1. Paonan-o kita nahibaro nga an panhimo hin disipulo nga buruhaton nagtatalwas hin kinabuhi?

AN PANHIMO hin disipulo nga buruhaton nagtatalwas hin kinabuhi! Paonan-o kita hito nahibaro? Han iginhatag ni Jesus an sugo nga nakarekord ha Mateo 28:19, 20, hiya nagsiring: “Lakat ngan panhimo kamo hin mga disipulo . . . , bawtismuhi hira.” Mationan-o kaimportante an pagpabawtismo? Kinahanglan ito kon karuyag naton matalwas. An nagpapabawtismo kinahanglan may pagtoo nga an katalwasan posible la tungod kay namatay hi Jesus para ha aton ngan ginbanhaw. Ito an rason nga ginsidngan ni apostol Pedro an iya mga igkasi-Kristiano: “An bawtismo . . . nagtatalwas . . . yana ha iyo . . . pinaagi han pagkabanhaw ni Jesu-Kristo.” (1 Ped. 3:21) Salit kon nagpapabawtismo an usa nga disipulo, nagkakaada hiya paglaom nga mabuhi ha kadayonan.

2. Ano an ginpapabug-atan ha aton han 2 Timoteo 4:1, 2 sugad nga mga magturutdo?

² Basi makahimo hin mga disipulo, kinahanglan magkaada kita “arte ha pagtutdo.” (Basaha an 2 Timoteo 4:1, 2.) Kay ano? Kay ginsugo kita ni Jesus: “Lakat ngan panhimo kamo hin mga disipulo . . . , tutdui hira.” Hi apostol Pablo nagsiring nga ‘magpadayon’ hini nga buruhaton, “kay ha pagbuhat hini, matatalwas mo an imo kalugaringon ngan an mga namamati ha imo.” Salit may maopay nga rason hi Pablo ha pagsiring: “Pirme tagi hin atensyon . . . an imo pagtutdo.” (1 Tim. 4:16) Tungod kay kinahanglan an pagtutdo basi makahimo hin disipulo, karuyag naton nga magin maopay gud an paagi han aton pagtutdo.

3. Hini nga artikulo, ano an aton hihisgotan mahitungod ha pagdumara hin mga pag-aram ha Biblia?

³ Minilyon nga tawo an regular nga gintututdoan naton han mga  kamatuoran ha Biblia. Pero sugad han ginsiring han nahiuna nga artikulo, karuyag naton mahibaroan kon paonan-o naton mabubuligan an mas damu pa ha ira nga mabawtismohan. Hini nga artikulo, hihisgotan naton an lima pa nga kinahanglan buhaton han magturutdo basi mabuligan an estudyante nga mag-uswag ngadto ha pagpabawtismo.

4. Kay ano nga kinahanglan magkaada pagpugong ha kalugaringon an usa nga magturutdo kon nagba-Bible study hiya? (Kitaa liwat an footnote.)

⁴ Hinigugma naton an aton mga igintututdo tikang ha Pulong han Dios. Salit bangin maruyag kita magyinakan hin damu mahitungod hito. Pero, nagdudumara man kita hin Pag-aram ha Barantayan, Pag-aram ha Biblia han Kongregasyon, o nagba-Bible study, kinahanglan diri kita magyinakan hin damu. Basi an Biblia mismo an magtutdo, kinahanglan magkaada pagpugong ha kalugaringon an magturutdo ngan diri isaysay an tanan nga iya nahibabaroan parte ha usa nga teksto o topiko. * (Juan 16:12) Hunahunaa an kadamu han imo nahibabaroan ha Biblia han nabawtismohan ka kon ikompara ha imo nahibabaroan yana. Posible nga hadto, an nangunguna la nga mga doktrina an imo nasasabtan. (Heb. 6:1) Mga tuig anay an linabay antes ka nagkaada han imo mga nahibabaroan yana, salit ayaw itutdo ha bag-o nga estudyante an tanan ha usa la ka higayon.

5. (a) Uyon ha 1 Tesalonica 2:13, ano an karuyag naton nga masabtan han aton estudyante tikang ha iya pag-aram? (b) Paonan-o naton maaaghat an estudyante nga mag-istorya han iya mga nahibabaroan?

⁵ Karuyag naton nga masabtan han aton estudyante nga tikang ha Biblia an iya nahibabaroan. (Basaha an 1 Tesalonica 2:13.) Paonan-o naton ito mahihimo? Aghata an estudyante nga mag-istorya han iya mga nahibabaroan. Imbes nga isaysay pirme ha iya an mga teksto, hangyoa hiya nga isaysay ha imo an iba hito. Buligi hiya nga makita kon paonan-o hiya personal nga magpapahimulos ha Pulong han Dios. Pagbangon hin mga pakiana nga mabulig ha iya nga ipahayag an iya ginhuhunahuna ngan inaabat ha mga teksto nga iya ginbabasa. (Luc. 10:25-28) Pananglitan, pakianhi hiya: “Paonan-o ini nga teksto nakakabulig ha imo nga makita an usa han mga kalidad ni Jehova?” “Paonan-o ka magpapahimulos hini nga kamatuoran ha Biblia?” “Ano an imo inaabat ha imo nahibaroan pa la?” (Prob. 20:5) An pinakaimportante, diri an kadamu han nahibabaroan han estudyante, kondi an kadaku han iya gugma ha iya nahibabaroan ngan han iya pag-aplikar hito.

6. Kay ano nga bangin maopay an pag-upod hin eksperyensyado nga magturutdo ha aton pag-Bible study?

⁶ Kon nagdudumara ka hin pag-aram ha Biblia, nag-uupod ka ba hin mga magwarali nga eksperyensyado nga magturutdo? Kon oo, puydi mo  hira pakianhan kon ano an ira obserbasyon ha paagi han imo pagdumara ngan kon gin-gagamit mo gud ba an Biblia ha imo pagtutdo. Kinahanglan magin mapainubsanon ka kon karuyag mo magin mas maopay nga magturutdo. (Ikompara an Buhat 18:24-26.) Katapos, pakianhi an eksperyensyado nga magwarali kon ha iya pagkita nasasabtan ba han estudyante an ira gin-aadman. Puydi mo liwat hangyoon ito nga magwarali nga hiya an magdumara han pag-aram kon mawawara ka hin usa ka semana o sobra pa. Makakabulig ito nga magin regular an pag-aram ngan maipapakita hito ha estudyante nga importante an iya pag-aram. Ayaw hunahunaa nga “imo” la hiya study ngan diri puydi an iba mag-Bible study ha iya. Ngani, karuyag mo an pinakamaopay para ha estudyante basi padayon hiya nga mahibaro hin dugang pa ha kamatuoran.

7. Ano an makakabulig ha estudyante nga magin eksayted ha iya gin-aadman?

⁷ Kinahanglan makita han estudyante an imo kadasig ngan mabatian an imo kombiksyon ha mga kamatuoran ha Biblia. (1 Tes. 1:5) Makakabulig ito nga magin eksayted hiya ha iya gin-aadman. Kon angayan, sumati hiya kon paonan-o nakabulig ha imo kinabuhi an mga prinsipyo ha Biblia. Pinaagi hito, makikita niya nga an Biblia may praktikal nga mga giya nga makakabulig liwat ha iya.

8. Ano pa an puydi mo himoon basi mabuligan an imo estudyante, ngan kay ano?

⁸ Ha iyo pag-Bible study, sumati an imo estudyante mahitungod han kabugtoan nga nakaeksperyensya hin mga problema nga pariho han iya ngan nalamposan ito. Puydi ka mag-upod hin bugto nga an ehemplo mahimo makabulig ha estudyante. O mahimo ka magbiling hin makaparig-on nga mga eksperyensya ha jw.org ha serye nga “An Biblia Nakakagbag-o han Kinabuhi.” * An sugad nga mga artikulo ngan video makakabulig ha imo estudyante nga makita nga an mga prinsipyo ha Biblia mas makakapaopay han iya kinabuhi.

9. Paonan-o mo madadasig an estudyante nga isumat ha iya pamilya ngan kasangkayan an iya mga nahibabaroan?

⁹ Kon inasaw-an an estudyante, nag-aaram ba liwat an iya asawa? Kon diri, imbitara an asawa nga umapi ha iyo pag-study. Dasiga an imo estudyante nga isumat ha iya pamilya ngan kasangkayan an iya mga nahibabaroan. (Juan 1:40-45) Paonan-o? Mahimo ka magpakiana: “Paonan-o mo isasaysay ini nga kamatuoran ha imo pamilya?” o “Ano nga teksto an imo gagamiton basi pamatud-an ini ha imo sangkay?” Hini nga paagi,  mati-train mo an estudyante nga magin magturutdo. Katapos kon kwalipikado na hiya, puydi na hiya makigbahin ha ministeryo sugad nga diri-bawtismado nga magwarali. Puydi mo pakianhan an estudyante kon may kilala ba hiya nga karuyag liwat magpa-Bible study. Kon may-ada, kontaka dayon ito nga tawo ngan tanyagi hiya nga mag-aram. Ipakita ha iya an video nga Paonan-o Ginhihimo an Pag-aram ha Biblia? *

10. Uyon ha 1 Tesalonica 2:7, 8, paonan-o masusubad han magturutdo an ehemplo ni Pablo?

¹⁰ An mga magturutdo kinahanglan magpakita hin tinuod nga personal nga interes ha ira mga estudyante. Hunahunaa hira sugad nga imo magigin kabugtoan ha espirituwal. (Basaha an 1 Tesalonica 2:7, 8.) Diri masayon para ha ira nga bayaan an ira kasangkayan ha kalibotan ngan himoon an ginkikinahanglan nga mga pagbag-o basi makag-alagad kan Jehova. Kinahanglan buligan naton hira nga magkaada tinuod nga kasangkayan ha kongregasyon. Magin sangkay ha imo estudyante pinaagi ha pakig-upod ha iya diri la ha panahon han iyo pag-Bible study kondi pati liwat ha iba nga higayon. An pagtawag, pagteks, o halipot nga pagbisita bisan kon diri niyo eskedyol ha pag-study nagpapakita nga importante gud hiya ha imo.

11. Ano an karuyag naton nga maeksperyensyahan ha kongregasyon han aton mga estudyante, ngan kay ano?

¹¹ May puplunganon nga nasiring: “Ginkikinahanglan an usa nga baryo ha pagpadaku hin bata.” Salit makakasiring kita: “Ginkikinahanglan an usa nga kongregasyon ha paghimo hin disipulo.” Ito an rason nga iginpapakilala han epektibo nga mga magturutdo an ira mga estudyante ha iba ha kongregasyon nga mahimo magin maopay nga impluwensya ha ira. Tungod hito, an mga estudyante mahimo malipay ha pakig-upod ha katawohan han Dios, nga makakahatag ha ira hin espirituwal ngan emosyonal nga bulig. Karuyag naton nga abaton han tagsa nga estudyante nga bahin hiya han kongregasyon ngan han aton espirituwal nga pamilya. Karuyag naton nga maruyag hiya ha pakig-upod ha aton buotan ngan mahigugmaon nga kabugtoan. Pinaagi hito, magigin mas masayon ha iya nga diri na makig-upod-upod ha mga tawo nga diri makakabulig ha iya nga higugmaon hi Jehova. (Prob. 13:20) Kon dumiri na ha iya an iya kasangkayan hadto, maaram hiya nga magkakaada hiya tinuod nga kasangkayan ha organisasyon ni Jehova.​—Mar. 10:29, 30; 1 Ped. 4:4.

12. Kay ano nga kinahanglan ig-istorya naton ha aton estudyante an mahitungod ha Kristiano nga dedikasyon ngan bawtismo?

¹² Ig-istorya pirme an mahitungod han Kristiano nga dedikasyon ngan bawtismo. Ngani, an aton rason kon kay ano nga nagdudumara kita  hin pag-aram ha Biblia amo an pagbulig ha usa nga magin bawtismado nga disipulo. Kon pipira ka bulan na nga nag-aaram an estudyante ngan labi na kon naatender na hiya ha mga katirok, kinahanglan masabtan niya nga an katuyoan han pag-aram ha Biblia amo an pagbulig ha iya nga mag-alagad kan Jehova sugad nga usa han Iya mga Saksi.

13. Ano an kinahanglan buhaton han estudyante basi mabawtismohan hiya?

¹³ May pipira nga butang nga mahimo buhaton han estudyante ha Biblia nga karuyag magpabawtismo. Una, ginkikilala ngan ginhihigugma han estudyante hi Jehova ngan nagpapakita hiya hin pagtoo ha Iya. (Juan 3:16; 17:3) Katapos, nagigin sangkay hiya ni Jehova, pati han kabugtoan ha kongregasyon. (Heb. 10:24, 25; San. 4:8) Sunod, ginbabayaan han estudyante an iya maraot nga binuhatan ngan nagbabasol ha iya mga sala. (Buh. 3:19) Dugang pa, an iya pagtoo nagpapagios ha iya nga isumat ha iba an kamatuoran. (2 Cor. 4:13) Katapos, igindidedikar niya an iya kalugaringon kan Jehova ngan ginsisimbolohan ito pinaagi ha pagpabawtismo. (1 Ped. 3:21; 4:2) Makalilipay gud ito nga adlaw para ha ngatanan! Samtang ginbubuhat han estudyante an kinahanglan niya buhaton basi mabawtismohan, pirme hiya kumendasyuni ngan dasiga hiya nga padayon ito nga buhaton.

14. Paonan-o mauusisa han magturutdo kon nag-uuswag ba an estudyante?

¹⁴ Kinahanglan magin mapailubon kita kon ginbubuligan naton an estudyante nga mag-uswag ngadto ha pagdedikar ngan pagpabawtismo. Pero kinahanglan mahibaroan naton kon karuyag ba niya mag-alagad kan Jehova nga Dios. May nakikita ka ba nga mga sinyales nga an estudyante nangangalimbasog ha pagtuman han mga sugo ni Jesus? O karuyag la niya mahibaro tikang ha Biblia?

15. Ano nga mga sinyales han pag-uswag an kinahanglan kitaon han magturutdo ha iya estudyante?

¹⁵ Regular nga analisara kon nag-uuswag ba an estudyante. Pananglitan, iginpapahayag ba niya an iya inaabat mahitungod kan Jehova? Nag-aampo ba hiya kan Jehova? (Sal. 116:1, 2) Nag-i-enjoy ba hiya ha pagbasa han Biblia? (Sal. 119:97) Regular ba hiya nga naatender ha mga katirok? (Sal. 22:22) Ginhimo na ba niya an ginkikinahanglan nga mga pagbag-o ha iya pagkinabuhi? (Sal. 119:112) Iginsusumat na ba niya ha iya pamilya ngan kasangkayan an iya mga nahibabaroan? (Sal. 9:1) Ngan an pinakaimportante, karuyag ba niya magin usa han mga Saksi ni Jehova? (Sal. 40:8) Kon diri nag-uuswag an estudyante hini nga mga bahin, mataktika nga hibaroi kon kay ano  ngan hisguti ito ha iya ha buotan pero prangka nga paagi. *

16. Ano an mahimo magin indikasyon nga angay na ig-undang an pag-Bible study ha usa?

¹⁶ Ha panapanahon, turotimbanga kon angay mo ba ipadayon an pag-Bible study ha usa nga estudyante. Pakianhi an imo kalugaringon: ‘An estudyante ba diri nag-aandam para ha pag-aram? Nadiri ba hiya pag-atender ha mga katirok? Nagbubuhat la ba gihapon hiya hin diri maopay? Membro la ba gihapon hiya han buwa nga relihiyon?’ Kon oo an baton hito nga mga pakiana, an padayon nga pag-Bible study ha iya magigin pariho ha pagtutdo ha usa ha paglangoy nga nadiri man hiya maghulos! Kon diri gud gin-aapresyar han estudyante an iya mga nahibabaroan ngan diri hiya andam maghimo hin mga pagbag-o, kay ano nga ipadayon pa an pag-Bible study ha iya?

17. Sumala ha 1 Timoteo 4:16, ano an kinahanglan buhaton han ngatanan nga magturutdo han Biblia?

¹⁷ Ginsiseryoso naton an aton responsabilidad nga manhimo hin mga disipulo, ngan karuyag naton buligan an aton mga estudyante nga mag-uswag ngadto ha pagpabawtismo. Salit gagamiton naton an Biblia ha aton pagtutdo ngan magtututdo kita nga may kadasig ngan kombiksyon. Dadasigon naton an estudyante nga makigsangkay ha kabugtoan ha kongregasyon. Ngan papabug-atan naton pirme an tumong nga pagdedikar ngan pagpabawtismo, nga gin-uusisa ha panapanahon an pag-uswag han estudyante. (Kitaa an kahon nga “ An Kinahanglan Buhaton han Magturutdo Basi Mabuligan an Estudyante nga Magpabawtismo.”) Nalilipay kita nga puydi kita makigbahin hini nga buruhaton nga nagtatalwas hin kinabuhi! Hinaot magin determinado kita nga buhaton an tanan nga aton mahihimo basi mabuligan an aton mga estudyante ha Biblia nga magin kwalipikado ha bawtismo.