Nagtikadaku an panginahanglan hin literatura samtang nagtitikadamu an nagsasangyaw. An kabugtoan ha Brooklyn Bethel naghihimo hin mga magasin, pero ha komersyal nga mga kompanya la gihap hira nagpapaimprinta hin mga libro nga matig-a an kobre. Han nagkulang hin mga libro ha sulod hin damu ka bulan ngan nagtikang maulang an pagsangyaw nga buruhaton, ginpakianhan ni Brother Rutherford hi Robert Martin, an brother nga nagdudumara han factory, kon may posibilidad ba nga makag-imprinta hira hin mga libro.

“Eksayting adto nga ideya,” siring ni Brother Martin, “kay nagpapasabot ito nga mag-aabri hin planta nga kompleto hin mga makina para ha typesetting, electroplating, pag-imprinta, ngan pag-bind.” An kabugtoan nagplete hin lugar ha 18 Concord Street ha Brooklyn ngan nagpalit han ginkikinahanglan nga mga makina.

Pero may-ada iba nga waray malipay hito nga pagbag-o. An presidente han usa nga kompanya nga nag-iimprinta hadto han aton mga libro binisita ha bag-o nga pasilidad. Siring niya: “May-ada kamo dinhi primera klase nga imprintahan, pero waray ha iyo maaram gumamit hito. Ha sulod la hin unom ka bulan, ruba na ito ngatanan.”

“Baga hin may punto ito nga iya ginsiring,” nagsumat hi Brother Martin, “pero waray hito ikonsiderar an Ginoo; ngan tikang pa hadto kaupod na namon Hiya.” Tama hi Brother Martin. Waray pag-iha, an bag-o nga bindery naghihimo na hin 2,000 ka libro kada adlaw.

Labot ha pag-imprinta han pipira han ira mga libro, an katawohan ni Jehova nagtikang paggamit hin bag-o nga pamaagi ha pagpasamwak han maopay nga sumat—an pagbrodkast ha radyo. Ha kulop han Domingo, Pebrero 26, 1922, hi Brother Rutherford nagyakan ha radyo ha siyahan nga higayon. Nagpahayag hiya han topiko nga “Minilyon  nga Nabubuhi Yana an Diri na Gud Mamamatay” ha KOG nga estasyon han radyo ha Los Angeles, California, U.S.A.

Ginbabanabana nga 25,000 an nakabati hito nga programa. An iba ha ira nagpadara hin mga surat nga nagpapahayag hin apresasyon hito nga brodkast. Usa hito nga mga surat an tikang kan Willard Ashford, nga residente ha Santa Ana, California. Ginpasalamatan niya hi Brother Rutherford ha “makalilipay ngan makapainteres” nga presentasyon. Katapos, nagsiring hiya: “Tulo an may sakit ha balay, salit kon waray ini nga pamaagi, imposible para ha bisan hin-o ha amon nga makabati ha imo bisan kon ha sunod nga bloke ka la nagpahayag.”

Nagkaada dugang nga mga brodkast han sumunod nga mga semana. Ha kataposan hito nga tuig, ginbanabana han The Watch Tower nga “diri maminos 300,000 ka tawo an nakabati na han mensahe pinaagi han radyo.”

An mga Estudyante han Biblia nadasig han mga surat ngan komento salit nagdesisyon hira nga magtukod hin estasyon han radyo ha usa nga lote ha Staten Island, hirani ha Brooklyn Bethel. Han sunod nga mga tuig, gin-gamit han mga Estudyante han Biblia ini nga estasyon nga WBBR basi ipasamwak an mensahe han Ginhadian ha damu nga lugar.

Iginpahibaro han Hunyo 15, 1922, nga isyu han The Watch Tower nga magkakaada kombensyon ha Cedar Point, Ohio, tikang ha Septyembre 5 tubtob 13, 1922. Eksayted gud an mga Estudyante han Biblia pag-abot nira ha Cedar Point.

Ha siyahan nga pahayag ni Brother Rutherford, nagsiring hiya ha mga mamarati: ‘Sigurado gud ako nga bibendisyonan han Ginoo ini nga kombensyon ngan sisiguruhon niya nga magkakaada pagsangyaw nga mas daku pa gud kay han nahitabo ha bisan san-o dinhi ha tuna.’ An mga mamumulong hito nga kombensyon pauroutro nga nag-aghat ha kabugtoan nga magsangyaw.

Katapos, han Biernes, Septyembre 8, mga 8,000 ka tawo an sumulod ha awditoryum, ngan eksayted hira nga mamati ha pahayag ni Brother Rutherford. Naglalaom hira nga isasaysay niya an kahulogan han “ADV,” nga nakaimprinta ha ira mga imbitasyon. Paglingkod nira, sigurado nga napansin han iba ha ira han daku nga nakalukot nga tela ha bawbaw han entablado. Hi Arthur Claus, nga  nagbiyahe ngadto ha kombensyon tikang ha Tulsa, Oklahoma, U.S.A., nakabiling hin lingkoran diin mababatian niya hin maopay an mga pahayag, nga makuri gud hito nga panahon kay waray pa mikropono o loudspeaker ha pagpadaku han tingog.

Basi masiguro nga waray makakadisturbo, iginpahibaro han tsirman nga diri papasudlon ha awditoryum an mga naurhi samtang nagpapahayag hi Brother Rutherford. Han alas–9:30 han aga, hi Brother Rutherford nagtikang pinaagi ha pagkotar han mga pulong ni Jesus nga mababasa ha Mateo 4:17: “An ginhadian han langit hirani na.” (King James Version) Ha iya paghisgot kon paonan-o makakabati an mga tawo mahitungod hini nga Ginhadian, hiya nagsiring: “Hi Jesus mismo nagyakan nga ha panahon han iya presensya mangunguna hiya ha pag-ani han iya katawohan, ngan hito nga panahon iya titirukon an tinuod ngan maunungon nga mga tawo.”

Hi Brother Claus, nga nalingkod ha awditoryum mismo, nag-istorya: “Namamati kami hin maopay ha tagsa nga pulong.” Pero tigda nga naglain an iya pag-abat ngan kinahanglan niya bumaya ha awditoryum. Ginawas hi Arthur nga nag-aalang, kay maaram hiya nga diri na hiya papasudlon utro.

Paglabay hin pipira ka minuto, nagtikang pag-opay an iya pag-abat. Siring niya nga samtang tipabalik hiya ha awditoryum, nakabati hiya hin makusog nga mga pagpakpak. Nakapaeksayt gud ito ha iya! Disidido hiya nga mapamatian an nabibilin nga bahin hiton makaruruyag gud nga pahayag bisan kon kinahanglan niya sumaka ha atop basi mahimo ito. Hi Brother Claus, nga 23 anyos hito nga panahon, nakabiling hin paagi nga makasaka ha atop. Abrido an mga bintana ha atop, ngan siring niya nga pagdaop niya hito, nakapamati hiya hin maopay.

Pero diri nag-uusahan hi Arthur. An iba han iya mga sangkay nakadto liwat ha atop. An usa ha ira, hi Frank Johnson, nagdadagmit nga dumaop ha iya ngan nagpakiana, “May matarom ka ba nga gutiay nga kutsilyo?”

“Oo may-ada,” siring ni Arthur.

 “Ikaw an baton ha amon mga pag-ampo,” siring ni Frank. “Nakikita mo ba inin daku nga linukot nga tela? Baner ini, nga nakahigot hini nga mga raysang. Pamati hin maopay kan Judge. * Pagsiring niya, ‘ngan kinahanglan niyo ipasamwak, ipasamwak,’ utda ini nga upat nga higot.”

Salit hi Arthur, nga kapot an kutsilyo, naghulat upod han iya mga sangkay ha tigaman nga uutdon na nira an mga higot. Waray pag-iha, hi Brother Rutherford inabot na ha pinakaimportante nga bahin han iya pahayag. Tungod han eksaytment ngan kadasig, sigurado nga haros naguliat na hi Brother Rutherford han nagsiring hiya: “Magin matinumanon ngan totoo nga mga saksi han Ginoo. Padayon ha pakig-away tubtob nga mabungkag an ngatanan nga tigaman han Babilonya. Ipasamwak an mensahe ha kahigrayoan. An kalibotan kinahanglan mahibaro nga hi Jehova an Dios ngan hi Jesu-Kristo an Hadi han mga hadi ngan Ginoo han mga ginoo. Ini an pinakaimportante ha ngatanan nga adlaw. Kitaa, an Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak, an Hadi ngan an iya Ginhadian!”

Nag-istorya hi Arthur nga gin-utod niya ngan han iba nga brother an mga higot han baner ngan maopay an pagbuklad hito. Uyon ha mga letra nga “ADV,” nga ginpahalipot nga porma han Ingles nga pulong nga “advertise,” karuyag sidngon ipasamwak, ini an mababasa ha baner: “Ipasamwak an Hadi Ngan Ginhadian.”

An kombensyon ha Cedar Point nakabulig ha kabugtoan nga magpokus ha importante nga buruhaton ha pagsangyaw han Ginhadian, ngan adton andam magbuhat hito nalipay nga makigbahin. Usa nga colporteur (kilala yana sugad nga payunir) tikang ha Oklahoma, U.S.A., an nagsurat, “Nagsangyaw kami ha lugar nga damu nga tawo an nagtatrabaho ha mga minahan hin karbon, ngan pobre gud hira.” Siring niya nga kon nababatian han mga tawo an mensahe nga mababasa ha Golden Age nga magasin, agsob nga ‘nagtatangis hira.’ Nakasiring hiya, “Bendisyon gud nga liawon hira.”

Inabat hini nga mga Estudyante han Biblia kon ano kaimportante an ginsiring ni Jesus nga mababasa ha Lucas 10:2: “Damu an aranihon, kondi gutiay an mag-arani.” Han natapos an tuig, mas determinado na gud hira nga ipasamwak an mensahe mahitungod han Ginhadian ha kahigrayoan.