1-2. Ano nga “maopay nga buhat” an ginhihimo han usa nga tigurang?

 KON ministeryal nga surugoon ka na hin pipira ka panahon, posible nga hirani ka na magin kwalipikado ha pagin tigurang. Mahimo mo ba kab-uton ito nga “maopay nga buhat”?​—1 Tim. 3:1.

² Ano an buruhaton han usa nga tigurang? Nangunguna hiya ha pagsangyaw, maduruto ha pag-shepherding ngan pagtutdo, ngan ginpaparig-on an kongregasyon pinaagi ha pulong ngan buhat. Diri urusahon nga gintatawag han Biblia an maduruto nga mga tigurang nga “regalo nga mga lalaki.”​—Efe. 4:8.

3. Paonan-o an usa nga brother magigin kwalipikado ha pagin tigurang? (1 Timoteo 3:​1-7; Tito 1:​5-9)

³ Paonan-o ka magigin kwalipikado ha pagin tigurang? An kwalipikasyon ha pagin tigurang diri pariho han kwalipikasyon ha sekular nga trabaho. Basi makarawat ha trabaho, kasagaran na nga kinahanglan la nga may-ada ka han mga skill nga ginbibiling han employer. Ha kabaliktaran, kon karuyag mo magin tigurang, diri igo an pagkaada la hin mga skill ha pagsangyaw ngan pagtutdo. Dapat mo maabot an Kasuratanhon nga mga kwalipikasyon para ha mga tigurang nga mababasa ha 1 Timoteo 3:​1-7 ngan Tito 1:​5-9. (Basaha.) Hihisgotan hini nga artikulo an ginkikinahanglan ha mga tigurang ha tulo nga importante nga bahin: pagkaada maopay nga reputasyon ha sulod ngan ha gawas han kongregasyon, pagpakita hin maopay nga ehemplo sugad nga ulo han pamilya, ngan pagin andam pagserbi ha kongregasyon.

PAGKAADA MAOPAY NGA REPUTASYON

4. Ano an karuyag sidngon han pagin “waray ikasaway”?

⁴ Para magin tigurang, dapat “waray ikasaway” ha imo, karuyag sidngon may-ada ka maopay nga reputasyon ha kongregasyon kay maopay an imo panggawi. Dugang pa, dapat “maopay an [imo] bantog ha mga taga-gawas.” An mga diri tumuroo bangin  diri umuyon ha imo mga gintotoohan, pero dapat waray gud hira rason nga magruhaduha nga tangkod ka ngan maopay nga tawo. (Dan. 6:​4, 5) Pakianhi an imo kalugaringon, ‘Maopay ba an akon reputasyon ha sulod ngan ha gawas han kongregasyon?’

5. Paonan-o mo maipapakita nga ‘mahigugmaon ka ha kaopayan’?

⁵ Kon “mahigugmaon [ka] ha kaopayan,” ginkikita mo an maopay ha iba ngan ginkukumendasyonan hira ha ira mag-opay nga kalidad. Nalilipay ka liwat ha pagbuhat hin maopay para ha iba, bisan han mga butang nga labaw kay ha ginlalaoman ha imo. (1 Tes. 2:8; kitaa an “laging gumagawa ng mabuti” nga study note ha Tito 1:8.) Kay ano nga importante gud ini nga kalidad para ha mga tigurang? Kay damu nga panahon an ira ginagamit ha pag-ataman han kongregasyon ngan ha pagdumara han ira mga toka. (1 Ped. 5:​1-3) Bisan pa hito, an kalipay nga ira inaabat tungod ha pagserbi ha iba mas labaw gud kay ha bisan ano nga sakripisyo.​—Buh. 20:35.

6. Ano an pipira nga paagi nga maipapakita ta an pagin “maabiabihon”? (Hebreo 13:​2, 16; kitaa liwat an piktyur.)

⁶ Iginpapakita mo nga “maabiabihon” ka kon nagbubuhat ka hin mag-opay nga butang para ha iba, upod na ha diri mo duok nga kasangkayan. (1 Ped. 4:9) Ha usa nga reperensya, ini an pagkahulagway ha tawo nga maabiabihon: “An purtahan han iya balay—ngan han iya kasingkasing—dapat abrido ha mga estranghero.” Pakianhi an imo kalugaringon, ‘Kilala ba ako nga maabiabihon ha mga bisita?’ (Basaha an Hebreo 13:​2, 16.) An maabiabihon nga tawo naghahatag ha mga bisita han anoman nga may-ada hiya, upod na ha mga pobre ngan ha maduruto nga mga alagad, sugad han mga paramangno han sirkito ngan bisita nga mga mamumulong.​—Gen. 18:​2-8; Prob. 3:27; Luc. 14:​13, 14; Buh. 16:15; Roma 12:13.

7. Paonan-o iginpapakita han usa nga tigurang nga “diri [hiya] mahigugmaon ha kwarta”?

⁷ “Diri mahigugmaon ha kwarta.” Karuyag sidngon hini nga diri ka nakapokus ha materyal nga mga butang. Riko ka man o pobre, an pag-alagad kan Jehova an pinakaimportante ha imo kinabuhi. (Mat. 6:33) Ginagamit mo an imo panahon, kusog, ngan mga panag-iya ha pagsingba kan Jehova, ha pag-ataman ha imo pamilya, ngan ha pagserbi ha kongregasyon. (Mat. 6:24; 1 Juan 2:​15-17) Pakianhi an  imo kalugaringon: ‘Ano an akon panhunahuna ha kwarta? Kontento ba ako ha pagkaada han akon mga panginahanglan? O nakapokus ako ha pamiling hin kwarta ngan pagkaada mas damu pa nga panag-iya?’—1 Tim. 6:​6, 17-19.

8. Ano an pipira nga paagi nga maipapakita mo nga “kontrolado an [imo] pamatasan” ngan “may pagpugong [ka] ha kalugaringon”?

⁸ Kon “kontrolado an [imo] pamatasan” ngan “may pagpugong [ka] ha kalugaringon,” balanse ka ha ngatanan nga bahin han imo kinabuhi. Nag-uupod ini han paglikay ha sobra nga pagkaon ngan pag-inom, diri desente nga pamado ngan pamostura, ngan maraot nga kaliawan. Diri ka nasubad ha diri angayan nga pagkinabuhi han mga tawo ha kalibotan. (Luc. 21:34; San. 4:4) Nagpapabilin ka nga kalmado bisan kon diri maopay an pagtratar han iba ha imo. “Diri [ka] parahubog”; diri ka liwat kilala nga parainom. Pakianhi an imo kalugaringon, ‘Iginpapakita ba han akon pagkinabuhi nga kontrolado an akon pamatasan ngan may pagpugong ako ha kalugaringon?’

9. Ano an karuyag sidngon han pagkaada “maopay [nga] panhunahuna” ngan pagin “organisado”?

⁹ Kon “maopay an [imo] panhunahuna,” gintuturotimbang mo hin maopay an mga butang uyon ha mga prinsipyo ha Biblia. Ginhuhunahuna mo hin maopay ini nga mga prinsipyo, salit nagkakaada ka hilarom nga pagsabot. Diri ka dayon naghihimo hin konklusyon. Lugod, ginsisiguro mo nga may-ada ka han ngatanan nga ginkikinahanglan nga impormasyon. (Prob. 18:13) Sugad nga resulta, nakakahimo ka hin maaramon nga mga desisyon nga uyon ha panhunahuna ni Jehova. Kon “organisado” ka, mahapsay an imo pagkinabuhi ngan naabot ka ha sakto nga oras. Kilala ka nga masasarigan ngan masinugtanon ha mga instruksyon. Ini nga mga kalidad mabulig ha imo nga magkaada maopay nga reputasyon. Hisgotan ta yana an Kasuratanhon nga mga kwalipikasyon parte ha pagin maopay nga ehemplo sugad nga ulo han pamilya.

MAGIN MAOPAY NGA ULO HAN PAMILYA

10. Paonan-o an usa nga brother nangunguna “hin maopay ha iya kalugaringon nga panimalay”?

¹⁰ Kon usa ka nga bana ngan karuyag mo magin kwalipikado sugad nga tigurang, kinahanglan maopay liwat an reputasyon han imo pamilya. Salit kinahanglan “nangunguna [ka] hin maopay ha [imo] kalugaringon nga panimalay.” Dapat kilala ka nga mahigugmaon ngan responsable nga ulo han pamilya. Nag-uupod ito han pagpanguna ha ngatanan nga bahin han aton pagsingba. Kay ano nga importante gud ini? Hi apostol Pablo nangatadongan: “Kon an bisan hin-o nga lalaki diri maaram manguna ha iya kalugaringon nga panimalay, paonan-o niya mamangnoan an kongregasyon han Dios?”—1 Tim. 3:5.

11-12. Paonan-o nakakaapekto ha kwalipikasyon han usa nga brother an panggawi han mga membro han iya pamilya? (Kitaa liwat an piktyur.)

¹¹ Kon usa ka nga tatay, dapat an imo minor de edad nga “mga anak seryoso gud nga nagpapasakop.” Kinahanglan mahigugmaon mo hira nga tutdoan ngan i-train. Syempre, karuyag mo nga magin malipayon hira ngan mag-enjoy pariho ha iba nga mga bata. Pero kinahanglan mo liwat hira tutdoan nga sumugot ha imo, irespeto an iba, ngan magkaada maopay nga pamatasan. Dapat mo liwat buhaton an pinakamaopay nga buligan an imo mga anak nga magkaada maopay nga relasyon kan Jehova, magkinabuhi uyon ha mga prinsipyo ha Biblia, ngan mag-uswag ngadto ha pagpabawtismo.

¹² “An mga anak tumuroo ngan diri gin-aakusaran nga nagkikinabuhi hin maraot o rebelyoso.” Kon an tumuroo nga anak nga nalungon pa ha balay nakahimo hin seryoso nga sala, paonan-o ito makakaapekto ha iya tatay? Kon an  tatay nagkulang ha pag-train ngan pagdisiplina, posible gud nga diri hiya kwalipikado ha pagin tigurang.​—Kitaa an Oktubre 15, 1996, nga isyu han An Barantayan, p. 21, par. 6-7.

PAGSERBI HA KONGREGASYON

13. Paonan-o mo maipapakita nga “makatadunganon” ka ngan “diri nag-iinsister han [imo] karuyag”?

¹³ An mga brother nga may-ada mag-opay nga Kristiano nga kalidad daku gud nga bulig ha kongregasyon. An “makatadunganon” nga tawo nag-aaghat hin kamurayawan. Kon karuyag mo nga makilala ka nga makatadunganon, pamatii an iba ngan sabota an ira panhunahuna. Ha usa nga miting, magigin andam ka ba nga suportaran an desisyon han kadam-an kon waray balaud o prinsipyo ha Biblia nga natatalapas? An “diri nag-iinsister han . . . karuyag” nangangahulogan nga diri mo iginpipirit nga buhaton an mga butang ha paagi nga imo karuyag. Gin-aapresyar mo an kaopayan han pagkaada damu nga magsaragdon. (Gen. 13:​8, 9; Prob. 15:22) “Diri [ka] makiawayon” o “madagmit masina.” Nangangahulogan ito nga diri ka nakikiglantugi, lugod buotan ka ngan may respeto ha iba. Sugad nga mamurayawon nga tawo, nag-uuna ka ha pakigmurayaw, bisan ha makuri nga mga sitwasyon. (San. 3:​17, 18) An imo buotan nga panyakan nabulig basi kumalma an iba, bisan an mga parakontra.​—Huk. 8:​1-3; Prob. 20:3; 25:15; Mat. 5:​23, 24.

14. Ano an karuyag sidngon han “diri bag-o la nga nakombirte” ngan “maunungon”?

¹⁴ An brother nga nagigin kwalipikado nga magin tigurang “diri bag-o la nga nakombirte.” Bisan kon diri kinahanglan nga bawtismado ka hin damu ka tuig, kinahanglan mo hin panahon para magin hamtong nga Kristiano. Antes ka pilion nga magin tigurang, dapat ipakita mo nga pariho kan Jesus, mapainubsanon ka ngan kontento samtang naghuhulat kan Jehova para hin dugang nga toka. (Mat. 20:23; Fil. 2:​5-8) Mapapamatud-an mo nga “maunungon” ka kon nagpapabilin ka nga matinumanon kan Jehova ngan nagkikinabuhi uyon ha iya mga suruklan ngan kon nasunod ka ha giya nga iginhahatag pinaagi han iya organisasyon.​—1 Tim. 4:15.

15. Kinahanglan ba nga maopay gud nga mamumulong an usa nga tigurang? Isaysay.

¹⁵ An Kasuratan klaro nga nasiring nga an mga paramangno kinahanglan “kwalipikado ha  pagtutdo.” Nagpapasabot ba ini nga kinahanglan maopay ka gud nga mamumulong? Diri man. Diri ngatanan nga tigurang maopay gud nga mamumulong, pero epektibo hira ha pagtutdo ha ministeryo ngan kon nagsi-shepherding. (Kitaa an “kwalipikadong magturo” nga study note ha 1 Timoteo 3:2; ikompara an 1 Corinto 12:​28, 29 ngan Efeso 4:11.) Bisan pa hito, kinahanglan padayon mo nga pauswagon an imo abilidad sugad nga magturutdo. Paonan-o ka magigin mas epektibo?

16. Paonan-o ka magigin mas epektibo nga magturutdo? (Kitaa liwat an piktyur.)

¹⁶ “Nakapot hin marig-on ha masasarigan nga pulong.” Basi magin mas epektibo nga magturutdo, siguroha nga uyon ha Pulong han Dios an imo igintututdo ngan iginsasagdon ha kabugtoan. Admi hin maopay an Biblia ngan an aton mga publikasyon. (Prob. 15:28; 16:23; kitaa an “mahigpit na nanghahawakan sa mapananaligang mensahe” nga study note ha Tito 1:9.) Ha imo pag-aram, tigamni an husto nga pag-aplikar han Kasuratan. Ngan kon nagtututdo, pangalimbasugi nga maabot an kasingkasing han imo mamarati. Mahimo mag-uswag an imo abilidad ha pagtutdo kon mangangaro ka hin suhestyon ha eksperyensyado nga mga tigurang ngan iaaplikar ito. (1 Tim. 5:17) An mga tigurang dapat “may kapas . . . ha pag-aghat” ha kabugtoan; pero may mga panahon nga kinahanglan hira sagdonan han mga tigurang o ‘sawayon’ pa ngani. Hain man hito an kahimtang, dapat magin buotan pirme an mga tigurang. Kon buotan ka ngan mahigugmaon ngan iginbabasar ha Pulong han Dios an imo pagtutdo, magigin epektibo ka kay ginsusubad mo an Bantogan nga Magturutdo, hi Jesus.​—Mat. 11:​28-30; 2 Tim. 2:24.

PADAYON NGA MAGKAB-OT

17. (a) Ano an makakabulig ha mga ministeryal nga surugoon nga padayon nga kab-uton an pagin tigurang? (b) Ano an dapat hinumdoman han mga tigurang kon ginkukonsiderar nira kon an usa nga brother angay ba irekomendar nga magin tigurang? (Kitaa an kahon nga “ Magin Makatadunganon Kon Ginkukonsiderar an Iba.”)

¹⁷ Katapos repasuhon an mga kwalipikasyon  ha pagin tigurang, bangin abaton han pipira nga ministeryal nga surugoon nga diri gud hira magigin kwalipikado. Pero hinumdumi nga hi Jehova ngan an iya organisasyon diri naglalaom nga maipapakita mo hin perpekto ini nga mga kalidad. (1 Ped. 2:21) Ngan an gamhanan nga baraan nga espiritu ni Jehova an nabulig ha imo nga makab-ot ini nga mga kwalipikasyon. (Fil. 2:13) May-ada ba espisipiko nga kalidad nga karuyag mo pauswagon? Ig-ampo ito kan Jehova. Pag-research parte hito nga topiko, ngan pangaro hin suhestyon ha usa han mga tigurang kon paonan-o mo ito mapapauswag.

18. Ano an igindadasig nga buhaton han ngatanan nga ministeryal nga surugoon?

¹⁸ Mga brother, hinaot kita ngatanan, upod na adton mga tigurang na, padayon nga magkultibar han mga kalidad nga ginhisgotan hini nga artikulo. (Fil. 3:16) Usa ka ba nga ministeryal nga surugoon? Padayon nga mag-uswag! Hangyoa hi Jehova nga i-train ngan moldehon ka para magin mas epektibo ha pag-alagad ha iya ngan pagserbi ha kongregasyon. (Isa. 64:8) Hinaot hura nga bendisyonan ni Jehova an imo pangalimbasog nga magin kwalipikado nga mag-alagad sugad nga tigurang.