Paul: Eksayted gud kami! Nobyembre 1985 adto, ngan tipakadto kami ha amon siyahan nga asaynment sugad nga misyonero—ha Liberia, West Africa. An amon ginsasakyan nga eruplano inundang ha Senegal. “Sobra usa ka oras na la, maabot na kita ha Liberia!” siring ni Anne. Katapos, nagkaada pahibaro: “An mga pasahero nga tipakadto ha Liberia kinahanglan humaw-as ha eruplano. May kudeta salit diri kita makakalanding didto.” Han sunod nga napulo ka adlaw, nakiukoy la anay kami ha mga misyonero ha Senegal, ngan nababatian namon ha mga balita tikang ha Liberia nga damu hinduro nga tawo an ginpapamatay ngan may mga curfew nga istrikto nga iginpapatuman—ginpupusil an mga diri nasunod hito.

Anne: Diri kami mahilig hin adventure. Ngani, tikang ha kabata, gintawag na ako nga Hadlukon nga Annie. Ginkukulba ngani ako bisan pagtabok ha kalsada! Pero determinado kami nga makaabot ha amon asaynment.

Paul: Kami ni Anne natawo ha weste han England, ngan walo ka kilometro la an kahirayo han amon lugar ha ira lugar. Pariho kami nagtikang dayon magpayunir katapos maghayskul, kay gindasig gud kami han akon mga kag-anak ngan han nanay ni Anne. Ginsuportaran gud nira an amon hingyap nga gamiton an amon kinabuhi ha bug-os-panahon nga pag-alagad. Han 19 anyos ako, nakapribilehiyo ako nga matawag ha Bethel, ngan katapos han amon kasal ni Anne han 1982, nakaupod ko na hiya didto.

Anne: Naruyagan gud namon an Bethel, pero maiha na namon nga hingyap nga mag-alagad ha lugar diin mas daku an panginahanglan. An pagtrabaho ha Bethel kaupod han mga misyonero hadto nagparig-on hito nga hingyap. Espisipiko nga igin-ampo namon ini kada gab-i ha sulod hin tulo ka tuig, salit han 1985 nalipay gud kami han nakarawat namon an imbitasyon nga umiskwela ha ika-79 nga klase han Gilead! Gin-asayn kami ha Liberia, West Africa.

Paul: Sumakay kami ha siyahan nga eruplano nga gintugotan nga makabalik ha Liberia. An mga tawo didto nahahadlok gud ngan may-ada la gihapon mga curfew. Ngani, an tigda la nga pagbuto-buto han makina han usa nga awto igo na para magpanik an mga tawo ha mga merkado. Basi kumalma, magkaupod nga ginbabasa namon an pipira nga bahin han Salmo  kada gab-i. Pero bisan pa han makuri nga sitwasyon, hinigugma gud namon an amon asaynment. Hi Anne nagsasangyaw kada adlaw, ngan ako naman nagtatrabaho ha Bethel kaupod ni John Charuk. a Damu gud an akon nahibaroan ha iya kay eksperyensyado hiya ngan nasasabtan gud niya an kahimtang han aton kabugtoan didto.

Anne: Kay ano nga naruyagan dayon namon an amon asaynment ha Liberia? Tungod ito han aton kabugtoan. Mahigugmaon hira, makisangkayon, ngan matinumanon. Nagin duok gud kami ha ira, ngan hira an nagin bag-o namon nga pamilya. An ira mga sagdon nagparig-on ha amon ha espirituwal. Makalilipay gud an pagsangyaw didto. Naaaringit an mga tagbalay kon nabaya ka dayon ha ira! Ha mga kalye, gin-uuroistoryahan han mga tawo an mga pakiana parte ha Biblia. Madali la para ha amon nga umapi ha ira uroistorya. Damu gud an amon Bible study salit makuri an pagkaada igo nga panahon ha pag-study ha ira ngatanan. Maopay gud ito nga problema!

Paul: Ha sulod hin upat ka tuig, medyo murayaw an kahimtang han nasud, pero han 1989, tigda ito nga nagbag-o—nagtikang an girra sibil. Han Hulyo 2, 1990, nasakop han rebelde nga mga sundalo an mga lugar hirani ha Bethel. Ha sulod hin tulo ka bulan, waray kami komunikasyon ha mga aadto ha gawas han nasud, bisan ha amon mga pamilya ngan ha world headquarters. May kasamok, kakulang hin pagkaon, ngan panlugos. Nagpadayon ito ha sulod hin 14 ka tuig ngan nakaapekto ha bug-os nga nasud.

Anne: An mga membro han pipira nga tribo nakikig-away ngan nanmamatay ha mga membro han iba nga mga tribo. Naglilinakat-lakat ha mga kalye an armado gud nga mga sundalo nga kakaiba an sul-ot, ngan nanlu-looting hira ha tagsa nga balay. Para ha iba, an pagpatay hin mga tawo sugad la hin pag-ihaw hin mga manok. An patay nga mga lawas gintambak ha mga checkpoint, an iba hirani ha branch. May matinumanon nga mga Saksi nga ginpatay, upod na an duha han aton hinigugma nga mga misyonero.

Ginbutang ha peligro han mga Saksi an ira kinabuhi pinaagi ha pagtago han iba nga kaapi ha mga tribo nga ginbibiniling ngan ginpapamatay. Ito liwat an ginbuhat han mga misyonero ngan mga Bethelite. Ha Bethel, an iba nga namalagiw nga mga Saksi nangangaturog ha ubos ngan an iba naman kaupod namon ha mga kwarto ha igbaw. Pito an amon kaupod ha amon kwarto.

Paul: Kada adlaw, an mga sundalo nangangalimbasog nga makasulod basi kitaon kon may gintatago kami nga mga tawo. Upat nga bugto an nakatoka ha pagbantay: an duha nagkikita ha may bintana ngan an duha pa napakadto ha pinakagawas nga gate. Kon an mga kamot han duha nga aadto ha gate aadto  la ha ira atubangan, karuyag sidngon diri masulod an mga sundalo. Pero kon ibutang nira an ira mga kamot ha ira luyo, karuyag sidngon nagpipirit pagsulod an mga sundalo, salit gintatago dayon han mga nagkikita ha may bintana an amon mga sangkay.

Anne: Paglabay hin damu ka semana, may nasisina nga grupo hin mga sundalo nga nagpirit pagsulod. Ako ngan an usa nga sister sumulod ha banyo ngan gintrangkahan ito; may-ada didto kabinet nga may gutiay nga tagoan ha ilarom hito. Sumuksok didto an sister. Ginsundan ngay-an ako han mga sundalo nga may mga machine gun. Nasisina nga ginmakmakan nira an amon purtahan. Nakimalooy hi Paul, “Anay la kay nagamit pa han banyo an akon asawa.” Maaringasa an pagsara han tagoan ngan sigurado ako nga nagsususpetsa na an mga sundalo kay naiha ako pagbalik han mga gamit ha mga estante, salit nangurog an akon bug-os nga lawas. Ano an ira huhunahunaon kon abrihan ko an purtahan? Nag-ampo ako hin hilom ngan nakimalooy kan Jehova nga buligan ako. Katapos, gin-abrihan ko an purtahan ngan nakaya ko gihap nga makiistorya ha ira hin kalmado. Ginduso ako han usa ha ira ngan dumiretso hiya pag-abri han kabinet ngan ginpananggal an mga gamit ha mga estante. Diri hiya makatoo nga waray hiya nakit-an. Katapos, ginsulod niya ngan han iya grupo an iba nga mga kwarto pati na an attic. Pero waray la gihapon hira nakit-an.

Paul: Ha sulod hin mga bulan kulang gud an amon pagkaon. Pero an espirituwal nga pagkaon nakabulig gud ha amon nga makailob. An morning worship ha Bethel amo na la an amon pinakapamahaw, ngan mapasalamaton kami ngatanan kay nakahatag ito ha amon han kusog nga amon kinahanglan.

Maaram kami nga kon maubosan kami hin pagkaon ngan tubig ngan mapiritan pagbaya ha branch, posible gud nga patayon an mga natago didto. Usahay, sakto gud la an tayming ngan urusahon hinduro an paagi han pagtagana ni Jehova ha amon. Ginhatag ni Jehova an amon mga panginahanglan ngan ginbuligan kami nga makontrol an amon kahadlok.

Samtang nagtitikasirom an kahimtang han kalibotan, nagtitikalamrag naman an kamatuoran. Pauroutro nga namalagiw an aton kabugtoan basi panalipdan an ira kinabuhi, pero gintipigan la gihapon nira an ira pagtoo ngan dignidad. Nagsiring an iba nga “praktis na para ha daku nga kasakitan” an ira pag-ilob hito nga girra. An maisugon nga mga tigurang ngan batan-on nga mga brother nangalimbasog gud nga manguna. An kabugtoan nga namalagiw ha iba nga lugar nag-urupod ngan nagburubligay; nagsangyaw hira didto ngan nagkatirok ha temporaryo nga mga Kingdom Hall nga ira ginhimo ha kagurangan. An mga katirok nakadasig ngan nakahatag hin paglaom ha kabugtoan bisan pa hiton makuri nga panahon, ngan an pagsangyaw nakabulig ha ira nga makailob. Han nanhahatag kami hin relief, nadasig gud kami kay damu han kabugtoan an nangaro hin mga bag nga pansangyaw imbes nga mga bado. An nasusubo ngan natruma nga mga tawo namati ha maopay nga sumat. Nahipausa hira nga malipayon ngan positibo la gihapon an mga Saksi; ini nga kabugtoan nasanag sugad hin kalamrag ha butnga han kasisidman. (Mat. 5:​14-16) Tungod han ira kadasig, bisan an iba han madarahog nga mga sundalo nagin kabugtoan naton.

Paul: May mga panahon nga kinahanglan namon bumaya ha nasud, tulo ka beses nga diri la maiha ngan duha ka beses nga bug-os nga tuig. Maopay gud an pagkasaysay han usa nga misyonera nga sister han amon inaabat: “Ha Gilead, gintutdoan kita nira nga himoon an aton pinakamaopay ha aton asaynment, ngan ito an aton ginbuhat. Salit baga hin narumok an aton kasingkasing nga bayaan an kabugtoan ha sugad hini nga kahimtang!” Maopay na la kay samtang aadto kami ha kahigrani nga nasud, nabubuligan la gihapon namon an kabugtoan ha Liberia.

Anne: Han Mayo 1996, upat ha amon an nagbiyahe sakay han awto han branch nga puno hin importante nga mga rekord han branch. Karuyag namon magbiyahe hin 16 ka kilometro ngadto ha mas talwas nga lugar ha luyo nga bahin han bungto. Pero hito nga takna, tigda la nga gin-atake an amon lugar. An nasisina nga mga sundalo nagpabuto han ira mga pusil tipaigbaw, ginpaundang kami, ginbutong tipagawas an tulo ha amon, ngan gindrayban an awto nga sakay la gihapon hi Paul. Na-shock gud kami. Tigda la nga nakita namon hi Paul nga naglalakat pahirani ha amon nga nagdudurugo an agtang. Ha siyahan, kahuna namon nga ginpusil hiya, pero katapos, nasantop namon nga kon ito an nahitabo, diri na unta hiya makakalakat! Ginsuntok ngay-an hiya han usa nga sundalo han ginduduso hiya tipagawas han awto. Maopay na la kay gutiay la an iya samad.

Ha hirani, may trak han militar nga puno hin nahahadlok nga mga tawo. Kumab-it kami bisan kon haros waray kami nakakaptan. Ginpaspasan han drayber an pagpadalagan, ngan hapit kami mahulog. Nakimalooy kami ha iya nga umundang, pero waray hiya makabati kay nahahadlok gud hiya. Maopay na la kay waray kami mahulog, pero pag-abot namon, nangungurog kami ngan kapoy hinduro tungod han pagkinapyot.

Paul: Waray kami iba nga nadara kondi an amon la mahugaw ngan gisi-gisi nga mga sul-ot; nagkitaay kami ngan diri makatoo nga buhi pa gihapon kami. Kinaturog kami ha gawas hirani ha usa nga helikopter nga tadtad hin bala ngan baga hin magbuburublag na, ngan ito an amon ginsakyan tipakadto ha Sierra Leone kinabuwasan. Mapasalamaton kami nga buhi kami, pero nabaraka liwat kami hinduro ha aton kabugtoan ha Liberia.

Anne: Talwas kami nga nakaabot ha Bethel ha Freetown, Sierra Leone, ngan gin-ataman gud kami didto. Pero nagtikang pagbalik-balik ha akon hunahuna an magraot nga nahitabo ha Liberia. Kon adlaw, nahahadlok ako, diri nahimumuruko, ngan diri nakakapanhunahuna hin maopay; baga hin diri tinuod an nahitatabo ha akon palibot. Kon gab-i, nakakamata ako nga ginhahagkot ngan ginbabalhas, nangungurog, ngan naabat nga baga hin may maraot nga mahitatabo. Nakukurian ako pagginhawa. Ginhahangkopan ako ni Paul ngan nag-aampo hiya kaupod ko. Nagkakanta kami hin mga Kingdom song tubtob nga kumalma ako. Inabat ko nga malulurong na ako ngan diri ko na kaya mag-alagad sugad nga misyonera.

Diri ko gud mahingangalimtan an sunod nga nahitabo. Hito mismo nga semana nakakarawat kami hin duha nga magasin. An usa amo an Gumising! han Hunyo 8, 1996. May-ada ito artikulo nga “Pagharap sa mga Sumpong ng Pagkataranta.” Yana nasabtan ko na an nahitatabo ha akon. An ikaduha amo an Mayo 15, 1996 nga An Barantayan nga may artikulo nga “Diin Nira Kuhaa an Ira Kusog?” Ito nga An Barantayan may piktyur hin alibangbang nga nadaot an pako. Iginsaysay han artikulo nga sugad la nga an alibangbang padayon nga nakakakaon ngan nakakalupad bisan kon nadaot gud an mga pako hito, pinaagi han espiritu ni Jehova padayon liwat kita nga makakabulig ha iba bisan kon may mga problema kita ha emosyon. Sugad ini hin nagpapakusog nga pagkaon nga iginhatag ni Jehova ha tama gud nga panahon. (Mat. 24:45) Nakabulig ha akon an pag-research ngan pagbutang ha usa nga folder han mga artikulo nga naghihisgot hini nga topiko. Paglabay han panahon, nagtikaiban an akon mga sintomas han post-traumatic stress.

Paul: Ha kada namon pag-uuli ha Liberia, malipayon gud kami. Ha ikatarapos han 2004, haros 20 ka tuig na kami ha amon asaynment. Natapos na an girra. May mga plano han pagpanukod ha branch. Pero tigda la nga ginhangyo kami nga karawaton an usa nga bag-o nga asaynment.

Diri gud adto masayon para ha amon. Duok gud kami ha amon espirituwal nga pamilya—kaya ba  namon hira bayaan? Han ginbayaan namon an amon mismo hinigugma nga mga pamilya basi mag-eskwela ha Gilead, nakita namon kon paonan-o kami ginbendisyonan ni Jehova kay igintapod namon ha iya an amon kinabuhi, salit ginkarawat namon an bag-o nga asaynment. Ipapadara kami ha Ghana, usa nga kahirani nga nasud.

Anne: Nagtinangis gud kami pagbaya namon ha Liberia. Nahipausa kami han ginsidngan kami han maaramon ngan edaran nga brother nga hi Frank: “Kalimti na kami!” Katapos, iginsaysay niya: “Maaram kami nga diri gud kamo mahingangalimot ha amon, pero kinahanglan niyo himoon an iyo pinakamaopay ha iyo bag-o nga asaynment. Tikang ito kan Jehova, salit pagpokus ha kabugtoan didto.” Naghatag ini ha amon hin kusog basi magin andam nga magkaada bag-o nga kasangkayan ha lugar nga pipira la an nakilala ha amon ngan bag-o ha amon an ngatanan.

Paul: Pero waray la mag-iha, hinigugma na namon an amon bag-o nga espirituwal nga pamilya ha Ghana. Damu gud an mga Saksi didto! Damu an amon nahibaroan ha pagkamaunungon ngan marig-on nga pagtoo han amon bag-o nga kasangkayan. Pero katapos mag-alagad hin 13 ka tuig ha Ghana, may nakarawat na liwat kami nga surprisa. Ginhangyo kami nga mag-alagad ha East Africa branch ha Kenya. Bisan kon namingaw gud kami ha amon kasangkayan ha naglabay namon nga mga asaynment, inabat dayon kami hin gugma ha matinumanon nga kabugtoan ha Kenya. Ngan nag-aalagad la gihapon kami ha haluag nga teritoryo diin daku gud an panginahanglan.

Anne: Ha paglabay han katuigan, damu ka beses nga nahahadlok gud ako ngan nangungurog. An delikado o nakakaistres nga mga sitwasyon mahimo makaapekto ha aton lawas ngan emosyon. Diri kita milagroso nga ginpuproteksyonan tikang hini. Kon nakakabati ako hin mga buto han pusil, nahingangasuka ako ngan namamanhod an akon mga kamot. Pero nahibaro ako nga sumarig ha ngatanan nga bulig nga ginhahatag ni Jehova basi pakusgon kami, upod na an suporta han aton kabugtoan. Ngan nakita ko nga pinaagi ha pagpadayon han amon espirituwal nga rutina, nabubuligan kami ni Jehova nga magpabilin ha amon asaynment.

Paul: Usahay may nagpapakiana, “Hinigugma ba niyo an iyo asaynment?” Bangin mahusay an mga nasud, pero puydi liwat ito magin masamok ngan delikado. Salit ano an mas hinigugma namon kay han nasud? An presyoso nga kabugtoan, an aton pamilya. Bisan kon iba-iba an aton gintikangan, nagkakaurosa gud an aton hunahuna. Kahuna namon nga ginpadara kami basi dasigon hira, pero an tinuod, hira an nagparig-on ha amon.

Ha kada namon pagbabalhin, may nakikita kami nga milagro ha moderno nga panahon: an aton pagminagburugto. Basta bahin kita han kongregasyon, may-ada kita pamilya ngan naabat nga talwas. Sigurado kami nga kon padayon kami nga masarig kan Jehova, ihahatag niya ha amon an kusog nga amon ginkikinahanglan.​—Fil. 4:13.