1. Ano an kaya buhaton ni Jehova para matuman an iya katuyoan?

HI Jehova magigin bisan ano nga ginkikinahanglan basi matuman an iya katuyoan. Pananglitan, hi Jehova nagigin Magturutdo, Paraliaw, ngan Ebanghelisador​—pipira la ini han iya damu nga papel. (Isa. 48:17; 2 Cor. 7:6; Gal. 3:8) Bisan pa hito, agsob niya gamiton an mga tawo basi matuman an iya mga katuyoan. (Mat. 24:14; 28:19, 20; 2 Cor. 1:3, 4) Kaya liwat kita tagan ni Jehova han kinaadman ngan kusog nga aton kinahanglan basi magin bisan ano nga ginkikinahanglan para matuman an iya kaburut-on. Ini ngatanan bahin han kahulogan han ngaran ni Jehova, sugad la han iginsiring han pipira nga eskolar.

2. (a) Kay ano nga usahay nagruruhaduha kita kon ginagamit ba kita ni Jehova? (b) Ano an aton hihisgotan hini nga artikulo?

² Kita ngatanan karuyag magpagamit kan Jehova, pero may pipira nga nagruruhaduha kon ginagamit ba hira ni Jehova. Kay ano? Kay inaabat nira nga nalilimitahan hira han ira edad, kahimtang, o abilidad. Ha luyo nga bahin, an iba bangin kontento na ha ira ginbubuhat ngan naabat nga diri na nira kinahanglan maghimo hin dugang pa ha ira pag-alagad. Hini nga artikulo, aton hihisgotan kon paonan-o kita ginbubuligan ni Jehova basi matuman an iya katuyoan. Sunod, uusisahon naton an mga asoy ha Biblia kon paonan-o gintagan ni Jehova an iya mga surugoon​—kalalakin-an ngan kababayin-an—​han hingyap ngan han gahum ha pagbuhat. Katapos, hihisgotan naton kon paonan-o kita magpapagamit kan Jehova.

3. Uyon ha Filipos 2:13, paonan-o kita mahimo tagan ni Jehova han hingyap nga magbuhat?

³ Basaha an Filipos 2:13. * Kaya kita tagan ni Jehova han hingyap nga magbuhat. Paonan-o niya ito mahimo buhaton? Bangin may mahibaroan kita nga partikular nga panginahanglan ha kongregasyon. O bangin may basahon an mga tigurang nga surat tikang ha sanga nga opisina nga nagsusumat han panginahanglan ha teritoryo nga diri sakop han aton kongregasyon. Tungod hito, bangin pakianhan naton an aton kalugaringon, ‘Ano an akon bubuhaton basi makabulig hini nga panginahanglan?’ O bangin gintagan kita hin makuri nga toka, pero naghuhunahuna kita kon mahihimo ba naton ito. O katapos naton magbasa hin teksto bangin maghunahuna kita, ‘Paonan-o ko maiaaplikar ini nga teksto basi makabulig ha iba?’ Diri kita pipiriton ni Jehova nga buhaton an usa nga butang. Pero kon nakikita niya nga andam kita nga usisahon an aton kalugaringon, mahimo niya ihatag ha aton an hingyap nga buhaton an aton ginhuhunahuna.

4. Paonan-o kita mahimo tagan ni Jehova han gahum ha pagbuhat?

⁴ Kaya liwat ni Jehova ihatag ha aton an gahum ha pagbuhat. (Isa. 40:29) Mahimo niya pauswagon an aton natural nga mga abilidad pinaagi han iya baraan nga espiritu. (Ex. 35:30-35) Pinaagi han iya organisasyon, mahimo kita tutdoan ni Jehova kon paonan-o bubuhaton an partikular nga toka. Kon diri ka sigurado kon paonan-o bubuhaton an usa nga toka, pangaro hin bulig. Ayaw liwat pag-alang ha pag-aro ha aton mahinatagon nga Amay ha langit para han “diri ordinaryo nga gahum.” (2 Cor. 4:7; Luc. 11:13) Mababasa ha Biblia an damu nga ehemplo kon paonan-o ginbuligan ni Jehova an kalalakin-an ngan kababayin-an pinaagi ha paghatag ha ira han hingyap ngan gahum ha pagbuhat. Samtang aton ginhihisgotan an pipira hini nga asoy, hunahunaa kon paonan-o ka mahimo gamiton ni Jehova ha pariho nga paagi.

5. Ano an aton mahibabaroan may kalabotan ha kon paonan-o ngan kon kakan-o gin-gamit ni Jehova hi Moises ha pagtalwas han iya katawohan?

⁵ Ginpahinabo ni Jehova nga hi Moises magin paratalwas han mga Israelita. Pero kakan-o hiya gin-gamit ni Jehova? Han inabat ba ni Moises nga kwalipikado na hiya kay “gintutdoan [hiya] han ngatanan nga kinaadman han mga Ehiptohanon”? (Buh. 7:22-25) Diri. Gin-gamit la ni Jehova hi Moises han katapos na Niya hiya moldehon nga magin mapainubsanon ngan malumo. (Buh. 7:30, 34-36) Gintagan ni Jehova hi Moises hin kaisog nga umatubang ha pinakagamhanan nga magmarando ha Ehipto. (Ex. 9:13-19) May kalabotan ha kon paonan-o ngan kon kakan-o gin-gamit ni Jehova hi Moises, ano an aton mahibabaroan hito? Ginagamit ni Jehova adton nagpapakita hin diosnon nga mga kalidad ngan adton nasarig ha iya para hin kusog.​—Fil. 4:13.

6. Ano an aton mahibabaroan ha paagi han paggamit ni Jehova kan Barzilai ha pagbulig kan Hadi David?

⁶ Paglabay hin mga siglo, gin-gamit ni Jehova hi Barzilai basi magtagana kan Hadi David. Hi David ngan an katawohan “ginugutom ngan kinakapoy ngan inuuhaw” samtang napalagiw ha iya anak nga hi Absalom. Kaupod han iba pa, iginbutang ni Barzilai ha peligro an iya kinabuhi, nga hini nga panahon lagas na basi makagtagana kan David ngan ha iya mga kaupod. Waray hunahunaa ni Barzilai nga tungod kay lagas na hiya, diri na hiya magagamit ni Jehova. Lugod, gin-gamit niya kon ano an may-ada hiya ha pagbulig ha mga surugoon han Dios nga nanginginahanglan. (2 Sam. 17:27-29) Ano an aton mahibabaroan nga leksyon? Anoman an aton edad, mahimo kita gamiton ni Jehova basi mapun-an  an panginahanglan han aton mga igkasi-tumuroo, ha aton man lugar o ha iba nga nasud, nga waray han nangunguna nga panginahanglan. (Prob. 3:27, 28; 19:17) Bisan kon diri naton hira personal nga mabubuligan, mahimo kita makagdonar para ha bug-os-kalibotan nga buruhaton basi may magamit nga pundo ha pag-ayuda ha panahon ngan ha lugar nga ginkikinahanglan ito.​—2 Cor. 8:14, 15; 9:11.

7. Paonan-o gin-gamit ni Jehova hi Simeon, ngan paonan-o an paghibaro hito makakadasig ha aton?

⁷ Hi Jehova nagsaad kan Simeon, usa nga maunungon nga lagas ha Jerusalem, nga diri hiya mamamatay tubtob nga diri pa niya nakikita an Mesias. Sigurado nga nadasig gud hi Simeon hito nga saad, kay maiha na niya nga ginhihinulat an Mesias. Ginbalosan an iya pagtoo ngan pagpailob. Usa ka adlaw, “pinaagi han gahum han espiritu,” kinadto hiya ha templo. Didto, nakita niya an minasus-an nga hi Jesus, ngan gin-gamit ni Jehova hi Simeon ha pagtagna mahitungod hini nga bata nga magigin an Kristo. (Luc. 2:25-35) Bisan kon posible nga namatay hi Simeon antes magtikang an ministeryo ni Jesus ha tuna, mapasalamaton hi Simeon ha iya nakarawat nga pribilehiyo, ngan damu pa nga mag-opay nga butang an iya mapapahimulosan ha tiarabot nga panahon! Ha bag-o nga kalibotan, makikita hiton matinumanon nga lalaki kon paonan-o an pagmando ni Jesus magigin bendisyon ha ngatanan nga pamilya ha tuna. (Gen. 22:18) Mapasalamaton liwat kita ha anoman nga pribilehiyo nga iginhahatag ha aton ni Jehova ha pag-alagad ha iya.

8. Paonan-o kita mahimo gamiton ni Jehova pariho han iya ginbuhat kan Bernabe?

⁸ Ha siyahan nga siglo C.E., usa nga mahinatagon nga lalaki nga hi Jose an andam magpagamit kan Jehova. (Buh. 4:36, 37) Posible nga tungod kay hi Jose maopay gud magliaw ha iba, gintawag hiya han mga apostol nga Bernabe, nga nangangahulogan nga “Anak han Pagliaw.” Pananglitan, han nagin tumuroo na hi Saul, damu nga kabugtoan an nahahadlok pagdaop ha iya kay kilala hiya nga paratimaraot han mga kongregasyon. Pero ginbuligan hi Saul han mahigugmaon nga hi Bernabe, ngan sigurado nga gin-apresyar gud ni Saul an iya pagkabuotan. (Buh. 9:21, 26-28) Ha urhi, nakita han mga tigurang ha Jerusalem nga nanginginahanglan hin pagdasig an kabugtoan ha Antiokia han Sirya. Hin-o an ira ginpakadto? Hi Bernabe! Maopay gud an ira napili. An asoy nasiring nga hi Bernabe “nagtikang pagdasig ha ira ngatanan nga magpabilin ha Ginoo nga may kinasingkasing nga determinasyon.” (Buh. 11:22-24) Yana, mahimo liwat kita buligan ni Jehova nga magin “anak han pagliaw” para ha mga igkasi-Kristiano. Pananglitan, mahimo kita niya gamiton ha pagliaw hadton namatayan hin hinigugma. O bangin pagiuson kita niya nga bisitahon o tawagan an usa nga may sakit o nadidepres basi maghatag hin pipira nga nakakaliaw nga pulong. Tutugotan mo ba hi Jehova nga gamiton ka pariho han iya paggamit kan Bernabe?​—1 Tes. 5:14.

9. Ano an aton mahibabaroan ha paagi han pagbulig ni Jehova kan Vasily nga magin may kapas nga espirituwal nga paraataman?

⁹ Ginbuligan ni Jehova an brother nga hi Vasily nga magin may kapas nga espirituwal nga paraataman. Han ginpili hi Vasily sugad nga tigurang ha edad nga 26, nabaraka hiya kay inabat niya nga diri hiya kwalipikado paghatag hin espirituwal nga bulig ha kongregasyon, labi na hadton naatubang hin kakurian. Kondi, nakakarawat hiya hin mapulsanon nga pagbansay tikang ha eksperyensyado nga mga tigurang ngan pinaagi ha pag-eskwela ha Kingdom Ministry School. Naningkamot gud hi Vasily nga mag-uswag. Pananglitan, iginlista niya an iya gudtiay nga tumong. Samtang iya ito ginkakab-ot usa-usa, hinay-hinay nga nadaog niya an iya mga kabaraka. Hiya nagsiring: “An akon ginkakabarak-an hadto naghahatag na ha akon yana hin daku nga kalipay. Kon ginbubuligan ako ni Jehova nga makita an angayan nga teksto para maliaw an usa nga bugto ha kongregasyon, naghahatag ito ha akon hin daku nga kalipay.” Mga brother, kon andam  kamo magpagamit kan Jehova pariho kan Vasily, mahimo kamo niya tagan han abilidad basi makagdumara hin mas daku nga responsabilidad ha kongregasyon.

10. Ano an ginbuhat ni Abigail, ngan ano an aton mahibabaroan ha iya ehemplo?

¹⁰ Hi David ngan an mga maunungon ha iya ginlalanat ni Hadi Saul, salit nanginginahanglan hira hin bulig. An mga tawo ni David naghangyo ha riko nga Israelita nga hi Nabal nga tagan hira hin gutiay nga pagkaon, kon ano la an aada ha iya. Inabat nira nga puydi hira mangaro kan Nabal kay ginpuproteksyonan nira an iya mga panon ha kamingawan. Pero waray maghatag hin bisan ano inin makikalugaringon nga hi Nabal. Nasina hi David ngan nagplano nga patayon hi Nabal pati an ngatanan nga lalaki ha iya panimalay. (1 Sam. 25:3-13, 22) Pero an asawa ni Nabal nga hi Abigail maaramon ngan mahusay. Maisugon nga kinadto hiya kan David, hinapa ha tiilan ni David, ngan gin-aghat hiya nga diri magin salaan ha dugo pinaagi ha pagbulos. Mataktika nga ginsagdonan niya hi David nga isarig kan Jehova an sitwasyon. An iya buotan nga mga pulong ngan maaramon nga paggios nakabantad han kasingkasing ni David. Nasantop ni David nga ginsugo ni Jehova hi Abigail. (1 Sam. 25:23-28, 32-34) Nakultibar ni Abigail an mag-opay nga kalidad salit gin-gamit hiya ni Jehova. Ha pariho nga paagi, an mga Kristiano nga sister nga nagkukultibar hin pagin mataktika ngan maaramon mahimo gamiton ni Jehova ha pagparig-on ha ira pamilya ngan ha iba ha kongregasyon.​—Prob. 24:3; Tito 2:3-5.

11. Ano an ginbuhat han mga anak nga babaye ni Salum, ngan hin-o an nagsusubad ha ira yana?

¹¹ Paglabay hin damu ka siglo, an mga anak nga babaye ni Salum kaapi hadton gin-gamit ni Jehova ha pag-ayad han mga pader han Jerusalem. (Neh. 2:20; 3:12) Bisan kon prinsipe an ira tatay, andam an mga anak ni Salum nga buhaton iton makuri ngan peligroso nga trabaho. (Neh. 4:15-18) Kabaliktaran gud hira han prominente nga kalalakin-an nga taga-Tekoa, nga “waray magpaubos basi makigbahin” ha buruhaton! (Neh. 3:5) Hunahunaa la an kalipay han mga anak ni Salum han natapos an proyekto hin 52 la ka adlaw! (Neh. 6:15) Yana, nalilipay an disidido nga mga sister ha pakigbahin ha espesyal nga klase hin pag-alagad​—an pagpanukod ngan pagmintinar han mga pasilidad nga igindedikar kan Jehova. An ira abilidad, kadasig, ngan pagkamaunungon importante ha kalamposan hini nga buruhaton.

12. Paonan-o kita mahimo gamiton ni Jehova pariho han iya ginbuhat kan Tabita?

¹² Ginpagios ni Jehova hi Tabita nga magbuhat hin damu nga “mag-opay nga mga buhat ngan mga regalo tungod ha kalooy,” labi na ha mga balo nga babaye. (Buh. 9:36) Tungod han iya pagin mahinatagon ngan buotan, damu an nasubo han namatay hiya. Pero nalipay gud hira han ginbanhaw hiya ni apostol Pedro. (Buh. 9:39-41) Ano an aton mahibabaroan kan Tabita? Bata man o lagas, lalaki o babaye, kita ngatanan makakahatag hin praktikal nga bulig ha aton kabugtoan.​—Heb. 13:16.

13. Paonan-o gin-gamit ni Jehova an awdanon nga sister nga hi Ruth, ngan ano an ginsiring ni Ruth?

¹³ An awdanon nga sister nga hi Ruth karuyag magmisyonera. Han bata pa hiya, gindadagmit la niya an panhatag hin mga tract ha balay-balay. “Nalilipay ako hini nga buruhaton,” siring niya. Pero nakukurian gud hiya ha pakiistorya ha mga tawo mahitungod han Ginhadian han Dios. Bisan kon awdanon hi Ruth, nagpayunir hiya ha edad nga 18. Han 1946, nag-eskwela hiya ha Watchtower Bible School of Gilead ngan ha urhi nag-alagad ha Hawaii ngan Japan. Gin-gamit gud hiya ni Jehova ha pagpasarang han maopay nga sumat hito nga mga nasud. Paglabay hin haros 80 ka tuig nga pakigbahin ha ministeryo, hiya nagsiring: “Pirme gud ako ginpaparig-on ni  Jehova. Ginbubuligan niya ako nga maatohan an akon pagkaawdanon. Natoo gud ako nga mahimo gamiton ni Jehova an bisan hin-o nga nasarig ha iya.”

14. Uyon ha Colosas 1:29, ano an kinahanglan naton buhaton kon karuyag naton magpagamit kan Jehova?

¹⁴ Ha bug-os nga kasaysayan, ginpapahinabo ni Jehova nga matuman han iya mga surugoon an damu nga magkaiba-iba nga papel. Ano an pahihinaboon niya ha imo nga magin? Madepende ito kon mationan-o ka kadisidido magpagamit. (Basaha an Colosas 1:29.) Kon andam ka magpagamit, mahimo pahinaboon ni Jehova nga magin usa ka nga madasigon nga ebanghelisador, epektibo nga magturutdo, maopay nga paraliaw, maabilidad nga trabahador, mabinuligon nga sangkay, o bisan ano nga iya ginkikinahanglan basi matuman an iya kaburut-on.

15. Sumala ha 1 Timoteo 4:12, 15, ano nga bulig an kinahanglan hangyoon kan Jehova han batan-on nga mga brother yana?

¹⁵ Kumusta man kamo nga mga batan-on nga brother nga hirani na magin adulto? Daku an panginahanglan hin makusog nga kalalakin-an nga magdudumara hin dugang nga responsabilidad sugad nga mga ministeryal nga surugoon. Ha damu nga kongregasyon, mas damu an tigurang kay ha ministeryal. Mga batan-on nga brother, mahimo ba niyo kultibaron an hingyap nga magdumara hin dugang nga responsabilidad ha kongregasyon? Usahay, may mga brother nga nasiring, “Kontento na ako nga mag-alagad sugad nga magwarali.” Kon ito an imo inaabat, hangyoa hi Jehova nga buligan ka nga kultibaron an hingyap nga magin kwalipikado nga ministeryal ngan hangyoa hiya nga tagan ka hin gahum nga mabuhat an ngatanan mo nga mahihimo ha pag-alagad ha iya. (Ecles. 12:1) Kinahanglan namon an iyo bulig!​—Basaha an 1 Timoteo 4:12, 15.

16. Ano an kinahanglan naton hangyoon kan Jehova, ngan kay ano?

¹⁶ Mahimo ka pahinaboon ni Jehova nga magin bisan ano nga ginkikinahanglan niya basi matuman an iya kaburut-on. Salit hangyoa hiya nga tagan ka han hingyap nga buhaton an iya buruhaton, katapos hangyoa hiya nga tagan ka han gahum nga imo ginkikinahanglan. Bata man o lagas, gamita an imo panahon, kusog, ngan mga abilidad ha pagdayaw kan Jehova yana. (Ecles. 9:10) Ayaw tuguti an kahadlok o pag-abat hin kawaray-kapas nga magin hinungdan nga diri mo karawaton an presyoso nga mga oportunidad ha pagbuhat han ngatanan mo nga mahihimo ha pag-alagad kan Jehova. Daku gud nga pribilehiyo an pagkaada bisan gutiay la nga bahin ha paghatag ha aton langitnon nga Amay han kadungganan nga takos gud ha iya!