1. Ano nga paglaom an iginhatag ha aton ni Jehova?

 IGINHATAG ha aton ni Jehova an makalilipay nga paglaom nga kinabuhi nga waray kataposan. An iba naglalaom nga mabuhi hin waray kataposan ha langit sugad nga imortal nga mga espiritu. (1 Cor. 15:50, 53) Pero an kadam-an naglalaom nga mabuhi hin waray kataposan ha tuna nga may perpekto nga kahimsog ngan kalipay. (Pah. 21:3, 4) Ginpapamulat man naton nga mabuhi hin waray kataposan ha langit o ha tuna, presyoso ha aton an aton paglaom.

2. Ha ano nakabase an aton paglaom, ngan kay ano nga makakasiring kita hito?

² An pulong nga “paglaom,” sugad han pagkagamit ha Biblia, mahimo magpasabot han “pagpamulat nga may mag-opay nga butang nga mahitatabo.” Sigurado an aton paglaom ha tiarabot kay tikang ito kan Jehova. (Roma 15:13) Maaram kita han iya iginsaad, ngan maaram kita nga pirme niya gintutuman an iya mga saad. (Num. 23:19) Kombinsido kita nga hi Jehova may hingyap ngan gahum ha pagtuman han tanan nga iya ginsiring nga iya bubuhaton. Salit an aton paglaom nakabase, diri ha pantasya o ha karuyag la naton hunahunaon, kondi ha ebidensya ngan reyalidad.

3. Ano an aton hihisgotan hini nga artikulo? (Salmo 27:14)

³ Hinigugma kita han aton langitnon nga Amay, ngan karuyag niya nga sumarig kita ha iya. (Basaha an Salmo 27:14.) Kon marig-on an aton paglaom kan Jehova, maiilob naton an mga problema, ngan magigin maisugon ngan malipayon kita anoman an mahitabo. Hisgotan ta kon paonan-o an aton paglaom nagpuprotektar ha aton. Siyahan, rirepasuhon ta kon paonan-o an paglaom pariho hin angkla ngan hin helmet. Katapos, hihisgotan ta kon paonan-o naton mapaparig-on an aton paglaom.

4. Ha ano nga paagi an paglaom pariho hin angkla? (Hebreo 6:19)

⁴ Ha surat ni apostol Pablo ha mga Hebreo, iginpariho niya ha angkla an aton paglaom. (Basaha an Hebreo 6:19.) Agsob hiya magbiyahe ha dagat, salit maaram hiya nga an mga angkla ginagamit basi diri maanod an usa nga barko. Makausa, pasahero hiya ha barko han nagkaada makusog nga bagyo. Hito nga bagyo, nakita niya nga an mga tripulante naghulog hin mga angkla ha dagat basi an barko diri maanod ngadto ha delikado nga kabatoan. (Buh. 27:29, 39-41) Sugad la nga an angkla nabulig basi diri maanod an barko, an aton paglaom nagpaparig-on ha aton basi diri kita maanod pahirayo kan Jehova kon naatubang kita hin sugad-bagyo nga mga problema. An aton marig-on nga paglaom nabulig ha aton nga magin kalmado bisan pa hito kay kombinsido kita nga magigin mas maopay an kahimtang ha tiarabot. Hinumdumi nga nagpahamangno hi Jesus nga pagtitimarauton kita. (Juan 15:20) Salit an pagpamalandong ha balos nga iginsaad ha aton nabulig basi makapabilin kita ha aton Kristiano nga pagkinabuhi.

5. Paonan-o an paglaom nagparig-on kan Jesus han inatubang hiya hin kamatayon?

⁵ Hunahunaa kon paonan-o an paglaom nakabulig kan Jesus nga makapabilin nga marig-on bisan kon maaram hiya nga makakaeksperyensya hiya hin masakit nga kamatayon. Ha adlaw han Pentekostes 33 C.E., hi apostol Pedro nagkotar hin tagna tikang ha libro han Mga Salmo nga naghuhulagway kon ano kakalmado hi Jesus: “Maukoy ako nga may paglaom; tungod kay diri mo ako babayaan ha Lubnganan, ngan diri mo papabay-an nga madunot an usa nga maunungon ha imo. . . . Pupun-on mo ako hin duro nga kalipay ha imo presensya.” (Buh. 2:25-28; Sal. 16:8-11) Bisan kon maaram hi Jesus nga mamamatay hiya, marig-on an iya paglaom nga babanhawon hiya han Dios ngan magkakaada hiya han kalipay nga makaupod utro an iya Amay ha langit.—Heb. 12:2, 3.

6. Ano an ginsiring han usa nga brother mahitungod ha paglaom?

⁶ An aton paglaom sugad nga Kristiano nakabulig ha damu naton nga kabugtoan nga makailob. Pansina an ehemplo ni Leonard Chinn, nga matinumanon nga brother nga taga-England. Ha panahon han Girra ha Kalibotan I, ginpriso hiya kay nagdumiri hiya nga magsundalo. Duha ka bulan nga ginbartolina hiya, katapos, ginpwersa hiya nga magtrabaho hin mabug-at gud. Ha urhi nagsurat hiya: “An akon mga naeksperyensyahan nakabulig ha akon nga masantop nga kinahanglan ta gud an paglaom basi makailob. Aada an ehemplo ni Jesus, han mga apostol, ngan han mga propeta, ngan may-ada kita han presyoso nga mga saad ha Biblia. Ini ngatanan naghahatag ha aton hin daku nga paglaom para ha tiarabot ngan nagpapakusog ha aton basi makailob.” An paglaom nagin angkla ni Leonard, ngan puydi liwat ito magin angkla naton.

7. Paonan-o an mga problema nagpaparig-on han aton paglaom? (Roma 5:3-5; Santiago 1:12)

⁷ Nagigin mas marig-on an aton paglaom katapos ta ilubon an mga problema ngan maeksperyensyahan an bulig ngan pag-uyon ni Jehova. (Basaha an Roma 5:3-5; Santiago 1:12.) Salit mas marig-on na an aton paglaom kompara han siyahan nga ginkarawat naton an maopay nga sumat. Karuyag ni Satanas nga mabug-atan gud kita han aton mga problema, pero ha bulig ni Jehova malalamposan naton an tagsa hito.

8. Ha ano nga paagi an paglaom pariho hin helmet? (1 Tesalonica 5:8)

⁸ Iginpapariho liwat han Biblia ha helmet an aton paglaom. (Basaha an 1 Tesalonica 5:8.)  An sundalo nagsusul-ot hin helmet basi protektado an iya ulo bisan kon maigo ito han mga kaaway. Ha aton espirituwal nga pakiggirra, kinahanglan ta protektaran an aton panhunahuna ha mga pag-atake ni Satanas. Ginpapauranan kita niya hin mga pagsulay ngan ideya basi mahugawan an aton panhunahuna. Sugad la nga an helmet nagpuprotektar ha ulo han sundalo, an aton paglaom nagpuprotektar ha aton panhunahuna basi makapabilin kita nga matinumanon kan Jehova.

9. Ano an nahitatabo kon an mga tawo waray paglaom?

⁹ An aton paglaom nga mabuhi ha waray kataposan mabulig ha aton nga gumios nga may kinaadman ngan husto nga pagturotimbang. Pero kon magluya an aton paglaom ngan tugotan ta an unudnon nga mga hingyap nga magkontrol ha aton hunahuna, mahimo kita mahingalimot han aton tumong nga mabuhi ha waray kataposan. Hunahunaa an nahitabo ha pipira nga Kristiano nga naukoy ha kadaan nga Corinto. Nawad-an hira hin pagtoo ha usa nga importante nga saad han Dios—an paglaom ha pagkabanhaw. (1 Cor. 15:12) Nagsurat hi Pablo nga an mga tawo nga diri natoo ha pagkabanhaw nagkikinabuhi nga diri ginhuhunahuna an tiarabot. (1 Cor. 15:32) Yana, damu nga waray paglaom ha mga saad han Dios an diri naghuhunahuna han tiarabot; lugod, ginsasalingabot nira an anoman nga kalipayan nga puydi nira ma-enjoy. Pero kita nasarig ha kabubuwason nga iginsaad han Dios. An aton paglaom usa nga simboliko nga helmet nga nagpuprotektar ha aton panhunahuna ngan nabulig ha aton nga diri hunahunaon an aton la kalugaringon, nga makakadaot ha aton relasyon kan Jehova.—1 Cor. 15:33, 34.

10. Paonan-o an paglaom makakaprotektar ha aton ha sayop nga panhunahuna?

¹⁰ An aton paglaom makakaprotektar liwat ha aton ha paghunahuna nga waray pulos an pangalimbasog nga lipayon hi Jehova. Pananglitan, an iba bangin maghunahuna: ‘Diri gud ako magigin usa hadton mabubuhi ha waray kataposan. Diri ako sugad kaopay nga tawo. Diri ko gud masusunod an mga suruklan han Dios.’ Hinumdumi nga puropariho hito an ginsiring kan Job han buwa nga paraliaw nga hi Elipaz: “Ano ba an mortal nga tawo nga magigin putli hiya?” Nagsiring liwat hiya parte ha Dios: “Kitaa! Waray Hiya pagsarig ha Iya mga baraan, ngan bisan an langit diri putli ha Iya pagkita.” (Job 15:14, 15) Kabuwaan gud ito! Hinumdumi kon hin-o an naruruyag nga hunahunaon mo ito—hi Satanas. Maaram hiya nga kon paghihinunahunaon mo ito, hinay-hinay nga mawawara an imo paglaom. Lugod, isalikway an sugad nga kabuwaan ngan pagpokus ha mga saad ni Jehova. Ayaw gud pagruhaduha nga karuyag niya nga mabuhi ka ha waray kataposan ngan bubuligan ka niya nga makab-ot ito nga tumong.—1 Tim. 2:3, 4.

11. Kay ano nga dapat kita magin mapailubon samtang ginhuhulat ta nga matuman an aton paglaom?

¹¹ Diri pirme masayon nga tipigan nga marig-on an aton paglaom. Bangin mauyam kita paghinulat ha Dios nga tumanon an iya mga saad. Pero hi Jehova waray tinikangan ngan waray kataposan, ngan an iya panhunahuna ha panahon iba kay ha aton. (2 Ped. 3:8, 9) Tutumanon niya an iya katuyoan ha pinakamaopay nga paagi, pero bangin diri hiya gumios ha panahon nga ginlalaoman ta. Ano an makakabulig ha aton nga matipigan nga marig-on an aton paglaom samtang mapailubon nga ginhuhulat ta nga tumanon han Dios an iya mga saad?—San. 5:7, 8.

12. Sumala ha Hebreo 11:1, 6, paonan-o an paglaom konektado ha pagtoo?

¹² Matitipigan naton nga marig-on an aton paglaom kon magpapabilin kita nga duok kan Jehova, an Dios nga naggagarantiya han aton paglaom. Ngani, iginpapakita han Biblia nga an paglaom konektado gud ha pagtoo nga buhi  hi Jehova ngan hiya “an nagbabalos ha mga sinsero nga namimiling ha iya.” (Basaha an Hebreo 11:1, 6.) Kon natoo gud kita nga buhi hi Jehova, mas masarig kita nga bubuhaton niya an tanan nga iya iginsaad. Hisgotan ta an praktikal nga mga paagi nga mapapahilarom ta an aton relasyon kan Jehova ngan matitipigan nga marig-on an aton paglaom.

13. Paonan-o kita magigin duok ha Dios?

¹³ Pag-ampo kan Jehova, ngan basaha an iya Pulong. Bisan kon diri naton nakikita hi Jehova, puydi kita magin duok ha iya. Puydi kita makiistorya ha iya ha pag-ampo, kay nasarig kita nga mamamati hiya ha aton. (Jer. 29:11, 12) Puydi kita mamati ha Dios pinaagi ha pagbasa han iya Pulong ngan pagpamalandong hito. Samtang ginbabasa naton kon paonan-o gin-ataman ni Jehova an mga maunungon ha iya hadto, mas magririg-on an aton paglaom. An ngatanan ha Pulong han Dios “iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.”—Roma 15:4.

14. Kay ano nga angay ta pamalandungon an ginbuhat ni Jehova para ha iba?

¹⁴ Pamalandonga kon paonan-o gintuman ni Jehova an iya mga saad. Pansina an ginbuhat han Dios para kanda Abraham ngan Sarah. Lagas na gud hira salit diri na hira magkakaanak. Pero ginsaaran hira han Dios nga magkakaanak hira. (Gen. 18:10) Ano an nagin reaksyon ni Abraham? An Biblia nasiring: “May pagtoo hiya nga magigin amay hiya han damu nga nasud.” (Roma 4:18) Bisan kon ha panhunahuna han tawo waray na paglaom an kahimtang ni Abraham, nasarig hiya nga tutumanon ni Jehova an Iya saad. Natuman gud man an ginlalaoman hiton matinumanon nga lalaki. (Roma 4:19-21) An sugad nga mga rekord nagtututdo ha aton nga pirme kita makakasarig nga tutumanon ni Jehova an iya mga saad, bisan kon baga hin imposible ito ha aton.

15. Kay ano nga angay ta pamalandungon an ginbuhat na han Dios para ha aton?

 ¹⁵ Hunahunaa kon ano na an ginbuhat ni Jehova para ha imo. Hunahunaa kon paonan-o ka mismo nakabenepisyo ha katumanan han mga saad nga mababasa ha Pulong han Dios. Pananglitan, hi Jesus nagsaad nga itatagana han iya Amay an imo mga panginahanglan. (Mat. 6:32, 33) Ginpasarig ka liwat ni Jesus nga ihahatag ha imo ni Jehova an baraan nga espiritu kon aaroon mo ito. (Luc. 11:13) Gintuman ni Jehova ito nga mga saad. Posible nga may mahunahuna ka nga iba pa nga saad nga gintuman niya para ha imo. Pananglitan, nagsasaad hiya nga iya ka papasayloon, liliawon, ngan papakaunon ha espirituwal. (Mat. 6:14; 24:45; 2 Cor. 1:3) Kon ginpapamalandong mo an ginbuhat na han Dios para ha imo, mapaparig-on mo an imo paglaom ha iya bubuhaton para ha imo ha tiarabot.

16. Kay ano nga an paglaom presyoso gud nga regalo?

¹⁶ An aton paglaom nga mabuhi ha waray kataposan presyoso nga regalo tikang ha Dios. Ginpapamulat naton an makalilipay nga kabubuwason, ngan sigurado kita nga mahitatabo ito. An paglaom sugad hin aton angkla, nga nagpaparig-on ha aton basi mailob ta an mga problema, makaya an pagtimaraot, ngan maatubang pa ngani an kamatayon. Sugad ito hin aton helmet, nga nagpuprotektar ha aton panhunahuna basi maisalikway ta an sayop ngan mabuhat an tama. An aton paglaom nga nakabase ha Biblia nabulig ha aton nga magin mas duok ha Dios ngan nagpapakita kon ano kita niya kahinigugma. Nakakabenepisyo gud kita kon gintitipigan ta nga marig-on an aton paglaom.

17. Kay ano nga an aton paglaom nagriresulta hin pagrayhak?

¹⁷ “Magrayhak kamo tungod han iyo paglaom,” an pagdasig ni Pablo ha iya surat ha mga taga-Roma. (Roma 12:12) Makakagrayhak hi Pablo kay sigurado hiya nga kon magpapabilin hiya nga matinumanon makakarawat niya an kinabuhi nga waray kataposan ha langit. Kita liwat makakagrayhak ha aton paglaom kay sigurado kita nga tutumanon ni Jehova an iya mga saad. Sugad han iginsurat han salmista, “malipayon an tawo . . . nga an iya paglaom aada kan Jehova nga iya Dios, . . . an Dios nga pirme matinumanon.”—Sal. 146:5, 6.