GIN-UUSISA han paraanunsyo han panahon an usa nga napuporma nga retrato ha radar. May nakikita hiya nga peligroso nga bagyo nga makakaigo ha usa nga lugar nga damu an tawo. Tungod kay nababaraka hiya ha katalwasan han mga tawo, ginhimo niya an ngatanan basi pahamangnoan hira samtang may panahon pa.

Ha pariho nga paagi, ginpapahamangnoan ni Jehova yana an mga umurukoy ha tuna mahitungod ha “bagyo” nga mas peligroso gud kay ha bisan ano nga ira mababatian nga balita may kalabotan ha kahimtang han panahon. Paonan-o niya ito ginhihimo? Paonan-o kita makakasiguro nga naghahatag hiya hin igo nga panahon ha mga tawo basi gumios? Para mabaton ito, tagdon anay naton an pipira nga pahamangno nga iginhatag ni Jehova ha naglabay.

Ha panahon han Biblia, nagpahamangno hi Jehova mahitungod hin iba-iba nga “bagyo,” o paghukom, nga iya ipapadapat hadton tinuyo nga nagtatalapas han iya mga sugo. (Prob. 10:25; Jer. 30:23) Ha tagsa nga kahimtang, abanse niya nga ginpahamangnoan adton mga maaapektohan ngan ginsidngan hira nga maghimo hin mga pagbag-o nga uyon ha iya kaburut-on. (2 Hadi 17:12-15; Neh. 9:29, 30) Basi maaghat an mga tawo nga magbag-o, kaurogan nga nagamit hiya han iya maunungon nga mga surugoon ha tuna basi ipahibaro an iya paghukom ngan ipakita an pagkaapurado hito.​—Amos 3:7.

Hi Noe usa hiton matinumanon nga mga surugoon. Ha damu nga katuigan, maisugon nga ginpahamangnoan niya an imoral ngan madarahog nga katawohan ha iya panahon mahitungod han tiarabot nga bug-os-kalibotan nga Baha. (Gen. 6:9-13, 17) Ginsumatan liwat niya hira kon ano an kinahanglan buhaton basi matalwas​—nagsangyaw gud hiya salit ha urhi gintawag hiya nga “parasangyaw han katadongan.”​—2 Ped. 2:5.

Bisan pa han paningkamot ni Noe, ginbalewaray han mga tawo an iya mensahe nga tikang ha Dios. Waray gud hira magpakita hin pagtoo. Salit, namatay hira han inabot an Delubyo ngan “igin-anod hira ngatanan.” (Mat. 24:39; Heb. 11:7) Han hirani na hira mamatay, diri gud hira makakasiring nga waray hira pahamangnoi han Dios.

Ha iba nga panahon, ginpahamangnoan ni Jehova an mga tawo han hirani na magtikang an “bagyo” han iya paghukom. Bisan pa hito, ginsiguro niya nga tagan hin igo nga panahon an apektado nga mga tawo basi gumios. Pananglitan, naghatag hiya hin abanse nga mga pahamangno antes niya ipadapat an Napulo nga Peste ha kadaan nga Ehipto. Ginsugo ni Jehova hira Moises ngan Aaron basi pahamangnoan an Paraon ngan an iya mga surugoon mahitungod han ikapito nga peste, usa nga nakakadaot nga pag-uran hin yelo. Tungod kay ito nga uran magtitikang kinabuwasan, gintagan ba hira han Dios hin igo nga panahon nga makabiling hin matatagoan basi makalikay ha bagyo? An Biblia nagsiring: “An bisan hin-o ha mga surugoon han Paraon nga nahadlok ha pulong ni Jehova nagdagmit ha pagpasulod han iya kalugaringon nga mga surugoon ngan han iya mga hayop ha mga balay, pero an bisan hin-o nga waray magbutang han pulong ni Jehova ha iya kasingkasing, ginbayaan niya an iya mga surugoon ngan an iya mga hayop ha uma.” (Ex. 9:18-21) Matin-aw, waray magkulang hi Jehova ha pagpahamangno, salit adton ginios dayon natalwas tikang ha maraot gud nga epekto hito nga peste.

Ginpahamangnoan liwat an Paraon ngan an iya mga surugoon antes ipadapat an ikanapulo nga peste. Pero iginsalikway nira an pahamangno. (Ex. 4:22, 23) Tungod hito, nakita nira an kamatay han ira suhag nga mga anak. Makasurubo gud ito! (Ex. 11:4-10; 12:29) May panahon pa ba hira nga mamati ha pahamangno? Oo! Ginpahamangnoan dayon ni Moises an mga Israelita han tiarabot nga ikanapulo nga peste ngan ginsumatan hira kon paonan-o matatalwas an ira pamilya. (Ex. 12:21-28) Pira kadamu an ginios uyon ha pahamangno? Sumala ha pipira nga pagbanabana, tulo ka milyon, upod na  an mga Israelita ngan an “usa ka daku hinduro nga grupo han magkadurodilain nga mga tawo” nga diri mga Israelita pati mga Ehiptohanon, an natalwas ha paghukom han Dios ngan nakagawas ha Ehipto.​—Ex. 12:38; ftn.

Sugad han iginpapakita hini nga mga ehemplo, pirme ginsisiguro ni Jehova nga may igo nga panahon an mga tawo nga mamati ha iya mga pahamangno. (Deut. 32:4) Kay ano nga ginbubuhat niya ito? Iginsaysay ni apostol Pedro nga “diri [ni Jehova] karuyag nga mabungkag an bisan hin-o, lugod karuyag niya nga magbasol an ngatanan.” (2 Ped. 3:9) Oo, hinigugma han Dios an mga tawo. Karuyag niya nga magbasol hira ngan magbag-o antes umabot an iya paghukom.​—Isa. 48:17, 18; Roma 2:4.

An ngatanan nga tawo kinahanglan liwat gumios ha importante nga pahamangno nga iginpapasamwak yana ha bug-os nga kalibotan. Han nakanhi hi Jesus ha tuna, nagpahamangno hiya nga an presente nga sistema mabubungkag ha panahon han usa nga “daku nga kasakitan.” (Mat. 24:21) May kalabotan hito nga tiarabot nga paghukom, naghatag hiya hin detalyado nga tagna nga nagsusumat ha iya mga disipulo kon ano an ira makikita ngan maieksperyensyahan samtang nagtitikahirani ito nga panahon. Igintagna ni Jesus an importante nga panhitabo ha bug-os nga kalibotan nga nakikita naton yana an katumanan hito.​—Mat. 24:3-12; Luc. 21:10-13.

Uyon hito nga tagna, gin-aaghat ni Jehova an tagsa nga tawo nga magpasakop ha Iya mahigugmaon nga pagmando. Hingyap niya nga an masinugtanon nga mga tawo magkaada mas maopay nga kinabuhi yana ngan magpahimulos han tiarabot nga mga bendisyon ha iya matadong nga bag-o nga kalibotan. (2 Ped. 3:13) Basi maaghat an mga tawo nga tumoo ha iya mga saad, naghatag hi Jehova hin nagtatalwas-kinabuhi nga mensahe​—an “maopay nga sumat han Ginhadian,” nga igintagna ni Jesus nga “isasangyaw ha bug-os nga inuukyan nga tuna sugad nga pamatuod ha ngatanan nga nasud.” (Mat. 24:14) Gin-oorganisar han Dios an iya tinuod nga mga magsiringba basi maghatag hini nga “pamatuod,” o magsangyaw hini nga mensahe han Dios, ha mga 240 nga nasud. Karuyag ni Jehova nga mamati ha pahamangno an damu nga tawo tubtob nga posible ngan makapalagiw ha tiarabot nga “bagyo” han iya matadong nga paghukom.​—Zep. 1:14, 15; 2:2, 3.

Kon sugad, an importante nga pakiana yana diri kay kon naghahatag ba hi Jehova hin igo nga panahon ha mga tawo nga gumios uyon ha iya mga pahamangno. Iginpapakita han ebidensya nga pirme niya ito ginhihimo. Lugod, ini an importante nga pakiana: Mamamati ba an mga tawo ha pahamangno han Dios samtang may panahon pa? Hinaot sugad nga mga mensahero han Dios, padayon naton nga buligan an damu nga tawo tubtob nga posible nga makatalwas ha kataposan hini nga sistema.