1. Ano an panhunahuna ni apostol Pablo ha mga ministeryal nga surugoon?

 IMPORTANTE an buruhaton han mga ministeryal nga surugoon ha kongregasyon. Ginpabilhan ni apostol Pablo inin maunungon nga kalalakin-an. Pananglitan, han nagsurat hiya ha mga Kristiano ha Filipos, espisipiko nga gin-unabi niya an mga ministeryal nga surugoon pati an mga tigurang.​—Fil. 1:1.

2. Ano an inaabat ni Luis ha iya pagin ministeryal nga surugoon?

² Batan-on man o edaran, damu nga bawtismado nga brother an nalilipay gud ha pagin ministeryal nga surugoon. Pananglitan, 18 anyos hi Devan han nagin ministeryal nga surugoon hiya. An brother naman nga hi Luis nagin ministeryal nga surugoon han mga 50 anyos hiya. Ano an iya inaabat ha pagin ministeryal nga surugoon? Hiya nagsiring: “Pribilehiyo gud nga serbihan an kongregasyon sugad nga ministeryal nga surugoon, labi na kon nahuhunahuna ko an ira daku nga gugma nga iginpapakita ha akon!”

3. Ano nga mga pakiana an aton hihisgotan?

³ Kon bawtismado ka nga brother ngan diri ka pa ministeryal nga surugoon, puydi mo ba ito himoon nga tumong? Ano an makakapagios ha imo nga buhaton ito? Ngan ano nga Kasuratanhon nga mga kwalipikasyon an dapat mo kab-uton? Hini nga artikulo, hihisgotan ta an mga baton hito nga mga pakiana. Pero hisgotan ta anay an papel han ministeryal nga surugoon.

ANO AN PAPEL HAN MINISTERYAL NGA SURUGOON?

4. Ano an papel han ministeryal nga surugoon? (Kitaa liwat an piktyur.)

⁴ An ministeryal nga surugoon usa nga bawtismado nga brother nga ginpili pinaagi han baraan nga espiritu basi buligan an  mga tigurang nga manginano han damu nga importante nga buruhaton ha kongregasyon. Ginsisiguro han pipira nga ministeryal nga surugoon nga an mga magwarali may igo nga teritoryo ngan literatura para ha ministeryo. An iba naman nabulig ha paglimpyo ngan pagmintinar han Kingdom Hall. Igintutoka liwat hira sugad nga attendant ngan nanginginano han audio-video equipment ha mga katirok han kongregasyon. Ini ngatanan importante gud nga mga buruhaton. Pero an pinakaimportante, an mga ministeryal nga surugoon maopay gud an espirituwalidad; hinigugma nira hi Jehova ngan nagkikinabuhi uyon ha iya matadong nga mga suruklan. Ngan hinigugma gud nira an ira Kristiano nga kabugtoan. (Mat. 22:​37-39) Paonan-o kakab-uton han usa nga bawtismado nga brother an pagin ministeryal nga surugoon?

5. Ano an puydi buhaton han usa nga brother kon karuyag niya magin ministeryal nga surugoon?

⁵ Gin-uunabi han Biblia an mga kwalipikasyon ha pagin ministeryal nga surugoon. (1 Tim. 3:​8-10, 12, 13) Kon karuyag mo makab-ot ito nga pribilehiyo, admi inin Kasuratanhon nga mga kwalipikasyon ngan paningkamot nga maabot ini. Pero dapat hunahunaon mo anay hin maopay an imo motibo ha pagkab-ot hito.

KAY ANO NGA KARUYAG MO MAGIN MINISTERYAL NGA SURUGOON?

6. Ano an dapat magpagios ha imo ha pagserbi ha imo kabugtoan? (Mateo 20:28; kitaa liwat an piktyur.)

⁶ An aton pinakamaopay nga ehemplo, hi Jesu-Kristo, ginpagios han gugma—gugma ha iya Amay ngan gugma ha mga tawo. Ito nga gugma an nagpagios ha iya nga magin maduruto ngan himoon an mga buruhaton nga minos para ha iba. (Basaha an Mateo 20:28; Juan 13:​5, 14, 15) Kon gugma an nagpapagios ha imo, bibendisyonan ka ni Jehova ngan bubuligan nga makab-ot an imo tumong nga magin ministeryal nga surugoon.​—1 Cor. 16:14; 1 Ped. 5:5.

7. Kay ano nga dapat likyan han usa nga brother an makikalugaringon nga motibo?

⁷ An mga tawo ha kalibotan kaurogan na nga nabilib hadton naniningkamot nga magin importante pagkit-on. Pero diri sugad hito ha organisasyon ni Jehova. An brother nga ginpapagios han gugma, pariho kan Jesus, diri naghihingyap hin gahum, awtoridad ha iba,  o pagin prominente. Kon tagan hin pribilehiyo ha kongregasyon an usa nga ambisyoso nga tawo, posible nga diri gud hiya magbubuhat han pipira nga ubos nga buruhaton nga ginkikinahanglan para maataman an presyoso nga mga karnero ni Jehova. Bangin maghunahuna hiya nga diri naangay ha iya ito nga mga buruhaton. (Juan 10:12) Diri bibendisyonan ni Jehova an mga pangalimbasog han bisan hin-o nga mapahitas-on o may makikalugaringon nga motibo.​—1 Cor. 10:​24, 33; 13:​4, 5.

8. Ano an iginsagdon ni Jesus ha iya mga apostol?

⁸ May panahon nga bisan an pinakaduok nga kasangkayan ni Jesus naghingyap hin mga pribilehiyo pero tungod han sayop nga motibo. Pansina an ginbuhat han duha nga apostol nga hira Santiago ngan Juan. Ginhangyo nira hi Jesus nga tagan hira hin espesyal nga posisyon ha iya Ginhadian. Waray hira kumendasyuni ni Jesus hito nga ira ambisyon. Lugod, ginsidngan niya an iya 12 nga apostol: “An bisan hin-o nga karuyag magin labaw dida ha iyo kinahanglan magserbi ha iyo, ngan an bisan hin-o nga karuyag magin una dida ha iyo kinahanglan magin uripon han ngatanan.” (Mar. 10:​35-37, 43, 44) An mga brother nga nagkakab-ot hin pribilehiyo nga may husto nga motibo—an pagserbi ha iba—magigin bendisyon ha kongregasyon.​—1 Tes. 2:8.

ANO AN MAGPAPARIG-ON HAN IMO HINGYAP NGA MAGSERBI?

9. Paonan-o mo mapaparig-on an imo hingyap nga magserbi?

⁹ Sigurado nga hinigugma mo hi Jehova ngan karuyag mo magserbi ha iba. Pero bangin kulang an imo hingyap nga himoon an mga buruhaton han usa nga ministeryal nga surugoon. Paonan-o mo mapaparig-on an imo hingyap nga magserbi? Hunahunaa an kalipay nga imo aabaton ha pagserbi ha imo kabugtoan. Hi Jesus nagsiring: “Mas daku an kalipay ha paghatag kay ha pagkarawat.” (Buh. 20:35) Nagkinabuhi hiya uyon hito nga prinsipyo. Nalipay gud hiya ha pagserbi ha iba, ngan ito liwat an imo aabaton.

10. Paonan-o iginpakita ni Jesus nga malipayon hiya ha pagserbi ha iba? (Marcos 6:​31-34)

¹⁰ Pansina an usa nga ehemplo kon paonan-o iginpakita ni Jesus nga malipayon hiya ha pagserbi ha iba. (Basaha an Marcos 6:​31-34.) Makausa, ginkapoy hi Jesus ngan an iya mga apostol. Tipakadto hira ha usa nga nahibubulag nga lugar basi pumahuway. Pero an mga tawo nahiuna pa ha ira pag-abot didto ngan naglalaom nga tututdoan hira ni Jesus. Puydi unta hiya bumaribad, kay hiya ngan an iya mga apostol ‘waray na bakante nga panahon bisan ha pagkaon.’ O puydi unta niya palakton na an mga tawo katapos niya magtutdo hin usa o duha la nga kamatuoran. Pero tungod kay ginpagios hiya han gugma, “nagtikang hiya pagtutdo ha ira hin damu nga butang.” Ngan padayon hiya nga nagtutdo ha ira tubtob han “tikagab-i na.” (Mar. 6:35) Ginbuhat niya ito, diri tungod kay obligado hiya, pero tungod kay “nalooy hiya ha ira.” Karuyag niya tutdoan hira kay hinigugma niya hira. An pagserbi ha iba naghatag kan Jesus hin daku nga kalipay.

11. Paonan-o hi Jesus naghatag hin praktikal nga bulig ha mga tawo? (Kitaa liwat an piktyur.)

¹¹ Han ginserbihan ni Jesus an mga tawo, diri la pagtutdo an iya ginbuhat. Igintagana liwat niya an ira pisikal nga panginahanglan. Milagroso nga nagtagana hiya hin pagkaon ngan katapos, ginsugo niya an iya mga disipulo nga ipanhatag ito ha mga tawo. (Mar. 6:41) Ha pagbuhat hito, gintutdoan niya an iya mga disipulo kon paonan-o magsiserbi ha iba. Iginpakita liwat niya nga importante an sugad nga klase hin buruhaton, nga kasagaran nga ginhihimo han mga ministeryal nga surugoon. Imadyina  an kalipay han mga apostol samtang nabulig hira kan Jesus ha panhatag hinin milagroso nga pagkaon tubtob nga ‘nangaon an ngatanan ngan nabusog’! (Mar. 6:42) Syempre, diri la ini an higayon nga gin-una ni Jesus an panginahanglan han iba. Gin-gamit niya an iya bug-os nga kinabuhi ha tuna ha pagserbi ha mga tawo. (Mat. 4:23; 8:16) Nalipay gud hi Jesus ha pagtutdo ha iba ngan ha mapainubsanon nga pagtagana han ira mga panginahanglan. Sigurado nga magigin malipayon ka liwat hinduro kon kakab-uton mo nga magin ministeryal nga surugoon kay karuyag mo magserbi ha iba.

12. Kay ano nga diri kita dapat maghunahuna nga waray kita maibubulig ha kongregasyon?

¹² Kon inaabat mo nga waray ka espesyal nga abilidad, ayaw panluya. Sigurado nga may-ada ka mga kalidad nga mahimo magin mapulsanon ha kongregasyon. Hunahunaa an ginsiring ni Pablo ha 1 Corinto 12:​12-30 ngan hangyoa hi Jehova nga buligan ka nga makita kon paonan-o ito naaplikar ha imo. Iginpapakita hito nga mga pulong ni Pablo nga pariho ha tagsa nga iba pa nga surugoon ni Jehova, may importante ka ngan mapulsanon nga papel ha kongregasyon. Kon waray mo pa maabot an mga kwalipikasyon ha pagin ministeryal nga surugoon, ayaw kawad-i hin paglaom. Lugod, buhata an tanan mo nga mahihimo ha pag-alagad kan Jehova ngan ha pagbulig ha kabugtoan. Sarig nga ikukonsiderar han mga tigurang an imo mga abilidad ngan tatagan ka hin mga toka nga makakaya mo.​—Roma 12:​4-8.

13. Ano an masisiring mahitungod ha kadam-an han mga kwalipikasyon para ha pinili nga kalalakin-an?

¹³ Pansina an usa pa nga rason kon kay ano nga dapat ka mangalimbasog nga magin kwalipikado sugad nga ministeryal nga surugoon: Kadam-an han mga kwalipikasyon aplikado ha ngatanan nga Kristiano. Ngani, an ngatanan nga Kristiano dapat magin duok kan Jehova, makaeksperyensya han kalipay ha paghatag, ngan magpakita hin maopay nga ehemplo sugad nga Kristiano. Ano an espisipiko nga bubuhaton han usa nga brother para magin ministeryal nga surugoon?

KON PAONAN-O KAKAB-UTON AN PAGIN MINISTERYAL NGA SURUGOON

14. Ano an karuyag sidngon han pagin “seryoso”? (1 Timoteo 3:​8-10, 12)

¹⁴ Hisgotan ta yana an pipira nga kwalipikasyon nga gin-unabi ha 1 Timoteo 3:​8-10, 12. (Basaha.) An ministeryal nga surugoon kinahanglan “seryoso.” Ito nga pulong mahimo liwat ihubad sugad nga “angay irespeto,” “may dignidad,” o “dungganon.” Diri ini  nagpapasabot nga diri ka puydi tumawa o mag-enjoy. (Ecles. 3:​1, 4) Lugod, dapat seryosohon mo an ngatanan mo nga responsabilidad. Kon kilala ka nga matataporan, rirespetuhon ka han kongregasyon.

15. Ano an karuyag sidngon han “diri malimbong an panyakan” ngan “diri hakog nga namimiling hin mga paagi basi makabentaha”?

¹⁵ An “diri malimbong an panyakan” nagpapasabot nga sinsero ka, tangkod, ngan masasarigan. Gintutuman mo an imo ginsisiring, ngan diri mo ginlilimbongan an iba. (Prob. 3:32) An “diri hakog nga namimiling hin mga paagi basi makabentaha” nagpapasabot nga tangkod ka ha imo mga transaksyon ngan ha pagkapot hin kwarta. Diri ka mamimentaha ha imo kasangkayan ha kongregasyon basi la makakwarta.

16. (a) Ano an karuyag sidngon han “diri nagpapatakas hin damu nga bino”? (b) Ano an karuyag sidngon han pagkaada “limpyo nga konsensya”?

¹⁶ An “diri nagpapatakas hin damu nga bino” nagpapasabot nga diri ka nagpapatakas hin makahurubog nga irimnon o kilala nga parainom. An pagkaada “limpyo nga konsensya” nagpapasabot nga nagkikinabuhi ka uyon ha mga suruklan ni Jehova. Bisan kon diri ka perpekto, may kamurayawan ka tungod kay may-ada ka maopay nga relasyon ha Dios.

17. Paonan-o maipapakita han usa nga brother nga masasarigan hiya samtang ‘ginsasarihan kon angayan’ hiya? (1 Timoteo 3:10; kitaa liwat an piktyur.)

¹⁷ An ‘nasarihan kon angayan’ nagpapasabot nga naipakita mo na nga puydi ka taporan hin responsabilidad. Salit kon tatagan ka hin toka han mga tigurang, sunda hin maopay an ira mga instruksyon ngan an mga giya han organisasyon. Siguroha nga naiintindihan mo an imo toka ngan kon san-o ito dapat matapos. Kon maduruto nga gintutuman mo an tanan mo nga toka, mapapansin ngan aapresyaron han kabugtoan ha kongregasyon an imo pag-uswag. Mga tigurang, magin alerto ha pagbansay ha bawtismado nga mga brother. (Basaha an 1 Timoteo 3:10.) May bawtismado ba nga mga brother ha iyo kongregasyon nga 10 tubtob 14 anyos o mas bata pa? Maopay ba hira nga susbaranan ha ira personal nga pag-aram? Regular ba hira nga nagkukomento ha mga katirok ngan nakikigbahin ha ministeryo? Kon amo, tagi hira hin mga toka nga angayan ha ira edad ngan kahimtang. Hito nga paagi, inin batan-on nga mga brother ‘masasarihan kon angayan’ hira. Katapos, kon 17 tubtob 19 anyos na hira, posible nga kwalipikado na hira ha pagin ministeryal nga surugoon.

18. Ano an karuyag sidngon han “waray naiaakusar”?

 ¹⁸ An “waray naiaakusar” nagpapasabot nga waray maiaakusar kontra ha imo nga seryoso nga sayop. Syempre, an mga Kristiano bangin makakarawat hin sayop nga akusasyon. Hi Jesus sayop nga gin-akusaran, ngan igintagna niya nga an iya mga sumurunod makakaeksperyensya liwat hin sugad hito. (Juan 15:20) Pero kon titipigan mo nga limpyo an imo panggawi, sugad han ginbuhat ni Jesus, magkakaada ka maopay nga reputasyon ha kongregasyon.​—Mat. 11:19.

19. Ano an karuyag sidngon han pagin “bana hin usa nga babaye”?

¹⁹ “Bana hin usa nga babaye.” Kon inasaw-an ka, dapat sundon mo an orihinal nga suruklan ni Jehova ha pag-asawa—usa nga lalaki ngan usa nga babaye. (Mat. 19:​3-9) An usa nga Kristiano nga lalaki dapat diri gud magbuhat hin seksuwal nga imoralidad. (Heb. 13:4) Pero labaw pa an nahiuupod hito. Dapat magin maunungon ka ha imo asawa ngan diri gud magpakita hin diri angayan nga atensyon ha iba nga babaye.​—Job 31:1.

20. Ha ano nga paagi an usa nga lalaki nangunguna “hin maopay” ha iya panimalay?

²⁰ “Nangunguna hin maopay ha ira mga anak ngan ha ira kalugaringon nga panimalay.” Kon ulo ka han pamilya, dapat mo seryosohon an imo mga responsabilidad. Pagdumara hin regular nga pagsingba han pamilya. Makigbahin hin agsob ha ministeryo upod an imo asawa ngan mga anak tubtob nga posible. Buligi an imo mga anak nga magkaada duok nga relasyon kan Jehova. (Efe. 6:4) Kon gin-aataman han usa nga lalaki an iya pamilya, iginpapakita hito nga maaataman niya an kongregasyon.​—Ikompara an 1 Timoteo 3:5.

21. Kon diri ka pa ministeryal nga surugoon, ano an puydi mo buhaton?

²¹ Mga brother, kon diri pa kamo ministeryal nga surugoon, alayon basaha hin maopay ini nga artikulo ngan ig-ampo ini kan Jehova. Admi an mga kwalipikasyon para ha pagin ministeryal nga surugoon ngan paningkamot nga maabot ito. Hunahunaa an imo daku nga gugma kan Jehova ngan ha imo kabugtoan. Pahilaroma an imo hingyap nga magserbi ha ira. (1 Ped. 4:​8, 10) Abata an kalipay nga resulta han pagserbi ha imo espirituwal nga pamilya. Hinaot hura nga bendisyonan ni Jehova an imo mga pangalimbasog nga kab-uton an pagin ministeryal nga surugoon!—Fil. 2:13.