1. Kay ano nga may mahibabaroan kita nga leksyon tikang ha mga lagas?

 KITA ngatanan nagkikinahanglan hin giya ha paghimo hin importante nga mga desisyon ha kinabuhi. Damu han sugad nga giya an makukuha naton tikang ha mga tigurang ngan ha iba nga hamtong nga mga Kristiano. Kon mas magurang gud hira kay ha aton, diri ta dapat hunahunaon dayon nga an ira sagdon diri na praktikal ha aton yana. Karuyag ni Jehova nga mahibaro kita hin leksyon tikang ha mga lagas. Tungod kay mas maiha na hira nga buhi kay ha aton, mas damu na an ira eksperyensya ngan mas hilarom na an ira pagsabot ngan kinaadman.​—Job 12:12.

2. Ano an hihisgotan hini nga artikulo?

² Ha panahon han Biblia, gin-gamit ni Jehova an matinumanon nga mga lagas basi dasigon ngan giyahan an iya katawohan. Pananglitan, pansina hira Moises, David, ngan apostol Juan. Nabuhi hira ha iba-iba nga panahon, ngan iba-iba gud an ira kahimtang. Han hirani na hira mamatay, naghatag hira hin maaramon nga sagdon ha mga burobata. Ginpabug-atan han tagsa hinin matinumanon nga mga lagas an pagkaimportante han pagin masinugtanon ha Dios. Gintipigan ni Jehova an ira maaramon nga mga pulong para ha aton yana. Batan-on man kita o lagas, makakapahimulos kita ha pagrepaso ha ira sagdon. (Roma 15:4; 2 Tim. 3:16) Hini nga artikulo, hihisgotan naton an ultimo nga mga pulong hinin tulo nga lagas ngan an mga leksyon nga aton mahibabaroan ha ira ginsiring.

“MABUBUHI KA HIN MAIHA NGA PANAHON”

3. Ha ano nga mga paagi nag-alagad hi Moises?

³ Hi Moises bug-os nga debotado kan Jehova. Usa hiya nga propeta, hukom, kumander, ngan historyador. Damu gud an naeksperyensyahan  ni Moises ha iya kinabuhi! Nanguna hiya ha nasud han Israel ha paggawas tikang ha pagkauripon ha Ehipto ngan nakita niya mismo an damu han mga milagro ni Jehova. Gin-gamit hiya ni Jehova ha pagsurat han siyahan nga lima nga libro han Biblia, han Salmo 90, ngan posible han Salmo 91. Posible gud nga hiya liwat an nagsurat han libro han Job.

4. Hin-o an gindasig ni Moises, ngan kay ano?

⁴ Han hirani na hi Moises mamatay, han 120 anyos hiya, gintirok niya an ngatanan nga Israelita basi ipahinumdom ha ira an mga butang nga ira nakita ngan naeksperyensyahan. An iba han iya mga mamarati batan-on pa han nakita nira an damu nga tigaman ngan milagro nga ginhimo ni Jehova pati na an Iya mga paghukom kontra ha Ehipto. (Ex. 7:​3, 4) Naglakat hira ha butnga han gintunga nga katubigan han Dagat nga Pula ngan nakita nira an pagbungkag ha kasundalohan han Paraon. (Ex. 14:​29-31) Ha kamingawan, naeksperyensyahan nira an proteksyon ngan pag-ataman ni Jehova. (Deut. 8:​3, 4) Yana nga an nasud tisulod na ha Tuna nga Iginsaad, ginsalingabot ni Moises inin ultimo nga oportunidad basi dasigon an katawohan. a

5. Ano an iginpasarig ha mga Israelita han ultimo nga mga pulong ni Moises nga mababasa ha Deuteronomio 30:​19, 20?

⁵ Ano an ginsiring ni Moises? (Basaha an Deuteronomio 30:​19, 20.) An nasud han Israel may ginlalaoman nga maopay gud nga kabubuwason. Pinaagi han bendisyon ni Jehova, an mga Israelita mahimo mabuhi hin maiha nga panahon ha tuna nga iya iginsaad ha ira. Ngan ito nga tuna maopay gud ngan mabungahon! Iginhulagway ito ni Moises ha ira: “Dagku ngan mag-opay nga mga syudad nga diri ikaw an nagtukod, mga balay nga puno han ngatanan nga klase hin mag-opay nga butang nga waray mo pagkapuyi, mga tirokan hin tubig nga diri ikaw an nag-ukad, ngan mga urubasan ngan mga kahoy nga olibo nga diri ikaw an nagtanom.”​—Deut. 6:​10, 11.

6. Kay ano nga gintugotan han Dios an iba nga mga nasud nga sakupon an Israel?

⁶ May iginpahamangno liwat hi Moises ha mga Israelita. Basi padayon hira nga mag-ukoy ha ira mabungahon nga tuna, kinahanglan sugton nira an mga sugo ni Jehova. Gin-aghat hira ni Moises nga ‘pilion an kinabuhi’ pinaagi han pagpamati kan Jehova ngan “pagpabilin nga duok gud ha iya.” Pero iginsalikway han mga Israelita hi Jehova. Salit inabot an panahon nga gintugotan han Dios an mga taga-Asirya ngan ha urhi an mga taga-Babilonya nga sakupon hira ngan igdistyero.​—2 Hadi 17:​6-8, 13, 14; 2 Cron. 36:​15-17, 20.

7. Ano nga leksyon an aton mahibabaroan ha mga pulong ni Moises? (Kitaa liwat an piktyur.)

⁷ Ano an leksyon hini para ha aton? An pagin masinugtanon nagriresulta hin kinabuhi. Pariho han mga Israelita nga hirani na gud sumulod ha Tuna nga Iginsaad, kita liwat hirani na gud sumulod ha iginsaad han Dios nga bag-o nga kalibotan, diin makikita naton nga an tuna magigin paraiso. (Isa. 35:1; Luc. 23:43) Mawawara na an Yawa ngan an iya mga demonyo. (Pah. 20:​2, 3) Mawawara na an buwa nga mga relihiyon nga nagpapahirayo han mga tawo kan Jehova. (Pah. 17:16) Mawawara na an mga gobyerno han tawo nga nagtatalumpigos han ira mga sakop. (Pah. 19:​19, 20) Waray rebelde nga papaukyon ha Paraiso. (Sal. 37:​10, 11) An ngatanan nga tawo masugot ha matadong nga mga balaud ni Jehova, nga nabulig basi magkaada pagkaurosa ngan kamurayawan. Salit hihigugmaon ngan tataporan nira an usa kag usa. (Isa. 11:9) Makalilipay gud ito nga paglaom! Dugang pa, kon susugton ta hi  Jehova, makakapadayon kita ha pag-ukoy ha paraiso nga tuna diri la ha sulod hin ginatos ka tuig kondi ha kadayonan.​—Sal. 37:29; Juan 3:16.

8. Paonan-o an saad nga kinabuhi nga waray kataposan nakabulig ha usa nga maiha na nga misyonero? (Judas 20, 21)

⁸ Kon padayon nga papamalandungon naton an saad han Dios nga kinabuhi nga waray kataposan, maruruyag kita nga magpabilin nga duok gud ha iya anoman nga mga problema an mahimo naton atubangon. (Basaha an Judas 20, 21.) Ito nga saad makakahatag liwat ha aton hin kusog basi atohan an aton mga kaluyahan. Usa nga maiha na nga misyonero ha Africa nga nangalimbasog pag-ato ha iya kaluyahan an nagsiring: “Han nasantop ko nga naninelikado nga mawara an akon paglaom nga mabuhi ha waray kataposan, nagin mas determinado gud ako nga atohan ito nga problema ngan sinsero nga mangamuyo kan Jehova. Ha bulig niya, nalamposan ko ito.”

“MAGIGIN MALAMPUSON KA”

9. Ano nga mga problema an naeksperyensyahan ni David?

⁹ Hi David maopay gud nga hadi. Musikero liwat hiya, parasiday, girriro, ngan propeta. Damu nga problema an iya naeksperyensyahan. Ha sulod hin pipira ka tuig, nagkinabuhi hiya sugad nga puga, nga napalagiw tikang ha nangangabugho nga hi Hadi Saul. Han hadi na hi David, kinahanglan na liwat niya pumalagiw kay karuyag han iya anak nga hi Absalom nga patayon hiya ngan agawon an iya pagkahadi. Bisan pa han mga kakurian ngan mga sayop ni David, nagpabilin hiya nga maunungon ha Dios tubtob ha iya kamatay. Iginhulagway hiya ni Jehova sugad nga “usa nga tawo nga nakakapalipay ha [Iya] kasingkasing.” Angay gud pamatian an sagdon ni David!—Buh. 13:22; 1 Hadi 15:5.

10. Kay ano nga ginsagdonan ni David an iya anak nga hi Solomon, an sunod nga hadi han Israel?

¹⁰ Pananglitan, pansina an iginsagdon ni David ha iya anak nga hi Solomon, an sunod nga hadi han Israel. Ginpili ni Jehova ini nga batan-on basi padayon nga suportaran an putli nga pagsingba ngan magtukod hin templo nga magpapasidungog ha Dios. (1 Cron. 22:5) Maatubang hi Solomon hin mga kakurian. Ano daw la an isisiring ni David ha iya? Kitaon ta.

11. Sumala ha 1 Hadi 2:​2, 3, ano an iginpasarig ni David kan Solomon, ngan paonan-o natuman ini nga mga pulong? (Kitaa liwat an piktyur.)

¹¹ Ano an ginsiring ni David? (Basaha an 1 Hadi 2:​2, 3.) Ginsidngan ni David an iya anak nga kon susugton niya hi Jehova, magigin malampuson an iya kinabuhi. Ngan ha sulod hin damu ka tuig, nagin malampuson gud hi Solomon. (1 Cron. 29:​23-25) Gintukod niya an makaruruyag nga templo, nagsurat hin pipira nga libro han Biblia, ngan an iba han iya mga pulong mababasa ha iba nga mga bahin han Biblia. Nagin kilala hiya tungod han iya kinaadman ngan karikohan. (1 Hadi 4:34) Pero sugad han iginsaysay ni David, magigin malampuson la hi Solomon kon padayon nga susugton niya hi Jehova  nga Dios. Makasurubo nga han lagas na hi Solomon, nagsingba hiya ha iba nga mga dios. Waray na hiya uyuni ni Jehova, ngan nawara kan Solomon an kinaadman basi magmando nga may katadongan ngan hustisya.​—1 Hadi 11:​9, 10; 12:4.

12. Ano nga leksyon an aton mahibabaroan ha mga pulong ni David?

¹² Ano an leksyon hini para ha aton? An pagin masinugtanon nagriresulta hin kalamposan. (Sal. 1:​1-3) Syempre, waray hi Jehova magsaad nga hihimoon kita niya nga riko ngan kilala pariho kan Solomon. Pero kon susugton ta an aton Dios, tatagan kita niya hin kinaadman nga mabulig ha aton nga makahimo hin mag-opay nga desisyon. (Prob. 2:​6, 7; San. 1:5) An iya mga prinsipyo makakaggiya ha aton kon nagdidesisyon kita may kalabotan ha trabaho, edukasyon, kaliawan, ngan kwarta. An pag-aplikar han kinaadman nga tikang ha Dios magpuprotektar ha aton tikang ha nagpapadayon nga kadaot. (Prob. 2:​10, 11) Magkakaada kita mag-opay nga sangkay. Ngan magkakaada kita han giya nga aton ginkikinahanglan para magin malipayon an aton pamilya.

13. Paonan-o hi Carmen nagin malampuson ha iya kinabuhi?

¹³ Hi Carmen, nga naukoy ha Mozambique, naghunahuna nga an hitaas nga edukasyon an maghahatag ha iya hin kalamposan. Nagpaenrol hiya ha usa nga unibersidad ngan nag-eskwela hin architecture. “Naruyagan ko gud an akon nahibabaroan,” nagsurat hiya. “Pero daku hinduro nga panahon ngan kusog an akon nagamit para hito. Nakadto ako ha eskwelahan tikang ha alas–7:30 han aga tubtob ha alas–6:00 han gab-i. Nakurian ako pagtambong ha mga katirok, ngan nagluya an akon espirituwalidad. Ngan nasantop ko nga nangangalimbasog ako pagserbi ha duha nga agaron.” (Mat. 6:24) Nag-ampo hiya parte ha iya sitwasyon ngan nag-research ha aton mga publikasyon. Nagsiring liwat hiya: “Katapos ko makakarawat hin maopay nga sagdon tikang ha hamtong nga mga brother ngan tikang ha akon nanay, nagdesisyon ako nga umundang pag-eskwela basi mag-alagad kan Jehova hin bug-os-panahon. Nakabulig ini ha akon nga himoon an pinakamaopay nga mga desisyon ha akon kinabuhi, ngan waray ako ginbabasolan.”

14. Ano an nangunguna nga mensahe nira Moises ngan David?

¹⁴ Hinigugma nira Moises ngan David hi Jehova ngan gin-apresyar gud nira an pagkaimportante han pagsugot ha iya. Ha ira ultimo nga  mga pulong, gindasig nira an ira mga mamarati nga subaron an ira ehemplo pinaagi ha pagpabilin nga matinumanon kan Jehova nga ira Dios. Nagpahamangno liwat hira nga an mga mabaya kan Jehova mawawad-an han iya pag-uyon pati na han mga bendisyon nga iya iginsaad ha ira. An ira sagdon mapulsanon ha aton yana. Paglabay han mga siglo, iginpakita han usa pa nga surugoon ni Jehova an pagkaimportante han pagin matinumanon ha Dios.

‘WARAY NA MAS DAKU NGA KALIPAY’

15. Ano an naeksperyensyahan ni apostol Juan ha iya kinabuhi?

¹⁵ Hi Juan usa nga hinigugma nga apostol ni Jesu-Kristo. (Mat. 10:2; Juan 19:26) Inupod hi Juan kan Jesus ha bug-os niya nga ministeryo, nakakita han iya mga milagro, ngan nagpabilin nga maunungon ha iya ha makuri nga mga panahon. Nakita ni Juan han ginpatay hi Jesus ngan nakita niya an nabanhaw nga hi Jesus. Nakita liwat ni Juan an pag-uswag han Kristiano nga kongregasyon ha siyahan nga siglo tikang ha gutiay nga grupo han matinumanon nga mga Kristiano tubtob nga an maopay nga sumat ‘naisangyaw na ha ngatanan nga linarang ha ilarom han langit.’—Col. 1:23.

16. Hin-o an nakakapahimulos ha mga surat ni Juan?

¹⁶ Han hirani na matapos an hilawig nga kinabuhi ni Juan, nakapribilehiyo hiya nga maghimo hin mga sinurat nga nagin bahin han giniyahan nga Pulong han Dios. Iginrekord niya an urusahon gud nga “pahayag ni Jesu-Kristo.” (Pah. 1:1) Iginsurat ni Juan an usa han mga Ebanghelyo. Naghimo liwat hiya hin tulo nga giniyahan nga surat. An iya ikatulo nga surat para ha matinumanon nga Kristiano nga hi Gayo, nga iya ginhigugma sugad nga anak ha espirituwal. (3 Juan 1) Hito nga panahon, posible gud nga damu na an mga anak ni Juan ha espirituwal. An iginsurat hinin matinumanon nga lagas nakakadasig ha ngatanan nga sumurunod ni Jesus tubtob ha aton panahon.

17. Sumala ha 3 Juan 4, ano an nagriresulta hin daku nga kalipay?

¹⁷ Ano an iginsurat ni Juan? (Basaha an 3 Juan 4.) Nagsurat hi Juan mahitungod han kalipay nga resulta han pagin masinugtanon ha Dios. Ha panahon nga ginhimo ni Juan an iya ikatulo nga surat, may mga indibiduwal na nga nagpapasarang hin buwa nga mga katutdoan ngan nagigin hinungdan hin pagkabahin-bahin. Pero an iba padayon nga ‘naglakat ha kamatuoran.’ Sinugot hira kan Jehova ngan ‘naglakat uyon ha iya mga sugo.’ (2 Juan 4, 6) Inin matinumanon nga mga Kristiano nakapalipay diri la kan Juan kondi pati liwat kan Jehova mismo.​—Prob. 27:11.

18. Ano nga leksyon an aton mahibabaroan ha mga pulong ni Juan?

 ¹⁸ Ano an leksyon hini para ha aton? An pagin matinumanon nagriresulta hin kalipay. (1 Juan 5:3) Pananglitan, nalilipay kita kay maaram kita nga napapalipay naton hi Jehova. Nalilipay hiya nga makita nga gin-aatohan naton an mga pagsulay hini nga kalibotan ngan ginkakarawat an kamatuoran. (Prob. 23:15) An iba nga aadto ha langit nalilipay liwat. (Luc. 15:10) Kita liwat nalilipay nga makita nga an aton kabugtoan nagpapabilin nga matinumanon, labi na kon naatubang hin mga pagsari ngan pagsulay. (2 Tes. 1:4) Ngan kon matapos na ini nga sistema, magigin malipayon kita kay maaram kita nga nagpabilin kita nga maunungon kan Jehova bisan ha kalibotan nga ginmamandoan ni Satanas.

19. Ano an ginsiring han sister nga hi Rachel mahitungod han pagtutdo han kamatuoran ha iba? (Kitaa liwat an piktyur.)

¹⁹ Labi na nga malipayon kita kon igintututdo naton an kamatuoran ha iba. Para kan Rachel, nga naukoy ha Dominican Republic, daku hinduro nga pribilehiyo an pagtutdo ha iba mahitungod han maopay gud nga Dios nga aton gin-aalagaran. Ini an iya siring parte ha iya mga anak ha espirituwal: “Diri ko maisaysay an kalipay nga akon inaabat kon nakikita ko nga adton akon gintututdoan nahibabaro paghigugma kan Jehova, nasarig ha iya hin bug-os, ngan ginbabag-o an ira kinabuhi basi mapalipay hiya. Ito nga kalipay mas labaw gud kay han anoman nga pangalimbasog ngan sakripisyo nga akon nahimo ha pagtutdo ha ira.”

MAGPAHIMULOS HA ULTIMO NGA MGA PULONG HAN MATINUMANON NGA MGA LALAKI

20. Ano an aton kaparihoan kanda Moises, David, ngan Juan?

²⁰ Hira Moises, David, ngan Juan nabuhi ha iba nga panahon, ngan an ira kahimtang iba kay han aton. Pero damu an aton kaparihoan ha ira. Nag-alagad hira ha tinuod nga Dios, ngan ito liwat an aton ginbubuhat. Pariho ha ira, nag-aampo kita, nasarig, ngan nagpapagiya kan Jehova. Ngan pariho hito nga mga lalaki ha kadaan nga panahon, natoo kita nga hura nga ginbibendisyonan ni Jehova an mga nasugot ha iya.

21. Ano nga mga bendisyon an makakarawat han mga nasunod ha sagdon han matinumanon nga mga lagas sugad kanda Moises, David, ngan Juan?

²¹ Salit sundon naton an ultimo nga mga pulong hito nga lagas nga mga lalaki pinaagi ha pagsugot ha mga sugo ni Jehova. Kon bubuhaton ta ito, magigin tinuod kita nga malampuson ha ngatanan nga aton ginbubuhat. ‘Mabubuhi kita hin maiha nga panahon,’ oo, ha waray kataposan! (Deut. 30:20) Ngan magigin malipayon kita kay napapalipay naton an aton mahigugmaon nga langitnon nga Amay, nga nagtutuman han ngatanan niya nga saad ha mga paagi nga labaw pa gud kay han anoman nga aton ginlalaoman o naiimadyin pa ngani.​—Efe. 3:20.