1, 2. (a) Ano an mahimo magin epekto ha usa nga Kristiano han diri ginlalaoman nga mga pagbag-o? (Kitaa an retrato hini nga pahina.) (b) Sumala ha Salmos 131, ano nga disposisyon an makakabulig basi matipigan naton an murayaw nga hunahuna?

HAN hinbaroan nira Lloyd ngan Alexandra, nga sobra 25 ka tuig na nga nag-aalagad ha Bethel, nga igintoka hira sugad nga mga payunir, nasubo hira ha tinikangan. Hi Lloyd nagsiring: “Para ha akon, an Bethel ngan an akon toka amo na an akon pangirilal-an. Nasasabtan ko an mga hinungdan han pagbag-o, pero paglabay hin mga semana ngan mga bulan, agsob ko abaton nga iginsalikway ako. Diri ko masabtan an akon inaabat. May panahon nga positibo ako, pero nuroniyan nasusubo ako.”

² Kon nakakaeksperyensya kita hin diri ginlalaoman nga mga pagbag-o, mahimo ito magin hinungdan nga mabaraka ngan maistres kita. (Prob. 12:25) Bangin makurian pa ngani kita nga karawaton ito nga mga pagbag-o. Ha sugad nga mga kahimtang, paonan-o naton ‘papakalmahon ngan papamingawon’ an aton kalag? (Basaha an Salmos 131:1-3.) Hisgotan naton kon paonan-o natipigan han pipira nga tawohan ha  Biblia ngan han mga surugoon ni Jehova ha aton panahon an murayaw nga hunahuna bisan pa han mga pagbag-o.

3. Ano an nagin kahimtang ni Jose?

³ Mga 17 anyos hi Jose han iginbaligya hiya han iya kabugtoan sugad nga uripon tungod han ira kaawa. Ha ngatanan nga anak ni Jacob, hi Jose an iya paborito. (Gen. 37:2-4, 23-28) Ha sulod hin mga 13 ka tuig, kinahanglan ilubon ni Jose an pagin uripon ngan pagin priso ha Ehipto nga hirayo ha iya hinigugma nga tatay nga hi Jacob. Ano an nakabulig ha iya nga diri mawad-an hin paglaom ngan diri masina?

4. (a) Samtang priso hi Jose, ha ano hiya nagpokus? (b) Paonan-o ginbaton ni Jehova an mga pag-ampo ni Jose?

⁴ Samtang nag-aantos hi Jose ha prisohan, posible gud nga nagpokus hiya ha mga ebidensya han bendisyon ha iya ni Jehova. (Gen. 39:21; Sal. 105:17-19) An matagnaon nga mga inop ni Jose han burobata pa hiya posible nga nagparig-on liwat han iya pagsarig nga gin-uuyonan hiya ni Jehova. (Gen. 37:5-11) Posible gud nga diri la usa ka beses nga iginsumat niya kan Jehova an iya mga kasakit. (Sal. 145:18) Sugad nga baton han kinasingkasing nga mga pag-ampo ni Jose, ginpasarig hiya ni Jehova nga pirme Hiya “kaupod niya” ha ngatanan niya nga pagsari.​—Buh. 7:9, 10. *

5. Ano an mahimo magin epekto han “kamurayawan han Dios” ha aton hingyap nga magkab-ot hin espirituwal nga mga tumong?

⁵ Bisan pa han magkuri nga kahimtang, mahimo naton maeksperyensyahan yana an nakakaliaw nga epekto han “kamurayawan han Dios” nga nagbabantay han aton panhunahuna. (Basaha an Filipos 4:6, 7.) Salit, kon madangop kita kan Jehova ha panahon nga duro an aton kabaraka, an kamurayawan han Dios magpaparig-on han aton determinasyon nga magkab-ot hin espirituwal nga mga tumong ngan makakabulig ito ha aton nga diri umundang. Hisgotan naton an pipira nga moderno nga ehemplo nga nakaeksperyensya hini.

6, 7. Paonan-o an pagin espisipiko ha aton mga pag-ampo makakabulig basi maibalik an aton murayaw nga hunahuna? Paghatag hin ehemplo.

⁶ Han ginsumatan hira Ryan ngan Juliette nga natapos na an ira toka sugad nga temporaryo nga espesyal payunir, nasubo gud hira. “Igin-ampo dayon namon ito kan Jehova,” siring ni Ryan. “Maaram kami nga usa ini nga espesyal nga oportunidad basi maipakita namon an amon pagsarig ha iya. Damu ha amon kongregasyon an bag-o la ha kamatuoran, salit nag-ampo kami nga buligan kami ni Jehova nga magpakita hin maopay nga susbaranan ha pagtoo.”

⁷ Paonan-o ginbaton ni Jehova an ira pag-ampo? Hi Ryan nagsiring: “Katapos gud namon mag-ampo, nawara an negatibo nga mga pagbati ngan kabaraka nga amon inabat ha tinikangan. An kamurayawan han Dios nagbantay han amon kasingkasing ngan hunahuna. Nasantop namon nga padayon kami nga magagamit ni Jehova kon titipigan namon an husto nga disposisyon.”

8-10. (a) Paonan-o an espiritu han Dios makakabulig ha aton kon nababaraka kita? (b) Paonan-o ginbabalosan ni Jehova an aton pangalimbasog nga magpokus ha espirituwal nga mga butang?

⁸ Labot ha paghatag ha aton hin murayaw nga hunahuna, an espiritu han Dios magpapahinumdom ha aton han mga teksto nga mabulig ha aton nga magpokus ha espirituwal nga mga butang. (Basaha an Juan 14:26, 27.) Tagda an mag-asawa nga hira Philip ngan Mary, nga nag-alagad ha Bethel hin haros 25 ka tuig. Ha sulod la hin upat ka bulan, namatayan hira nga duha hin nanay ngan usa nga paryente, ngan kinahanglan nira atamanon an tatay ni Mary nga may sakit nga dementia.

 ⁹ Hi Philip nagsiring: “Kahuna ko nga naka-adjust na ako, pero baga hin may kulang. Nabasa ko an Colosas 1:11 ha usa nga aradman nga artikulo han Barantayan. Oo, nakakapailob ako, pero diri bug-os. Kinahanglan ko ‘mag-antos nga may pagpailob ngan kalipay.’ Ini nga teksto nagpahinumdom ha akon nga an akon kalipay diri nakadepende ha akon kahimtang, kondi ha paggios han espiritu han Dios ha akon kinabuhi.”

¹⁰ Tungod han ira pangalimbasog nga magpokus ha espirituwal nga mga butang bisan pa han ira sitwasyon, ginbendisyonan ni Jehova hira Philip ngan Mary ha damu nga paagi. Waray pag-iha han binaya hira ha Bethel, nakabiling hira hin mga Bible study nga nag-uuswag ha espirituwal ngan naghangyo nga dumarahan hin pag-aram diri la usa ka beses ha usa ka semana. Hi Mary nagsiring: “Hira an amon kalipay ngan an paagi ni Jehova ha pagsiring ha amon nga magigin maopay an ngatanan.”

11, 12. (a) Paonan-o gintagan ni Jose hin rason hi Jehova nga bendisyonan hiya? (b) Paonan-o ginbalosan hi Jose tungod han iya pagpailob?

¹¹ Kon nakakaeksperyensya kita hin tigda nga mga pagbag-o, bangin mabaraka kita hinduro ngan magpokus na la ha aton mga problema. Mahimo unta ini mahitabo kan Jose. Pero ginbuhat niya an pinakamaopay nga iya mahihimo ha iya sitwasyon, ngan hito nga paagi, gintagan niya hi Jehova hin rason nga bendisyonan hiya. Bisan kon priso hi Jose, maduruto nga gintuman niya an bisan ano nga toka nga iginhatag ha iya han parabantay han prisohan, sugad la han iya ginhimo han nagtatrabaho pa hiya kan Potipar.​—Gen. 39:21-23.

¹² Usa ka adlaw, gintokahan hi Jose ha pag-asikaso ha duha nga tawo nga may hitaas nga katungdanan hadto ha palasyo han Paraon. Tungod kay buotan hi Jose ha ira, nagkaada hira pagtapod ha iya. Salit, iginsumat nira kan Jose an ira mga nababarak-an ngan an ira nakakagupong nga inop han naglabay nga gab-i. (Gen. 40:5-8) Waray mahunahuna ni Jose nga ito nga ira pag-iristorya magkakaada makalilipay nga resulta para ha iya. Bisan kon nag-antos hiya hin duha pa ka tuig ha prisohan, ha urhi ginpagawas hiya, ngan hito mismo nga adlaw ginhimo hiya nga magmarando nga ikaduha ha Paraon.​—Gen. 41:1, 14-16, 39-41.

13. Paonan-o naton matatagan hi Jehova hin rason nga bendisyonan kita bisan pa han anoman nga aton gin-aatubang?

¹³ Pariho kan Jose, bangin umatubang kita hin sitwasyon nga gutiay la an aton mahihimo o diri naton kontrolado. Kondi kon magpabilin kita nga mapailubon ngan mangalimbasog nga buhaton an pinakamaopay nga aton mahihimo ha aton sitwasyon, tatagan naton hi Jehova hin rason nga bendisyonan kita. (Sal. 37:5) Oo, usahay bangin ‘nasasamok’ o nagugupong kita, pero sugad han ginsiring ni apostol Pablo, diri gud kita ‘nawawarayan paglaom.’ (2 Cor. 4:8; ftn.) Ini nga ginsiring ni Pablo magigin tinuod ha aton, labi na kon magpapabilin kita nga nakapokus ha aton ministeryo.

14-16. Paonan-o an ebanghelisador nga hi Felipe nagpabilin nga nakapokus ha iya ministeryo bisan pa han mga pagbag-o?

¹⁴ An ebanghelisador nga hi Felipe usa nga maopay nga susbaranan nga nagpabilin nga nakapokus ha ministeryo bisan pa han mga pagbag-o. Ha Jerusalem, nagkaada duro nga pagtimaraot katapos patayon hi Esteban. * Hito nga panahon, nagpahimulos hi Felipe han iya bag-o pa la nga toka. (Buh. 6:1-6) Pero han nagpatlaag an mga sumurunod han Kristo, nagpabilin hi Felipe nga sagipo ha iya pag-alagad kan Jehova. Kinadto hiya ha Samaria, usa nga syudad nga an kadak-an nga bahin waray pa masangyawi han maopay nga sumat.​—Mat. 10:5; Buh. 8:1, 5.

¹⁵ Andam hi Felipe nga kumadto diin man hiya giyahan han espiritu han Dios, salit gin-gamit hiya ni Jehova ha pag-abri hin bag-o nga mga teritoryo. An iya patas nga pagtratar ha mga tawo posible nga nakarepresko ha mga Samaritano, tungod kay diri maopay an pagtratar ha ira han mga Judio. Salit diri urusahon nga an “ngatanan nga tawo” namati ha iya!​—Buh. 8:6-8.

¹⁶ Katapos hito, gin-giyahan hi Felipe han espiritu han Dios nga kumadto ha Asdod ngan Cesarea, duha nga syudad diin damu an umurukoy nga Hentil. (Buh. 8:39, 40) Mga 20 ka tuig tikang han nagsangyaw hi Felipe ha Samaria, matin-aw nga nagbag-o na liwat an iya kahimtang. Hini nga panahon, nagkaada na hiya pamilya, ngan posible nga inukoy hiya ha usa han iya teritoryo. Bisan pa han mga pagbag-o ha iya kahimtang, nagpabilin hi Felipe nga nakapokus ha iya ministeryo, ngan sugad nga resulta, ginbendisyonan gud hiya ni Jehova ngan an iya pamilya.​—Buh. 21:8, 9.

17, 18. Paonan-o an pagpokus ha ministeryo makakabulig ha aton nga magpabilin nga timbang durante han mga pagbag-o?

¹⁷ Damu nga bug-os-panahon nga mga surugoon han Dios an makakagpamatuod nga an pagpokus ha ministeryo nakabulig ha ira nga magpabilin nga timbang bisan pa han mga pagbag-o. Han binaya ha Bethel hira Osborne ngan Polite, mag-asawa nga tikang ha Sur Aprika, kahuna nira nga makakabiling dayon hira hin part-time nga trabaho ngan hin mauukyan. Hi Osborne nagsiring: “Makasurubo, waray dayon kami makabiling hin trabaho sugad han amon ginlalaoman.” An iya asawa nga hi Polite nagsiring: “Waray kami nabilngan nga trabaho ha sulod hin tulo ka bulan, ngan waray kami tinirok. Usa gud ito nga pagsari ha amon.”

¹⁸ Ano an nakabulig ha ira nga malamposan inin nakakaistres nga sitwasyon? Ini an siring ni Osborne: “An pagsangyaw kaupod han kongregasyon  daku an naibulig ha amon basi makapabilin kami nga nakapokus ngan positibo. Nagdesisyon kami nga magin okupado ha pagsangyaw imbes nga magliningkod la ngan magkinabaraka, ngan naghatag gud ito ha amon hin daku nga kalipay. Padayon kami nga nagpinamiling hin trabaho, ngan ha urhi nakabiling kami.”

19-21. (a) Ano an mabulig ha aton nga matipigan an murayaw nga hunahuna? (b) Paonan-o kita mahimo magpahimulos ha pagpahiuyon ha mga pagbag-o?

¹⁹ Sugad la han iginpapakita hini nga mga ehemplo, kon bubuhaton naton an pinakamaopay nga aton mahihimo ha aton sitwasyon ngan may pagsarig nga maghuhulat kan Jehova, matitipigan naton an murayaw nga hunahuna. (Basaha an Mika 7:7.) Bangin masantop pa ngani naton nga damu nga espirituwal nga kapulsanan an aton nakakarawat tungod han aton pagpahiuyon ha mga pagbag-o. Ha paghinumdom han iya eksperyensya, hi Polite nga gin-unabi kanina nagsiring: “Han igintoka kami sugad nga mga payunir, nagtutdo ini ha akon kon ano gud an iginpapasabot han pagsarig kan Jehova bisan kon baga hin makuri an kahimtang. Nagin mas duok ako ha iya.”

²⁰ Hi Mary nga gin-unabi kanina, nag-aataman pa gihapon han iya lagas nga tatay samtang nagpapayunir hiya. Siring niya: “Hinbaroan ko nga kon naabat ako hin kabaraka, kinahanglan ko umundang, mag-ampo, ngan kumalma. An pinakaimportante nga leksyon nga akon hinbaroan amo an pagtapod han mga butang kan Jehova, ngan pagkikinahanglanon pa gud ito ha tidaraon.”

²¹ Hira Lloyd ngan Alexandra nga gin-unabi ha tinikangan, nagsiring nga an pagbag-o han ira sitwasyon nagsari han ira pagtoo ha mga paagi nga diri nira ginlalaoman. Pero siring nira: “An mga pagsari ha amon pagtoo nagpapakita kon tinuod an amon pagtoo ngan kon may kusog ito ha pagbulig ngan pagliaw ha amon ha panahon han kakurian. Inabat namon nga nagin mas maopay kami nga mga tawo.”

22. Kon bubuhaton naton an pinakamaopay nga aton mahihimo ha aton sitwasyon, ha ano kita makakasarig?

²² Kon makaeksperyensya ka hin diri ginlalaoman nga mga pagbag-o​—tungod man ito ha pagbag-o han teokratiko nga toka, problema ha kahimsog, o bag-o nga responsabilidad ha pamilya—​sarig nga nagtatagad gud hi Jehova ha imo ngan bubuligan ka niya ha husto nga panahon. (Heb. 4:16; 1 Ped. 5:6, 7) Ha pagkayana, buhata an pinakamaopay nga imo mahihimo ha imo sitwasyon. Magin duok ha imo langitnon nga Amay pinaagi ha pag-ampo, ngan bug-os nga sumarig ha iya. Kon bubuhaton mo ini, matitipigan mo liwat an murayaw nga hunahuna bisan pa han mga pagbag-o.