1. Ano an aton “espirituwal nga panginahanglan,” ngan paonan-o ito konektado ha kalipay?

 AN TINUOD nga kalipay diri la kay basta maopay nga pag-abat nga naabot ngan nawawara. Mahimo ito magpadayon ha bug-os nga kinabuhi han usa nga tawo. Paonan-o? Hi Jesus nagsaysay ha iya Sermon ha Bukid: “Malipayon an mga mahunahunaon han ira espirituwal nga panginahanglan.” (Mat. 5:3) Maaram hi Jesus nga an mga tawo ginhimo nga may daku nga hingyap nga makilala ngan singbahon an ira Maglalarang, hi Jehova nga Dios. Ito an aton “espirituwal nga panginahanglan.” Ngan tungod kay hi Jehova an “malipayon nga Dios,” adton nagsisingba ha iya mahimo liwat magin malipayon.—1 Tim. 1:11.

2-3. (a) Sumala kan Jesus, hin-o pa an mahimo magin malipayon? (b) Ano an aton hihisgotan hini nga artikulo, ngan kay ano nga kinahanglan ini?

² Kinahanglan ba nga maopay an aton mga kahimtang ha kinabuhi para magin malipayon? Diri. Ha sermon ni Jesus, may urusahon hiya nga ginsiring. “An mga nabibido”—bangin tungod kay nakukonsensya hira ha ira mga sala o tungod kay nakakaeksperyensya hira hin nakakaistres gud nga mga sitwasyon—mahimo magin malipayon. Ito liwat an ginsiring ni Jesus mahitungod ha “mga gintitimaraot tungod han katadongan” o ha mga ‘ginpapakaalohan’ tungod han pagin sumurunod han Kristo. (Mat. 5:4, 10, 11) Pero kay ano nga posible nga magin tinuod nga malipayon ha sugad nga mga sitwasyon?

³ Igintututdo ha aton ni Jesus nga magigin malipayon kita, diri tungod han pagkaada maopay nga mga kahimtang ha aton kinabuhi, kondi tungod han pagtagbaw han aton espirituwal nga panginahanglan ngan pagin duok ha Dios. (San. 4:8) Paonan-o naton ito mahihimo? Hini nga artikulo, hihisgotan naton  an tulo nga butang nga nagriresulta hin tinuod nga kalipay.

4. Ano an siyahan nga butang nga dapat naton buhaton basi magin tinuod nga malipayon? (Salmo 1:1-3)

⁴ SIYAHAN: Basi magin tinuod nga malipayon, kinahanglan kita kumaon hin espirituwal nga pagkaon. An mga tawo ngan mga hayop nagkikinahanglan hin materyal nga pagkaon basi mabuhi. Pero an mga tawo la an may abilidad nga kumaon hin espirituwal nga pagkaon. Ngan kinahanglan naton ito. Ito an rason nga hi Jesus nagsiring: “An tawo nabubuhi, diri la ha tinapay, kondi ha tagsa nga pulong nga nagawas ha baba ni Jehova.” (Mat. 4:4) Salit diri naton dapat palabyon an usa ka adlaw nga diri kita nakakakaon hin espirituwal nga pagkaon tikang ha presyoso nga Pulong han Dios, an Biblia. An salmista nagsiring: ‘Malipayon an tawo nga an kalipay aada ha balaud ni Jehova ngan nagbabasa hito ha adlaw ngan gab-i.’—Basaha an Salmo 1:1-3.

5-6. (a) Ano an aton mahibabaroan ha Biblia? (b) Ha ano nga mga paagi an pagbasa ha Biblia makakabulig ha aton?

⁵ Ha Biblia, mahigugmaon nga gintatagan kita ni Jehova hin importante nga impormasyon kon paonan-o magigin malipayon. Nahibabaro kita han iya katuyoan para ha aton kinabuhi. Nahibabaro kita kon paonan-o kita magigin duok ha iya ngan makarawat an iya pagpasaylo ha aton mga sala. Ngan nahibabaro kita mahitungod han makalilipay nga paglaom nga iya iginsaad para ha tiarabot. (Jer. 29:11) Ini nga mga kamatuoran nga aton nahibabaroan ha pag-aram ha Biblia nakakapalipay gud ha aton kasingkasing!

 ⁶ Maaram kita nga an Biblia puno liwat hin praktikal nga sagdon para ha adlaw-adlaw nga pagkinabuhi. Kon ginsusunod naton ito nga sagdon, magigin malipayon kita. Ha kada panahon nga nanluluya ka tungod han mga problema, paghatag hin mas damu nga panahon ha pagbasa ngan pagpamalandong ha Pulong ni Jehova. Hi Jesus nagsiring: “Malipayon an mga namamati ha pulong han Dios ngan nagtutuman hito!”—Luc. 11:28.

7. Ano an makakabulig ha imo nga makabenepisyo gud ha panahon nga iginhahatag mo ha pagbasa ha Pulong han Dios?

⁷ Ha imo pagbasa ha Pulong han Dios, paghatag hin panahon nga ma-enjoy an imo ginbabasa. Ha pag-ilustrar, nahitabo na ba ini ha imo? May nagluto han imo paborito nga pagkaon. Pero bangin kulang an imo panahon o may ginhuhunahuna ka salit gindali-dali mo na la ito pagkaon nga waray mo man la maabat an rasa hito. Kahuman, nasantop mo nga madagmit gud an imo pagkaon ngan nahunahuna mo nga unta naghinay-hinay ka la ngan gin-enjoy an rasa hito. Ha pariho nga paagi, nagbasa ka na ba ha Biblia nga nagdadagmit gud salit waray mo ma-enjoy an rasa han mensahe hito? Paghatag hin panahon nga ma-enjoy an pagbasa ha Pulong han Dios; imadyina an mga eksena, hunahunaa an mga tingog, ngan pamalandonga an imo ginbasa. Kon bubuhaton mo ini, magigin mas malipayon ka.

8. Paonan-o gintutuman han “matinumanon ngan maaramon nga uripon” an toka hito? (Kitaa liwat an footnote.)

⁸ Gintokahan ni Jesus an “matinumanon ngan maaramon nga uripon” nga magtagana hin espirituwal nga pagkaon ha husto nga panahon, ngan napapakaon gud kita hin maopay ha espirituwal. * (Mat. 24:45) An giniyahan nga Kasuratan amo an nangunguna nga ingredient ha ngatanan nga igintatagana han matinumanon nga uripon. (1 Tes. 2:13) Salit ito nga espirituwal nga pagkaon nabulig ha aton nga mahibaroan an panhunahuna ni Jehova nga iya iginsumat ha Biblia. Ini an rason nga ginbabasa naton an Barantayan ngan Pagpamata! nga mga magasin ngan an mga artikulo ha jw.org. Nag-aandam kita para ha mga katirok ha midweek ngan weekend. Ngan ginkikita naton an tagsa nga binulan nga programa ha JW Broadcasting^® kon available ito. An pagkaon hin hura nga espirituwal nga pagkaon mabulig ha aton nga mahimo an ikaduha nga butang nga nagriresulta hin tinuod nga kalipay.

9. Ano an ikaduha nga butang nga nagriresulta hin tinuod nga kalipay?

⁹ IKADUHA: Basi magin tinuod nga malipayon, kinahanglan magkinabuhi kita uyon ha mga suruklan ni Jehova. An salmista nagsurat: “Malipayon an bisan hin-o nga may kahadlok kan Jehova, nga naglalakat ha Iya mga dalan.” (Sal. 128:1) An kahadlok kan Jehova nagpapasabot nga ginrirespeto gud naton hiya salit ginlilikyan naton an pagbuhat hin bisan ano nga nakakapasubo ha iya. (Prob. 16:6) Salit padayon kita nga naniningkamot nga sundon an mga suruklan han Dios ha tama ngan sayop nga iya iginsaysay ha Biblia. (2 Cor. 7:1) Magigin malipayon kita kon ginbubuhat naton an mga naruruyagan ni Jehova ngan ginsasalikway an mga ginkakangalasan niya.—Sal. 37:27; 97:10; Roma 12:9.

10. Sumala ha Roma 12:2, ano an aton responsabilidad?

¹⁰ Basaha an Roma 12:2. Bangin maaram an usa nga tawo nga hi Jehova an may awtoridad ha pagdesisyon kon ano an tama ngan sayop,  pero kinahanglan liwat hiya magdesisyon nga sundon an mga suruklan han Dios. Pananglitan, bangin maaram an usa nga tawo nga an gobyerno an may katungod ha paghimo hin mga balaud may kalabotan ha kalaksihon han mga awto ha kalsada. Pero bangin nadiri hiya nga sundon ito. Salit an iya pagdrayb mas malaksi kay han igintutugot. Iginpapakita naton ha aton panggawi nga natoo gud kita nga an pagsunod ha mga suruklan ni Jehova amo an pinakamaopay nga paagi han pagkinabuhi. (Prob. 12:28) Ito an inabat ni David, salit nagsiring hiya mahitungod kan Jehova: “Imo iginpapahibaro ha akon an dalan han kinabuhi. Ha imo presensya may pagrayhak; may kalipay dida ha imo too nga kamot ha kadayonan.”—Sal. 16:11.

11-12. (a) Kon nagugupong kita o nanluluya, ha ano kita dapat maghirot? (b) Paonan-o an mga pulong ha Filipos 4:8 makakabulig ha aton kon nagpipili hin kaliawan?

¹¹ Kon nagugupong kita o nanluluya, bangin abaton naton nga kinahanglan may buhaton kita basi diri ta na mahunahuna an aton mga problema. Natural la ito, pero kinahanglan maghirot kita nga diri makabuhat hin bisan ano nga ginkakangalasan ni Jehova.—Efe. 5:10-12, 15-17.

¹² Ha surat ni apostol Pablo ha mga taga-Filipos, iya gin-aghat an mga Kristiano nga padayon nga hunahunaon an mga butang nga “matadong, . . . putli, . . . makapaaghat han gugma, [ngan] maopay.” (Basaha an Filipos 4:8.) Bisan kon diri espisipiko nga mahitungod ha kaliawan an iginsurat ni Pablo, dapat ito makaimpluwensya ha mga pahalibway nga aton ginpipili. Testingi ini: Bisan diin nga nakikita ha bersikulo an pulong nga “butang,” liwani ito han pulong nga “kanta,” “salida,” “nobela,” o “video game.” An pagbuhat hini makakabulig ha imo nga masabtan kon hain an bangin inuuyonan han Dios ngan hain an bangin diri. Karuyag naton ipahiuyon an aton kinabuhi ha higtaas nga suruklan ni Jehova. (Sal. 119:1-3) Katapos, tungod kay limpyo an aton konsensya, mahihimo na naton an sunod nga butang nga nagriresulta hin tinuod nga kalipay.—Buh. 23:1.

13. Ano an ikatulo nga butang nga nagriresulta hin tinuod nga kalipay? (Juan 4:23, 24)

¹³ IKATULO: Siguroha nga unahon mo ha imo kinabuhi an pagsingba kan Jehova. Sugad nga aton Maglalarang, angayan hi Jehova han aton pagsingba. (Pah. 4:11; 14:6, 7) Tungod hito, angay naton iprayoridad an pagsingba ha iya ha paagi nga iya gin-uuyonan, “ha espiritu ngan ha kamatuoran.” (Basaha an Juan 4:23, 24.) Karuyag naton nga giyahan han baraan nga espiritu han Dios an aton pagsingba basi magin uyon ito ha mga kamatuoran nga mababasa ha iya Pulong. Kinahanglan unahon ta an aton pagsingba bisan kon naukoy kita ha usa nga nasud diin may restriksyon o igindidiri an aton buruhaton. Yana mismo, sobra 100 nga kabugtoan an priso tungod la kay mga Saksi ni Jehova hira. * Bisan pa hito, malipayon nga ginbubuhat nira an ira mahihimo basi makag-ampo, makag-aram, ngan makagsumat ha iba mahitungod ha aton Dios ngan ha iya Ginhadian. Kon ginpapakaalohan kita o gintitimaraot, mahimo kita magin malipayon kay maaram kita nga upod naton hi Jehova ngan babalosan kita niya.—San. 1:12; 1 Ped. 4:14.

14. Ano an nahitabo ha usa nga batan-on nga brother nga taga-Tajikistan, ngan kay ano?

¹⁴ May mga eksperyensya nga nagpapakita nga an tulo nga butang nga aton pa la ginhisgotan nagriresulta hin tinuod nga kalipay,  anoman an aton sitwasyon. Pansina an nahitabo ha 19 anyos nga hi Jovidon Bobojonov, nga taga-Tajikistan, nga nagdumiri pagsundalo. Han Oktubre 4, 2019, pwersado nga ginkuha hiya ha iya balay, ginpriso hin damu ka bulan, ngan gintratar sugad hin kriminal. Ini nga inhustisya gumawas ha balita ha pipira nga nasud. Iginreport nga ginkastigo hiya basi presyuron nga igyakan an panumpa han mga sundalo ngan magsul-ot hin uniporme. Katapos hito, gindeklara hiya nga guilty ngan gindara ha labor camp tubtob nga an presidente han nasud naghatag ha iya hin pardon ngan nagsugo nga pagawson hiya. Ha bug-os nga panahon nga priso hi Jovidon, gintipigan niya an iya integridad ngan kalipay. Paonan-o? Pinaagi ha pagin mahunahunaon han iya espirituwal nga panginahanglan.

15. Paonan-o hi Jovidon nakakakaon hin espirituwal nga pagkaon samtang priso?

¹⁵ Samtang priso hi Jovidon, kumaon hiya hin espirituwal nga pagkaon, bisan han waray hiya Biblia o bisan ano nga aton publikasyon. Paonan-o ito nagin posible? An kabugtoan didto nagdadara ha iya hin materyal nga pagkaon ngan ginsusuratan han inadlaw nga teksto an mga surudlan han groseri. Salit nababasa niya an Biblia ngan napapamalandong ito kada adlaw. Katapos hiya pagawson ha prisohan, ini an iya sagdon para hadton waray pa  makaeksperyensya hin grabe nga mga pagsari: “Importante gud nga bug-os mo nga gamiton an imo kagawasan basi pahilarumon an imo kahibaro parte kan Jehova pinaagi ha pagbasa han iya Pulong ngan han aton mga publikasyon.”

16. Diin iginpokus ni Jovidon an iya hunahuna?

¹⁶ Ini nga aton bugto nagkinabuhi uyon ha mga suruklan ni Jehova. Imbes nga maghinunahuna ha sayop nga mga hingyap ngan gumawi hin maraot, nagpokus hiya kan Jehova ngan ha kon ano an Iya nalilipayan. Ginpamalandong ni Jovidon an kahusay han mga linarang han Dios. Kada aga nagmamata hiya nga nababatian an mga huni ngan kanta han mga tamsi. Ha gab-i ginkikinita niya an bulan ngan mga bitoon. Siring niya: “Ito nga mga regalo ni Jehova nakapalipay ngan nakadasig ha akon.” Kon mapasalamaton kita ha espirituwal ngan materyal nga mga tagana ni Jehova, magigin malipayon kita, ngan ito nga kalipay makakabulig ha aton nga makailob.

17. Paonan-o an mga pulong ha 1 Pedro 1:6, 7 aplikado ha usa nga tawo nga bangin puropariho kan Jovidon an sitwasyon?

¹⁷ Gin-una liwat ni Jovidon an pagsingba kan Jehova. Maaram hiya han importansya han pagtipig han iya integridad ha tinuod nga Dios. Hi Jesus nagsiring: “Hi Jehova nga imo Dios an kinahanglan mo singbahon, ngan hiya gud la an kinahanglan mo tagan hin sagrado nga pag-alagad.” (Luc. 4:8) Karuyag han mga kumander han militar ngan mga sundalo nga bayaan ni Jovidon an iya relihiyon. Lugod, naniguro hiya ha pag-ampo adlaw ngan gab-i ngan naghangyo kan Jehova nga buligan hiya nga diri umundang ngan diri ikompromiso an iya pagtoo. Bisan pa han diri patas nga pagtratar kan Jovidon, waray gud hiya magkompromiso. Sugad nga resulta, malipayon gud hiya yana ha pagkaada hin usa nga butang nga waray ha iya antes hiya dakpon, kastiguhon, ngan prisuhon—an nasarihan nga pagtoo.—Basaha an 1 Pedro 1:6, 7.

18. Paonan-o naton matitipigan an aton kalipay?

¹⁸ Maaram hi Jehova han aton ginkikinahanglan basi magin tinuod nga malipayon. Kon bubuhaton mo an tulo nga butang nga nagriresulta hin tinuod nga kalipay, makakapabilin ka nga malipayon bisan pa han magkuri nga problema. Ikaw liwat makakasiring: “Malipayon an katawohan nga an Dios hi Jehova!”—Sal. 144:15.