INATUBANG hi Esteban ha nasisina nga kalalakin-an. Mga membro hira han pinakahitaas nga korte ha Israel, an Sanhedrin. Ini nga 71 nga hukom kaapi han pinakamaimpluwensya nga mga tawo han nasud. Gintirok hira han hitaas nga saserdote nga hi Caifas, nga nanguna ha korte mga pipira ka bulan an naglabay han ginsentensyahan hi Jesus hin kamatayon. (Mat. 26:57, 59; Buh. 6:8-12) Samtang usa-usa nira nga ginpapayakan an buwa nga mga testigo, may nakita hira nga urusahon kan Esteban​—an iya nawong nagin “pariho hin kanan anghel.”​—Buh. 6:13-15.

Paonan-o hi Esteban nakapabilin nga kalmado ngan murayaw ha sugad kamakaharadlok nga sitwasyon? Antes pa hiya pwersahon pagdara ngadto ha Sanhedrin, sagipo hi Esteban ha pagtuman han iya toka ilarom han bulig han espiritu han Dios. (Buh. 6:3-7) Han ginbibista hiya, ito gihapon nga espiritu an nagios ha iya sugad nga parabulig o paraliaw ngan parapahinumdom. (Juan 14:16) Samtang maisugon nga iginyayakan ni Esteban an iya depensa, nga nakarekord ha Buhat kapitulo 7, iginpahinumdom ha iya han baraan nga espiritu an mga 20 o sobra pa nga asoy tikang ha Hebreo nga Kasuratan. (Juan 14:26) Pero mas naparig-on pa gud an pagtoo ni Esteban han nakarawat niya an usa nga bisyon mahitungod kan Jesus nga natindog ha too han Dios.​—Buh. 7:54-56, 59, 60.

Bangin makaeksperyensya liwat kita hin mga pagtarhog ngan pagtimaraot. (Juan 15:20) Pinaagi ha regular nga pagbasa han Pulong han Dios ngan pagin aktibo ha ministeryo, gintutugotan naton nga gumios ha aton an espiritu ni Jehova. Magkakaada liwat kita kusog nga atubangon an mga pagkontra samtang gintitipigan an murayaw nga hunahuna.​—1 Ped. 4:12-14.