1, 2. (a) Ano an kaibahan han ginlalaoman han tinuod nga mga Kristiano ha ginlalaoman han mga tawo ha kalibotan ni Satanas? (b) Ano nga importante nga mga pakiana an aton hihisgotan?

MAKALILIPAY gud an paglaom han tinuod nga mga Kristiano! Kita ngatanan, dinihogan man o kaapi han “iba nga mga karnero,” naglalaom han katumanan han orihinal nga katuyoan ni Jehova ngan han pagbaraan han Iya ngaran. (Juan 10:16; Mat. 6:9, 10) Ito an pinakaimportante nga paglaom nga sadang pamulaton han ngatanan. Naglalaom liwat kita han iginsaad nga balos nga kinabuhi nga waray kataposan, bahin man kita han “bag-o nga langit” han Dios o han iya “bag-o nga tuna.” (2 Ped. 3:13) Samtang diri pa ito natutuman, naglalaom kita nga padayon nga papahinaboon han Dios an espirituwal nga pag-uswag han iya katawohan.

² An mga tawo nga bahin han kalibotan ni Satanas may-ada liwat mga ginlalaoman, pero diri hira sigurado kon matutuman ito. Pananglitan, minilyon nga parahuygo an naglalaom nga magdaog ha lotto, pero diri hira sigurado kon mahitatabo ito. Ha luyo nga bahin, an tinuod nga pagtoo, amo “an marig-on nga pagsarig” ha aton ginlalaoman sugad nga mga Kristiano. (Heb. 11:1) Pero bangin maghunahuna ka, Paonan-o ko mapaparig-on an akon pagtoo ha akon mga ginlalaoman? Ngan ano an mga kapulsanan han pagkaada marig-on nga pagtoo ha akon ginlalaoman?

3. Ha ano nga kamatuoran iginbasar an pagtoo han mga Kristiano?

 ³ Sugad nga mga makasasala, waray kita ig-anak nga may pagtoo ngan diri liwat awtomatiko nga nagkakaada kita hito. An pagtoo han mga Kristiano resulta han paggios han baraan nga espiritu ha makinarawaton nga kasingkasing. (Gal. 5:22) Waray mababasa ha Biblia nga hi Jehova may pagtoo o nagkikinahanglan hito. Tungod kay hiya an makagarahum-ha-ngatanan ngan maaramon gud nga Dios, waray makakapugong ha pagtuman han iya katuyoan. Sigurado gud an aton langitnon nga Amay nga matutuman an iya iginsaad nga mga bendisyon, salit nakasiring hiya: “Natuman na ito!” (Basaha an Pahayag 21:3-6.) An pagtoo han mga Kristiano iginbasar ha kamatuoran nga hi Jehova “an Dios nga matinumanon”; pirme niya gintutuman an iya mga saad.—Deut. 7:9.

4. Ano nga paglaom an ginpapabilhan han matinumanon nga kalalakin-an ngan kababayin-an antes han panahon ni Jesus?

⁴ Ha Hebreo kapitulo 11, mababasa an ngaran han 16 nga kalalakin-an ngan kababayin-an nga may pagtoo. An nagsurat hito nga libro nag-unabi ha ira ngan ha iba pa sugad nga ‘nagpakakarawat hin maopay nga pamatuod tungod han ira pagtoo.’ (Heb. 11:39) Hira ngatanan may “marig-on nga pagsarig” nga tutumanon han Dios an iya saad nga magkakaada ‘tulin,’ o binhi nga magbubungkag kan Satanas ngan magtutuman han orihinal nga katuyoan ni Jehova. (Gen. 3:15) Inin magtinumanon nga katawohan namatay antes umabot an iginsaad nga “binhi,” hi Jesu-Kristo, nga nag-abri han dalan para ha kinabuhi ha langit. (Gal. 3:16) Bisan pa hito, sigurado nga babanhawon hira ni Jehova ha paraiso nga tuna nga may-ada perpekto nga kinabuhi.—Sal. 37:11; Isa. 26:19; Hos. 13:14.

5, 6. Ano nga paglaom an ginpapamulat gud ni Abraham ngan han iya pamilya, ngan paonan-o nira gintipigan nga marig-on an ira pagtoo? (Kitaa an retrato ha tinikangan hini nga artikulo.)

⁵ May kalabotan han pipira nga nabuhi antes han panahon ni Jesus, an Hebreo 11:13 nasiring: “Hira ngatanan namatay nga may pagtoo, bisan kon waray nira makarawat an katumanan han mga saad, pero nakita nira ito ha hirayo ngan ginpinamulat ito.” Usa ha ira hi Abraham. Ginhahandom gud ba niya an makalilipay nga kinabuhi ilarom ha pagmando han iginsaad nga “binhi”? Matin-aw an baton ni Jesus hito nga pakiana han nagsiring hiya ha iya mga parakontra: “An iyo amay nga hi Abraham nalipay gud ha paglaom nga makita an akon adlaw; nakita niya ito ngan nalipay hiya.” (Juan 8:56) Ginpamulat liwat ito nira Sarah, Isaac, Jacob, ngan han damu nga iba pa nga naglalaom han tiarabot nga Ginhadian, “nga an disenyador ngan magtirindog amo an Dios.”—Heb. 11:8-11.

⁶ Paonan-o ginparig-on ni Abraham ngan han iya pamilya an ira pagtoo? Posible nga nahibaro hira mahitungod ha Dios pinaagi ha pagpamati ha matinumanon nga kalagasan, ha pagbasa ha masasarigan nga kadaan nga mga sinurat, ngan ha mga kapahayagan han Dios pinaagi hin mga anghel, bisyon, o inop. Labaw ha ngatanan, waray nira hingalimti an ira hinbaroan kondi ginpabilhan nira an mga saad han Dios ngan an iya mga ginkikinahanglan ngan ginpamalandong ito. Tungod kay sigurado hira han ira ginlalaoman, andam hira magpailob ha anoman nga kakurian basi makapabilin nga maunungon ha Dios.

7. Ano an mga tagana ni Jehova nga magpaparig-on han aton pagtoo, ngan ano an kinahanglan naton buhaton hito nga mga tagana?

⁷ Basi matipigan nga marig-on an aton pagtoo, mahigugmaon nga igintagana ni Jehova an iya Pulong, an Biblia. Para magin malipayon ngan malampuson, kinahanglan naton ito basahon adlaw-adlaw kon posible. (Sal. 1:1-3; basaha an Buhat 17:11.) Ngan pariho ha mga magsiringba ni Jehova antes han panahon ni Jesus, kinahanglan naton padayon nga pamalandungon an mga saad han Dios ngan magin masinugtanon ha iya mga sugo. Nagtatagana liwat hi Jehova ha aton hin hura nga espirituwal nga pagkaon pinaagi han “matinumanon ngan maaramon nga uripon.” (Mat. 24:45) Salit  kon ginpapabilhan naton an aton hinbabaroan tikang ha espirituwal nga mga tagana ni Jehova, magigin pariho kita ha mga surugoon han Dios ha kadaan nga panahon nga may “marig-on nga pagsarig” ha ira ginlalaoman may kalabotan han Ginhadian.

8. Paonan-o an pag-ampo nagpaparig-on han aton pagtoo?

⁸ Daku liwat an naibulig han pag-ampo basi matipigan nga marig-on an pagtoo han mga magsiringba han Dios antes han panahon ni Jesus. Naparig-on an ira pagtoo han ginbaton han Dios an ira mga pag-ampo. (Neh. 1:4, 11; Sal. 34:4, 15, 17; Dan. 9:19-21) Yana, maisusumat liwat naton kan Jehova an aton mga kabaraka kay maaram kita nga papamatian kita niya ngan paparig-unon basi malipayon nga makapailob. Ngan kon ginbabaton an aton mga pag-ampo, nagigin mas marig-on an aton pagtoo. (Basaha an 1 Juan 5:14, 15.) Tungod kay an pagtoo bahin han bunga han espiritu, kinahanglan “padayon nga mangaro” kita han espiritu han Dios, sugad han igin-aaghat ha aton ni Jesus.—Luc. 11:9, 13.

9. Labot ha pag-ampo para ha aton kalugaringon, hin-o pa an sadang naton ig-ampo?

⁹ Pero diri la pangaro hin bulig an sadang naton ig-ampo. “Damo an mga urusahon nga buhat” ni Jehova nga mahimo naton igpasalamat ha iya kada adlaw ngan dayawon hiya tungod hito! (Sal. 40:5) Kinahanglan liwat naton ipakita ha aton mga pag-ampo nga ‘nahinunumdoman [naton] pirme an mga priso nga sugad hin ginpriso kita upod nira.’ Sadang liwat naton ig-ampo an aton kabugtoan ha bug-os nga kalibotan, labi na adton “mga nangunguna ha [aton].” Napaparig-on gud an aton pagtoo kon nakikita naton kon paonan-o ginbabaton ni Jehova an aton urosa nga pag-ampo!—Heb. 13:3, 7.

10. Hin-o an mga surugoon han Dios nga waray magkompromiso han ira integridad, ngan ano an nakabulig ha ira nga diri magkompromiso?

¹⁰ Ha Hebreo kapitulo 11, iginhuhulagway ni apostol Pablo an mga pagsari nga gin-ilob han mga surugoon han Dios nga waray ngarani. Pananglitan, nag-unabi an apostol hin kababayin-an nga may pagtoo nga namatyan hin anak pero ha urhi ginbanhaw. Nag-unabi liwat hiya hin iba pa nga ‘waray magkompromiso para han ira kagawasan, basi makarawat an mas maopay nga pagkabanhaw.’ (Heb. 11:35) Bisan kon diri kita sigurado kon hin-o an gin-uunabi ni Pablo, an pipira pariho kan Nabot ngan kan Sakarias, ginbato tubtob nga mamatay tungod han ira pagsugot ha Dios ngan pagbuhat han iya kaburut-on. (1 Hadi 21:3, 15; 2 Kron. 24:20, 21) Hi Daniel ngan an iya mga kaupod may higayon unta nga ikompromiso an ira integridad. Pero waray nira ito buhata. Lugod, tungod han ira pagtoo ha gahum han Dios, ‘natak-om nira an baba han mga leon’ ngan ‘waray hira maapektohi han gahum han kalayo,’ siring pa.—Heb. 11:33, 34; Dan. 3:16-18, 20, 28; 6:13, 16, 21-23.

11. Ano nga mga pagsari an gin-ilob han pipira nga propeta tungod han ira pagtoo?

¹¹ An mga propeta pariho kanda Mikaya ngan Jeremias ‘inatubang hin pagsari pinaagi hin mga pagtamay ngan kapriso’ tungod han ira pagtoo. An iba, pariho kan Elias, ‘nagburobalhin ha mga disyerto, ha kabukiran, ha mga lungib, ngan ha mga buho han tuna.’ Nakapailob hira tungod kay ‘marig-on an ira pagsarig nga matutuman an ira ginlalaoman.’—Heb. 11:1, 36-38; 1 Hadi 18:13; 22:24-27; Jer. 20:1, 2; 28:10, 11; 32:2.

12. Hin-o an pinakamaopay nga susbaranan nga nagpailob ha mga pagsari, ngan ano an nakabulig ha iya nga makapailob?

¹² Katapos unabihon ni Pablo an kalalakin-an ngan kababayin-an nga may pagtoo, ginpabug-atan niya an pinakamaopay nga susbaranan—an aton Ginoo nga hi Jesu-Kristo. An Hebreo 12:2 nasiring: “Tungod han kalipay nga iginbutang ha iya atubangan gin-ilob niya an pasakitan nga kahoy, ginbalewaray an pakaalo, ngan liningkod ha too han trono han Dios.” Oo, kinahanglan gud naton ‘tagdon hin maopay’ an susbaranan han pagtoo  nga iginpakita ni Jesus bisan ha pinakamakuri nga mga pagsari. (Basaha an Hebreo 12:3.) Pariho kan Jesus, damu nga Kristiano ha siyahan nga siglo an ginpatay tungod kay waray nira ikompromiso an ira integridad. Usa ha ira amo an disipulo nga hi Antipas. (Pah. 2:13) Makakarawat nira an balos nga pagkabanhaw ha langit nga labaw pa han “mas maopay nga pagkabanhaw” nga ginlalaoman han matinumanon nga mga surugoon han Dios antes han panahon ni Jesus. (Heb. 11:35) Paglabay hin pipira ka panahon katapos maestablisar an Ginhadian han 1914, an ngatanan nga matinumanon nga dinihogan nga namatay ginbanhaw ha langit basi makaupod ni Jesus ha pagmando ha katawohan.—Pah. 20:4.

13, 14. Ano nga mga pagsari an naeksperyensyahan ni Rudolf Graichen, ngan ano an nakabulig ha iya nga makapailob?

¹³ Yana, ginsusubad han minilyon nga magsiringba han Dios an ehemplo ni Jesus pinaagi ha pagtipig han ira paglaom nga matin-aw ha ira hunahuna ngan diri pagtugot ha mga pagsari nga magpaluya han ira pagtoo. Pananglitan, tagda an ehemplo ni Rudolf Graichen nga natawo ha Alemanya han 1925. Gindudumdom niya an mga retrato han mga kahimtang nga iginsasaysay ha Biblia nga nakadispley ha bungbong han ira balay. Hiya nagsurat: “Ha usa nga retrato, makikita an  lobo ngan an nati nga karnero, an nati nga kanding ngan an leopardo, an nati nga baka ngan an leon—hira ngatanan mamurayawon, ngan ginmamandoan han usa nga gutiay nga bata. . . . Ito nga mga retrato nagpapabilin gud ha akon hunahuna.” (Isa. 11:6-9) Bisan pa han madarahog nga pagtimaraot, siyahan han Nazi Gestapo ngan ha urhi han Communist Stasi han Este nga Alemanya, gintipigan ni Rudolf nga marig-on an iya pagtoo ha paraiso nga tuna.

¹⁴ Naeksperyensyahan liwat ni Rudolf an iba pa nga magkuri nga pagsari sugad han kamatay han iya hinigugma nga nanay ha prisohan han Ravensbrück tungod han tipus. Nakita liwat niya an pagluya han pagtoo han iya tatay tubtob ha punto nga nagpirma an iya tatay han dokumento nga nagsusumat nga diri na hiya usa han mga Saksi ni Jehova. Han nakagawas hi Rudolf ha prisohan, nakapribilehiyo hiya nga magin paramangno han sirkito ngan ha urhi nag-eskwela ha Gilead. Igintoka hiya sugad nga misyonero ha Chile, diin nagin paramangno utro hiya han sirkito. Pero nakaeksperyensya na liwat hiya hin magkuri nga pagsari. Paglabay hin usa ka tuig tikang han nagpakasal hira han misyonera nga hi Patsy, namatay an ira anak nga minasus-an. Ha urhi, namatay liwat an iya hinigugma nga asawa nga 43 anyos pa la. Nagpailob hi Rudolf hini ngatanan nga pagsari. Bisan kon lagas ngan maluya na, nag-aalagad hiya sugad nga regular payunir ngan tigurang han iginsurat an istorya han iya kinabuhi ha Agosto 1, 1997, nga gowa han An Barantayan, pahina 20-25. ^[1]

15. Paghatag hin pipira nga ehemplo han mga Saksi ni Jehova yana nga malipayon nga nagpapailob bisan pa han mga pagtimaraot.

¹⁵ An mga Saksi ni Jehova nagpapabilin nga malipayon tungod han ira paglaom bisan pa han duro ngan nagpapadayon nga pagtimaraot. Pananglitan, damu nga kabugtoan ha Eritrea, Singapore, ngan South Korea an ginpriso tungod han ira pagsunod ha ginsiring ni Jesus nga diri ‘gumamit hin espada.’ (Mat. 26:52) Kaupod hinin ginatos nga napriso hira Isaac, Negede, ngan Paulos, nga sobra 20 ka tuig na nga priso ha Eritrea! Nawad-an hira hin higayon nga makaasawa ngan atamanon an ira lagas na nga mga kag-anak, pero nagpapabilin hira nga maunungon bisan pa han duro nga pagtimaraot. Sugad han makikita ha aton website nga jw.org, an ira malipayon nga pamahongpahong nagpapakita nga marig-on an ira pagtoo. Bisan an mga gwardya ha prisohan may pagrespeto ha ira.

16. Paonan-o nakakabulig ha imo an marig-on nga pagtoo?

¹⁶ Kadam-an han katawohan ni Jehova yana diri nakakaeksperyensya hin duro nga pagtimaraot. Iba nga pagsari an ira inaatubang. Damu ha ira an nag-aantos tungod han kapobrehan, girra sibil, o natural nga mga kalamidad. An iba liwat binaya ha ira mahimyang nga kinabuhi o ha pagin kilala ha kalibotan pariho kan Moises ngan han mga patriarka. Nangangalimbasog gud hira nga atohan an pagin materyalistiko ngan makikalugaringon nga pagkinabuhi. Ano an nabulig ha ira ha pagbuhat hito? An ira gugma kan Jehova ngan an ira marig-on nga pagtoo ha iya saad nga wawad-on niya an kawaray-hustisya ngan babalosan an iya magtinumanon nga surugoon hin kinabuhi nga waray kataposan ha matadong nga bag-o nga kalibotan.—Basaha An Mga Salmos 37:5, 7, 9, 29.

17. Ano an imo determinasyon, ngan ano an hihisgotan ha sunod nga artikulo?

¹⁷ Hini nga artikulo, hinbaroan naton kon paonan-o an pagpamalandong ha mga saad han Dios ngan an regular nga pag-ampo magpaparig-on han aton pagtoo. Ngan ito nga pagtoo mabulig ha aton nga mailob an mga pagsari samtang ginpapamulat naton nga may “marig-on nga pagsarig” an aton paglaom sugad nga mga Kristiano. Pero ano pa an nahiuupod han pagtoo sumala ha pagkahulagway han Biblia? Babatunon ito ha sunod nga artikulo.