Ginpakusog gud ni Jehova inin madasigon nga mga parasangyaw. Hito nga tuig, an 225 nga mga colporteur, o payunir, nagin 350 an kadamu. Ngan ha siyahan nga higayon, sobra 8,000 nga class worker, o magwarali, an nagreport ha headquarters han ira mga ginbuhat ha ministeryo. Ginbendisyonan gud hira ni Jehova kay damu an namati han ira mensahe.

Han Marso 21, 1920, hi Joseph F. Rutherford, nga amo an nangunguna ha mga Estudyante han Biblia hito nga panahon, nagpahayag han topiko nga “Minilyon nga Nabubuhi Yana an Diri Na Gud Mamamatay.” Nangalimbasog gud an mga Estudyante han Biblia nga imbitaron an mga interesado para hini nga okasyon. Ginpletehan nira an usa han pinakadaku nga mga teatro ha New York City ngan nanhatag hin mga 320,000 nga imbitasyon.

Waray laumi nga damu gud an maatender. Sobra 5,000 an inatender, ngan mga 7,000 an waray na makasulod ha teatro kay puno na ito. Gintawag ito han The Watch Tower sugad nga “usa han pinakamalampuson nga mga katirok nga ginhimo han International Bible Students.”

Nagin kilala an mga Estudyante han Biblia tungod ha pagpasamwak nga “minilyon nga nabubuhi yana an diri na gud mamamatay.” Hito nga panahon, diri hira maaram nga an mensahe han Ginhadian kinahanglan ipasamwak ha mas damu pa nga lugar. Bisan pa hito, duro gud an ira kadasig. Hi Ida Olmstead, nga nagtikang umatender ha mga katirok han 1902, nagsiring, “Maaram kami nga damu nga bendisyon an makakarawat han tanan nga tawo, ngan nangalimbasog gud kami nga isumat inin maopay nga sumat ha mga nakikilala namon ha ministeryo.”

Basi masiguro nga may suplay han espirituwal nga pagkaon, an kabugtoan mismo ha Bethel nagtikang mag-imprinta han pipira nga literatura. Nagpalit hira hin imprintahan ngan gin-instalar ito ha ginpletehan nga bilding ha 35 Myrtle Avenue, Brooklyn, New York, pipira ka bloke tikang ha Bethel.

Han Enero 1920, inabot hira Leo Pelle ngan Walter Kessler ha Bethel basi magtrabaho sugad nga boluntaryo. “Han inabot kami,” siring ni Walter, “an overseer han printery nagkita ha amon ngan nagsiring, ‘May usa ngan tunga ka oras pa kamo antes han paniudto.’ Ginhangyo niya kami nga dad-on ha igbaw an kinarton nga mga libro tikang ha basement.”

Ginsaysay ni Leo an nahitabo kinabuwasan: “Trabaho namon nga limpyohan an mga bungbong han una nga andana han bilding. Ito an pinakamahugaw nga trabaho nga akon ginhimo. Pero ginbubuhat namon ito para ha Ginoo, salit importante gud ito.”

 Ha sulod la hin pipira ka semana, an The Watch Tower gin-iimprinta na han madasigon nga mga boluntaryo nga ministro. Ha imprintahan ha ikaduha nga andana, saisenta mil nga kopya han Pebrero 1, 1920 nga isyu han The Watch Tower an gin-imprinta. Hito liwat nga panahon, an kabugtoan nag-instalar ha basement hin imprintahan nga ira gintawag nga Battleship. Gintikangan liwat an pag-imprinta han The Golden Age han Abril 14, 1920 nga isyu. Klaro nga ginbendisyonan ni Jehova an mga paningkamot hadton andam nga mga magburuhat.

An maunungon nga katawohan ni Jehova nakaeksperyensya hin makarepresko nga buruhaton ngan pagminagburugto. Pero an pipira nga Estudyante han Biblia binaya ha organisasyon ha masamok nga mga panahon tikang han 1917 tubtob 1919. Paonan-o hira mabubuligan?

An Abril 1, 1920 nga The Watch Tower may-ada artikulo nga “Mag-ukoy Kita nga Mamurayawon.” Mahigugmaon nga nagsiring ito: “Sigurado kami . . . nga an kada tagsa nga may espiritu han Ginoo . . . andam ha paglimot han mga butang nga ginbayaan na, . . . ha pag-ukoy nga nagkakaurosa ngan magbuhat sugad nga nagkakaurosa nga lawas.”

Damu an ginios uyon hinin mahigugmaon nga mga pulong. Usa nga mag-asawa an nagsurat: “Maaram kami nga sayop an amon ginbuhat ha naglabay nga sobra usa ka tuig kay waray kami magsangyaw samtang an iba nakikigbahin ha [pagsangyaw nga] buruhaton. . . . Hinaot diri na kami mahisimang.” Inin nagin aktibo utro nga mga magburuhat may-ada damu nga buruhaton nga paghihimoon.

Han Hunyo 21, 1920, gintikangan han mga Estudyante han Biblia an maduruto nga kampanya ha pagpanaltag han “ZG,” usa nga edisyon han The Finished Mystery nga papel an kobre. * Damu hini nga mga libro an gintago han igindiri ini han 1918.

An tanan nga magwarali, diri la an mga payunir,  an gin-imbitar nga makigbahin ha pagpanaltag. “An tagsa nga dedikado [bawtismado] nga tawo ha kada klase [o, kongregasyon] nga mahimo makigbahin kinahanglan buhaton ito nga may kalipay. Ini an angay magin motto han kada usa yana: ‘Ini an akon bubuhaton’​—ipanaltag an ZG.” Hi Edmund Hooper nagsiring nga para ha damu, ini nga kampanya an siyahan ngan aktuwal nga pagbalay-balay nga ira ginhimo. Hiya nagdugang, “Bug-os namon nga nasabtan kon ano an nahiuupod ha buruhaton nga paghihimoon ha damu nga lugar ngan waray gud namon ito maimadyin.”

Karuyag dasigon ni Brother Rutherford an mga Estudyante han Biblia ha iba nga nasud ngan ig-organisar utro an pagsangyaw nga buruhaton, pero makuri an pakigkomunikar ha ira han Girra ha Kalibotan I. Salit han Agosto 12, 1920, nagbiyahe hiya hin hirayo kaupod an upat nga brother ngadto ha Britain, ha kontinente han Europa, ngan ha Middle East.

Han binisita hi Rutherford ha Britain, an mga Estudyante han Biblia nag-organisar hin tulo nga kombensyon ngan 12 nga panpubliko nga mga katirok. Ginbabanabana nga 50,000 an kabug-osan han tinambong. May kalabotan han pagbisita, an The Watch Tower nagsiring: “Narepreskohan ngan naparig-on gud an kabugtoan. Nakig-upod hira ha kada tagsa ngan nagbuhat kaupod an usa kag usa, ngan nakapalipay gud ito ha ira.” Ha Paris, nagpahayag utro hi Brother Rutherford han topiko nga “Minilyon nga Nabubuhi Yana an Diri Na Gud Mamamatay.” Han nagtikang an pahayag, napuno an pasilidad. Tres syentos nga tawo an naghangyo hin dugang nga impormasyon.

Han sumunod nga mga semana, binisita ha Athens, Cairo, ngan Jerusalem an pipira nga brother. Basi mabuligan an mga interesado hini nga mga lugar nga mahibaro hin dugang pa, nag-establisar hi Brother Rutherford hin bodega hin mga literatura ha bungto han Ramallah, hirani ha Jerusalem. Katapos, binalik hiya ha Europa ngan gin-establisar an Central European Office ngan gin-organisar nga maimprinta didto an mga literatura.

Han Septyembre 1920, iginrelis han mga Estudyante han Biblia an Num. 27 nga The Golden Age, usa nga espesyal nga isyu nga nagbuhayhag han pagtimaraot ha mga Estudyante han Biblia han 1918. An Battleship, nga gin-unabi kanina, gab-i ngan adlaw nga nag-imprinta hin sobra upat ka milyon nga mga kopya hini nga magasin.

 Nahibaro an mga magbarasa hito nga magasin han kakaiba nga eksperyensya ni Emma Martin. Hi Sister Martin usa nga colporteur ha San Bernardino, California. Han Marso 17, 1918, hiya ngan an tulo nga mga brother nga hira E. Hamm, E. J. Sonnenburg, ngan E. A. Stevens, nag-atender hin gutiay nga katirok han mga Estudyante han Biblia.

Usa nga lalaki an inatender diri basi mahibaro han Biblia. “Inatender ako hini nga katirok . . . tungod han sugo han Prosecuting attorney’s office,” hiya nagsiring ha urhi. “Kinadto ako basi makakuha hin ebidensya.” Nakuha niya an “ebidensya” nga iya ginbibiling, usa nga kopya han The Finished Mystery. Paglabay hin pipira ka adlaw, gin-aresto hi Sister Martin ngan an tulo nga brother. Gin-akusaran hira nga gintalapas nira an Espionage Act pinaagi ha pagpanaltag hin mga kopya han igindidiri nga libro.

Hi Emma ngan an tulo nga brother ginhukman nga salaan ngan ginsentensyahan hin tulo ka tuig nga kapriso. Han Mayo 17, 1920, diri na hira puydi mag-apela, salit ginpriso hira. Pero nagbag-o an kahimtang.

Han Hunyo 20, 1920, igin-istorya ni Brother Rutherford ito nga eksperyensya ha usa nga kombensyon ha San Francisco. An mga mamarati nalainan gud ha pagtratar hini nga mga Kristiano, salit nagpadara hira hin telegrama ha presidente han United States. Hira nagsurat: “Natoo kami nga an sentensya . . . kan Mrs. Martin . . . uyon ha Espionage law diri makatadunganon . . . An ginbuhat han mga opisyal han gobyerno ha paggamit han ira awtoridad basi . . . lit-agon . . . hi Mrs. Martin . . . ngan i-frame up hiya basi makasohan ngan maipapriso ginkukonsiderar namon nga . . . maraot gud.”

Kinabuwasan, ginbag-o dayon ni Presidente Woodrow Wilson an sentensya kan Sister Martin ngan kanda Brother Hamm, Sonnenburg, ngan Stevens. Natapos na an diri makatadunganon nga pagpriso ha ira.

Ha ikatarapos han 1920, damu gud an angay ikalipay han mga Estudyante han Biblia. Padayon nga nagtikadamu an buruhaton ha headquarters, ngan nagin mas aktibo pa gud an tinuod nga mga Kristiano ha pagpasamwak nga an Ginhadian han Dios an solusyon han mga problema han katawohan. (Mat. 24:14) Ha sunod nga tuig, 1921, magigin mas sagipo pa gud hira ha pagpasamwak han Ginhadian.