1. Ano an pinakamaopay nga desisyon nga mahihimo han usa?

AN MGA desisyon nga ginhihimo han mga kag-anak kaurogan na nga nakakaapekto ha ira mga anak ha sulod hin maiha nga panahon. Kon diri maopay an mga desisyon han mga kag-anak, mahimo ito makahatag hin mga problema ha ira mga anak. Pero kon maopay an ira mga desisyon, ginbubuligan nira an ira mga anak nga magkaada malipayon nga kinabuhi. Syempre, an mga anak kinahanglan liwat maghimo hin maopay nga mga desisyon. An pinakamaopay nga desisyon nga mahihimo han usa amo an pag-alagad ha aton mahigugmaon nga Amay ha langit, hi Jehova.​—Sal. 73:28.

2. Ano nga maopay nga mga desisyon an ginhimo ni Jesus ngan han iya mga kag-anak?

² Determinado an mga kag-anak ni Jesus nga buligan an ira mga anak nga mag-alagad kan Jehova, ngan an mga desisyon nga ira ginhimo nagpamatuod nga ito an pinakaimportante ha ira kinabuhi. (Luc. 2:40, 41, 52) Hi Jesus liwat naghimo hin maopay nga mga desisyon nga nakabulig ha iya nga matuman an iya papel ha katuyoan ni Jehova. (Mat. 4:1-10) Hi Jesus nagdaku nga buotan, maunungon, ngan maisugon. An tanan nga kag-anak nga nahigugma kan Jehova magigin proud ngan malipayon ha pagkaada sugad nga anak.

3. Ano nga mga pakiana an babatunon naton hini nga artikulo?

³ Babatunon hini nga artikulo ini nga mga pakiana: Ano nga maopay nga mga desisyon an ginhimo ni Jehova may kalabotan kan Jesus? Ano an mahibabaroan han Kristiano nga mga kag-anak ha mga desisyon nga ginhimo han tawhanon nga mga kag-anak ni Jesus? Ngan ano an mahibabaroan han Kristiano nga mga batan-on ha mga desisyon nga ginhimo ni Jesus?

4. Ano nga importante nga desisyon an ginhimo ni Jehova may kalabotan ha iya Anak?

⁴ Hi Jehova nagpili hin maopay gud nga mga kag-anak para kan  Jesus. (Mat. 1:18-23; Luc. 1:26-38) An sinsero nga mga pulong ni Maria nga nakarekord ha Biblia nagpapakita nga may hilarom hiya nga gugma kan Jehova ngan ha iya Pulong. (Luc. 1:46-55) Ngan an pagsunod ni Jose ha sugo ni Jehova nagpapakita nga may kahadlok hiya ha Dios ngan karuyag niya nga lipayon hiya.​—Mat. 1:24.

5-6. Ano an igintugot ni Jehova nga maeksperyensyahan han iya Anak?

⁵ Hinumdumi nga waray magpili hi Jehova hin riko nga mga kag-anak para kan Jesus. An iginhalad nira Jose ngan Maria katapos matawo hi Jesus nagpapakita nga pobre hira. (Luc. 2:24) Hi Jose posible nga may gutiay nga pwesto hirani ha iya balay ha Nazaret diin nagtatrabaho hiya sugad nga panday. Posible gud nga simple an ira pagkinabuhi, labi na kay ha urhi nagkaada hira diri maminos pito nga anak.​—Mat. 13:55, 56.

⁶ Ginproteksyonan ni Jehova hi Jesus ha mga peligro, pero diri ha ngatanan nga problema ginproteksyonan Niya an Iya Anak. (Mat. 2:13-15) Pananglitan, kinahanglan magpailob hi Jesus ha iya diri tumuroo nga mga paryente. Hunahunaa la an kasubo nga posible nga inabat niya han ha siyahan waray tumoo ha iya an iba niya nga kapamilya nga hiya an Mesias. (Mar. 3:21; Juan 7:5) Posible nga kinahanglan liwat niya atubangon an kamatay han iya pinakaamay nga hi Jose. An kamatay ni Jose mahimo magpasabot nga hi Jesus, sugad nga suhag nga anak, amo an masaliwan ha panginano han negosyo han ira pamilya. (Mar. 6:3) Samtang nagtutubo hi Jesus, nahibaro hiya ha pag-ataman han iya pamilya. Posible nga kinahanglan niya maniguro basi masuportaran hira. Salit maaram hiya han pag-abat han pagin kapoy katapos han bug-os adlaw nga pagtrabaho.

7. (a) Ano nga mga pakiana an mabulig ha mga mag-asawa ha pagpadaku han ira mga anak? (b) Paonan-o an Proberbios 2:1-6 makakabulig ha mga kag-anak ha pagtutdo ha ira mga anak?

⁷ Kon kamo nga mag-asawa naruruyag magkaanak, pakianhi an iyo kalugaringon: ‘Mapainubsanon ngan mahunahunaon ba kami ha espirituwal? Pipilion ba kami ni Jehova ha pag-ataman hin bag-o nga presyoso nga kinabuhi?’ (Sal. 127:3, 4) Kon usa ka na nga kag-anak, pakianhi an imo kalugaringon: ‘Gintututdoan ko ba an akon mga anak han kaopayan han pagin maduruto?’ (Ecles. 3:12, 13) ‘Ginhihimo ko ba an akon pinakamaopay basi maproteksyonan an akon mga anak ha pisikal ngan moral nga mga peligro nga  mahimo nira atubangon ha kalibotan ni Satanas?’ (Prob. 22:3) Diri mo mapuproteksyonan an imo mga anak ha tanan nga problema nga mahimo nira atubangon. Imposible gud ito. Pero maiaandam mo hira ha mga reyalidad ha kinabuhi pinaagi ha padayon nga pagtutdo ha ira ha mahigugmaon nga paagi kon paonan-o masarig ha Biblia para hin sagdon. (Basaha an Proberbios 2:1-6.) Pananglitan, kon an usa nga paryente nagdesisyon nga diri na mag-alagad kan Jehova, buligi an imo mga anak nga mahibaro tikang ha Pulong han Dios kon kay ano nga importante gud nga magpabilin nga maunungon kan Jehova. (Sal. 31:23) O kon mamatayan hin hinigugma, ipakita ha imo mga anak kon paonan-o gagamiton an Pulong han Dios basi makaya an kasubo ngan makabiling hin kamurayawan.​—2 Cor. 1:3, 4; 2 Tim. 3:16.

8. Sumala ha Deuteronomio 6:6, 7, ano an kinahanglan buhaton nira Jose ngan Maria?

⁸ An tawhanon nga mga kag-anak ni Jesus binulig ha iya nga magdaku nga may pag-uyon han Dios; ginsunod nira an mga sugo ni Jehova ha mga kag-anak. (Basaha an Deuteronomio 6:6, 7.) Hira Jose ngan Maria may-ada hilarom nga gugma kan Jehova, ngan an ira prayoridad amo an pagbulig ha ira mga anak nga magkaada hito nga klase han gugma.

9. Ano nga importante nga mga desisyon an ginhimo nira Jose ngan Maria?

⁹ Ginpili nira Jose ngan Maria nga tipigan an maopay nga espirituwal nga rutina sugad nga pamilya. Sigurado nga inatender hira ha sinemana nga mga katirok ha sinagoga ha Nazaret, sugad man ha tinuig nga Paskua ha Jerusalem. (Luc. 2:41; 4:16) Hito nga mga pagbiyahe ngadto ha Jerusalem, posible nga gintutdoan nira hi Jesus ngan an iya kabugtoan mahitungod han kasaysayan han katawohan ni Jehova. Bangin samtang nagbibiyahe, ginbisita nira an mga lugar nga gin-unabi ha Kasuratan. Samtang nagtitikadaku an ira pamilya, posible nga diri masayon para kanda Jose ngan Maria an pagtipig hin maopay nga espirituwal nga rutina. Pero kitaa an mga bendisyon ha ira! Tungod kay gin-una nira an pagsingba kan Jehova, an ira pamilya nagpabilin nga duok kan Jehova.

10. Ano nga mga leksyon an mahibabaroan han Kristiano nga mga kag-anak kanda Jose ngan Maria?

¹⁰ Ano an mahibabaroan han mahadlukon ha Dios nga mga kag-anak kanda Jose ngan Maria?  An pinakaimportante, ipakita ha imo mga anak ha pulong ngan buhat nga hinigugma mo gud hi Jehova. Hunahunaa nga an pinakamaopay nga regalo nga maihahatag mo ha ira amo an oportunidad nga higugmaon hi Jehova. Ngan usa han pinakaimportante nga leksyon nga maitututdo mo ha ira amo an pagtipig hin maopay nga espirituwal nga rutina han pag-aram, pag-ampo, pag-atender ha mga katirok, ngan pagministeryo. (1 Tim. 6:6) Syempre, kinahanglan mo tagan an imo mga anak han ira materyal nga panginahanglan. (1 Tim. 5:8) Pero hinumdumi nga an mabulig ha imo mga anak nga makatalwas ha kataposan hinin daan nga sistema ngan makasulod ha bag-o nga kalibotan han Dios amo an ira duok nga relasyon kan Jehova, diri an ira materyal nga mga panag-iya. *​—Ezek. 7:19; 1 Tim. 4:8.

11. (a) Paonan-o an sagdon ha 1 Timoteo 6:17-19 mabulig ha mga kag-anak nga makahimo hin maopay nga mga desisyon kon nagpapadaku hin mga anak? (b) Ano nga mga tumong an mahimo ikonsiderar han iyo pamilya, ngan ano nga mga bendisyon an iyo makakarawat? (Kitaa an kahon nga “ Ano nga mga Tumong an Iyo Kakab-uton?”)

¹¹ Makalilipay gud makita an damu nga Kristiano nga mga kag-anak nga naghihimo hin maopay nga mga desisyon para ha espirituwalidad han ira pamilya! Regular ngan urosa hira ha pagsingba. Naatender hira ha mga katirok han kongregasyon ngan ha mga kombensyon. Ngan nakikigbahin hira ha ministeryo. An iba nga pamilya nagsasangyaw pa ngani ha teritoryo nga talagsa la masangyawan. An iba nabisita ha Bethel o nasuporta ha teokratiko nga mga proyekto ha pagpanukod. An mga pamilya nga nagdidesisyon ha pagbuhat hito nga mga aktibidad kinahanglan gumasto hin kwarta, ngan bangin makuri ito para ha ira. Pero hura nga bibendisyonan hira ni Jehova. (Basaha an 1 Timoteo 6:17-19.) Kaurogan na nga iginpapadayon han mga anak nga ginpadaku ha sugad nga pamilya iton mag-opay nga butang nga ira nahibaroan, ngan nalilipay gud hira hito! *​—Prob. 10:22.

12. Ano an kinahanglan himoon ni Jesus han daku na hiya?

¹² An langitnon nga Amay ni Jesus pirme naghihimo hin maopay nga mga desisyon, ngan an iya tawhanon nga mga kag-anak naghimo liwat hin maopay nga mga desisyon. Pero han daku na hi Jesus, kinahanglan niya maghimo hin kalugaringon nga mga desisyon. (Gal. 6:5) Pariho ha aton ngatanan, may-ada hiya han regalo nga kagawasan ha pagbuot. Puydi unta niya unahon an iya la mga karuyag. Pero, ginpili niya nga tipigan an iya maopay nga relasyon kan Jehova. (Juan 8:29) Paonan-o makakabulig an iya ehemplo ha mga batan-on yana?

13. Ano nga importante nga desisyon an ginhimo ni Jesus samtang bata pa?

¹³ Han bata pa hi Jesus, ginpili niya nga magpasakop ha iya mga kag-anak. Waray gud niya  isalikway an ira giya; waray hiya maghunahuna nga mas maaram hiya kay ha ira. Lugod, “padayon nga nagpasakop hiya ha ira.” (Luc. 2:51) Sigurado nga seryoso nga gintuman ni Jesus an iya papel sugad nga suhag nga anak. Naniguro gud hiya nga mahibaro pagpanday tikang ha iya pinakaamay nga hi Jose basi makabulig ha iya pamilya.

14. Paonan-o kita nahibaro nga hi Jesus maduruto nga estudyante han Pulong han Dios?

¹⁴ Posible nga ginsumatan hi Jesus han iya mga kag-anak mahitungod han iya milagroso nga katawo ngan han ginsiring han mga mensahero han Dios mahitungod ha iya. (Luc. 2:8-19, 25-38) Hi Jesus waray makontento ha iginsumat la ha iya; iya liwat mismo gin-adman an Kasuratan. Paonan-o kita nahibaro nga hi Jesus maduruto nga estudyante han Pulong han Dios? Kay han bata pa hiya, an mga magturutdo ha Jerusalem “padayon nga nahipapausa ha iya pagsabot ngan ha iya mga baton.” (Luc. 2:46, 47) Ngan han 12 anyos pa la hiya, napamatud-an na ni Jesus ha iya kalugaringon nga hi Jehova an iya Amay.​—Luc. 2:42, 43, 49.

15. Paonan-o iginpakita ni Jesus nga ginpili niya an pagbuhat han kaburut-on ni Jehova?

¹⁵ Han nahibaroan ni Jesus an iya papel ha katuyoan ni Jehova, ginpili niya nga karawaton an iya toka. (Juan 6:38) Maaram hiya nga kangangalasan hiya han damu nga tawo. Bisan kon diri niya ito karuyag, ginpili la gihapon niya nga sumugot kan Jehova. Han nabawtismohan hi Jesus han 29 C.E., an iya prayoridad amo an pagbuhat han iginsugo ha iya ni Jehova. (Heb. 10:5-7) Ngan bisan han tikamatay na hiya ha pasakitan nga kahoy, waray gud magluya an iya determinasyon ha pagbuhat han kaburut-on han iya Amay.​—Juan 19:30.

16. Ano an usa nga leksyon nga mahibabaroan han mga anak tikang kan Jesus?

¹⁶ Sunda an imo mga kag-anak. Pariho kanda Jose ngan Maria, an imo mga kag-anak diri perpekto. Pero gintokahan hira ni Jehova basi proteksyonan, tutdoan, ngan giyahan ka. Kon pamamatian mo an ira sagdon ngan irirespeto an ira awtoridad, ‘maghihingaopay ka.’​—Efe. 6:1-4.

17. Sumala ha Josue 24:15, ano nga desisyon an kinahanglan himoon han mga batan-on?

¹⁷ Pagdesisyon kon kanay ka mag-aalagad. Kinahanglan pamatud-an mo ha imo kalugaringon kon hin-o hi Jehova, ano an iya kaburut-on, ngan kon paonan-o mo ito mabubuhat ha imo kinabuhi. (Roma 12:2) Katapos, mahihimo mo an pinakaimportante nga desisyon ha imo kinabuhi,  nga amo an pag-alagad kan Jehova. (Basaha an Josue 24:15; Ecles. 12:1) Kon regular nga ginbabasa ngan gin-aadman mo an Biblia, an imo gugma kan Jehova padayon nga magtutubo ngan an imo pagtoo ha iya magigin mas marig-on.

18. Ano an usa nga desisyon nga kinahanglan himoon han mga batan-on, ngan ano an magigin resulta hito?

¹⁸ Unaha ha imo kinabuhi an pagbuhat han kaburut-on ni Jehova. An kalibotan ni Satanas nagsasaad nga kon gagamiton mo an imo abilidad para ha imo kalugaringon nga kapulsanan, magigin malipayon ka. Pero maaram kita nga adton nagpupokus ha materyal nga mga tumong nagbubuno han ira kalugaringon hin “damu nga kasakit.” (1 Tim. 6:9, 10) Pero, kon mamamati ka kan Jehova ngan uunahon mo ha imo kinabuhi an pagbuhat han iya kaburut-on, magigin malampuson ka ngan “magios ka nga maaramon.”​—Jos. 1:8.

19. Ano an kinahanglan hinumdoman han mga kag-anak?

¹⁹ Mga kag-anak, himoa an iyo pinakamaopay basi buligan an iyo pamilya nga mag-alagad kan Jehova. Sarig ha iya, ngan bubuligan niya kamo nga makahimo hin maopay nga mga desisyon. (Prob. 3:5, 6) Hinumdumi nga mas makakaimpluwensya ha iyo mga anak an iyo ginbubuhat kay han iyo ginyayakan. Salit paghimo hin mga desisyon nga mabulig ha ira nga magkaada han pag-uyon ni Jehova.

20. Ano nga mga bendisyon an makakarawat han mga batan-on kon pipilion nira nga mag-alagad kan Jehova?

²⁰ Mga batan-on, an iyo mga kag-anak makakabulig ha iyo nga makahimo hin maopay nga mga desisyon ha kinabuhi. Pero kinahanglan maghimo kamo hin maopay nga mga desisyon basi magkaada han pag-uyon han Dios. Salit subara hi Jesus ngan pilia nga mag-alagad ha iyo mahigugmaon nga Amay ha langit. Kon bubuhaton niyo ito, magkakaada kamo kinabuhi yana nga okupado, may katuyoan, ngan makalilipay. (1 Tim. 4:16) Ngan ha tiarabot, magkakaada kamo han pinakamakalilipay gud nga kinabuhi!