1-2. Ha ano nga mga paagi bangin makaeksperyensya kita hin kawaray-hustisya?

 HI Jesus nagsumat hin ilustrasyon parte ha balo nga babaye nga naghinangyo ha usa nga hukom nga tagan hiya hin hustisya. Sigurado nga damu han mga disipulo ni Jesus an nakasabot han inabat han babaye hito nga istorya kay hito nga panahon an ordinaryo nga mga tawo kasagaran na nga biktima han kawaray-hustisya. (Luc. 18:​1-5) Ini nga istorya mapulsanon liwat ha aton yana kay kita ngatanan nakakaeksperyensya hin kawaray-hustisya ha panapanahon.

² Komon ha kalibotan yana an diskriminasyon, pagin diri patas, ngan panalumpigos, salit diri kita nahipapausa kon maraot an pagtratar ha aton han iba. (Ecles. 5:8) Pero bangin diri naton ginlalaoman nga hunahunaan kita hin maraot han usa nga bugto; kondi mahimo ito mahitabo. Syempre, diri pariho han mga nakontra ha kamatuoran, diri ito tinuyo han aton kabugtoan. Tungod la ito kay diri hira perpekto. Damu an aton mahibabaroan ha nagin reaksyon ni Jesus ha kawaray-hustisya nga iya naeksperyensyahan tikang ha magraot nga parakontra. Kon kaya naton magin pasensyoso ha mga parakontra nga maraot an pagtratar ha aton, labi na gud nga dapat kita magin pasensyoso ha aton mga igkasi-tumuroo! Ano an inaabat ni Jehova kon maraot an pagtratar ha aton han usa nga diri tumuroo o han usa nga bugto? Importante ba ha iya an nahitatabo ha aton?

3. Kay ano nga maaram kita nga importante kan Jehova an paagi han pagtratar ha aton han iba?

³ Importante gud kan Jehova an paagi han pagtratar ha aton han iba. “Hi Jehova nahigugma han hustisya.” (Sal. 37:28) Ginpasarig kita ni Jesus nga hi Jehova ‘maghahatag dayon hin hustisya’ ha tama nga panahon. (Luc. 18:​7, 8) Ngan diri mag-iiha, wawad-on na niya an tanan nga magraot nga butang nga aton  gin-aantos ngan an tanan nga klase han kawaray-hustisya.​—Sal. 72:​1, 2.

4. Ano nga bulig an ginhahatag ni Jehova ha aton yana?

⁴ Samtang ginhuhulat naton an panahon nga magigin kalyap na an katadongan, ginbubuligan kita ni Jehova nga maatubang an kawaray-hustisya. (2 Ped. 3:13) Gintututdoan kita niya kon paonan-o lilikyan nga makabuhat hin sayop kon maraot an pagtratar ha aton. Pinaagi han iya Anak, gintagan kita ni Jehova hin perpekto nga ehemplo kon ha ano nga paagi naton maaatubang an kawaray-hustisya. Ngan gintatagan kita niya hin praktikal nga sagdon nga mahimo naton sundon kon diri patas an pagtratar ha aton.

PAGHIROT HA IMO REAKSYON HA KAWARAY-HUSTISYA

5. Kay ano nga kinahanglan naton maghirot ha aton reaksyon ha kawaray-hustisya?

⁵ Bangin masakitan gud kita ngan masubo tungod han kawaray-hustisya. (Ecles. 7:7) Ito liwat an gin-abat han matinumanon nga mga surugoon sugad kanda Job ngan Habakuk. (Job 6:​2, 3; Hab. 1:​1-3) Natural la nga abaton naton ini, pero kinahanglan maghirot kita ha aton reaksyon basi malikyan naton nga makabuhat hin sayop.

6. Ano an igintututdo ha aton han nahitabo kan Absalom? (Kitaa liwat an piktyur.)

⁶ Bangin magin sayop an aton reaksyon ha usa nga kawaray-hustisya pinaagi ha pangalimbasog nga sulbaron ito ha aton kalugaringon nga paagi. Pero an pagbuhat hito mahimo la magresulta hin dugang nga mga problema. Pansina an nahitabo ha anak ni Hadi David nga hi Absalom. Nasina gud hiya han hi Tamar nga iya bugto nga babaye ginlugos ni Amnon nga ira bugto ha tatay. Sumala ha Mosaiko nga Balaud, angay la mamatay hi Amnon tungod han iya ginbuhat. (Lev. 20:17) Bisan kon may rason gud hi Absalom nga masina, waray hiya awtoridad nga patayon hi Amnon.​—2 Sam. 13:​20-23, 28, 29.

7. Paonan-o an kawaray-hustisya temporaryo nga nakaapekto ha usa nga salmista?

⁷ Kon an mga nagbubuhat hin kawaray-hustisya baga hin diri nasisirotan, bangin maghunahuna kita kon sulit ba an pagbuhat han tama. Pansina an salmista nga nakayakan nga an magraot baga hin may-ada maopay nga kinabuhi bisan kon maraot an ira pagtratar ha magtadong. “Ini an magraot, nga pirme hayahay an kinabuhi,” siring niya. (Sal. 73:12) Nasakit liwat hiya hinduro han kawaray-hustisya nga iya nakita salit nahunahuna niya kon mapulsanon pa ba an  pag-alagad kan Jehova. Nagsiring hiya: “Han nangalimbasog ako nga masabtan ito, nagin makuri ito para ha akon.” (Sal. 73:​14, 16) Ngani, nagsumat hiya: “Mahitungod ha akon, an akon mga tiil hapit na mahisimang; haros mahitalindas an akon mga pitad.” (Sal. 73:2) May puropariho hito nga nahitabo ha usa nga brother nga tatawagon naton nga Alberto.

8. Ano an nagin epekto ha usa nga brother han kawaray-hustisya?

⁸ Hi Alberto sayop nga gin-akusaran nga nangawat hin kwarta tikang ha pundo han kongregasyon. Sugad nga resulta, nawad-an hiya han iya mga pribilehiyo ngan waray na hiya respetoha han damu han iya kakongregasyon nga nakahibaro hito. “Nasina ako ngan nasubo,” siring niya. Gintugotan niya an iya kasakit ha emosyon nga makaapekto han iya espirituwalidad, ngan nagin diri aktibo pa ngani hiya ha sulod hin lima ka tuig. Iginpapakita hini nga eksperyensya kon ano an posible mahitabo kon diri naton kontrolon an aton kasina tungod han kawaray-hustisya.

SUBARA AN PAAGI HAN PAG-ATUBANG NI JESUS HA KAWARAY-HUSTISYA

9. Ano nga kawaray-hustisya an gin-ilob ni Jesus? (Kitaa liwat an piktyur.)

⁹ Hi Jesus nagpakita hin perpekto nga ehemplo kon paonan-o aatubangon an kawaray-hustisya. Pansina an iya naeksperyensyahan nga  kawaray-hustisya tikang ha iya pamilya ngan ha iba nga mga tawo. An iya diri tumuroo nga mga paryente nag-akusar nga nalulurong hiya, an mga lider han relihiyon nag-akusar nga nakikigkooperar hiya ha mga demonyo, ngan ginyaangyaangan hiya, ginkastigo, ngan ha urhi ginpatay han Romano nga mga sundalo. (Mar. 3:​21, 22; 14:55; 15:​16-20, 35-37) Bisan pa hito, gin-ilob ni Jesus ini ngatanan nga kawaray-hustisya ngan waray bumulos. Ano an aton mahibabaroan ha iya ehemplo?

10. Paonan-o gin-atubang ni Jesus an kawaray-hustisya? (1 Pedro 2:​21-23)

¹⁰ Basaha an 1 Pedro 2:​21-23. a Naghatag hi Jesus ha aton hin perpekto nga ehemplo basi sundon kon naatubang kita hin kawaray-hustisya. Maaram hiya kon san-o magpapabilin nga hilom ngan san-o mayakan. (Mat. 26:​62-64) Usahay kon an iba nagyayakan hin mga buwa mahitungod ha iya, diri hiya nabaton. (Mat. 11:19) Kon nagyayakan hiya, diri niya gin-iinsulto o gintatarhog an mga nagtitimaraot ha iya. Nagpakita hi Jesus hin pagpugong ha kalugaringon kay “igintapod niya an iya kalugaringon ha Dios nga naghuhukom ha matadong nga paagi.” Maaram hi Jesus nga an panhunahuna ni Jehova ha iya sitwasyon amo an pinakaimportante. Nasarig hiya nga susolusyonan ni Jehova an kawaray-hustisya ha tama nga panahon.

11. Ano an pipira nga paagi nga makukontrol naton an aton panyakan? (Kitaa liwat an mga piktyur.)

¹¹ Masusubad naton hi Jesus pinaagi ha pagkontrol han aton ginyayakan kon nakakaeksperyensya kita hin kawaray-hustisya. An iba nga kawaray-hustisya diri sugad kaseryoso ngan puydi naton palabyon la. O puydi kita  magpabilin nga hilom basi waray kita maiyakan nga makakadugang ha problema. (Ecles. 3:7; San. 1:​19, 20) Ha iba nga mga higayon, bangin kinahanglan naton magyakan kon may nakikita kita nga gintatratar hin maraot o kon kinahanglan naton depensahan an kamatuoran. (Buh. 6:​1, 2) Kon magyayakan kita, dapat himoon naton an aton pinakamaopay nga buhaton ito ha kalmado ngan may respeto nga paagi.​—1 Ped. 3:15. b

12. Paonan-o naton igintatapod an aton kalugaringon ngadto “ha Dios nga naghuhukom ha matadong nga paagi”?

¹² Masusubad liwat naton hi Jesus pinaagi ha pagtapod han aton kalugaringon ngadto “ha Dios nga naghuhukom ha matadong nga paagi.” Kon an iba may sayop nga panhunahuna o maraot an pagtratar ha aton, nasarig kita nga maaram hi Jehova han kamatuoran. Makakabulig ini ha aton nga mailob an maraot nga pagtratar kay maaram kita nga ha urhi, susolusyonan ito ni Jehova. Kon igintatapod naton ini nga mga butang kan Jehova, nalilikyan naton nga magpabilin ha aton kasingkasing an kasina o pagdumot. Ito nga mga emosyon mahimo magin hinungdan nga sobra kita nga magreak, mawara an aton kalipay, ngan madaot an aton relasyon kan Jehova.​—Sal. 37:8.

13. Ano an makakabulig ha aton nga padayon nga mailob an kawaray-hustisya?

¹³ Syempre, diri gud naton masusubad hin perpekto an ehemplo ni Jesus. Usahay bangin may mabuhat kita o mayakan nga ha urhi aton pagbabasolan. (San. 3:2) Ngan an iba nga kawaray-hustisya mahimo magresulta hin emosyonal ngan pisikal nga kasakit nga makuri ilubon. Kon nahitabo ito ha imo, makakasiguro ka nga maaram hi Jehova han imo naieksperyensyahan. Ngan hi Jesus, nga nag-antos gihap hin kawaray-hustisya, napaid ha imo inaabat. (Heb. 4:​15, 16) Labot la han paghatag ni Jehova han perpekto nga ehemplo ni Jesus, nahatag liwat Hiya hin praktikal nga sagdon nga nabulig ha aton ha pag-atubang ha kawaray-hustisya. Usisahon naton an duha nga bersikulo tikang ha libro han Roma nga makakabulig ha aton.

“TAGI HIN LUGAR AN KAPUNGOT”

14. Ano an karuyag sidngon han ‘paghatag hin lugar ha kapungot’? (Roma 12:19)

¹⁴ Basaha an Roma 12:19. Han hi apostol Pablo nag-aghat ha mga Kristiano nga ‘tagan hin lugar an kapungot,’ kan kanay kapungot an iya gintutudlok? Sumala ha konteksto, kapungot ito ni Jehova. Gintatagan naton hin lugar an kapungot ni Jehova kon hiya an aton ginpapadesisyon kon san-o ngan ha ano nga paagi ipapadapat an hustisya. Katapos trataron hin maraot an brother nga hi John, hiya nagsiring: “Kinahanglan ko pugngan an akon kalugaringon nga diri tadungon an sayop ha akon kalugaringon nga paagi. An Roma 12:19 nakabulig ha akon nga maghulat kan Jehova.”

15. Kay ano nga maopay gud an paghulat kan Jehova nga tadungon an usa nga butang?

¹⁵ Nagpapahimulos kita kon naghuhulat kita kan Jehova nga tadungon an usa nga butang. Kon hihimoon naton ini, malilikyan naton an sobra nga istres ngan kapakyasan nga kasagaran naton inaabat kon ginpapangalimbasogan naton nga kita la an magsulbad han problema. Karuyag ni Jehova bumulig ha aton. Sugad hin nasiring hiya, ‘Itapod ha akon an kawaray-hustisya; ako an bahala hito.’ Kon natapod kita ha iginsaad ni Jehova nga “Ako an mabulos,” palalabyon naton an kawaray-hustisya, kay nasarig kita nga iya ito susulbaron ha pinakamaopay nga paagi. Ito an nakabulig kan John, nga gin-unabi kanina. Hiya nagsiring, “Kon makakahulat la ako kan Jehova, an iya paagi han pagsulbad mas maopay gud kay han akon.”

 “PADAYON NGA DAOGA AN MARAOT PINAAGI HAN MAOPAY”

16-17. Paonan-o an pag-ampo makakabulig ha aton nga ‘padayon nga daugon an maraot pinaagi han maopay’? (Roma 12:21)

¹⁶ Basaha an Roma 12:21. Gin-aghat liwat ni Pablo an mga Kristiano nga ‘padayon nga daugon an maraot pinaagi han maopay.’ Hi Jesus nagsiring ha iya Sermon ha Bukid: “Padayon nga higugmaa an iyo mga kaaway ngan ig-ampo an mga nagtitimaraot ha iyo.” (Mat. 5:44) Ito mismo an iya ginhimo. Posible gud nga nahunahuna naton an pag-antos nga gin-ilob ni Jesus han ginraysang hiya ha kahoy han Romano nga mga sundalo. Diri naton bug-os nga masasabtan an kasakit nga iya gin-abat sugad man an kaarawdan ngan an kawaray-hustisya nga iya gin-ilob.

¹⁷ Waray madaog hi Jesus han kawaray-hustisya nga iya gin-antos. Imbes nga panhimarauton ito nga mga sundalo, nag-ampo lugod hiya: “Amay, pasayloa hira, kay diri hira maaram han ira ginbubuhat.” (Luc. 23:34) Kon igin-aampo naton an mga tawo nga maraot an pagtratar ha aton, makakabulig ito ha aton nga magin kalmado, makakaiban han aton kasina, ngan makakabag-o pa ngani han aton panhunahuna ha ira.

18. Paonan-o an pag-ampo nakabulig kanda Alberto ngan John nga mailob an kawaray-hustisya?

¹⁸ An pag-ampo nakabulig ha duha nga brother nga gin-unabi na hini nga artikulo basi mailob an kawaray-hustisya nga ira naeksperyensyahan. Hi Alberto nagsiring: “Igin-ampo ko an kabugtoan nga maraot an pagtratar ha akon. Pipira ka beses nga naghangyo ako kan Jehova nga buligan ako nga kalimtan na ini nga kawaray-hustisya.” Maopay na la kay hi Alberto binalik ha pagin aktibo ngan matinumanon nga nag-aalagad kan Jehova. Hi John nagsiring: “Damu ka beses nga igin-ampo ko an brother nga nakasakit ha akon. An sugad nga mga pag-ampo nakabulig ha akon nga magkaada mas makatadunganon nga panhunahuna ha iya ngan diri hiya hukman. Ngan ito nga mga pag-ampo nakahatag liwat ha akon hin murayaw nga hunahuna.”

19. Ano an dapat naton himoon tubtob ha kataposan hini nga sistema? (1 Pedro 3:​8, 9)

¹⁹ Diri kita maaram kon ano pa nga kawaray-hustisya an mahimo naton atubangon antes matapos ini nga sistema. Anoman an aton maeksperyensyahan, ayaw gud kita pag-undang ha pag-ampo kan Jehova basi mangaro ha iya hin bulig. Hinaot subaron liwat naton an reaksyon ni Jesus ha maraot nga pagtratar ngan padayon nga iaplikar an mga prinsipyo ha Biblia. Kon hihimoon naton ini, makakasiguro kita nga bibendisyonan kita ni Jehova.​—Basaha an 1 Pedro 3:​8, 9.