ARADMAN NGA ARTIKULO 42
Kapti hin Marig-on an Kamatuoran Ngan Magin Kombinsido Gud Hito
“Siguroha an ngatanan nga butang; kapot hin marig-on ha kon ano an maopay.”—1 TES. 5:21.
KARANTAHON 142 Marig-on nga Tipigi an Aton Paglaom
MAHITUNGOD HAN ARTIKULO *
1. Kay ano nga damu nga tawo an nagugupong?
DAMU nga relihiyon an nasiring nga mga Kristiano hira ngan ginsisingba nira an Dios ha paagi nga iya ginkakarawat. Tungod hito, damu nga tawo an nagugupong! Nagpapakiana hira, “Usa la ba an tinuod nga relihiyon, o ginkakarawat han Dios an ngatanan nga relihiyon?” Kombinsido gud ba kita nga kamatuoran an aton igintututdo ngan an paagi han pagsingba han mga Saksi ni Jehova yana amo la an ginkakarawat ni Jehova? Posible gud ba kita magkaada sugad hito karig-on nga kombiksyon? Hisgotan naton an mga ebidensya.
2. Sumala ha 1 Tesalonica 1:5, kay ano nga kombinsido hi apostol Pablo nga kamatuoran an iya gintotoohan?
2 Kombinsido gud hi apostol Pablo nga kamatuoran an iya gintotoohan. (Basaha an 1 Tesalonica 1:5.) Natoo hiya hito diri la tungod kay nakakapalipay ito ha iya. Hi Pablo maduruto nga estudyante han Pulong han Dios. Natoo hiya nga an “ngatanan nga Kasuratan giniyahan han Dios.” (2 Tim. 3:16) Ano an iya nahibaroan ha iya mga pag-aram? Ha Kasuratan, nahibaroan ni Pablo an marig-on nga pamatuod nga hi Jesus an iginsaad nga Mesias—an ebidensya nga ginbalewaray han Judio nga mga lider han relihiyon. Ito nga hipokrito nga mga lider han relihiyon nagsiring nga nagrirepresentar hira ha Dios pero kabaliktaran an iginpapakita han ira mga buhat. (Tito 1:16) Diri pariho ha ira, waray magpili hi Pablo kon ano la nga mga bahin han Pulong han Dios an iya totoohan. Nagin andam hiya ha pagtutdo ngan pag-aplikar han “ngatanan nga kaburut-on han Dios.”—Buh. 20:27.
3. Kinahanglan ba mahibaroan naton an baton ha ngatanan naton nga pakiana basi magin kombinsido kita nga aada kita ha kamatuoran? (Kitaa liwat an kahon nga “ An mga Buhat Ngan Panhunahuna ni Jehova—‘Duro Ito Kadamu Para Isaysay.’”)
3 An iba naghuhunahuna nga kinahanglan nababaton han totoo nga relihiyon an ngatanan nga pakiana, bisan adton mga pakiana nga waray espisipiko nga baton an Biblia. Reyalistiko ba ito? Tagda an ehemplo ni Pablo. Gin-aghat niya an iya mga igkasi-tumuroo nga ‘siguruhon an ngatanan nga butang,’ pero nagsiring liwat hiya nga damu nga butang an waray niya masabti. (1 Tes. 5:21) “Diri kompleto an aton kahibaro,” nagsurat hiya, katapos hiya nagdugang, “diri klaro nga dagway an aton nakikita pinaagi han metal nga espiho.” (1 Cor. 13:9, 12) May mga butang nga waray masabti ni Pablo, ngan sugad liwat kita hito. Pero nasabtan ni Pablo an nangunguna nga mga kamatuoran mahitungod han mga katuyoan ni Jehova. An iya mga nahibaroan eksakto na para makombinse hiya nga kamatuoran an iya gintotoohan!
4. Paonan-o kita magigin mas kombinsido nga nabilngan na naton an kamatuoran, ngan ano an aton hihisgotan mahitungod ha tinuod nga mga Kristiano?
4 An usa nga paagi basi magin mas kombinsido kita nga nabilngan na naton an kamatuoran amo an pagkompara han paagi han pagsingba nga iginpakita ni Jesus ha ginbubuhat yana han mga Saksi ni Jehova. Hini nga artikulo, mahibabaroan naton nga an tinuod nga mga Kristiano (1) nagsasalikway ha idolatriya, (2) narespeto ha ngaran ni Jehova, (3) nahigugma ha kamatuoran, ngan (4) may hilarom nga gugma ha usa kag usa.
GINSASALIKWAY NATON AN IDOLATRIYA
5. Ano an aton nahibaroan kan Jesus mahitungod ha tama nga paagi han pagsingba ha Dios, ngan paonan-o naton maiaaplikar an iya igintutdo?
5 Tungod han hilarom nga gugma ha Dios, hi Jehova gud la an ginsingba ni Jesus han nakadto hiya ha langit ngan han nakanhi hiya ha tuna. (Luc. 4:8) Gintutdoan liwat niya an iya mga disipulo nga hi Jehova la an singbahon. Waray gud gumamit hi Jesus o an iya matinumanon nga mga disipulo hin mga imahen ha pagsingba. Tungod kay an Dios espiritu, waray bisan ano nga butang nga mahihimo an tawo nga makakagrepresentar kan Jehova! (Isa. 46:5) Pero kumusta man an paghimo hin mga imahen han gintatawag nga mga santo kuno ngan pag-ampo ha ira? Ha ikaduha han Napulo nga Sugo, hi Jehova nagsiring: “Ayaw paghimo hin inukit nga imahen o hin dagway nga pariho han bisan ano nga aada ha langit ha igbaw o aada ha tuna ha ubos . . . Ayaw pagyukbo ha ira.” (Ex. 20:4, 5) Klaro gud an iginpapasabot hito nga mga pulong ha mga tawo nga karuyag mapalipay an Dios.
6. Ano nga surubdan han pagsingba an ginsusunod yana han mga Saksi ni Jehova?
6 Aminado an sekular nga mga historyador nga an Dios gud la an gintagan hin eksklusibo nga debosyon han siyahan-siglo nga mga Kristiano. Pananglitan, an libro nga History of the Christian Church nagsiring nga an mga Kristiano ha siyahan nga siglo “nangangalas” ha paggamit hin mga imahen ha mga lugar han pagsingba. Yana, ginsusunod han mga Saksi ni Jehova an ehemplo nga iginpakita han siyahan-siglo nga mga Kristiano. Diri kita nag-aampo ha mga imahen han gintatawag nga mga santo kuno o ha mga anghel; diri ngani kita nag-aampo kan Jesus. Ngan diri naton ginsisingba an mga simbolo han nasud. Anoman an mahitabo, determinado kita nga sundon an ginsiring ni Jesus: “Hi Jehova nga imo Dios an kinahanglan mo singbahon.”—Mat. 4:10.
7. Ha ano nga mga paagi naiiba gud an mga Saksi ni Jehova ha iba nga mga relihiyon?
7 Yana, damu an naruruyag magpinamati ha popular nga mga lider han relihiyon. Nabilib gud hira hito nga mga tawo salit haros ginsisingba na nira hira. Napakadto an mga tawo ha ira mga singbahan, napalit han ira mga libro, ngan nagdudonar hin daku nga kantidad ha ira o ha mga organisasyon nga ira ginsusuportaran. An pipira nga tawo natuod ha tagsa nira nga ginsisiring. Sobra gud nga nabilib ha ira ini nga mga parasingba nga sugad hin hi Jesus mismo an ira nakikita! Ha kabaliktaran, an tinuod nga mga magsiringba ni Jehova waray mga lider. Bisan kon ginrirespeto naton an mga nangunguna, ginkakarawat naton inin klaro nga katutdoan ni Jesus: “Kamo ngatanan magburugto.” (Mat. 23:8-10) Diri naton gin-iidolo an mga tawo, mga lider man hira han relihiyon o mga magmarando. Ngan diri naton ginsusuportaran an ira mga panuyoan. Lugod, nagpapabilin kita nga neutral ngan bulag ha kalibotan. Hini nga mga butang, naiiba gud kita ha damu nga relihiyon nga nasiring nga mga Kristiano hira.—Juan 18:36.
GINRIRESPETO NATON AN NGARAN NI JEHOVA
Inaabat han tinuod nga mga Kristiano nga pribilehiyo nira nga isumat ha iba an mahitungod kan Jehova (Kitaa an parapo 8-10) *
8. Paonan-o kita nahibaro nga karuyag ni Jehova nga mahimaya an iya ngaran ngan makilala ito han ngatanan?
8 Makausa, nag-ampo hi Jesus: “Amay, himayaa an imo ngaran.” Ginbaton mismo ni Jehova ito nga pag-ampo pinaagi ha daku nga tingog tikang ha langit, nga nagsasaad nga hihimayaon niya an iya ngaran. (Juan 12:28) Ha bug-os nga ministeryo ni Jesus, ginhimaya niya an ngaran han iya Amay. (Juan 17:26) Salit inaabat han tinuod nga mga Kristiano nga pribilehiyo gud an paggamit han ngaran han Dios ngan pagpakilala hito ha iba.
9. Paonan-o ginpamatud-an han siyahan-siglo nga mga Kristiano nga ginrirespeto nira an ngaran han Dios?
9 Han siyahan nga siglo C.E., waray pag-iha tikang han naestablisar an Kristiano nga kongregasyon, hi Jehova “naghatag hin atensyon ha mga nasud . . . basi magkuha ha ira hin katawohan nga magdadara han iya ngaran.” (Buh. 15:14) Inabat hiton siyahan-siglo nga mga Kristiano nga pribilehiyo an paggamit han ngaran han Dios ngan pagpakilala hito ha iba. Gin-gamit gud nira an ngaran han Dios ha ira ministeryo ngan ha ira mga sinurat. * Ginpamatud-an nira nga hira an katawohan nga nagdadara han ngaran han Dios.—Buh. 2:14, 21.
10. Ano an ebidensya nga an mga Saksi ni Jehova katawohan nga nagdadara han ngaran ni Jehova?
10 An mga Saksi ni Jehova ba katawohan nga nagdadara han ngaran ni Jehova? Tagda an ebidensya. Yana, ginbubuhat han damu nga mga lider han relihiyon an ngatanan nga ira mahihimo basi tagoon an kamatuoran nga an Dios may-ada personal nga ngaran. Gintanggal nira ito ha ira mga hubad han Biblia, ngan ha pipira nga kahimtang, ira igindiri nga gamiton ito nga ngaran ha ira mga singbahan. * May-ada ba makakagnigar nga an mga Saksi ni Jehova gud la an naghahatag ha ngaran ni Jehova han respeto ngan dungog nga angayan para hito? Diri pariho ha iba nga mga relihiyon, iginpapakilala naton an personal nga ngaran han Dios ha mga tawo ha bisan diin! Ginbubuhat gud naton an aton pinakamaopay basi magkinabuhi uyon ha tawag ha aton, mga Saksi ni Jehova. (Isa. 43:10-12) Nagpublikar kita hin sobra 240 ka milyon nga kopya han Bag-o nga Kalibotan nga Hubad han Baraan nga Kasuratan, diin makikita an ngaran ni Jehova ha mga dapit nga gintanggal ito han iba nga mga parahubad han Biblia. Nagpupublikar liwat kita hin basado ha Biblia nga mga publikasyon nga nagamit han ngaran ni Jehova ha sobra 1,000 nga linggwahe!
HINIGUGMA NATON AN KAMATUORAN
11. Paonan-o iginpakita han siyahan-siglo nga mga Kristiano an ira gugma ha kamatuoran?
11 Hinigugma ni Jesus an kamatuoran, karuyag sidngon, an kamatuoran mahitungod ha Dios ngan ha iya mga katuyoan. Nagkinabuhi hi Jesus uyon hito nga kamatuoran, ngan iya ito iginpasamwak. (Juan 18:37) Hinigugma gud liwat han tinuod nga mga sumurunod ni Jesus an kamatuoran. (Juan 4:23, 24) Ngani, gintawag ni apostol Pedro an Kristianidad sugad nga “an dalan han kamatuoran.” (2 Ped. 2:2) Tungod han ira marig-on nga gugma ha kamatuoran, ginsalikway han siyahan-siglo nga mga Kristiano an relihiyoso nga mga ideya, mga tradisyon, ngan personal nga mga opinyon nga diri uyon ha kamatuoran. (Col. 2:8) Yana, nangangalimbasog liwat an tinuod nga mga Kristiano nga “maglakat ha kamatuoran” pinaagi ha pagbasar han ngatanan nira nga gintotoohan ngan han ira paagi han pagkinabuhi ha Pulong ni Jehova.—3 Juan 3, 4.
12. Ano an ginbubuhat han mga nangunguna kon nasasantop nira nga kinahanglan klaruhon an aton pagsabot, ngan kay ano nga ito an ira ginhihimo?
12 An katawohan han Dios yana diri nasiring nga may perpekto o kompleto hira nga kahibaro han kamatuoran. Usahay, nagsasayop hira ha pagsaysay ha usa nga katutdoan ha Biblia o ha mga instruksyon may kalabotan ha pag-organisar han kongregasyon. Diri kita angay mahipausa hito. An Kasuratan klaro nga nasiring nga an husto nga kahibaro nag-uuswag samtang nalabay an panahon. (Col. 1:9, 10) Hinay-hinay nga iginsusumat ni Jehova an kamatuoran, ngan kinahanglan mapailubon nga maghulat kita tubtob nga magtikaklaro an aton pagsabot ha kamatuoran. (Prob. 4:18) Kon nasasantop han mga nangunguna nga kinahanglan klaruhon an aton pagsabot ha usa nga kamatuoran, diri hira nag-aalang ha paghimo hin ginkikinahanglan nga mga pagbag-o. An damu nga relihiyon ha Kakristianohan naghihimo hin mga pagbag-o basi mapalipay an ira mga membro o magin popular ha kalibotan. Pero an mga Saksi ni Jehova naghihimo hin mga pagbag-o basi magin mas duok ha Dios ngan masunod an surubdan han pagsingba nga gin-establisar ni Jesus. (San. 4:4) Naghihimo kita hin mga pagbag-o diri tungod kay nagbag-o an opinyon han mga tawo ha kalibotan, kondi tungod kay mas klaro nga nasabtan naton an Kasuratan. Hinigugma gud naton an kamatuoran!—1 Tes. 2:3, 4.
MAY HILAROM KITA NGA GUGMA HA USA KAG USA
13. Ano an pinakaimportante nga kalidad nga iginpapakita han tinuod nga mga Kristiano, ngan paonan-o ito yana iginpapakita han mga Saksi ni Jehova?
13 An siyahan-siglo nga mga Kristiano kilala tungod han ira damu nga mag-opay nga kalidad, pero an pinakaimportante hito amo an gugma. Hi Jesus nagsiring: “Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.” (Juan 13:34, 35) Yana, an mga Saksi ni Jehova ha bug-os nga kalibotan nagkakaurosa ngan may-ada gugma ha usa kag usa. Naiiba gud kita ha iba nga mga relihiyon tungod kay sugad kita hin usa nga pamilya bisan kon iba-iba an aton nasud, lahi, ngan kultura. Nakikita naton an ebidensya han tinuod nga gugma ha aton mga katirok, asembleya, ngan kombensyon. Ito nga ebidensya nabulig ha aton nga magin mas kombinsido nga an aton paagi han pagsingba amo gud an ginkakarawat ni Jehova.
14. Sumala ha Colosas 3:12-14, ano an usa nga importante nga paagi nga maipapakita naton an hilarom nga gugma ha usa kag usa?
14 Gin-aaghat kita han Kasuratan nga “magkaada . . . hilarom nga gugma ha usa kag usa.” (1 Ped. 4:8) An usa nga paagi nga iginpapakita naton an sugad nga gugma amo an pagpasaylo ha usa kag usa ngan pagpailob ha mga kaluyahan han iba. Namimiling liwat kita hin mga oportunidad nga maipakita an pagin mahinatagon ngan pagin maabiabihon ha ngatanan ha kongregasyon, bisan hadton bangin nakasakit ha aton. (Basaha an Colosas 3:12-14.) Kon iginpapakita naton an sugad nga gugma, ginpapamatud-an naton nga tinuod kita nga mga Kristiano.
“USA NGA PAGTOO”
15. Ha ano pa nga mga paagi ginsusunod naton an surubdan han pagsingba nga iginpakita han siyahan-siglo nga mga Kristiano?
15 Ginsusunod naton an surubdan han pagsingba nga iginpakita han siyahan-siglo nga Kristiano nga kongregasyon ha iba pa nga mga paagi. Pananglitan, an pagkaorganisar han aton organisasyon—nga nag-uupod han nagbibiyahe nga mga paramangno, mga tigurang, ngan mga ministeryal nga surugoon—pariho han kahikayan nga igin-establisar han mga apostol ha siyahan nga siglo. (Fil. 1:1; Tito 1:5) An aton panhunahuna mahitungod ha sex ngan pag-asawa, an aton respeto ha pagin sagrado han dugo, ngan an aton hingyap nga proteksyonan an kongregasyon tikang ha diri mabinasulon nga mga nakasala iginbasar ha surubdan nga iginpakita ha siyahan nga siglo.—Buh. 15:28, 29; 1 Cor. 5:11-13; 6:9, 10; Heb. 13:4.
16. Ano an aton mahibabaroan ha ginsiring ha Efeso 4:4-6?
16 Hi Jesus nagsiring nga damu an masiring nga disipulo hira niya pero diri ngatanan magigin tinuod. (Mat. 7:21-23) An Kasuratan nagpapahamangno liwat nga ha kataposan nga mga adlaw damu an magigin “diosnon [la] pagkit-on.” (2 Tim. 3:1, 5) Pero an Biblia klaro nga nasiring nga may-ada “usa nga pagtoo” nga gin-uuyonan han Dios.—Basaha an Efeso 4:4-6.
17. Hin-o yana an nasunod kan Jesus ngan nagbubuhat han usa la nga tinuod nga pagsingba?
17 Hin-o an nagbubuhat yana han usa la nga tinuod nga pagsingba? Ginhisgotan naton an ebidensya. Gin-usisa naton an surubdan han pagsingba nga igintutdo ni Jesus ngan ginbuhat han siyahan-siglo nga mga Kristiano. Usa la an baton—an mga Saksi ni Jehova. Daku gud nga pribilehiyo nga magin usa han katawohan ni Jehova ngan mahibaro han kamatuoran mahitungod ha iya ngan ha iya mga katuyoan! Hinaot padayon nga kaptan naton hin marig-on an kamatuoran ngan magin kombinsido gud hito.
KARANTAHON 3 Amon Kusog, Paglaom, Ginsasarigan
^ par. 5 Hini nga artikulo, hihisgotan naton an surubdan han tinuod nga pagsingba nga iginpakita ni Jesus, ngan uusisahon naton kon paonan-o ito ginsunod han iya mga disipulo ha siyahan nga siglo. Hihisgotan liwat naton an mga ebidensya nga ginsusunod han mga Saksi ni Jehova yana ito nga surubdan han tinuod nga pagsingba.
^ par. 9 Kitaa an kahon nga “Gin-gamit ba han Siyahan nga mga Kristiano an Ngaran han Dios?” ha An Barantayan, Hulyo 1, 2010, p. 6.
^ par. 10 Pananglitan, han 2008, ginsugo han papa nga hi Benedict XVI nga an ngaran han Dios “diri gamiton o luwason” ha mga misa, kanta, o pag-ampo ha Katoliko.
^ par. 63 DISKRIPSYON HAN RETRATO: Iginrelis han organisasyon ni Jehova an Bag-o nga Kalibotan nga Hubad ha sobra 200 nga linggwahe na basi mabasa han mga tawo ha ira kalugaringon nga linggwahe an usa nga Biblia nga nagamit han ngaran han Dios.
