1. Paonan-o an 2 Corinto 3:1-3 nabulig ha aton nga maapresyar an aton pribilehiyo nga magtutdo ha iba han Biblia ngan makita hira nga nagpapabawtismo? (Kitaa an retrato ha kobre.)

ANO an imo inaabat kon may estudyante ha Biblia ha iyo kongregasyon nga nababawtismohan? Sigurado nga nalilipay ka. (Mat. 28:19) Ngan kon ikaw an nag-Bible study hini nga bag-o nga disipulo, malilipay ka gud nga makita hiya nga ginbabawtismohan! (1 Tes. 2:19, 20) An bag-o nga nabawtismohan nga mga disipulo maopay nga “mga surat han rekomendasyon,” diri la para ha mga nag-Bible study ha ira kondi pati liwat ha bug-os nga kongregasyon.​—Basaha an 2 Corinto 3:1-3.

2. (a) Ano nga importante nga pakiana an kinahanglan naton ikonsiderar, ngan kay ano? (b) Ano an pag-aram ha Biblia? (Kitaa an footnote.)

² Maopay gud hibaroan nga ha naglabay nga upat ka tuig, mga 10,000,000 nga Bible study * an iginrireport kada bulan ha bug-os nga kalibotan. Ngan hito liwat nga mga tuig, mga 280,000 an nababawtismohan kada tuig sugad nga mga Saksi ni Jehova ngan mga disipulo ni Jesu-Kristo. Paonan-o naton mabubuligan nga mabawtismohan an mas damu pa hiton minilyon nga estudyante ha Biblia? Samtang mapailubon nga gintatagan ni Jehova an mga tawo hin panahon ngan oportunidad nga magin disipulo han Kristo, karuyag naton buhaton an tanan nga aton mahihimo basi buligan hira nga mag-uswag ngan magpabawtismo dayon tubtob nga posible. Madagmit nga nauubos an nabibilin nga panahon!​—1 Cor. 7:29a; 1 Ped. 4:7.

3. Ano an aton hihisgotan hini nga artikulo mahitungod ha pag-Bible study?

 ³ Tungod kay importante gud an panhimo hin disipulo yana, ginsurbey an mga sanga nga opisina basi mahibaroan kon paonan-o naton mabubuligan an mas damu pa nga mga estudyante ha Biblia nga mag-uswag ngadto ha pagpabawtismo. Hini nga artikulo ngan ha masunod, kitaon naton kon ano an aton mahibabaroan tikang ha eksperyensyado nga mga payunir, misyonero, ngan paramangno han sirkito. * (Prob. 11:14; 15:22) Iginsaysay nira kon ano an puydi himoon han mga magturutdo han Biblia ngan han ira mga estudyante basi magin mas mapulsanon an pag-Bible study. Hini nga artikulo, aton hihisgotan an lima nga kinahanglan himoon han estudyante basi mag-uswag hiya ngadto ha pagpabawtismo.

4. Ano an angay naton masabtan mahitungod ha pagdumara hin pag-aram ha Biblia dida ha purtahan?

⁴ Damu han aton kabugtoan an nagdudumara hin pag-aram ha Biblia dida ha purtahan han balay han interesado. Bisan kon maopay ini nga tinikangan ha pagkultibar han interes ha Biblia, ini nga mga paghisgot kaurogan nga halipot la ngan bangin diri kada semana. Basi mas makultibar an interes, gin-aaro han iba nga kabugtoan an numero han telepono han interesado ngan gintatawagan o gintiteks hiya ha panapanahon basi maghatag hin haglipot nga impormasyon tikang ha Biblia. An sugad nga mga paghisgot mahimo magpadayon hin mga bulan nga diri nagigin produktibo nga pag-aram ha Biblia. Mag-uuswag gud ba an usa nga estudyante ngadto ha pagdedikar ngan pagpabawtismo kon ito la nga panahon ngan pangalimbasog an iya iginhahatag ha pag-aram han Pulong han Dios? Posible nga diri.

5. Sumala ha Lucas 14:27-33, ano an ginpabug-atan ni Jesus nga makakabulig ha aton ha paghimo hin mga disipulo?

⁵ Makausa, iginsaysay ni Jesus pinaagi hin ilustrasyon kon ano an angay buhaton han usa basi magin iya disipulo. Nag-istorya hiya mahitungod hin usa nga karuyag magtukod hin torre ngan hin usa nga hadi nga karuyag makiggirra. Hi Jesus nagsiring nga an magtutukod kinahanglan ‘anay lumingkod ngan magkwenta han magagasto’ basi makita kon mahuhuman ba niya ito ngan an hadi kinahanglan ‘anay lumingkod ngan mangaro hin sagdon’ basi makita kon kaya ba han iya kasundalohan an ira plano. (Basaha an Lucas 14:27-33.) Sugad man, maaram hi Jesus nga kinahanglan hunahunaon hin maopay han usa nga karuyag magin iya disipulo kon ano an iginpapasabot han pagsunod ha iya. Salit, kinahanglan dasigon naton an aton  mga estudyante ha Biblia nga magpa-Bible study kada semana. Paonan-o naton ito mahihimo?

6. Ano an puydi naton buhaton basi magkaada progresibo nga mga Bible study?

⁶ Pahurohilabaa an mga pag-aram dida ha purtahan. Bangin puydi ka maghisgot hin dugang nga teksto ha Biblia ha kada mo pagbibisita. Kon komportable na an tagbalay ha hurohilaba nga pagbisita, pakianhi hiya kon may lugar ba diin puydi kamo makalingkod ngan padayon nga maghisgot. Makikita ha iya baton kon seryoso gud ba hiya ha pag-aram han Biblia. Ha urhi, basi mapalaksi an iya pag-uswag, bangin pa ngani pakianhan mo hiya kon karuyag ba niya mag-aram hin duha ka beses kada semana. Pero, diri la an pag-Bible study hin usa o duha ka beses kada semana an kinahanglan.

7. Paonan-o an magturutdo mag-aandam hin maopay para ha tagsa nga pag-aram ha Biblia?

⁷ Sugad nga magturutdo, kinahanglan mo mag-andam hin maopay para ha tagsa nga pag-aram ha Biblia. Mahimo ka magtikang pinaagi ha pagbasa han materyal ngan han mga teksto. Siguroha nga magin klaro ha imo an nangunguna nga mga punto. Hunahunaa an ulohan han leksyon, mga sub-ulohan, mga pakiana, mga teksto nga may “basaha,” mga retrato, ngan bisan ano nga video nga makakabulig ha pagsaysay han topiko. Katapos hunahunaa an imo estudyante ngan kon paonan-o mo isasaysay ha iya an impormasyon ha simple ngan klaro nga paagi basi masayon ito masabtan ngan maiaplikar han imo estudyante.​—Neh. 8:8; Prob. 15:28a.

8. Ano an igintututdo ha aton han mga pulong ni apostol Pablo ha Colosas 1:9, 10 mahitungod ha pag-ampo para ha aton mga estudyante ha Biblia?

⁸ Sugad nga bahin han imo pagpangandam, pag-ampo kan Jehova mahitungod han estudyante ngan han iya panginahanglan. Pangamuyo kan Jehova nga buligan ka nga makagtutdo tikang ha Biblia ha paagi nga makakabantad han iya kasingkasing. (Basaha an Colosas 1:9, 10.) Pakianhi an imo kalugaringon kon may punto ba nga bangin makurian an imo estudyante ha pagsabot o ha pagkarawat. Hinumdumi nga an imo tumong amo an pagbulig ha iya nga mag-uswag ngadto ha pagpabawtismo.

9. Paonan-o mabubuligan han magturutdo an estudyante nga mangandam para ha pag-aram? Isaysay.

⁹ Naglalaom kita nga pinaagi han regular nga pag-aram ha Biblia, aapresyaron han estudyante an ginhimo ni Jehova ngan ni Jesus ngan maruruyag hiya nga mahibaro hin dugang pa. (Mat. 5:3, 6) Basi makapahimulos hin bug-os ha pag-aram,  an estudyante kinahanglan magpokus ha iya gin-aadman. Salit, isaysay ha iya nga importante gud nga mag-andam hiya para ha tagsa nga pag-aram pinaagi han abanse nga pagbasa han leksyon ngan pagpamalandong kon paonan-o niya iaaplikar an iya nahibaroan. Paonan-o makakabulig an magturutdo? Admi an usa nga leksyon upod an imo estudyante basi makita niya kon paonan-o mag-aandam. * Isaysay kon paonan-o mabibilngan an direkta nga baton ha mga pakiana, ngan ipakita kon paonan-o an pagmarka han importante la nga mga pulong makakabulig ha iya nga mahinumdoman an baton. Katapos, hangyoa hiya nga bumaton ha iya kalugaringon nga mga pulong. Pinaagi hito, mahibabaroan mo kon nasabtan gud ba niya an iyo gin-aadman. Pero may usa pa nga butang nga mahimo mo iaghat ha estudyante nga buhaton.

10. Kay ano nga importante an pagbasa han Biblia kada adlaw, ngan ano an kinahanglan para makabenepisyo gud ha pagbasa han Biblia?

¹⁰ Labot pa han pag-aram kada semana upod han magturutdo, magpapahimulos liwat an estudyante ha pagbuhat hin iba nga butang kada adlaw nga hiya la. Kinahanglan niya makigkomunikar kan Jehova. Paonan-o? Pinaagi ha pagpamati ngan pakiistorya kan Jehova. Makakapamati hiya ha Dios pinaagi ha pagbasa han Biblia kada adlaw. (Jos. 1:8; Sal. 1:1-3) Ipakita ha iya kon paonan-o gagamiton an “Eskedyol ha Pagbasa han Biblia” nga puydi ma-print, nga makikita ha jw.org. * Syempre, para makabenepisyo gud hiya ha iya pagbasa han Biblia, aghata hiya nga pamalandungon an igintututdo ha iya han Biblia mahitungod kan Jehova ngan kon paonan-o niya maiaaplikar ha iya kinabuhi an iya hinbabaroan.​—Buh. 17:11; San. 1:25.

11. Paonan-o mahibabaro an estudyante han tama nga paagi han pag-ampo, ngan kay ano nga importante nga pirme hiya mag-ampo kan Jehova?

¹¹ Dasiga an imo estudyante nga makiistorya kan Jehova pinaagi ha pag-ampo kada adlaw. Pag-ampo hin kinasingkasing ha tinikangan ngan ha kataposan han tagsa niyo nga pag-aram, ngan unabiha an imo estudyante hito nga mga pag-ampo. Samtang namamati hiya ha imo mga pag-ampo, mahibabaro hiya kon paonan-o mag-aampo hin kinasingkasing ngan ipaabot ito kan Jehova nga Dios ha ngaran ni Jesu-Kristo. (Mat. 6:9; Juan 15:16) Hunahunaa la kon paonan-o an pagbasa han Biblia kada adlaw (pagpamati kan Jehova) ngan pag-ampo (pakiistorya kan Jehova) mabulig ha imo estudyante nga magin mas duok gud ha Dios! (San. 4:8) Kon  bubuhaton niya ito kada adlaw, mabulig ito ha iya nga mag-uswag ngadto ha pagdedikar ngan pagpabawtismo. Ano pa an makakabulig ha iya?

12. Paonan-o mabubuligan han magturutdo an estudyante nga magkaada duok nga relasyon kan Jehova?

¹² An nahibabaroan han estudyante ha pag-aram ha Biblia kinahanglan maisilsil diri la ha iya hunahuna kondi pati liwat ha iya kasingkasing. Kay ano? An aton kasingkasing​—nga nag-uupod han aton mga hingyap, emosyon, ngan inaabat—​nag-aaghat ha aton nga gumios. Hi Jesus naggamit hin lohikal nga pangatadongan nga nakapainteres ha mga tawo. Pero sinunod hira kan Jesus kay nabantad liwat an ira kasingkasing. (Luc. 24:15, 27, 32) Kinahanglan makombinse an imo estudyante nga hi Jehova tinuod nga Persona, nga puydi hiya magkaada duok nga relasyon ha Iya, ngan puydi niya magin Amay, Dios, ngan Sangkay. (Sal. 25:4, 5) Kon nagba-Bible study, pabug-ati an mag-opay nga kalidad han Dios. (Ex. 34:5, 6; 1 Ped. 5:6, 7) Buhata ito anoman nga topiko an iyo ginhihisgotan. Buligi an estudyante nga apresyaron an mag-opay nga kalidad ni Jehova​—an iya gugma, pagkabuotan, ngan pagpaid. Hi Jesus nagsiring nga “an pinakaimportante ngan siyahan nga sugo” amo an ‘paghigugma kan Jehova nga imo Dios.’ (Mat. 22:37, 38) Pangalimbasugi nga ipasilsil ha kasingkasing han imo estudyante an hilarom nga gugma ha Dios.

13. Paghatag hin ehemplo kon paonan-o mabubuligan an estudyante nga mahibaro han mga kalidad ni Jehova.

¹³ Kon nakikiistorya ka ha imo estudyante, isumat ha iya kon kay ano nga hinigugma mo hi Jehova. Mahimo ini makabulig ha iya nga makita nga kinahanglan niya magkaada hin duok nga personal nga relasyon ha Dios. (Sal. 73:28) Pananglitan, ha gin-aadman nga publikasyon o ha usa nga teksto, may mga pulong ba dida hito nga nagsusumat han gugma, kinaadman, hustisya, o gahum ni Jehova nga nakakabantad han imo kasingkasing? Unabiha ito ha estudyante, ngan isumat ha iya nga usa ito han damu nga rason kon kay ano nga hinigugma mo an aton langitnon nga Amay. May usa pa nga kinahanglan buhaton an estudyante ha Biblia basi mag-uswag ngadto ha pagpabawtismo.

14. Ano an iginsusumat ha aton han Hebreo 10:24, 25 mahitungod ha mga katirok ha kongregasyon nga makakabulig ha estudyante ha Biblia nga mag-uswag?

¹⁴ Karuyag naton nga mag-uswag ngadto ha pagpabawtismo an aton mga estudyante. An usa nga importante nga paagi nga mabubuligan hira amo an pag-aghat ha ira nga umatender ha mga katirok ha kongregasyon. An eksperyensyado nga mga magturutdo nasiring nga malaksi an  pag-uswag han mga estudyante nga naatender dayon ha mga katirok. (Sal. 111:1) An iba nga magturutdo nasiring ha ira mga estudyante nga damu nga butang an ira mahibabaroan ha mga katirok nga diri nira mahibabaroan ha ira pag-Bible study. Basaha an Hebreo 10:24, 25 ha imo estudyante, ngan isaysay ha iya an mga benepisyo nga iya makakarawat kon maatender hiya ha mga katirok. Ipakita ha iya an video nga Ano an Ginbubuhat ha Kingdom Hall? * Buligi an imo estudyante nga magin determinado gud nga umatender pirme ha mga katirok.

15. Ano an aton puydi himoon basi maaghat an estudyante nga regular nga umatender ha katirok?

¹⁵ Ano an imo puydi himoon kon an imo estudyante waray pa umatender ha katirok o talagsa la nga naatender? Malipayon nga isumat ha iya an imo nahibaroan ha naglabay nga katirok. Mas nakakaaghat ito kay ha basta pag-imbitar la ha iya nga umatender. Tagi hiya han Barantayan o han Workbook Para ha Katirok ha Pagkinabuhi Ngan Ministeryo nga presente nga gin-aadman. Ipakita ha iya kon ano an hihisgotan ha sunod nga katirok, ngan pakianhi hiya kon hain an nakapainteres gud ha iya. An maieksperyensyahan han imo estudyante ha una niya nga pag-atender magigin labaw gud kay ha bisan ano nga iya naeksperyensyahan ha katirok han iba nga relihiyon. (1 Cor. 14:24, 25) Makikilala niya an iba pa nga may mag-opay nga ehemplo nga iya masusubad ngan makakabulig ha iya nga mag-uswag ngadto ha pagpabawtismo.

16. Ano an ginkikinahanglan basi makagdumara hin mga pag-aram ha Biblia nga magriresulta ha bawtismo, ngan ano an mahibabaroan naton ha sunod nga artikulo?

¹⁶ Paonan-o kita makakagdumara hin mga pag-aram ha Biblia nga magriresulta ha bawtismo? Mabubuligan naton an estudyante nga seryosohon an pag-aram pinaagi ha pag-aghat ha iya nga magpa-Bible study kada semana ngan mag-andam para ha tagsa niyo nga pag-aram. Karuyag liwat naton hiya dasigon nga makigkomunikar kan Jehova kada adlaw ngan magkaada duok nga relasyon ha Iya. Karuyag naton aghaton an estudyante nga umatender ha mga katirok ha kongregasyon. (Kitaa an kahon nga “ An Kinahanglan Buhaton han Estudyante Basi Mag-uswag Ngadto ha Pagpabawtismo.”) Pero, sugad han isasaysay han sunod nga artikulo, may lima pa nga mahimo buhaton an mga magturutdo han Biblia basi mabuligan an mga estudyante nga mag-uswag ngadto ha pagpabawtismo.