag ni Satanas nga hunahunaon naton. (2 Cor. 2:11) An sugad nga negatibo nga panhunahuna mahimo magin hinungdan nga bumulag kita kan Jehova ngan ha iya organisasyon. Salit kon inaabat naton nga gintratar kita hin maraot han usa nga bugto, paonan-o ta matitipigan an aton maopay nga panhunahuna ngan malikyan an nakakadaot nga mga panhunahuna?

4. Paonan-o gintipigan ni Jose an iya maopay nga panhunahuna han gintratar hiya hin maraot, ngan ano nga mga leksyon an aton mahibabaroan ha iya ehemplo? (Genesis 50:19-21)

⁴ Ayaw pagdumot. Han tin-edyer hi Jose, gintratar hiya hin maraot han iya mga magurang. Nangalas hira ha iya ngan karuyag pa ngani han iba ha ira nga patayon hiya. (Gen. 37:4, 18-22) Ha urhi, ginbaligya nira hiya ha pagkauripon. Tungod hito, inatubang hi Jose hin grabe nga mga problema nga inabot hin mga 13 ka tuig. Puydi unta hunahunaon ni Jose nga diri gud hiya hinigugma ni Jehova. Ngan puydi unta niya hunahunaon nga ginpabay-an hiya ni Jehova ha panahon nga nanginginahanglan hiya hin bulig. Pero waray magdumot hi Jose. Lugod, gintipigan niya an iya maopay nga panhunahuna pinaagi ha pagpabilin nga kalmado. Han nagkaada hiya higayon nga bumulos ha iya kabugtoan, waray niya buhata ito, lugod nagpakita hiya hin gugma ha ira ngan ginpasaylo hira. (Gen. 45:4, 5) Ginios hi Jose hin sugad hini kay nakapanhunahuna hiya hin maopay. Imbes nga magpokus ha iya mga problema, padayon nga ginhunahuna niya an katuyoan ni Jehova. (Basaha an Genesis 50:19-21.) Ano an leksyon? Kon gintratar ka hin maraot, ayaw pagdumot kan Jehova o paghunahuna nga ginpabay-an ka niya. Lugod, pamalandonga kon paonan-o ka niya ginbubuligan basi mailob an problema. Dugang pa, kon gintratar ka hin maraot han iba, pangalimbasugi nga tabonan hin gugma an ira pagin diri perpekto.—1 Ped. 4:8.

5. Paonan-o gintipigan ni Miqueas an iya maopay nga panhunahuna han inabat niya nga gintratar hiya hin maraot?

⁵ Pansina an eksperyensya ha aton panahon han tigurang ha South America nga hi Miqueas. b Nahinumdoman niya an panahon nga inabat niya nga gintratar hiya hin maraot han pipira nga brother nga may responsabilidad ha organisasyon ni Jehova. Siring niya: “Waray pa gud ako makaeksperyensya hin sugad nga klase hin istres. Nabaraka gud ako. Diri ako nahingangaturog, ngan nagtitinangis ako kay inabat ko nga waray ako mahihimo.” Bisan pa hito, gintipigan ni Miqueas an iya maopay nga panhunahuna ngan nangalimbasog gud nga kontrolon an iya emosyon. Pirme hiya nag-aampo ngan nangangaro kan Jehova han iya baraan nga espiritu ngan hin kusog basi makailob. Namiling liwat hiya hin impormasyon ha aton mga publikasyon nga makakabulig ha iya. Ano an leksyon? Kon inaabat mo nga gintratar ka hin maraot han usa nga bugto, pagpabilin nga kalmado ngan pangalimbasugi nga kontrolon an bisan ano nga negatibo nga pagbati nga bangin inaabat mo. Bangin diri ka maaram han sitwasyon nga nagin hinungdan nga nayakan o nabuhat niya ito. Salit pakiistorya kan Jehova ha pag-ampo, ngan hangyoa hiya nga buligan ka nga masabtan an panhunahuna han bugto. An pagbuhat hito bangin makabulig ha imo nga hunahunaon nga waray tuyoa han bugto nga buhaton ito ha imo  ngan pasayloon hiya. (Prob. 19:11) Hinumdumi nga maaram hi Jehova han imo sitwasyon, ngan tatagan ka niya han kusog nga imo ginkikinahanglan basi makailob.—2 Cron. 16:9; Ecles. 5:8.

6. Kay ano nga importante nga masabtan naton nga an disiplina ni Jehova kapahayagan han iya gugma? (Hebreo 12:5, 6, 11)

⁶ Mahimo magin masakit gud an disiplina. Pero kon magpupokus la kita ha kasakit, bangin hunahunaon naton nga diri patas an disiplina ngan diri ito aplikado ha aton o sobra ito kabug-at. Sugad nga resulta, bangin diri naton masabtan an usa nga importante gud nga butang—nga an disiplina kapahayagan han gugma ni Jehova ha aton. (Basaha an Hebreo 12:5, 6, 11.) Ngan kon magpapakontrol kita ha aton emosyon, gintatagan ta hi Satanas hin higayon nga gamiton ito nga aton inaabat kontra ha aton. Karuyag niya nga diri naton karawaton an disiplina, ngan mas maraot pa, magpahirayo kita kan Jehova ngan ha kongregasyon. Kon gindisiplina ka, paonan-o mo matitipigan an imo maopay nga panhunahuna?

7. (a) Sugad han makikita ha piktyur, paonan-o gin-gamit ni Jehova hi Pedro katapos niya kumarawat hin disiplina? (b) Ano an imo nahibaroan ha ehemplo ni Pedro?

⁷ Karawata an disiplina, ngan himoa an ginkikinahanglan nga mga pagbag-o. Diri la makausa nga gintadong ni Jesus hi Pedro ha atubangan han iba nga mga apostol. (Mar. 8:33; Luc. 22:31-34) Posible nga naalohan gud hi Pedro! Pero nagpabilin hiya nga maunungon kan Jesus. Ginkarawat niya an disiplina ngan nahibaro hin leksyon ha iya mga sayop. Salit ginbalosan ni Jehova an pagkamaunungon ni Pedro ngan gintokahan hiya hin importante nga mga responsabilidad ha kongregasyon. (Juan 21:15-17; Buh. 10:24-33; 1 Ped. 1:1) Ano an aton mahibabaroan ha ehemplo ni Pedro? Nakakabenepisyo kita ngan an iba kon diri kita nagpupokus ha kaarawdan tungod han disiplina, lugod ginkakarawat an pagtadong ngan ginhihimo an ginkikinahanglan nga mga pagbag-o. Kon ginbubuhat ta ito, nagigin mas mapulsanon kita kan Jehova ngan ha aton kabugtoan.

8-9. Katapos madisiplina, ano an inabat ni Bernardo ha siyahan, pero ano an nakabulig ha iya nga tadungon an iya panhunahuna?

⁸ Pansina an nahitabo kan Bernardo, usa nga brother ha Mozambique. Gintanggal hiya ha pagin tigurang. Ano an inabat ni Bernardo ha siyahan? Siring niya, “Nasina ako kay diri ko karuyag an disiplina ha akon.” Nabaraka hiya han huhunahunaon ha iya han iba ha kongregasyon. Gin-amin niya, “Linabay anay an pipira ka bulan antes ako magkaada tama nga panhunahuna ha disiplina ngan sumarig utro kan Jehova ngan ha iya organisasyon.”  Ano an nakabulig kan Bernardo nga magkaada husto nga panhunahuna?

⁹ Gintadong ni Bernardo an iya panhunahuna. Hiya nagsaysay: “Han tigurang pa ako, ginagamit ko an Hebreo 12:7 basi buligan an iba nga magkaada husto nga panhunahuna ha disiplina ni Jehova. Yana ginpakianhan ko an akon kalugaringon, ‘Hin-o an kinahanglan mag-aplikar hini nga teksto?’ An ngatanan nga surugoon ni Jehova—pati na ako.” Katapos, may mga pagbag-o pa nga ginhimo hi Bernardo basi maibalik an iya pagsarig kan Jehova ngan ha Iya organisasyon. Mas naggahin hiya hin panahon ha pagbasa han Biblia ngan ha pagpamalandong hito hin maopay. Bisan kon nababaraka pa hiya ha kon ano an pagkita ha iya han kabugtoan, nagsangyaw hiya kaupod nira ngan nagkomento ha mga katirok. Inabot an panahon, ginpili utro hi Bernardo nga magin tigurang. Kon gindisiplina ka pariho kan Bernardo, pangalimbasugi nga diri magpokus ha kaawod nga imo inaabat, karawata an sagdon, ngan himoa an ginkikinahanglan nga mga pagbag-o. c (Prob. 8:33; 22:4) Kon bubuhaton mo ito, makakasiguro ka nga babalosan ni Jehova an imo pagpabilin nga maunungon ha iya ngan ha iya organisasyon.

10. Ano nga pagbag-o an bangin nagsari ha pagkamaunungon han pipira nga Israelita nga kalalakin-an?

¹⁰ Mahimo masarihan an aton pagkamaunungon kon may mga pagbag-o ha organisasyon. Kon diri kita magbabantay, bangin magin hinungdan pa ngani ito nga bumulag kita kan Jehova. Pananglitan, hunahunaa kon paonan-o nakaapekto ha pipira nga Israelita an usa nga pagbag-o ha Mosaiko nga Balaud. Antes ighatag ni Jehova ha ira an Balaud, an mga ulo han pamilya an nagbubuhat han mga toka han mga saserdote. Naghihimo hira hin mga halaran ngan naghahalad kan Jehova para ha ira pamilya. (Gen. 8:20, 21; 12:7; 26:25; 35:1, 6, 7; Job 1:5) Pero han nagkaada na Balaud, an mga ulo han pamilya diri na gintutugotan nga buhaton ito. Nagpili hi Jehova hin mga saserdote tikang ha pamilya ni Aaron basi amo an maghalad. Katapos ipatuman ito nga pagbag-o, kon may ulo han pamilya nga diri tulin ni Aaron nga gumios sugad hin saserdote, puydi hiya patayon. d (Lev. 17:3-6, 8, 9) Posible ba nga ini nga pagbag-o usa han mga rason kon kay ano nga hira Kora, Datan, Abiram, ngan an 250 nga lider nagrebelde kanda Moises ngan Aaron? (Num. 16:1-3) Diri kita sigurado. Anoman an kahimtang, hi Kora ngan an iya mga kaupod waray magpabilin nga maunungon kan Jehova. Kon nasasarihan an imo pagkamaunungon tungod han mga pagbag-o ha organisasyon, ano an imo mahihimo?

11. Ano nga leksyon an aton mahibabaroan ha ehemplo han pipira nga Kohatita nga Levita?

¹¹ Bug-os nga sumuporta ha mga pagbag-o ha organisasyon. Han an mga Israelita nagbibiyahe ha kamingawan, an mga Kohatita may espesyal gud nga toka. Ha kada pagbabalhin hin kampo han mga Israelita, ginpapas-an han pipira nga Kohatita an arka han kasabotan ha unahan han ngatanan nga katawohan. (Num. 3:29, 31; 10:33; Jos. 3:2-4) Daku gud ito nga pribilehiyo! Pero nagbag-o an ira kahimtang han an mga Israelita inukoy na ha Tuna nga Iginsaad. Diri na kinahanglan iburobalhin an arka. Salit ha panahon nga hi Solomon na an naghadi, an pipira nga Kohatita gintokahan sugad nga mga parakanta, an iba mga parabantay han ganghaan, ngan an iba naman nanginginano han mga bodega. (1 Cron. 6:31-33; 26:1, 24) Waray rekord nga an mga Kohatita nagreklamo o nag-insister nga tagan hira hin mas maopay nga pribilehiyo kay espesyal an ira toka  hadto. Ano nga leksyon an aton mahibabaroan? Bug-os-kasingkasing nga sumuporta ha mga pagbag-o nga ginhihimo han organisasyon ni Jehova, upod na an bisan ano nga nakakaapekto ha imo toka. Malipay ha bisan ano nga toka nga iginhahatag ha imo. Hinumdumi nga an imo toka diri amo an basihan han imo pagin presyoso kan Jehova. Mas ginpapabilhan gud ni Jehova an imo pagin masinugtanon kay han bisan ano nga toka.—1 Sam. 15:22.

12. Ano an inabat ni Zaina han na-reassign hiya?

¹² Pansina an ehemplo ni Zaina, usa nga sister ha Middle East, nga nakakarawat hin bag-o nga toka ngan nawad-an han iya nalilipayan nga pribilehiyo. Gin-reassign hiya katapos mag-alagad ha Bethel hin sobra 23 ka tuig. Hiya nagsiring: “Ginkalasan gud ako han nagbag-o an akon toka. Inabat ako hin kawaray-pulos ngan pirme ko ginpapakianhan an akon kalugaringon, ‘Ano ba an sayop nga akon nabuhat?’” Makasurubo, an pipira nga kabugtoan ha kongregasyon nakadugang ha iya kasakit pinaagi ha pagsiring: “Kon gin-opay mo la, nagpabilin ka unta ha Bethel.” Maiha-iha nga hi Zaina nasusubo gud ngan nagtitinangis kada gab-i. Pero nagsiring hiya: “Waray ko gud tuguti nga magkaada ako pagruhaduha ha organisasyon o ha gugma ni Jehova.” Paonan-o natipigan ni Zaina an iya maopay nga panhunahuna?

13. Ano an ginbuhat ni Zaina basi malamposan an iya negatibo nga pagbati?

¹³ Nalamposan ni Zaina an iya negatibo nga pagbati. Paonan-o? Nagbasa hiya hin mga artikulo ha aton mga publikasyon nga naghihisgot han iya kahimtang. Daku gud an naibulig ha iya han artikulo nga “Malalamposan Mo an Panluya!” ha Pebrero 1, 2001, nga isyu han An Barantayan. Iginsasaysay hito nga artikulo kon paonan-o an parasurat han Biblia nga hi Marcos posible nga inabat hin puropariho nga pagbati han nakakarawat hiya hin mga pagbag-o ha iya toka. Hi Zaina nagsiring, “An ehemplo ni Marcos amo gud an akon ginkikinahanglan basi diri na manluya.” Hi Zaina nagpabilin liwat nga duok ha iya kasangkayan. Waray hiya mag-inusahan ngan waray malooy ha iya kalugaringon. Nakasiring hiya nga an espiritu ni Jehova an naggigiya ha iya organisasyon ngan an mga nangunguna hito nahigugma gud ha iya. Pero nasantop liwat niya nga kinahanglan buhaton han organisasyon han Dios an gimaopayi basi matuman an buruhaton ni Jehova.

14. Ha ano nga pagbag-o ha organisasyon nakurian pagpahiuyon hi Vlado, ngan ano an nakabulig ha iya?

¹⁴ Hi Vlado, usa nga 73 anyos nga tigurang ha Slovenia, nakurian han an iya kongregasyon gintampo ha lain nga kongregasyon ngan waray na gamita an Kingdom Hall nga iya gintatambongan.  Siring niya: “Waray ko masabti kon kay ano nga an sugad kaopay nga Kingdom Hall diri na gagamiton. Nasakitan ako kay bag-o la namon ito nga gin-renovate. Panday ako, ngan ako an naghimo han pipira nga bag-o nga muwebles. Sugad man, an pagtampo nagresulta hin damu nga pagbag-o nga diri masayon para ha amon nga edaran na nga mga magwarali.” Ano an nakabulig kan Vlado basi sumuporta ha instruksyon? Hiya nagsaysay: “An pagpahiuyon ha mga pagbag-o nga ginhihimo ha organisasyon ni Jehova pirme nagriresulta hin mga bendisyon. Ini nga mga pagbag-o nag-aandam ha aton para ha mas dagku pa nga pagbag-o ha tiarabot.” Nakukurian ka ba ha mga pagbag-o nga resulta han pagtampo han kongregasyon o han pagbag-o han toka? Sarig nga nasasabtan ni Jehova an imo inaabat. Kon masuporta ka ha sugad nga mga pagbag-o ngan magpapabilin nga maunungon kan Jehova ngan ha organisasyon nga iya ginagamit, sigurado nga bibendisyonan ka.—Sal. 18:25.

15. Paonan-o naton matitipigan an aton maopay nga panhunahuna kon naatubang kita hin mga problema tikang ha sulod han kongregasyon?

¹⁵ Samtang nagtitikahirani kita ha kataposan hini nga sistema han mga butang, makakalaom kita hin mga problema tikang ha sulod han kongregasyon. Ito nga mga problema mahimo magsari han aton pagkamaunungon kan Jehova. Salit kinahanglan tipigan ta an aton maopay nga panhunahuna. Kon inaabat mo nga gintratar ka hin maraot han usa nga igkasi-Kristiano, ayaw pagdumot. Kon gindisiplina ka, ayaw pagpokus ha kaarawdan, karawata an sagdon, ngan himoa an ginkikinahanglan nga mga pagbag-o. Ngan kon ikaw mismo an apektado ha mga pagbag-o nga ginhihimo han organisasyon ni Jehova, bug-os-kasingkasing nga karawata ito ngan sunda an instruksyon.

16. Paonan-o mo matitipigan an imo pagsarig kan Jehova ngan ha iya organisasyon?

¹⁶ Mahimo mo matipigan an imo pagsarig kan Jehova ngan ha iya organisasyon kon nasasarihan an imo pagkamaunungon. Pero basi mahimo ito, kinahanglan tipigan mo an imo maopay nga panhunahuna, karuyag sidngon, magpabilin nga kalmado, maghunahuna hin maopay, ngan subaron an panhunahuna ni Jehova. Magin determinado nga pag-adman an mga karakter ha Biblia nga naglampos ha pag-atubang hin puropariho nga mga kahimtang ngan pamalandungon an ira mga ehemplo. Pag-ampo kan Jehova para hin bulig. Ngan ayaw gud ibulag an imo kalugaringon tikang ha kongregasyon. Kon bubuhaton mo ito, anoman an mahitabo, diri ka gud maibubulag ni Satanas tikang kan Jehova o ha iya organisasyon.—San. 4:7.