1-2. (a) Ha diri na maiha, ano an ipuproklamar han mga lider han kalibotan? (b) Ano nga mga pakiana an kinahanglan mabaton?

IMADYINA nga iginpuproklamar na han mga lider han kalibotan an ira maiha na nga ginpapamulat nga proklamasyon nga “kamurayawan ngan kasigurohan.” Bangin iginrarakudaku nira nga mamurayawon na gud an kalibotan. Karuyag nira nga hunahunaon naton nga kontrolado na nira an kahimtang han kalibotan. Pero diri gud nira kontrolado an sunod nga mahitatabo! Kay ano? Sumala han tagna ha Biblia, “tigda nga maabot dayon ha ira an kabungkagan, . . . ngan diri gud hira makakapalagiw.”​—1 Tes. 5:3.

² May importante nga mga pakiana nga kinahanglan mabaton: Ano an mahitatabo ha “daku nga kasakitan”? Ano an ginlalaoman ni Jehova nga bubuhaton naton hito nga panahon? Ngan paonan-o kita mangangandam yana para makapabilin nga matinumanon ha daku nga kasakitan?​—Mat. 24:21.

3. Sumala ha Pahayag 17:5, 15-18, paonan-o bubungkagon han Dios an “Babilonya nga Gamhanan”?

³ Basaha an Pahayag 17:5, 15-18. Bubungkagon an “Babilonya nga Gamhanan”! Sugad han gin-unabi na, diri makukontrol han mga lider han kalibotan an mahitatabo hito nga panahon. Kay ano? Kay “[ibubutang] ito han Dios ha ira kasingkasing basi buhaton an iya panhunahuna.” Ano ito nga panhunahuna? Bungkagon an imperyo han buwa nga relihiyon ha kalibotan, upod na an Kakristianohan. * Ibubutang han Dios an iya panhunahuna ngada ha kasingkasing han “napulo nga sungay” han “mapintas nga hayop  nga an kolor malamrag an kapula.” An napulo nga sungay nagrirepresentar han ngatanan nga politikal nga gahum nga nasuporta ha “mapintas nga hayop”​—an United Nations. (Pah. 17:3, 11-13; 18:8) Kon atakehon na hinin politikal nga mga gahum an buwa nga relihiyon, ito an magigin sinyales nga nagtikang na an daku nga kasakitan. Magigin tigda ngan makaharadlok gud ito nga panhitabo ha bug-os nga kalibotan.

4. (a) Ano an posible nga ihatag nga rason han mga lider han kalibotan basi pakamatadungon an ira pag-atake ha buwa nga relihiyon? (b) Ano an posible nga buhaton han mga membro hito nga mga relihiyon?

⁴ Diri kita maaram han mga rason nga ihahatag han mga lider han kalibotan basi pakamatadungon an ira pag-atake ha Babilonya nga Gamhanan. Bangin sumiring hira nga an mga relihiyon ha kalibotan usa nga ulang para ha kamurayawan ngan pirme ito nanginginlabot ha politika. O bangin sumiring hira nga ito nga mga relihiyon nakatirok na hin damu hinduro nga karikohan ngan mga panag-iya. (Pah. 18:3, 7) Ini nga pag-atake posible gud nga diri nagpapasabot nga bubungkagon an ngatanan nga membro hito nga mga relihiyon. Lugod, baga hin an bubungkagon la han mga lider han kalibotan amo an relihiyoso nga mga organisasyon. Kon mabungkag na ito nga mga organisasyon, masasantop han mga membro hito nga ginpakyas hira han mga lider han ira relihiyon ngan posible nga ignigar na nira ito nga mga relihiyon.

5. Ano an iginsaad ni Jehova mahitungod ha daku nga kasakitan, ngan kay ano?

⁵ Waray ginsiring an Biblia kon mationan-o kaiha an pagbungkag ha Babilonya nga Gamhanan, pero maaram kita nga diri ito mag-iiha. (Pah. 18:10, 21) Nagsaad hi Jehova nga iya ‘pahahaliputon an mga adlaw’ han kasakitan basi matalwas an iya “mga pinili” ngan an tinuod nga relihiyon. (Mar. 13:19, 20) Pero ano an ginlalaoman ni Jehova nga bubuhaton naton ha panahon han pagtikang han daku nga kasakitan tubtob ha girra han Armagedon?

6. Kay ano nga labaw pa an ginkikinahanglan kay ha pagbaya la ha buwa nga relihiyon?

⁶ Sugad han nahisgotan ha nauna nga artikulo, naglalaom hi Jehova nga an iya mga magsiringba mabulag ha Babilonya nga Gamhanan.  Pero, labaw pa an kinahanglan kay ha pagbaya la ha buwa nga relihiyon. Kinahanglan magin determinado kita nga makigbahin ha tinuod nga relihiyon​—an putli nga pagsingba kan Jehova. Tagda an duha nga paagi nga mahihimo naton ito.

7. (a) Paonan-o naton padayon nga masusunod hin marig-on an matadong nga mga suruklan ni Jehova ha moral? (b) Paonan-o ginpapabug-atan han Hebreo 10:24, 25 an pagkaimportante han aton mga katirok, labi na yana?

⁷ Siyahan, kinahanglan padayon nga sundon naton hin marig-on an matadong nga mga suruklan ni Jehova ha moral. Diri gud kita nauyon ha panggawi ngan mga suruklan han kalibotan. Pananglitan, diri kita nauyon ha bisan ano nga seksuwal nga imoralidad, upod na an pag-asawa han pariho an sekso ngan iba pa nga homoseksuwal nga buhat. (Mat. 19:4, 5; Roma 1:26, 27) Ikaduha, kinahanglan padayon kita nga magsingba kaupod han aton mga igkasi-Kristiano. Ginbubuhat naton ini hain man kita, ha Kingdom Hall man o, kon kinahanglan, ha pribado nga mga balay o ha tago pa ngani nga mga lugar. Anoman an mahitabo, diri gud kita maundang ha pagtambong ha aton mga katirok. Ngani, kinahanglan naton magkatirok “labi na gud samtang nakikita [naton] nga nagtitikahirani na an adlaw.”​—Basaha an Hebreo 10:24, 25.

8. Paonan-o posible magbag-o an aton mensahe ha tiarabot nga panahon?

⁸ Ha daku nga kasakitan, posible nga magbag-o an mensahe nga aton iginsasangyaw. Yana, nagsasangyaw kita han maopay nga sumat han Ginhadian ngan naniningkamot ha panhimo hin mga disipulo. Pero hito nga panahon, bangin an mensahe nga aton ipapasamwak sugad kabug-at han dagku nga uran nga yelo. (Pah. 16:21) Bangin ipasamwak naton an hirani na gud nga kabungkagan han kalibotan ni Satanas. Ha tiarabot nga panahon, mahibabaroan naton kon ano gud an aton mensahe ngan kon paonan-o naton ito igsusumat. Gagamiton la ba gihapon naton an pariho nga mga pamaagi nga aton na ginagamit ha sobra usa ka gatos ka tuig basi matuman an aton ministeryo? O magamit na ba kita hin iba nga mga pamaagi? Diri kita maaram. Anoman ito nga pamaagi, baga hin makakapribilehiyo kita nga maisugon nga ipasamwak an mensahe han paghukom ni Jehova!​—Ezek. 2:3-5.

9. Ano an posible magin reaksyon han mga nasud ha aton mensahe, kondi ha ano kita makakasiguro?

⁹ Posible gud nga an aton mensahe makaaghat ha mga nasud nga maniguro nga diri na gud kita pasangyawon. Sugad la nga nasarig kita han bulig ni Jehova ha aton ministeryo yana, kinahanglan liwat kita sumarig han bulig ni Jehova hito nga panahon. Makakasiguro kita nga tatagan kita han aton Dios hin gahum basi matuman an iya kaburut-on.​—Mic. 3:8.

10. Sugad han igintagna ha Lucas 21:25-28, ano an magigin reaksyon han kadam-an nga tawo han mahitatabo ha daku nga kasakitan?

¹⁰ Basaha an Lucas 21:25-28. Ha daku nga kasakitan, makakalasan an mga tawo samtang nakikita nira nga nagtitikang na mapakyas an ngatanan nga ira ginhuhunahuna hadto nga marig-on gud ha kalibotan. ‘Duro [hira] nga masasakit’ ngan mahahadlok nga bangin mamatay hira hiton pinakamakuri nga panahon ha kasaysayan han tawo. (Zep. 1:14, 15) Hito nga panahon, posible nga magin mas makuri gud an kinabuhi bisan ha katawohan ni Jehova. Tungod kay nagpapabilin kita nga bulag ha kalibotan, bangin mag-antos kita hin mga kakurian. Bangin mawad-an kita han aton mga panginahanglan.

11. (a) Kay ano nga magpupokus an mga nasud ha mga Saksi ni Jehova? (b) Kay ano nga diri kita angay mahadlok ha daku nga kasakitan?

¹¹ Ha urhi, an mga tawo nga nabungkag na an relihiyon bangin masina kay nagpapadayon la  gihapon an mga Saksi ni Jehova. Maiimadyin naton an kasamok nga mahimo mahitabo tungod hini, pati ha social media. Mangangalas ha aton an mga nasud ngan an ira magmarando nga hi Satanas kay kita na la an relihiyon nga nagpapabilin. Waray pa maglalampos an ira tumong nga wad-on an ngatanan nga relihiyon ha tuna. Salit magpupokus hira ha aton. Hini nga takna, bubuhaton na han mga nasud an papel ni Gog han Magog. * Magkakaurosa hira ha mabangis nga pag-atake ha katawohan ni Jehova. (Ezek. 38:2, 14-16) Bangin mabaraka kita kon ano an mahitatabo hito nga panahon, labi na kay diri kita maaram han eksakto nga detalye. Pero, ini an sigurado: Diri kita angay mahadlok ha daku nga kasakitan. Tatagan kita ni Jehova hin mga instruksyon kon paonan-o matatalwas. (Sal. 34:19) Mahihimo naton nga ‘tumindog hin tadong ngan humangad’ kay maaram kita nga an aton “katalwasan nagtitikahirani na.” *

12. Paonan-o kita igin-aandam han “matinumanon ngan maaramon nga uripon” ha tiarabot nga panhitabo?

¹² Igin-aandam kita han “matinumanon ngan maaramon nga uripon” nga makapabilin nga matinumanon ha daku nga kasakitan. (Mat. 24:45) Ginbubuhat ini ha damu nga paagi, kondi tagda an usa nga ehemplo: an aton napapanahon nga mga programa han kombensyon han tuig 2016-2018. Pinaagi hito nga mga programa, nadasig kita nga parig-unon an mga kalidad nga kinahanglan naton samtang nagtitikahirani kita ha adlaw ni Jehova. Repasuhon naton hin madaliay ito nga mga kalidad.

13. Paonan-o naton mapaparig-on an aton pagkamaunungon kan Jehova, ngan kay ano nga kinahanglan naton ito buhaton yana?

¹³ Pagkamaunungon: An tema han 2016 nga programa han kombensyon amo an “Magpabilin nga Maunungon kan Jehova!” Ini nga programa nagtutdo ha aton nga kon may marig-on kita ngan duok nga relasyon kan Jehova, magigin maunungon kita ha iya. Ginpahinumdoman kita nga magigin duok kita kan Jehova pinaagi han aton kinasingkasing nga pag-ampo ngan maduruto nga pag-aram han iya Pulong. An pagbuhat hito naghahatag ha aton hin kusog nga makaya bisan an pinakamakuri nga mga problema. Samtang nagtitikahirani an kataposan han sistema ni Satanas, makakalaom kita nga maatubang kita hin mas makuri nga mga pagsari han aton pagkamaunungon ha Dios ngan ha iya Ginhadian. Posible nga padayon kita nga tamayon. (2 Ped. 3:3, 4) Bangin an nangunguna nga rason hini tungod kay nagpapabilin kita nga neutral. Kinahanglan parig-unon naton an aton pagkamaunungon yana basi makapabilin kita nga maunungon ha daku nga kasakitan.

14. (a) Ano nga pagbag-o an mahitatabo may kalabotan ha kabugtoan nga nangunguna dinhi ha tuna? (b) Kay ano nga kinahanglan kita magin maunungon hito nga panahon?

¹⁴ Ha daku nga kasakitan, magkakaada pagbag-o may kalabotan ha kabugtoan nga nangunguna dinhi ha tuna. May takna hito nga panahon nga an ngatanan nga dinihogan nga aanhi pa ha tuna titirukon ha langit basi makigbahin ha girra han Armagedon. (Mat. 24:31; Pah. 2:26, 27) Nangangahulogan ini nga an Nagmamando nga Lawas diri na naton makakaupod dinhi ha tuna. Bisan pa hito, an daku nga grupo magpapabilin nga organisado. An kwalipikado nga kabugtoan nga membro han daku nga grupo amo an mangunguna. Kinahanglan ipakita  naton an aton pagkamaunungon pinaagi ha pagsuporta hini nga kabugtoan ngan ha pagsunod han ira giya nga tikang ha Dios. Dida hito nadepende an aton katalwasan!

15. Paonan-o naton mapaparig-on an aton pagpailob, ngan kay ano nga kinahanglan naton ito buhaton yana?

¹⁵ Pagpailob: An tema han 2017 nga programa han kombensyon amo an “Ayaw pag-undang!” Ini nga programa nakabulig ha aton nga parig-unon an aton abilidad nga makailob ha mga pagsari. Nahibaroan naton nga an aton pagpailob diri nakadepende ha mag-opay nga kahimtang. Mapaparig-on naton an aton pagpailob pinaagi ha pagsarig kan Jehova. (Roma 12:12) Hinaot diri naton hingalimtan an saad ni Jesus: “An nagpapailob tubtob ha kataposan matatalwas.” (Mat. 24:13, ftn.) Ini nga saad nagpapasabot nga kinahanglan kita magpabilin nga matinumanon anoman nga kakurian an aton atubangon. Kon nagpapailob kita ha tagsa nga pagsari yana, magigin mas marig-on kita antes magtikang an daku nga kasakitan.

16. Paonan-o kita nagkakaada kaisog, ngan paonan-o naton mapaparig-on yana an aton kaisog?

¹⁶ Kaisog: An tema han 2018 nga programa han kombensyon amo an “Magin Maisugon!” Ini nga programa nagpahinumdom ha aton nga diri kita nagigin maisugon tungod han aton mga abilidad. Pariho han pagpailob, nagkakaada kita tinuod nga kaisog tungod ha pagsarig kan Jehova. Paonan-o naton mapaparig-on an aton pagsarig ha iya? Pinaagi ha pagbasa han iya Pulong kada adlaw ngan pagpamalandong kon paonan-o gintalwas ni Jehova an iya katawohan han naglabay. (Sal. 68:20; 2 Ped. 2:9) Kon atakehon na kita han mga nasud ha daku nga kasakitan, kinahanglan naton magin maisugon ngan sumarig gud kan Jehova. (Sal. 112:7, 8; Heb. 13:6) Kon nasarig kita yana kan Jehova, magkakaada kita han kaisog nga aton ginkikinahanglan ha pag-atubang han pag-atake ni Gog. *

17. Kay ano nga diri kita angay mahadlok ha Armagedon? (Kitaa an retrato ha kobre.)

¹⁷ Sugad han gin-unabi ha naglabay nga artikulo, kadam-an ha aton tikang pa ha katawo, nagkikinabuhi na ha kataposan nga mga adlaw. Pero naglalaom liwat kita nga makakatalwas  kita ha daku nga kasakitan. An girra han Armagedon amo an magigin kataposan hini nga sistema. Kondi, diri kita angay mahadlok. Kay ano? Tungod kay pakig-away ini han Dios. (Prob. 1:33; Ezek. 38:18-20; Zac. 14:3) Kon magsugo na hi Jehova, pangungunahan ni Jesu-Kristo an pakig-away. Maupod ha iya an binanhaw nga mga dinihogan ngan an minilyon nga anghel. Hira ngatanan makikiggirra kan Satanas, ha iya mga demonyo, ngan ha ira kasundalohan ha tuna.​—Dan. 12:1; Pah. 6:2; 17:14.

18. (a) Ano an iginpapasarig ni Jehova? (b) Paonan-o an Pahayag 7:9, 13-17 nagpapasarig ha imo nga matatalwas ka hiton tiarabot nga panahon?

¹⁸ Hi Jehova nagpapasarig: “Waray armas nga ginporma kontra ha imo an maglalampos.” (Isa. 54:17) An “usa nga daku nga grupo” han matinumanon nga mga magsiringba ni Jehova ‘matatalwas ha daku nga kasakitan’! Katapos, padayon hira nga magbubuhat hin sagrado nga pag-alagad ha iya. (Basaha an Pahayag 7:9, 13-17.) Ginpapasarig gud kita han Biblia nga matatalwas kita hiton tiarabot nga panahon! Maaram kita nga “ginpapanalipdan ni Jehova an mga matinumanon.” (Sal. 31:23) An ngatanan nga nahigugma ngan nagdadayaw kan Jehova malilipay nga makita nga ginbibindikar niya an iya baraan nga ngaran.​—Ezek. 38:23.

19. Ano nga makalilipay nga paglaom an aton maieksperyensyahan ha diri na maiha?

¹⁹ Hunahunaa kon ano an posible nga mababasa ha 2 Timoteo 3:2-5 kon an ihuhulagway hito adton mga tawo ha bag-o nga kalibotan nga waray na han impluwensya ni Satanas. (Kitaa an kahon nga “ An Magigin Panggawi han mga Tawo ha Bag-o nga Kalibotan.”) Hi Bugto George Gangas, * nga nagin membro han Nagmamando nga Lawas, naghulagway hini nga paagi: “An kalibotan magigin makaruruyag gud nga lugar kon an ngatanan magin magburugto na! Diri na maiha, makakapribilehiyo ka nga magkinabuhi ha bag-o nga sistema. Mabubuhi ka samtang buhi hi Jehova. Mabubuhi kita ha kadayonan.” Makalilipay gud ito nga paglaom!