1. Ano an ginsiring han usa nga anghel, ngan ano an dapat magin epekto hito ha aton?

 KON may anghel nga makiistorya ha imo, mamamati ka ba ha iya isisiring? Ha totoo la, may usa nga anghel nga nakikiistorya yana “ha tagsa nga nasud ngan tribo ngan pinulongan ngan katawohan.” Ano an iya ginsisiring? “Kahadluki niyo an Dios ngan himayaa hiya . . . Singbaha an Dios nga naghimo han langit ngan han tuna.” (Pah. 14:6, 7) Hi Jehova an amo la nga tinuod nga Dios nga dapat singbahon han ngatanan. Mapasalamaton gud kita nga gintagan kita niya han presyoso nga oportunidad nga singbahon hiya ha iya daku nga espirituwal nga templo!

2. Ano an espirituwal nga templo ni Jehova? (Kitaa liwat an kahon nga “ An Diri Iginpapasabot Hito.”)

² Ano an espirituwal nga templo, ngan diin naton mabibilngan an mga detalye nga nagsasaysay mahitungod hito? An espirituwal nga templo diri literal nga bilding. Ito an kahikayan ni Jehova para ha paghalad hin ginkakarawat nga pagsingba basado ha halad lukat ni Jesus. Iginsaysay ni apostol Pablo ini nga kahikayan ha iya surat ha siyahan-siglo nga Hebreo nga mga Kristiano nga naukoy ha Judea. b

3-4. Ano an mga ginkakabarak-an ni Pablo mahitungod ha Hebreo nga mga Kristiano ha Judea, ngan paonan-o niya hira ginbuligan?

³ Kay ano nga nagsurat hi Pablo ha Hebreo nga mga Kristiano ha Judea? Posible nga may duha nga nangunguna nga rason. Siyahan, basi parig-unon hira. Kadam-an ha ira nagdaku ha relihiyon han mga Judio. Bangin gintatamay hira han ira mga lider  han relihiyon hadto kay nagin mga Kristiano hira. Kay ano? Tungod kay an mga Kristiano waray templo para ha pagsingba, waray halaran diin hira maghahalad ha Dios, ngan waray mga saserdote nga mabulig ha ira. Mahimo ini makawara han kadasig han mga disipulo han Kristo ngan magpaluya han ira pagtoo. (Heb. 2:1; 3:12, 14) Bangin pa ngani an iba ha ira masulay nga bumalik ha Judaismo.

⁴ Ikaduha, ginpabug-atan ni Pablo ha Hebreo nga mga Kristiano nga diri hira nangangalimbasog nga masabtan an bag-o o hilarom nga espirituwal nga mga katutdoan, an “matig-a nga pagkaon” nga mababasa ha Pulong han Dios. (Heb. 5:11-14) Klaro nga an iba ha ira nasunod pa ha Mosaiko nga Balaud. Pero iginsaysay ni Pablo nga an mga halad nga igin-oobligar han Balaud diri bug-os nga makakawara han sala. Tungod hito, “ginwara” an Balaud. Salit hi Pablo nagpadayon pagtutdo hin pipira nga mas higlarom nga kamatuoran. Ginpahinumdoman niya an iya mga igkasi-Kristiano mahitungod ha “mas maopay nga paglaom” basado ha halad ni Jesus nga makakabulig gud ha ira nga ‘makapahirani ha Dios.’—Heb. 7:18, 19.

5. Ano an dapat naton masabtan tikang ha libro han Biblia nga Hebreo, ngan kay ano?

⁵ Iginsaysay ni Pablo ha iya Hebreo nga kabugtoan kon kay ano nga an ira pagsingba sugad nga mga Kristiano mas maopay gud kay ha ira pagsingba hadto ha Judaismo. An paagi han pagsingba han mga Judio uyon ha Balaud usa la nga “lambong han tiarabot nga mga butang, pero an reyalidad kanan Kristo.” (Col. 2:17) An lambong usa nga diri detalyado nga porma han aktuwal nga butang. Sugad man, an paagi hadto han mga Judio ha pagsingba ha Dios usa la nga lambong han reyalidad nga tiabot. Kinahanglan naton masabtan an kahikayan nga ginhimo ni Jehova basi mapasaylo an aton mga sala para makagsingba kita ha iya ha paagi nga naruruyagan niya. Ikompara naton an “lambong” (an paagi han pagsingba han mga Judio) ha “reyalidad” (an paagi han pagsingba han mga Kristiano), sugad han iginsaysay ha Hebreo. Ha pagbuhat hito, mas masasabtan naton an espirituwal nga templo ngan kon ano an epekto hito ha aton.

6. Paonan-o gin-gamit hadto an tabernakulo?

⁶ An paagi han pagsingba han mga Judio. Iginbasar ni Pablo an iya paghisgot ha tabernakulo nga ginhimo ni Moises han 1512 B.C.E. (Kitaa an tsart nga “An Paagi han Pagsingba han  mga Judio—An Paagi han Pagsingba han mga Kristiano.”) An tabernakulo usa nga sugad-tolda nga istraktura nga ha siyahan gindadara-dara han mga Israelita kon nagbuburobalhin hira hin mga lugar. Gin-gamit nira ito hin haros 500 ka tuig tubtob nga natukod an permanente nga templo ha Jerusalem. (Ex. 25:8, 9; Num. 9:22) Ini nga “tolda nga katirokan” amo an sentro nga lugar han mga Israelita para ha ira pagdaop ha Dios, paghalad, ngan pagsingba. (Ex. 29:43-46) Pero an tabernakulo nagrirepresentar liwat hin mas maopay nga butang nga maabot para ha mga Kristiano.

7. Kakan-o nagtikang pag-eksister an espirituwal nga templo?

⁷ An paagi han pagsingba han mga Kristiano. An kadaan nga tabernakulo usa nga “lambong han langitnon nga mga butang,” ngan nagrirepresentar ito han daku nga espirituwal nga templo ni Jehova. Nagsiring hi Pablo nga “ini nga tolda [o, tabernakulo] usa nga ilustrasyon para ha presente nga panahon.” (Heb. 8:5; 9:9) Salit ha panahon nga nagsurat hiya ha mga Hebreo, an espirituwal nga templo naeksister na. Nagtikang ito pag-eksister han 29 C.E. Hito nga tuig, nabawtismohan hi Jesus, gindihogan han baraan nga espiritu, ngan nagtikang pag-alagad sugad nga “harangdon nga hitaas nga saserdote” ni Jehova ha espirituwal nga templo. c—Heb. 4:14; Buh. 10:37, 38.

8-9. Sumala ha Hebreo 7:23-27, ano an daku nga kaibahan han hitaas nga mga saserdote han Israel ngan han harangdon nga Hitaas nga Saserdote nga hi Jesu-Kristo?

⁸ An paagi han pagsingba han mga Judio. An hitaas nga saserdote amo an nagrirepresentar ha mga tawo ha atubangan han Dios. Hi Aaron an siyahan nga hitaas nga saserdote han Israel nga ginpili ni Jehova han igindedikar an tabernakulo. Pero sugad han iginsaysay ni Pablo, “damu an kinahanglan magin saserdote sugad nga kasaliwan kay an mga saserdote diri nakakapadayon ha pag-alagad tungod han kamatayon.” d (Basaha an Hebreo 7:23-27.) Ngan sugad nga diri perpekto nga mga tawo, an hitaas nga mga saserdote kinahanglan maghalad para ha ira mismo mga sala. Ini an usa han daku nga kaibahan han hitaas nga mga saserdote han Israel ngan han harangdon nga Hitaas nga Saserdote nga hi Jesu-Kristo.

⁹ An paagi han pagsingba han mga Kristiano. Sugad nga aton Hitaas nga Saserdote, hi Jesu-Kristo “usa nga ministro . . . ha tinuod nga tolda, nga gintindog ni Jehova, ngan diri han tawo.” (Heb. 8:1, 2) Iginsaysay ni Pablo nga “tungod kay nagpapadayon [hi Jesus] nga buhi ha waray kataposan, waray hiya mga kasaliwan ha pagkasaserdote.” Hi Pablo nagsiring pa nga hi Jesus “waray hugaw, bulag ha magpakasasala” ngan diri pariho ha hitaas nga mga saserdote han Israel, “diri hiya kinahanglan maghalad kada adlaw” para ha iya kalugaringon nga mga sala. Yana tagdon naton an mga kaibahan han mga halaran ngan han mga halad ha paagi han pagsingba han mga Judio ngan ha paagi han pagsingba han mga Kristiano.

10. Ano an katugbang han mga halad ha halaran nga tumbaga?

¹⁰ An paagi han pagsingba han mga Judio. Ha gawas han entrada han tabernakulo may usa nga halaran nga tumbaga diin an mga hayop iginhahalad kan Jehova. (Ex. 27:1, 2; 40:29) Pero ito nga mga halad diri bug-os nga makakapasaylo han mga sala han mga tawo. (Heb. 10:1-4) An nagpapadayon nga paghalad hin mga hayop ha tabernakulo nagrirepresentar ha usa  nga halad nga bug-os nga makakapasaylo ha katawohan.

11. Ha ano nga halaran iginhalad ni Jesus an iya kalugaringon? (Hebreo 10:5-7, 10)

¹¹ An paagi han pagsingba han mga Kristiano. Maaram hi Jesus nga ginsugo hiya ni Jehova nganhi ha tuna basi ihalad an iya tawhanon nga kinabuhi sugad nga lukat para ha katawohan. (Mat. 20:28) Salit ha iya bawtismo, iginpresentar ni Jesus an iya kalugaringon para buhaton an karuyag ni Jehova. (Juan 6:38; Gal. 1:4) Iginhalad ni Jesus an iya kalugaringon ha usa nga simboliko nga halaran nga nagrirepresentar han “kaburut-on” han Dios para ha Iya Anak nga ihalad an iya perpekto nga tawhanon nga kinabuhi. Iginhalad ni Jesus an iya kinabuhi hin “makausa gud la” basi paraon o permanente nga tabonan an mga sala han ngatanan nga nagpapakita hin pagtoo ha Kristo. (Basaha an Hebreo 10:5-7, 10.) Sunod, hisgotan naton an ginrirepresentaran han sulod nga mga bahin han tabernakulo.

12. Hin-o an puydi sumulod ha tagsa nga kwarto han tabernakulo?

¹² An paagi han pagsingba han mga Judio. An tabernakulo ngan an mga templo nga gintukod ha urhi ha Jerusalem puropariho an porma. Ha sulod hito may duha nga kwarto—“an Baraan nga Lugar” ngan “an Pinakabaraan”—nga ginbulag pinaagi han kurtina nga may burda. (Heb. 9:2-5; Ex. 26:31-33) Ha sulod han Baraan may-ada bulawan nga burutangan han lampara, halaran para ha pagsunog hin insenso, ngan lamesa para ha halad nga mga tinapay. An “gindihogan nga mga saserdote” la an gintutugotan ha sulod han Baraan basi buhaton an ira sagrado nga  mga toka. (Num. 3:3, 7, 10) Ha Pinakabaraan aadto an bulawan nga arka han kasabotan nga nagrirepresentar han presensya ni Jehova. (Ex. 25:21, 22) An hitaas nga saserdote la an puydi lumahos ha kurtina ngadto ha Pinakabaraan makausa kada tuig ha Adlaw han Pagpara han Sala. (Lev. 16:2, 17) Kada tuig, nasulod hiya dida hito nga may dara nga dugo han mga hayop para ha pagpara han iya kalugaringon nga mga sala ngan ha mga sala han bug-os nga nasud. Ha urhi, pinaagi han baraan nga espiritu, ginklaro ni Jehova an tinuod nga ginrirepresentaran hini nga mga bahin han tabernakulo.—Heb. 9:6-8. e

13. Ano an ginrirepresentaran han Baraan ngan han Pinakabaraan han tabernakulo ha paagi han pagsingba han mga Kristiano?

¹³ An paagi han pagsingba han mga Kristiano. May-ada limitado nga kadamu han mga disipulo han Kristo nga gindihogan han baraan nga espiritu, ngan may-ada hira espesyal nga relasyon kan Jehova. Ini nga 144,000 mag-aalagad sugad nga mga saserdote ha langit upod ni Jesus. (Pah. 1:6; 14:1) An Baraan han tabernakulo nagrirepresentar han pag-ampon ha ira sugad nga espirituwal nga mga anak han Dios samtang aanhi pa hira ha tuna. (Roma 8:15-17) An Pinakabaraan han tabernakulo nagrirepresentar han langit, diin naukoy hi Jehova. An “kurtina” nga nagbubulag han Baraan ngan han Pinakabaraan nagrirepresentar han unudnon nga lawas ni Jesus nga nakakaulang ha iya pagsulod ha langit sugad nga harangdon nga Hitaas nga Saserdote han espirituwal nga templo. Pinaagi ha paghalad han iya tawhanon nga lawas para ha katawohan, gin-abrihan ni Jesus an dalan tipakadto ha langitnon nga kinabuhi para ha ngatanan nga dinihogan nga Kristiano. Kinahanglan liwat nira bayaan an ira unudnon nga lawas basi makarawat an ira balos ha langit. (Heb. 10:19, 20; 1 Cor. 15:50) Katapos banhawon hi Jesus, sinulod hiya ha Pinakabaraan han espirituwal nga templo, diin an ngatanan nga dinihogan makakaupod niya ha urhi.

14. Sumala ha Hebreo 9:12, 24-26, kay ano nga labaw an kahikayan ni Jehova ha espirituwal nga templo?

¹⁴ Klaro nga makikita naton dinhi an pagin labaw han kahikayan ni Jehova para ha putli nga pagsingba nga basado ha halad lukat ngan pagkasaserdote ni Jesu-Kristo. An hitaas nga saserdote ha Israel sinulod ha hinimo han tawo nga Pinakabaraan dara an dugo han halad nga mga hayop, pero hi Jesus sinulod “ha langit mismo,” an pinakabaraan nga lugar ha ngatanan, basi umatubang kan Jehova. Didto iginpresentar ni Jesus an bili han iya perpekto nga tawhanon nga kinabuhi para ha aton “basi wad-on an sala pinaagi ha paghalad ha iya kalugaringon.” (Basaha an Hebreo 9:12, 24-26.) An halad ni Jesus bug-os nga makakapasaylo han mga sala ha waray kataposan. Sugad han aton sunod nga mahibabaroan, kita ngatanan makakagsingba kan Jehova ha iya espirituwal nga templo, ha langit man o ha tuna an aton paglaom.

15. Hin-o an nag-aalagad ha bungsaran han tabernakulo?

¹⁵ An paagi han pagsingba han mga Judio. An tabernakulo may usa nga bungsaran—haluag ito ngan napapalibotan hin alad ngan dida hito ginbubuhat han mga saserdote an ira mga toka. Nahimumutang ha bungsaran an daku nga tumbaga nga halaran han halad nga sinunog, pati na an planggana nga tumbaga han tubig nga ginagamit han mga saserdote ha paglimpyo han ira kalugaringon antes nira buhaton an ira sagrado nga pag-alagad. (Ex. 30:17-20; 40:6-8) Pero an mga templo nga gintukod ha urhi may-ada liwat gawas nga bungsaran diin puydi kumadto an mga diri saserdote ngan magsingba ha Dios.

16. Hin-o an nag-aalagad ha tagsa nga bungsaran han espirituwal nga templo?

 ¹⁶ An paagi han pagsingba han mga Kristiano. Antes kumadto ha langit basi mag-alagad sugad nga mga saserdote upod ni Jesus, an mga dinihogan nga aanhi pa ha tuna matinumanon nga nag-aalagad ha sulod nga bungsaran han espirituwal nga templo. An daku nga planggana han tubig usa nga importante nga pahinumdom ha ira, ngan ha ngatanan nga Kristiano, nga magpabilin nga limpyo ha moral ngan espirituwal. Kon sugad, diin nag-aalagad an “daku nga grupo,” nga maunungon nga nasuporta ha dinihogan nga kabugtoan han Kristo? Nakita hira ni apostol Juan nga “natindog ha atubangan han trono . . . ngan nagbubuhat hira hin sagrado nga pag-alagad ha [Dios] ha adlaw ngan gab-i ha iya templo.” (Pah. 7:9, 13-15) An daku nga grupo nagbubuhat hini nga mga butang dinhi ha tuna ha gawas nga bungsaran han espirituwal nga templo. Ginpapabilhan gud naton an pagkaada hini nga presyoso nga oportunidad nga singbahon hi Jehova ha iya daku nga espirituwal nga templo!

17. Ano nga mga halad an may pribilehiyo kita nga ihatag kan Jehova?

¹⁷ An ngatanan nga Kristiano yana may pribilehiyo ha paghalad kan Jehova pinaagi ha paggamit han ira panahon, kusog, ngan panag-iya basi suportaran an mga buruhaton han Ginhadian han Dios. Sugad han ginsiring ni apostol Pablo ha Hebreo nga mga Kristiano, ‘pirme kita makakahalad ha Dios hin halad han pagdayaw, nga amo an bunga han aton mga im-im nga nagpapasamwak ha publiko han iya ngaran.’ (Heb. 13:15) Maipapakita naton nga ginpapabilhan ta an aton pribilehiyo nga singbahon hi Jehova pinaagi ha paghatag ha iya han aton pinakamaopay.

18. Sumala ha Hebreo 10:22-25, ano an diri gud naton dapat pabay-an, ngan ano an diri gud naton dapat kalimtan?

¹⁸ Basaha an Hebreo 10:22-25. Han hirani na matapos an iya surat ha mga Hebreo, gin-unabi ni Pablo an pipira nga bahin han aton pagsingba nga diri gud naton dapat pabay-an. Nag-uupod ini han pagdaop kan Jehova ha pag-ampo, pagsangyaw ha iba, pag-atender ha mga katirok ha kongregasyon, ngan pagdinasigay ha usa kag usa “labi na gud samtang nakikita [naton] nga nagtitikahirani na an adlaw” ni Jehova. Han hirani na matapos an rekord han Pahayag, makaduha igyakan han anghel ni Jehova an masunod nga mga pulong sugad nga pagpabug-at: “Singbaha an Dios!” (Pah. 19:10; 22:9) Hinaot diri gud naton makalimtan ini nga hilarom nga espirituwal nga kamatuoran mahitungod han daku nga espirituwal nga templo ni Jehova ngan an aton presyoso nga pribilehiyo nga singbahon an aton harangdon nga Dios!