“KON may bisan hin-o ha iyo nga magdumiri pakiggirra ha France o England, kamo ngatanan kinahanglan mamatay!” Ini an guliat han usa nga opisyal han Nazi ha usa nga grupo han mga Saksi ni Jehova han Girra ha Kalibotan II. Bisan kon may armado gud nga SS nga mga sundalo nga naghuhulat ha hirani, waray bisan usa han aton kabugtoan an nagkompromiso. Maisugon gud an ira ginbuhat! Maopay ini nga ehemplo han aton panhunahuna sugad nga mga Saksi ni Jehova: Nagdudumiri kita nga umapi ha mga girra hini nga kalibotan. Bisan kon gintatarhog nga patayon, nagdudumiri kita nga may dapigan ha mga araway hini nga kalibotan.

1. AN KATAWOHAN HAN DIOS USA LA NGA NASUD

Hadto, hi Jehova nagpili hin usa la nga nasud basi magin iya katawohan—an Israel. Gintawag niya an mga Israelita nga iya “espesyal nga propyedad tikang ha ngatanan nga mga katawohan.” (Ex. 19:5) Gintagan liwat hira han Dios hin espisipiko nga teritoryo. Salit han ginsugo han Dios an mga Israelita nga makiggirra ha iba nga mga nasud, diri hira nakikiggirra o nagpapatay han ira mga igkasi-magsiringba. *

Yana, an tinuod nga mga magsiringba tikang ha “ngatanan nga nasud ngan mga tribo ngan mga katawohan ngan mga pinulongan.” (Pah. 7:9) Kon an katawohan han Dios maapi ha girra, posible nira igkaaway—ngan mapatay pa ngani—an ira mga igkasi-magsiringba.

 2. GINSUGO NI JEHOVA AN MGA ISRAELITA NGA MAKIGGIRRA

Hadto, hi Jehova an nagdidesisyon kon san-o ngan kay ano nga kinahanglan makiggirra an mga Israelita. Pananglitan, an Dios nagsugo ha Israel nga ipadapat an iya paghukom ha mga Canaanita, nga kilala tungod han ira pagsingba ha mga demonyo, mangil-ad nga seksuwal nga imoralidad, ngan paghalad hin bata. Ginsugo ni Jehova an mga Israelita nga wad-on inin maraot nga impluwensya tikang ha tuna nga iya iginsaad ha ira. (Lev. 18:24, 25) Han naukoy na an mga Israelita ha Tuna nga Iginsaad, may mga panahon nga ginsugo hira han Dios nga makiggirra basi depensahan an Israel tikang ha nagtatalumpigos nga mga kaaway. (2 Sam. 5:17-25) Pero waray gud tuguti ni Jehova an mga Israelita nga maglugaring pagdesisyon nga makiggirra. Kon ginbubuhat nira ito, agsob nga maraot gud an nahitatabo.—Num. 14:41-45; 2 Cron. 35:20-24.

Yana, diri ginsusugo ni Jehova an mga tawo nga makiggirra. Nakikiggirra an mga nasud tungod han karuyag han mga tawo, diri tungod han karuyag han Dios. Bangin makiggirra hira basi magkaada dugang nga teritoryo o mas damu nga kwarta o magpakilala hin politikal nga ideya. Pero kumusta man adton nasiring nga nakikiggirra hira ha ngaran han Dios basi protektaran an ira relihiyon o pamatayon an mga kaaway han Dios? Puprotektaran ni Jehova an iya tinuod nga mga magsiringba ngan bubungkagon an iya mga kaaway ha tiarabot nga girra—an girra han Armagedon. (Pah. 16:14, 16) Hito nga girra, an espiritu nga mga linarang la an magkukompwesto han kasundalohan han Dios, diri an iya tawhanon nga mga magsiringba.—Pah. 19:11-15.

3. GINTIPIGAN NGA BUHI HAN MGA ISRAELITA ADTON NAGPAKITA HIN PAGTOO

Hadto, agsob kaloy-an han Israelita nga kasundalohan an mga nagpapakita hin pagtoo ha Dios ngan an ginpapatay la amo adton ginhukman ni Jehova nga patayon. Pansina an duha nga ehemplo. Bisan kon hi Jehova nagsugo nga bungkagon an Jerico, gintipigan nga buhi han mga Israelita hi Rahab ngan an iya pamilya tungod han iya pagtoo. (Jos. 2:9-16; 6:16, 17) Ha urhi, an tanan nga residente ha syudad han Gibeon gintipigan nga buhi  kay an mga Gibeonita nagpakita hin husto nga kahadlok ha Dios.—Jos. 9:3-9, 17-19.

Yana, diri gintitipigan nga buhi han naggigirra nga mga nasud adton nagpapakita hin pagtoo. Ngan may mga panahon nga an inosente nga mga sibilyan namamatay ha araway han mga nasud.

4. KINAHANGLAN SUNDON HAN MGA ISRAELITA AN MGA REGULASYON HAN DIOS HA GIRRA

Hadto, gin-obligar ni Jehova an Israelita nga mga sundalo nga makiggirra uyon ha iya mga instruksyon. Pananglitan, may mga panahon nga ginsugo hira han Dios nga maghatag hin “mga kondisyon ha pakigmurayaw” ha kakontra nga syudad. (Deut. 20:10) Ginlaoman liwat ni Jehova nga titipigan han Israelita nga mga sundalo nga limpyo an ira kalugaringon ngan an ira kampo ngan susundon an iya mga suruklan ha moral. (Deut. 23:9-14) An mga sundalo ha kahigrani nga nasud agsob manlugos han mga babaye ha nasakop nga mga teritoryo, pero gindid-an ni Jehova an mga Israelita nga buhaton ito. Ngani, diri hira puydi mag-asawa hin bihag nga babaye tubtob nga lumabay an usa ka bulan katapos masakop an usa nga syudad.—Deut. 21:10-13.

Yana, kadam-an nga nasud an nagpirma hin mga kasabotan nga sundon an mga regulasyon parte ha pakiggirra. Katuyoan hito nga protektaran an mga sibilyan, pero makasurubo nga agsob talapason ito nga mga regulasyon.

5. AN DIOS NAKIGGIRRA PARA HA IYA NASUD

Hadto, hi Jehova nakikiggirra para ha mga Israelita, ngan agsob hiya maghimo hin mga milagro basi magdaog hira. Pananglitan, paonan-o ginbuligan ni Jehova an mga Israelita nga masakop an syudad han Jerico? Sugad han iginsugo ni Jehova, han an mga Israelita “nagsinggit hin makusog nga singgit han pakiggirra, narumpag dayon an pader,” salit nagin mas masayon para ha ira nga sakupon an syudad. (Jos. 6:20) Ngan paonan-o hira nagdaog ha ira pakiggirra ha mga Amorita? “Hi Jehova nagpauran tikang ha langit ngada ha ira hin dagku nga mga yelo . . . Ha pagkamatuod, mas damu an nagkamatay tungod han uran nga yelo kay han nagkamatay pinaagi han espada han mga Israelita.”—Jos. 10:6-11.

AN TINUOD NGA MGA KRISTIANO NAKIKIGMURAYAW

Sugad han aton nahibaroan, an aton sitwasyon yana iba gud kay ha kadaan nga Israel. Pero ini nga mga kaibahan diri la amo an rason nga diri kita nakikiggirra. May iba pa. Pananglitan, igintagna han Dios nga ha kataposan nga mga adlaw, an mga gintutdoan niya diri na “mag-aaram hin pakiggirra,” salit labi na nga diri hira maapi hito. (Isa. 2:2-4) Dugang pa, an Kristo nagsiring nga an iya mga disipulo ‘diri [magigin] bahin han kalibotan’; waray hira dadapigan ha mga araway ha kalibotan.—Juan 15:19.

Gin-aghat liwat han Kristo an iya mga sumurunod nga magbuhat hin dugang pa. Ginsidngan niya hira nga likayan an mga disposisyon nga nagriresulta hin pagdumot, kasina, ngan girra. (Mat. 5:21, 22) Ginsugo liwat niya an iya mga sumurunod nga ‘makigmurayaw’ ngan higugmaon an ira mga kaaway.—Mat. 5:9, 44.

Kumusta man kita sugad nga mga indibiduwal? Posible gud nga diri naton karuyag umapi ha bisan ano nga girra, pero may mga tigaman ba hin pagdumot ha aton kasingkasing nga mahimo magresulta hin mga araway o pagkabahin-bahin ha kongregasyon? Padayon kita nga mangalimbasog nga wad-on an sugad nga mga pag-abat.—San. 4:1, 11.

Imbes nga umapi ha mga araway han mga nasud, nangangalimbasog kita nga magkaada kamurayawan ngan gugma ha usa kag usa. (Juan 13:34, 35) Hinaot magin determinado kita nga magpabilin nga neutral samtang ginpapamulat naton an adlaw nga wawad-on na ni Jehova ha kadayonan an ngatanan nga girra.—Sal. 46:9.