1. Kay ano nga hi Jehova angay kumarawat han aton eksklusibo nga debosyon?

HI Jehova an angay kumarawat han aton eksklusibo nga debosyon kay hiya an aton Maglalarang ngan Parahatag han Kinabuhi. (Pah. 4:11) Pero naatubang kita hin peligro. Bisan kon hinigugma ngan ginrirespeto naton hi Jehova, mahimo kita masulay nga diri ihatag ha iya an aton eksklusibo nga debosyon. Kinahanglan hibaroan naton kon paonan-o ito mahimo mahitabo. Pero hisgotan anay naton kon ano an eksklusibo nga debosyon.

2. Sumala ha Exodo 34:14, ano an bubuhaton naton kon eksklusibo an aton debosyon kan Jehova?

² Ha Biblia, an pagin debotado ha Dios nagpapasabot hin pagkaada hilarom nga gugma ha iya. Kon eksklusibo an aton debosyon kan Jehova, hiya la an aton sisingbahon. Diri naton tutugotan an bisan hin-o o bisan ano nga sumaliwan ha iya ha aton kasingkasing.​—Basaha an Exodo 34:14.

3. Kay ano nga an aton debosyon kan Jehova diri kay waray basihan?

³ An aton debosyon kan Jehova diri kay waray basihan. Kay ano? Tungod kay iginbasar ito ha mga kamatuoran nga aton nahibabaroan mahitungod ha iya. Naruyagan naton an iya mag-opay nga kalidad. Maaram kita han iya naruruyagan ngan diri naruruyagan, ngan nauyon kita hito. Nasasabtan naton ngan ginsusuportaran an iya katuyoan para ha aton. Inaabat naton nga ginpapasidunggan kita tungod han iya paghatag ha aton hin oportunidad nga magin sangkay niya. (Sal. 25:14) An ngatanan nga aton nahibabaroan mahitungod ha aton Maglalarang nakakabulig nga magin mas duok kita ha iya.​—San. 4:8.

4. (a) Ano an ginagamit han Yawa basi paluyahon an aton debosyon kan Jehova? (b) Ano an aton hihisgotan hini nga artikulo?

⁴ Ginkukontrol han Yawa ini nga sistema, ngan ginagamit niya  ito basi madani an aton natural nga mga hingyap ngan unudnon nga mga kaluyahan. (Efe. 2:1-3; 1 Juan 5:19) Tumong niya nga mabahin an aton gugma basi diri na magin eksklusibo an aton debosyon kan Jehova. Hisgotan naton an duha nga butang nga mahimo hiya maglampos ha pagbuhat hito. Siyahan, ginsusulay niya kita nga magkab-ot hin karikohan, ngan ikaduha, naniningkamot hiya pag-impluwensya ha aton nga magpili hin maraot nga mga kaliawan.

5. Kay ano nga kinahanglan magbantay kita nga diri magkaada gugma ha kwarta?

⁵ Natural la nga karuyag naton magkaada igo nga pagkaon, angayan nga bado, ngan desente nga urukyan. Kondi, kinahanglan magbantay kita nga diri magkaada gugma ha kwarta. Damu nga tawo ha kalibotan ni Satanas an “mahigugmaon ha kwarta” ngan ha mga butang nga napapalit han kwarta. (2 Tim. 3:2) Maaram hi Jesus nga an iya mga sumurunod posible masulay nga magkaada hini nga gugma. “Waray tawo nga mahimo magpauripon ha duha nga agaron,” siring ni Jesus, “kay kangangalasan niya an usa ngan hihigugmaon an usa, o uunongan niya an usa ngan tatamayon an usa. Diri niyo mahimo pagdunganon an pagpauripon ha Dios ngan ha Karikohan.” (Mat. 6:24) An usa nga tawo nga nagsisingba kan Jehova pero naggagahin hin daku nga panahon ngan kusog basi magkaada karikohan hini nga kalibotan sugad hin naniningkamot pagserbi ha duha nga agaron. Diri niya naihahatag kan Jehova an eksklusibo nga debosyon.

6. Ano nga leksyon an aton mahibabaroan ha ginsiring ni Jesus ha kongregasyon ha Laodicea?

⁶ Ha ikatarapos han siyahan nga siglo C.E., an mga membro han kongregasyon ha syudad han Laodicea naghambog: “Riko ako ngan nagkaada hin karikohan ngan diri na nagkikinahanglan hin bisan ano.” Pero para kan Jehova ngan kan Jesus, “miserable [hira] ngan makalolooy ngan pobre ngan buta ngan hubo.” Ginsagdonan hira  ni Jesus, diri tungod kay riko hira, kondi tungod kay an ira gugma ha karikohan nagdadaot han ira relasyon kan Jehova. (Pah. 3:14-17) Kon maobserbaran naton nga may nagtutubo ha aton kasingkasing nga hingyap ha pagkab-ot hin karikohan, kinahanglan tadungon dayon naton an aton panhunahuna. (1 Tim. 6:7, 8) Kay kon diri, mababahin an aton kasingkasing ngan diri na kakarawaton ni Jehova an aton pagsingba. “Nagsusugo [hiya] nga ihatag ha iya an eksklusibo nga debosyon.” (Deut. 4:24) Paonan-o mahimo mawara an aton timbang nga panhunahuna ha kwarta?

7-9. Ano nga leksyon an imo mahibabaroan ha eksperyensya han tigurang nga hi David?

⁷ Tagda an ehemplo ni David, usa nga maduruto nga tigurang nga taga-Estados Unidos. Nagsiring hiya nga dedikado hiya ha iya trabaho. Na-promote hiya ha kompanya nga iya gintatrabahoan ngan ginkilala hiya ha bug-os nga nasud sugad nga usa han pinakamaopay nga empleyado. “Hito nga panahon, kahuna ko nga ini nga akon mga nakarawat pamatuod han bendisyon ni Jehova,” siring ni David. Pero bendisyon gud ba ito?

⁸ Hinay-hinay nga nakita ni David an mga sinyales nga an iya trabaho may maraot nga epekto ha iya relasyon kan Jehova. “Ha mga katirok ha kongregasyon ngan bisan ha ministeryo, naobserbaran ko nga naghihinunahuna na ako han mga problema ha trabaho,” siring niya. “Daku an akon kità, pero nagtitikaduro an akon istres, ngan nagin problemado an amon pag-asawa.”

⁹ Nasantop ni David nga kinahanglan niya usisahon an iya mga prayoridad. “Marig-on nga nagdesisyon ako nga tadungon an akon sitwasyon,” siring niya. Karuyag ni David bag-uhon an iya eskedyol ha trabaho, ngan iya iginsumat ha iya boss an iya plano. Ano an resulta? Gintanggal hiya ha trabaho! Ano an iya ginhimo? “Kinabuwasan gud la, nag-aplay ako para ha durodiretso  nga pag-auxiliary payunir,” siring niya. Basi masuportaran an ira kalugaringon, hi David ngan an iya asawa nagtrabaho sugad nga janitor. Paglabay hin pipira ka panahon, nagregular payunir hiya, ngan ha urhi an iya asawa nagpayunir liwat. Ginpili hini nga mag-asawa an trabaho nga ginmiminos han damu nga tawo, pero para ha ira diri an klase han trabaho an pinakaimportante. Bisan kon an ira kità naghamubo hin 90 porsyento kay ha ira kità hadto, may-ada hira han ira ginkikinahanglan nga panggastos ha kada bulan. Ginpaprayoridad nira hi Jehova, salit naieksperyensyahan nira mismo nga gin-aataman niya adton nag-uuna han Ginhadian.​—Mat. 6:31-33.

10. Paonan-o naton mababantayan an aton kasingkasing?

¹⁰ Riko man kita o pobre, kinahanglan bantayan naton an aton kasingkasing. Paonan-o? Ayaw patuboa an gugma ha karikohan. Ngan ayaw tuguti nga magin prayoridad mo an imo trabaho imbes nga an pag-alagad kan Jehova. Paonan-o mo mahibabaroan nga nahitatabo na ini ha imo? Puydi mo pakianhan an imo kalugaringon: ‘Agsob ko ba hunahunaon an akon trabaho kon aada ako ha katirok o ha ministeryo? Pirme ba ako nababaraka kon magkakaada ako kasigurohan ha pinansyal ha tiarabot nga panahon? Nagkakaproblema ba an amon pag-asawa tungod han kwarta ngan materyal nga mga panag-iya? Andam ba ako kumarawat hin trabaho nga ginmiminos han iba pero makakaghatag ha akon hin dugang nga panahon ha pag-alagad kan Jehova?’ (1 Tim. 6:9-12) Kon ginkukonsiderar ito nga mga pakiana, hinumdoman naton nga hinigugma kita ni Jehova ngan nagsasaad hiya ha mga may debosyon ha iya: “Diri ko gud ikaw babayaan, ngan diri ko gud ikaw papabay-an.” Tungod hini, nagsurat hi apostol Pablo: “Mahigawas ha paghigugma ha kwarta an iyo pagkinabuhi.”​—Heb. 13:5, 6.

11. Ano an nahihimo han kaliawan ha usa nga tawo?

¹¹ Karuyag ni Jehova nga mag-enjoy kita ha kinabuhi, ngan makakabulig an kaliawan basi mahimo ito. Ngani, an Pulong han Dios nasiring nga “waray na mas maopay pa para ha tawo kay han kumaon ngan uminom ngan malipay ha iya ginpinanigurohan pagtrabaho.” (Ecles. 2:24) Pero, kadam-an han kaliawan ha kalibotan may maraot nga epekto ha aton. Ginpapahamubo hito an mga suruklan ha moral han mga tawo, gin-aaghat hira nga konsinteron​—o higugmaon pa ngani—​an mga butang nga ginkukondenar han Pulong han Dios.

12. Sumala ha 1 Corinto 10:21, 22, kay ano nga kinahanglan naton pilion hin maopay an aton kaliawan?

¹² Karuyag naton ihatag kan Jehova an eksklusibo nga debosyon, salit diri kita puydi kumaon  ha “lamesa ni Jehova” ngan “ha lamesa han mga demonyo.” (Basaha an 1 Corinto 10:21, 22.) An pagkaon upod ha usa agsob nga tigaman han pagkamagsangkay. Kon an ginpipili naton nga kaliawan nag-aaghat hin kamadarahog, espiritismo, imoralidad, o iba pa nga unudnon nga hingyap ngan pamatasan, sugad hin nasaro kita ha pagkaon nga igin-andam han mga kaaway han Dios. Tungod hito, diri la naton gindadaot an aton kalugaringon kondi pati an aton pakigsangkay kan Jehova.

13-14. Sumala ha Santiago 1:14, 15, kay ano nga kinahanglan pilion naton hin maopay an aton kaliawan? Iilustrar.

¹³ Tagda an pipira nga paagi diin an kaliawan maipapariho ha literal nga pagkaon. Kon nakaon kita, kita an nagkukontrol kon ano an aton ibubutang ha aton baba. Pero kon matulon na naton an pagkaon, awtomatiko na ito nga napuproseso ngan an mga sustansya hito nagigin bahin na han aton lawas. An masustansya nga pagkaon makakapahimsog ha aton; an diri masustansya diri makakapahimsog ha aton. Bangin diri dayon makita an mga resulta hito, pero makikita ito paglabay han panahon.

¹⁴ Ha pariho nga paagi, kon nagpipili kita hin kaliawan, kita an nagkukontrol kon ano an aton isusulod ha aton hunahuna. Katapos hito, awtomatiko na ito nga napuproseso ngan naaapektohan na hito an aton hunahuna ngan kasingkasing. An maopay nga kaliawan makakarepresko ha aton; an maraot nga kaliawan makakadaot ha aton. (Basaha an Santiago 1:14, 15.) An mga epekto han maraot nga kaliawan bangin diri makita dayon, pero makikita ito paglabay han panahon. Salit ginpapahamangnoan kita han Biblia: “Ayaw kamo palimbong: An Dios diri angay minuson. Kay anoman an iginsasabwag han usa nga tawo, ito liwat an iya aanihon; kay hiya nga nagsasabwag uyon ha iya unod mag-aani hin pagkadunot tikang ha iya unod.” (Gal. 6:7, 8) Importante gud nga isalikway naton an ngatanan nga kaliawan nga nag-aaghat han mga butang nga ginkakangalasan ni Jehova!​—Sal. 97:10.

15. Ano nga regalo an igintatagana ha aton ni Jehova?

¹⁵ Damu han katawohan ni Jehova an nag-i-enjoy pagkita han JW Broadcasting^®, an aton maopay nga estasyon hin telebisyon ha Internet. An sister nga hi Marilyn nagsiring: “An JW Broadcasting nakakabulig ha akon nga magin mas positibo, ngan diri ko na kinahanglan pilion an sulod hito. Kon namimingaw ako o nanluluya, nagbibiling ako hin kikitaon nga makaparig-on nga pahayag o programa ha Morning Worship. Nabulig ito ha akon nga magin mas duok kan Jehova ngan ha iya organisasyon. Ini nga tagana nga JW Broadcasting bug-os nga nakagbag-o han akon kinabuhi.” Nagpapahimulos ka ba hini nga regalo ni Jehova? Labot pa han bag-o nga programa kada bulan, ha JW Broadcasting damu an audio ngan video pati nakakaliaw nga mga kanta nga puydi makita ngan mapamatian bisan san-o.

16-17. Kay ano nga kinahanglan kontrolon gud naton an kadamu han panahon nga aton igin-gagahin ha kaliawan, ngan paonan-o naton ito mahihimo?

¹⁶ Kinahanglan kontrolon gud naton diri la an klase han kaliawan nga aton ginpipili kondi pati an kadamu han panahon nga aton igin-gagahin hito. Kay kon diri, bangin mas damu nga panahon an aton magamit ha kaliawan kay ha aton pag-alagad kan Jehova. Damu an nakukurian pagkontrol han kadamu han panahon nga ginagamit ha kaliawan. An 18 anyos nga sister nga hi Abigail nagsiring: “Narirelaks ako kon nagkikita ako hin TV katapos han sagipo nga adlaw. Pero kon diri ako magbantay, mahimo ako magkinita hin TV hin damu ka oras.” An batan-on nga brother nga hi Samuel nagsiring: “Usahay nagkikinita ako hin damu nga haglipot nga video ha Internet. Usa la anay an akon ginkikita, ngan diri ko napapansin nga tulo o upat na ngay-an ka oras an naglabay.”

¹⁷ Paonan-o mo makukontrol an kadamu han  imo panahon para ha kaliawan? Siyahan, hibaroi kon ano kadamu nga panahon an imo igin-gagahin hito. Mahimo ka magrekord hin kanan usa ka semana. Ilista ha kalendaryo kon pira ka oras an imo pagkinita hin TV, pag-ininternet, ngan pag-inuyag ha imo gadyet. Kon nakita mo nga damu gud nga panahon an imo nagagamit hito, paghimo hin eskedyol. Unaha paggahin hin panahon ha mas importante nga mga butang, kahuman, isunod na an para ha kaliawan. Katapos, pag-ampo kan Jehova nga buligan ka nga masunod an imo eskedyol. Hito nga paagi, magkakaada ka panahon ngan kusog nga imo ginkikinahanglan ha imo personal nga pag-aram ha Biblia, pagsingba han pamilya, mga katirok han kongregasyon, ngan ha pagsangyaw ngan pagtutdo nga buruhaton. Posible nga diri ka liwat makukonsensya ha panahon nga imo igin-gagahin ha kaliawan.

18-19. Paonan-o naton maipapakita nga eksklusibo an aton debosyon kan Jehova?

¹⁸ Katapos igsurat ni apostol Pedro an mahitungod han kataposan han kalibotan ni Satanas ngan han tiarabot nga bag-o nga kalibotan, hiya nagsiring: “Mga hinigugma, tungod kay naghihinulat kamo hini nga mga butang, buhata an iyo bug-os nga mahihimo basi ha kataposan makita niya kamo nga waray buring ngan waray hugaw ngan may kamurayawan.” (2 Ped. 3:14) Kon ginsusunod naton ito nga sagdon ngan ginbubuhat an gimaopayi basi magpabilin nga limpyo ha moral ngan espirituwal, ginpapakita naton nga eksklusibo an aton debosyon kan Jehova.

¹⁹ Hi Satanas ngan an iya sistema padayon nga magsusulay ha aton nga bag-uhon an aton mga prayoridad. (Luc. 4:13) Pero anoman nga ayat an aton gin-aatubang, diri naton tutugotan an bisan hin-o o an bisan ano nga sumaliwan kan Jehova ha aton kasingkasing. Determinado kita nga ihatag kan Jehova an para gud la ha iya​—an aton eksklusibo nga debosyon!