1. Kay ano nga bangin makurian kita ha pagsugot?

 NAKUKURIAN ka ba usahay nga magin masinugtanon? Ito an gin-abat ni Hadi David, salit nag-ampo hiya ha Dios: “Pagiosa ako nga kinaburut-on nga sumugot ha imo.” (Sal. 51:12) Hinigugma ni David hi Jehova. Bisan pa hito, may mga panahon nga nakurian hiya nga magin masinugtanon, ngan kita liwat. Kay ano? Siyahan, napanunod naton an tendensya nga magin diri masinugtanon. Ikaduha, pirme kita gin-aaghat ni Satanas nga magrebelde, pariho han iya ginbuhat. (2 Cor. 11:3) Ikatulo, napapalibotan kita hin mga tawo nga may rebelyoso nga disposisyon, “an espiritu nga nagios yana ha mga anak han pagkadiri-masinugtanon.” (Efe. 2:2) Kinahanglan kita maningkamot nga atohan diri la an aton tendensya nga makasala kondi pati liwat an mga presyur ha aton han Yawa ngan hini nga kalibotan nga diri magin masinugtanon. Kinahanglan ta mangalimbasog nga sugton hi Jehova ngan adton iya gintagan hin awtoridad.

2. Ano an karuyag sidngon han pagin “andam ha pagsugot”? (Santiago 3:17)

² Basaha an Santiago 3:17. An giniyahan nga parasurat nga hi Santiago nagsiring nga an maaramon nga mga tawo “andam ha pagsugot.” Hunahunaa kon ano an karuyag sidngon hito. Kinahanglan kinaburut-on ngan andam kita ha pagsugot hadton gintagan ni Jehova hin awtoridad. Syempre, hi Jehova diri naglalaom nga susugton naton adton nag-aaghat ha aton nga talapason an Iya mga sugo.—Buh. 4:18-20.

3. Kay ano nga importante kan Jehova an aton pagsugot hadton may mga awtoridad ha aton?

³ Bangin mas masayon ha aton an pagsugot kan Jehova kay ha pagsugot ha mga tawo. Tungod ito kay hi Jehova pirme naghahatag hin perpekto nga giya. (Sal. 19:7) Pero an mga tawo nga may awtoridad diri perpekto. Bisan pa hito, an aton langitnon nga Amay naghatag hin awtoridad ha mga kag-anak, mga opisyal  han gobyerno, ngan mga tigurang. (Prob. 6:20; 1 Tes. 5:12; 1 Ped. 2:13, 14) Kon ginsusugot naton hira, ginsusugot naton hi Jehova. Aton hisgotan kon paonan-o ta masusugot an mga gintagan ni Jehova hin awtoridad, bisan kon may mga panahon nga bangin nakukurian kita ha pagkarawat ngan pagsunod han ira giya.

4. Kay ano nga diri ginsusugot han damu nga anak an ira mga kag-anak?

⁴ An mga batan-on napapalibotan han ira mga igkasi-batan-on nga “diri masinugtanon ha mga kag-anak.” (2 Tim. 3:1, 2) Kay ano nga damu ha ira an diri nasugot? Ginhuhunahuna han pipira nga hipokrito an ira mga kag-anak kay iba an ginbubuhat han mga kag-anak ha ira ginsisiring. Para ha iba, an sagdon han ira mga kag-anak kadaan na, diri praktikal, o sobra kaistrikto. Kon usa ka nga batan-on, inabat ka na ba hin sugad? Damu an nakukurian ha pag-aplikar hini nga sugo ni Jehova: “Magin masinugtanon kamo ha iyo mga kag-anak kahiusa han Ginoo, kay matadong ini.” (Efe. 6:1) Ano an makakabulig ha imo nga mabuhat ito?

5. Sugad nga batan-on, kay ano nga hi Jesus an pinakamaopay nga ehemplo ha pagsugot ha mga kag-anak? (Lucas 2:46-52)?

⁵ Mahibabaro ka ha pagin masinugtanon tikang ha pinakamaopay nga ehemplo—hi Jesus. (1 Ped. 2:21-24) Perpekto hiya nga tawo nga may diri perpekto nga mga kag-anak. Pero ginpasidunggan ni Jesus an iya mga kag-anak bisan kon nakahimo hira hin mga sayop ngan usahay diri nira hiya nasasabtan. (Ex. 20:12) Pansina kon ano an nahitabo han 12 anyos hi Jesus. (Basaha an Lucas 2:46-52.) Nabayaan hiya han iya mga kag-anak ha Jerusalem. Responsabilidad gud nira Jose ngan Maria nga siguruhon nga an ngatanan nira nga anak kaupod han grupo nga nagbibiyahe tipauli katapos han piyesta. Han nakit-an na nira hi Jesus, ginbasol hiya ni Maria kay nabaraka hira hinduro! Imbes nga magsiring hi Jesus nga diri hira makatadunganon, binaton hiya ha ira ha simple ngan matinalahuron nga paagi. Pero ‘waray masabti nira Jose ngan Maria an iya ginsiring ha ira.’ Bisan pa hito, “padayon nga nagpasakop [hi Jesus] ha ira.”

6-7. Ano an makakabulig ha mga batan-on nga sugton an ira mga kag-anak?

⁶ Mga batan-on, nakukurian ba kamo usahay nga sugton an iyo mga kag-anak kon nakakahimo hira hin mga sayop o kon diri nira kamo nasasabtan? Ano an makakabulig ha iyo? Siyahan, hunahunaa an aabaton ni Jehova. An Biblia nasiring nga kon nasugot kamo ha iyo mga kag-anak, “nakakapalipay gud ini ha Ginoo.” (Col. 3:20) Maaram hi Jehova nga usahay diri kamo nasasabtan han iyo mga kag-anak o usahay naghihimo hira hin mga patakaran nga makuri sundon. Pero bisan pa hito, kon ginpipili niyo nga sundon hira, mapapalipay niyo hi Jehova.

⁷ Ikaduha, hunahunaa an aabaton han iyo mga kag-anak. Kon nasugot kamo ha ira, mapapalipay niyo hira ngan mas masarig hira ha iyo. (Prob. 23:22-25) Posible nga magin mas duok liwat kamo ha ira. “Han ginsugot ko hin mas agsob an akon mga kag-anak,” siring ni Alexandre nga taga-Belgium, “nag-opay an amon relasyon. Nagin mas duok kami ngan mas malipayon.” b Ikatulo, hunahunaa nga kon magigin masinugtanon kamo yana, makakabulig ito ha iyo ha tiarabot. Hi Paulo, nga taga-Brazil, nagsiring: “An akon pagin masinugtanon ha akon mga kag-anak nakabulig ha akon nga sugton hi Jehova ngan an iba nga may awtoridad.” An Pulong han Dios naghahatag hin importante nga rason nga sugton an iyo mga kag-anak.  Nasiring ito: “Basi maghingaopay [kamo] ngan magpabilin [kamo] hin hilawig nga panahon ha tuna.”—Efe. 6:2, 3.

8. Kay ano nga damu nga batan-on an nagdesisyon nga sugton an ira mga kag-anak?

⁸ Nakita han damu nga batan-on an mag-opay nga resulta kon nasugot hira. Hi Luiza, nga taga-Brazil liwat, ha siyahan nakurian pag-intindi kon kay ano nga diri la anay hiya puydi magkaada hin celfon. Baman, nangatadongan hiya, an iya mga kaedad may-ada man mga celfon. Pero nasantop niya nga ginpuprotektaran la hiya han iya mga kag-anak. Maaram hiya nga kon ginsusugot niya an iya mga kag-anak, dapat diri niya abaton nga ginbabawalan hiya kay an ira mga sagdon para gud ha iya kaopayan. Hi Elizabeth, nga batan-on nga sister nga taga-United States, usahay nakukurian la gihapon nga sugton an iya mga kag-anak. Hiya nagsaysay: “Kon diri ko bug-os nga nasasabtan kon kay ano nga naghimo hin espisipiko nga patakaran an akon mga kag-anak, ginhihinumdom ko an mga panahon nga an ira mga patakaran nagpanalipod ha akon.” Hi Monica, nga taga-Armenia, nagsiring nga pirme maopay an mga resulta kon ginsusugot niya an iya mga kag-anak kay ha kon diri niya hira ginsusugot.

9. Ano an inaabat han damu nga tawo mahitungod ha pagsugot ha balaud?

⁹ Damu nga tawo an nauyon nga kinahanglan naton an sekular nga mga gobyerno ngan dapat naton sugton an pipira nga balaud nga iginpapatuman hinin “higtaas nga mga awtoridad.” (Roma 13:1) Pero bangin diri nira sugton an mga balaud nga diri nira karuyag o inaabat nira nga diri patas. Pananglitan, tagda an pagbayad hin buhis. Ha usa nga nasud ha Europa, damu nga tawo an natoo nga “husto la nga diri magbayad hin buhis kon inaabat mo nga diri ito patas.” Salit diri urusahon nga an mga umurukoy hito diri nagbabayad han ngatanan nga buhis nga igin-oobligar han gobyerno.

10. Kay ano nga nasugot kita bisan ha mga balaud nga diri naton karuyag?

¹⁰ Iginpapakita han Biblia nga an mga gobyerno han tawo usa nga hinungdan han pag-antos, ginkukontrol ito ni Satanas, ngan hirani na ito bungkagon. (Sal. 110:5, 6; Ecles. 8:9; Luc. 4:5, 6) Nagsusumat liwat ito ha aton nga “an bisan hin-o nga nakontra ha awtoridad nakontra ha kahikayan han Dios.” An aton relatibo nga pagpasakop ha higtaas nga mga awtoridad bahin han temporaryo nga kahikayan ni Jehova basi tipigan an kahapsay. Salit dapat naton “ihatag ha ngatanan an angay ha ira,” upod na an pagbayad hin mga buhis, pagrespeto, ngan pagsugot. (Roma 13:1-7) Bangin hunahunaon naton nga an pagsugot ha balaud diri masayon, diri patas, o magasto. Pero nasugot kita kan Jehova, ngan ginsisidngan kita niya nga sugton adton aada ha awtoridad samtang diri kita nira ginsusugo nga talapason an iya mga sugo.—Buh. 5:29.

11-12. Sugad han iginsusumat han Lucas 2:1-6, ano an ginbuhat nira Jose ngan Maria basi sugton an balaud bisan kon diri ito masayon, ngan ano an mga resulta? (Kitaa liwat an mga piktyur.)

 ¹¹ Mahibabaro kita tikang ha ehemplo nira Jose ngan Maria, nga andam sumugot ha higtaas nga mga awtoridad bisan kon diri masayon an pagbuhat hito. (Basaha an Lucas 2:1-6.) Han mga siyam ka bulan na nga burod hi Maria, nasarihan an ira pagkamasinugtanon ni Jose. Hi Agusto, nga nagmando ha Imperyo han Roma, nagpagawas hin sugo nga magparehistro. Hira Jose ngan Maria kinahanglan magbiyahe tikadto ha Bethlehem, nga mga 150 ka kilometro an kahirayo nga may sagkahon nga mga dalan. Ito nga pagbiyahe diri gud masayon, labi na para kan Maria. Posible nga nabaraka ini nga mag-asawa mahitungod ha kahimsog ni Maria ngan ha ira diri pa natatawo nga anak. Ano man kon manganak hiya samtang nagbibiyahe? Iginbuburod niya an iginsaad nga Mesias. Puydi ba nira ito himoon nga pasangil basi diri sugton an gobyerno?

¹² Bisan kon hira Jose ngan Maria may-ada mga rason nga mabaraka, ginsunod nira an balaud. Ginbendisyonan ni Jehova an ira pagin masinugtanon. Talwas nga nakaabot hi Maria ha Bethlehem, nag-anak hin mahimsog nga bata, ngan nakabulig pa ngani ha pagtuman han tagna ha Biblia!—Mic. 5:2.

13. Paonan-o an aton pagin masinugtanon mahimo makaapekto ha aton kabugtoan?

¹³ Kon nasugot kita ha higtaas nga mga awtoridad, nagpapahimulos kita ngan an iba. Paonan-o? An usa hito, nalilikyan naton an magraot nga resulta han diri pagsunod ha balaud. (Roma 13:4) An aton pagsugot sugad nga indibiduwal mahimo makaapekto ha pagkita han mga awtoridad ha mga Saksi ni Jehova sugad nga grupo. Pananglitan, ha Nigeria pipira ka dekada na an naglabay, may mga sundalo nga sinulod ha Kingdom Hall ha panahon han katirok ngan ginbibiling an mga nagrarayot nga nadiri pagbayad hin buhis. Pero ginsugo hira han ira opisyal nga bumaya, nga nasiring: “An mga Saksi ni Jehova pirme nagbabayad han ira buhis.” Kon nasugot ka ha balaud, nabulig ka nga  matipigan an maopay nga reputasyon han mga Saksi ni Jehova—ito nga reputasyon mahimo makabulig ha pagprotektar ha imo kabugtoan.—Mat. 5:16.

14. Ano an nakabulig ha usa nga sister nga magin “andam ha pagsugot” ha higtaas nga mga awtoridad?

¹⁴ Bisan pa hito, bangin diri pirme naton karuyag nga sumugot ha higtaas nga mga awtoridad. “Makuri gud para ha akon nga magin masinugtanon,” siring ni Joanna nga sister ha United States, “kay pipira han akon kapamilya an nag-antos hin kawaray-hustisya ha kamot han mga awtoridad.” Pero nangalimbasog gud hi Joanna nga bag-uhon an iya panhunahuna. Siyahan, gin-undang niya an pagbinasa hin mga post ha social media nga nakakadugang han iya negatibo nga panhunahuna ha mga awtoridad. (Prob. 20:3) Ikaduha, nag-ampo hiya nga buligan hiya ni Jehova nga sumarig ha Iya imbes nga sumarig nga magbabag-o an gobyerno han tawo. (Sal. 9:9, 10) Ikatulo, nagbasa hiya hin mga artikulo ha aton mga publikasyon mahitungod ha neutralidad. (Juan 17:16) Yana, hi Joanna nagsiring nga tungod kay ginrirespeto ngan ginsusugot niya an mga awtoridad, “nagin kalmado gud hiya ngan kontento.”

15. Kay ano nga bangin makurian kita ha pagsugot ha instruksyon nga tikang ha organisasyon ni Jehova?

¹⁵ Gin-aaghat kita ni Jehova nga “magin masinugtanon ha mga nangunguna” ha kongregasyon. (Heb. 13:17) Bisan kon perpekto an aton Lider nga hi Jesus, adton iya ginagamit nga manguna dinhi ha tuna diri perpekto. Bangin makurian kita ha pagsugot ha ira, labi na kon may ginpapahimo hira ha aton nga diri naton karuyag. Makausa, hi apostol Pedro nag-alang ha pagsugot. Han ginsugo hiya han anghel nga kumaon hin karne han mga hayop nga mahugaw uyon ha Mosaiko nga Balaud, nagdumiri hi Pedro—diri la makausa, pero makatulo ka beses! (Buh. 10:9-16) Kay ano? Waray niya masabti iton bag-o nga instruksyon. Iba gud ito ha iya mga nahiaraan. Kon nakurian hi Pedro nga sugton an instruksyon tikang ha perpekto nga anghel, labi na gud nga makuri para ha aton nga sugton an instruksyon han diri perpekto nga mga tawo!

16. Bisan kon ginhunahuna ni apostol Pablo nga diri makatadunganon an instruksyon nga iya nakarawat, ano an iya ginhimo? (Buhat 21:23, 24, 26)

¹⁶ Hi apostol Pablo “andam ha pagsugot” bisan han kinarawat hiya hin instruksyon nga bangin para ha iya diri makatadunganon. An Judio nga mga Kristiano nakabati hin mga hurobhurob mahitungod kan Pablo—nga nagsasangyaw kuno hiya hin “pag-apostata kan Moises” ngan diri hiya narespeto ha Mosaiko nga Balaud. (Buh. 21:21) An Kristiano nga mga tigurang ha Jerusalem nagsugo kan Pablo nga mag-upod hin upat nga lalaki ha templo ngan limpyohan an iya kalugaringon basi ipakita nga ginsusunod niya an Balaud. Pero maaram hi Pablo nga an mga Kristiano diri na sakop han Balaud. Ngan waray hiya ginbuhat nga sayop. Bisan pa hito, sinugot dayon hi Pablo. Iya “igin-upod . . . an mga lalaki ngan naglimpyo hiya han iya kalugaringon uyon ha mga balaud upod nira.” (Basaha an Buhat 21:23, 24, 26.) An pagin masinugtanon ni Pablo nagresulta hin pagkaurosa.—Roma 14:19, 21.

17. Ano an imo nahibaroan ha eksperyensya ni Stephanie?

¹⁷ An sister nga hi Stephanie nakurian ha pagkarawat ha desisyon nga ginhimo han mga brother nga nangunguna ha ira nasud. Hiya ngan an iya bana malipayon nga nag-aalagad ha grupo nga iba an linggwahe. Katapos, waray na ipadayon han sanga nga opisina ito nga grupo, ngan an mag-asawa iginbalik ha kongregasyon nga nagyayakan han ira kalugaringon nga linggwahe. “Nasubo gud ako,” siring ni Stephanie.  “Diri ako kombinsido nga may-ada daku nga panginahanglan ha amon kalugaringon nga linggwahe.” Bisan pa hito, nagdesisyon hiya nga suportahan an bag-o nga kahikayan. “Ha urhi, nasantop ko kon kay ano nga maaramon ito nga desisyon,” siring niya. “Nagin espirituwal kami nga kag-anak ha pipira namon nga kakongregasyon nga usa la nga Saksi ha pamilya. Gindudumarahan ko hin pag-aram an usa nga sister nga bag-o pa la nga nagin aktibo utro. Ngan yana mas damu an akon panahon para ha personal nga pag-aram.” Hiya nagdugang: “May-ada ako limpyo nga konsensya kay maaram ako nga ginbuhat ko an akon pinakamaopay basi magin masinugtanon.”

18. Paonan-o kita nagpapahimulos ha pagin masinugtanon?

¹⁸ Mahimo kita mahibaro ha pagsugot. Hi Jesus “nahibaro . . . han pagkamasinugtanon,” diri ha panahon nga maopay an kahimtang, kondi “tikang ha mga butang nga iya gin-antos.” (Heb. 5:8) Pariho kan Jesus, agsob nga nahibabaro kita ha pagin masinugtanon ha panahon nga makuri an kahimtang. Pananglitan, han bag-o pa la an COVID-19 nga pandemya, ginsugo kita nga diri la anay magkatirok ha aton mga Kingdom Hall ngan diri magsangyaw ha balay-balay, nakurian ka ba ha pagsugot hito? Bisan pa hito, an imo pagin masinugtanon nagprotektar ha imo, nakabulig nga magkaurosa an kongregasyon, ngan nakapalipay kan Jehova. Yana, kita ngatanan mas andam na ha pagsugot ha bisan ano nga mga instruksyon nga aton makakarawat ha daku nga kasakitan. An aton kinabuhi nakadepende dida hito!—Job 36:11.

19. Kay ano nga karuyag mo nga magin masinugtanon?

¹⁹ Nahibaroan naton nga an pagin masinugtanon magriresulta hin damu nga bendisyon. Pero labaw ha ngatanan, ginpili naton nga sugton hi Jehova kay hinigugma naton hiya ngan karuyag naton lipayon hiya. (1 Juan 5:3) Diri gud naton mababalosan hi Jehova ha ngatanan niya nga ginbuhat para ha aton. (Sal. 116:12) Pero mahimo naton hiya sugton ngan adton may awtoridad ha aton. Kon sumugot kita, iginpapakita naton nga maaramon kita. Ngan an maaramon nakakapalipay ha kasingkasing ni Jehova.—Prob. 27:11.