NAKUKURIAN ka ba nga magin regular an imo personal nga pag-aram ha Biblia ngan i-enjoy ito? Kita ngatanan danay naabat hito. Pero hunahunaa an iba nga mga butang nga aton ginbubuhat hin regular, sugad han pagkarigo. Nagkikinahanglan hin panahon ngan pangalimbasog an pagkarigo, pero katapos hito narirepreskohan kita! An pag-aram ha Biblia nakakarepresko liwat ha aton. (Efe. 5:26) Pansina an pipira nga suhestyon nga makakabulig:

• Paghimo hin eskedyol. An personal nga pag-aram ha Biblia usa han “mas importante nga mga butang” nga diri dapat pabay-an han usa nga Kristiano. (Fil. 1:10) Basi mabuligan ka nga masunod an imo eskedyol, puydi mo ito ipaskin ha lugar nga masayon makita, pananglitan ha board o ha refrigerator. O bangin makabulig an pag-set hin alarm ha imo gadyet basi mapahinumdoman ka antes gud han oras han imo pag-aram.

• Pag-adjust uyon ha imo panginahanglan. Mas masayon ba para ha imo an pagpokus hin maiha, o mas karuyag mo an halipot pero mas agsob nga pag-aram? Ikaw an mas maaram han imo kahimtang. Ipahiuyon hito an imo eskedyol han pag-aram. Kon oras na han imo pag-aram pero waray ka gana, puydi ka ba mag-aram bisan dyes minutos la? Bisan kon sugad la kahalipot an imo pag-aram, damu na an imo mahibabaroan. Ngan kon makagtikang ka na, bangin maruyag ka pa ngani nga magpadayon.​—Fil. 2:13.

• Abanse nga magpili hin mga topiko. Kon oras na han imo pag-aram ngan dida ka pa la maghuhunahuna kon ano an imo aadman, bangin diri mo ‘magamit ha pinakamaopay nga paagi an imo panahon.’ (Efe. 5:16) Puydi ka ba maglista han mga artikulo o mga topiko nga karuyag mo adman? Kon may nahuhunahuna ka nga pakiana, isurat ito. Ngan katapos han kada pag-aram, mahimo mo idugang ha imo lista an iba nga mga topiko nga karuyag mo adman.

• Magin mapauyon-uyon. Magin mapauyon-uyon ha imo eskedyol, sugad han kaihaon han imo pag-aram o han ginpipili mo nga mga topiko. Diri importante kon san-o, kon ano kaiha, o kon ano an imo gin-aadman, kondi an imo pagin regular ha pag-aram.

Nagpapahimulos gud kita kon may regular kita nga rutina han pag-aram. Nagigin mas duok kita kan Jehova, nahibabaro nga gumios hin maaramon, ngan narirepreskohan.​—Jos. 1:8.